Kuwee 9 - Bibeli do fee

Icɛ ku sintii Arɔ̃ɔ do amaɛ ŋa

¹ Si ajɔ mɛɛjɔsiau ŋɔi Moizi í kpe Arɔ̃ɔ do amaɛ ŋa do inɛ ngboi Izirɛli ŋau.

² Nɔ í sɔ̃ Arɔ̃ɔ í ni, dɛdɛ ama kɛtɛ i ceò kuwee iyi á kpa idei dulum, do angudã kombo iyi aa jo si ina fei sãa sãa, kãma nŋa ku maà nɛ leebu gɔ. Nɔ i ceaò Aɔ̃ Lafɛ̃ɛ kuwee.

³ Nɔ i sɔ̃ inɛi Izirɛli ŋau i ni a dɛdɛ iwo kombo iyi aa ceò kuwee iyi á kpa idei dulum ŋa, do ama kɛtɛ do ama angudã iyi à nɛ adɔ̃ akã nɔ a kù nɛ leebu kãma a ceò kuwee iyi à ya jo si ina fei sãa sãau.

⁴ Si anyiɛ nɔ a dɛ kɛtɛ do angudã kombo iyi aa ceò kuweei anu akã si wajui Aɔ̃ Lafɛ̃ɛ. Nɔ a ceaa kuweei iyafũ iyi à fɔ do ikpo ŋa, domi nnyi Aɔ̃ Lafɛ̃ɛ á faata si ŋɛ wa.

⁵ Nɔ à naaò mii ŋa iyi Moizi í fãa ŋau wa si wajui ile bi kukou. Nɔ inɛi Izirɛli ŋau fei à sɛkɛɛ wa à naa à leekĩ si wajui Aɔ̃ Lafɛ̃ɛ.

⁶ Ŋɔi Moizi í sɔ̃ ŋa í ni, i ce bɛi Aɔ̃ Lafɛ̃ɛ í ni i ce ŋa ku ba amboeɛ ku faata si ŋɛ wa.

⁷ Nɔ Moizi í sɔ̃ Arɔ̃ɔ má í ni, maai si bi kuweeu wa nɔ i ce kuwee iyi á kpa idei dulum nɔu do kuwee iyi aa jo si ina fei sãa sãau, nɔ i kpa idei dulum dii awɔ takaɛ do ti zamaau fei, nɔ i ce kuwee do mɛɛmu ŋa iyi inɛ ŋau à naaò wau ku ba i kpa idei dulum du ŋa si bɛi Aɔ̃ Lafɛ̃ɛ í tako í fɔu.

⁸ Ŋɔi Arɔ̃ɔ í sɛkɛɛ si bi kuweeu nɔ í saka ama kɛtɛ iyi á ceò kuwee iyi á kpaò idei dulum dɛɛu.

⁹ Nɔ amaɛ ŋau à so njɛu à náa, ŋɔi í dasi amaawɔɛ si njɛu nɔ í jɔ́si ngoi gontai bi kuwee ŋau, nɔ í nikãɛ si icui bi kuweeu i kaakoɛò.

¹⁰ Nɔ í jo ikpoi iŋau si antaii bi kuweeu, do kpaa ŋau, do bubui idɔi mɛɛmu iyi à ceò kuweeu, si bɛi Aɔ̃ Lafɛ̃ɛ í tako í sɔ̃ Moiziu.

¹¹ Amma iŋau takaɛ do batau í koo í jooi angule.

¹² Nɔ í saka angudã kombo iyi aa ceò kuwee iyi aa jo si ina fei sãa sãau. Nɔ amaɛ ŋau à bu njɛu à náa í nikãɛ si bi kuweeu í kaakoɛò.

¹³ Ŋɔi à bububu iŋai kuweeu do iriu à soo à náa nɔ í joo si antaii bi kuweeu.

¹⁴ Nɔ í wiɛ mii ndii inɔ ŋau do kɔbisi ŋau í lesi antaii inɛ ihɔ̃u í joo.

¹⁵ Si anyiɛ nɔ Arɔ̃ɔ í kooò kuweei zamaau bi Aɔ̃ Lafɛ̃ɛ. Í mu iwo kombo iyi inɛ ŋa à waa ceò kuwee iyi á kpa idei dulum í sakaɛ nɔ í ceò kuwee bɛi ti sinteu.

¹⁶ Nɔ si anyiɛ, í ce kuwee iyi à ya jo si ina fei sãa sãau si bɛi wooda iyi à jilɛu í fɔ.

¹⁷ Si anyiɛ nɔ í kooò kuweei iyafũ ŋau, nɔ í bu awɔ kutu akã í joo si antaii bi kuweeu, baai kuwee iyi à ya jo si ina fei sãa sãa daakɔ feiu baasi.

¹⁸ Nɔ í saka kɛtɛ kombo do angudã kombo iyi á ceò kuweei anu akã na zamaau. Nɔ amaɛ ŋau à bu njɛu à náa nɔ í nikãɛ si bi kuweeu í kaakoɛò.

¹⁹ Nɔ à so ikpoi kɛtɛu do angudãu à náa, do akpaamuu, do ikpo iyi wa bii mii ndii inɔ ŋau, do kpaa ŋau, do bubui idɔu.

²⁰ Nɔ à so ikpo ŋau à lesi gɛndɛi mɛɛmu ŋau, à joo si antaii bi kuweeu.

²¹ Si anyiɛ nɔ Arɔ̃ɔ í so gɛndɛ ŋau do itã njɛi mɛɛmu ŋau í gbugbã gbugbãɛ si bɛi Moizi í tako í sɔ̃ɔu.

²² Waati iyi Arɔ̃ɔ í kooò kuwee iyi á kpa idei dulum ŋau, do kuwee ŋa iyi à ya jo si ina fei sãa sãau, do kuweei anu akã ŋau, ŋɔi í wu awɔ lele í weea inɛ ŋau í bɛi í kita wa hai si antaii bi kuweeu.

²³ Nɔ Moizi do Arɔ̃ɔ à lɔ inɔ ile bi kukou. Waati iyi à fita wa nɔ à weea inɛ ŋau. Ŋɔi amboei Aɔ̃ Lafɛ̃ɛ í faata si inɛ ŋau fei wa.

²⁴ Ŋɔi Aɔ̃ Lafɛ̃ɛ í jɔ̀ ina í dede nɔ í jo kuwee ŋa iyi à ya jo si ina fei sãa sãau do ikpoi iŋai kuwee mmu ŋau fei. Iyi inɛ ŋau fei à yɔɔ, ŋɔi à wasi ku dɔ̃ anu do inɔ didɔ̃, nɔ aŋa fei à sɛɛbata.