Kuwee 8 - Bibeli do fee

Bukii woo wee sinte ŋa iyi à nya ikã

¹ Aɔ̃ Lafɛ̃ɛ í sɔ̃ Moizi í ni,

² gbã Arɔ̃ɔ do amaɛ ŋa i bɔò ŋa anui ile bi kukou. Jɔ̀ a naaò jĩnɛi woo wee ŋau wa do ikpo iyi à ya tontoo si woo wee ŋa a nya ŋaò ikã, nɔ i jɔ̀ a naaò kɛtɛ kombo saasaabɔ iyi aa ceò kuwee iyi á kpa idei dulum nɔu wa, do angudã kombo minji, do kɔlɔ iyi í nɛ pɛ̃ɛ hai nɛ levɛ̃ɛ ŋau.

³ Nɔ i tɔtɔɔ inɛi Izirɛli ŋau fei tengi bɛ.

⁴ Moizi í ce bɛi Aɔ̃ Lafɛ̃ɛ í sɔ̃ɔu fei, inɛi Izirɛli ŋau à tɔtɔɔ anui ile bi kukou.

⁵ Nɔ Moizi í sɔ̃ inɛ ŋau í ni, bɛi Aɔ̃ Lafɛ̃ɛ í ni ka ce mbɛ.

⁶ Moizi í jɔ̀ Arɔ̃ɔ do amaɛ ŋa à sɛkɛɛ si anui ile bi kukou nɔ í wɛ ŋa.

⁷ Ŋɔi í daa Arɔ̃ɔ si ibɔ kumboo nɔ í dĩa kungbã. Si anyiɛ nɔ í daa si ibɔ sisɔ má do efodu, nɔ í dĩ efoduu do kungbãɛ takaɛ.

⁸ Si anyiɛ nɔ í kɔaa bɔgɔ si gɛndɛɛ, nɔ í daa si urimu do tumimu.

⁹ Ŋɔi í lea bɔngɔtɔbɛɛ si iri nɔ í mási kokoi jĩi kumá iyi à ce do wura bɛi Aɔ̃ Lafɛ̃ɛ í sɔ̃ɔu.

¹⁰ Moizi í bu ikpou í jɔ́si ile bi kukou hee do mii iyi í wa bɛ fei, nɔ í jɔ̀ à nya ikã.

¹¹ Í fãsi bi ku ce kuwee iyi à ya jo si ina fei sãa sãau tuuba mɛɛje, nɔ í jɔ̀ bi kuweeu í nya ikã hee do jĩnɛɛ ŋa fei. Nɔ í fãsi jɛɛ nantaau mɔ do si mii iyi wa leekĩ siu ku ba aŋa fei a nya ikã.

¹² Nɔ í tontoo ikpou si irii Arɔ̃ɔ ku ba ku nyaa ikã.

¹³ Moizi í ni amai Arɔ̃ɔ ŋau mɔ a sɛkɛɛ wa, nɔ í daa aŋa mɔ si ibɔ kumboo, í naaò kungbã í dĩ nŋa nɔ í da nŋa si fula nŋa ŋa bɛi Aɔ̃ Lafɛ̃ɛ í tako í sɔ̃ɔu.

¹⁴ Ŋɔi Moizi í jɔ̀ à naaò kɛtɛ kombo iyi aa ceò kuwee iyi á kpa idei dulum nɔu wa, nɔ Arɔ̃ɔ do amaɛ ŋau à lea awɔ si iri.

¹⁵ Ŋɔi Moizi í sakaɛ nɔ í bu njɛu, nɔ do amaawɔɛ í jɔ́si ngoi gontai bi kuwee ŋau í kaakoɛò, nɔ í jɔ̀ bi kuweeu í maaju, si anyiɛ nɔ í fãsi njɛu si icui bi kuweeu ku ba ku nya ikã na kuwee iyi á kpa idei dulum ŋau.

¹⁶ Í so ikpo iyi í bii mii ndii inɔ ŋau fei do bubui idɔu, do kpaa minji ŋau do ikpo nŋa ŋa í joo si antaii bi kuweeu.

¹⁷ Amma kɛtɛu takaɛ angulei í koo í joo, hai bataɛ do iŋau do imiɛ ŋau fei si bɛi Aɔ̃ Lafɛ̃ɛ í tako í sɔ̃ɔu.

¹⁸ Si anyiɛ nɔ í naaò angudã kombo iyi aa ceò kuwee iyi à ya jo si ina fei sãa sãau wa, nɔ Arɔ̃ɔ do amaɛ ŋa fei à lesi irii angudãu awɔ.

¹⁹ Moizi í saka angudãu nɔ í fãsi njɛu si bi kuweeu í kaakoɛò.

²⁰ Ŋɔi í bububu iŋau, nɔ í joo hee do iriu do ikpo ŋau fei.

²¹ Nɔ í wiɛ mii ndii inɔ ŋau do kɔbisi ŋau, nɔ í jo iŋai angudãu fei si bi kuweeu. Nŋu bɛi í jɛ kuwee iyi inunuɛ í ya dɔ̃a Aɔ̃ Lafɛ̃ɛ si, bɛi nŋu takaɛ í tako í sɔ̃ Moizi wou.

²² Si anyiɛ nɔ í naaò angudã kombo minjisia wa má iyi aa ceò kuweei icɛ ku sintii woo wee ŋau. Nɔ Arɔ̃ɔ do amaɛ ŋau à lea angudãu awɔ si iri.

²³ Ŋɔi Moizi í saka angudãu, nɔ í bu njɛu í jɔ́a Arɔ̃ɔ si itĩ njɛɛ, nɔ í jɔ́aa si awɔ ngbo njɛɛ do si isɛ ngbo njɛɛ.

²⁴ Ŋɔi í jɔ̀ amai Arɔ̃ɔ ŋau mɔ a sɛkɛɛ wa, nɔ í jɔ́a aŋa mɔ njɛu si itĩ njɛ nŋa, do si awɔ ngbo njɛ nŋa, do si isɛ ngbo njɛ nŋa, nɔ í fãsi bi kuweeu njɛu í kaakoɛò.

²⁵ Si anyiɛ nɔ Moizi í so ikpoi iŋau do akpaamuu do ikpo iyi wa bii mii ndii inɔ ŋau fei, do bubui idɔu, do kpaa minjiu do ikpo iyi í kaako ŋau, do itã njɛu,

²⁶ nɔ hai si kɔlɔi pɛ̃ɛ hai nɛ levɛ̃ɛ iyi wa jilɛ si wajui Aɔ̃ Lafɛ̃ɛu, í nya kaa hai nɛ levɛ̃ɛ, do pɛ̃ɛ iyi à sɔ̃ si ikpo, do kaa keeke gɔ, í lesi ŋa si antaii ikpoi iŋau do si itã njɛi iŋau.

²⁷ Nɔ í so fei ndɛɛ í daa Arɔ̃ɔ do amaɛ ŋa si awɔ, nɔ à gbugbã gbugbã fei ndɛɛ cingaa cingaa fei si wajui Aɔ̃ Lafɛ̃ɛ.

²⁸ Ŋɔi Moizi í gbaa má hai si awɔ nŋa í koo í joo si antaii bi kuweeu do kuwee iyi à jo si ina fei sãa sãau. Nŋu bɛi í jɛ kuwee iyi à ce, woo wee ŋau a bɛi a sinti icɛ. À jooi si ina ku ba inunuɛ ku dɔ̃a Aɔ̃ Lafɛ̃ɛ si.

²⁹ Moizi í so gɛndɛi iŋai angudã iyi à ceò kuweeu í gbugbã gbugbãɛ cingaa cingaa fei si wajui Aɔ̃ Lafɛ̃ɛ. Nŋu bɛi í jɛ ti Moizi takaɛ si bɛi Aɔ̃ Lafɛ̃ɛ í tako í sɔ̃ɔu.

³⁰ Ŋɔi Moizi í bu ikpo kumáu, do bubui njɛ iyi í wa si antaii bi kuweeu, nɔ í fãsi Arɔ̃ɔ do si jĩnɛɛ ŋa, nɔ í fãsi amai Arɔ̃ɔ ŋau mɔ do si jĩnɛ nŋa ŋa, nɔ Arɔ̃ɔ do amaɛ ŋau fei à nya ikã hee do jĩnɛ nŋa ŋa fei.

³¹ Ŋɔi Moizi í sɔ̃ Arɔ̃ɔ do amaɛ ŋa í ni, i se iŋai angudã kombo minjisiau anui ile bi kukou ŋa, nɔ i ŋɔɔ tengi bɛ ŋa, do pɛ̃ɛ iyi í wa si kɔlɔi pɛ̃ɛ hai nɛ levɛ̃ɛu si bɛi ǹ tako ǹ fɔ ǹ ni, Arɔ̃ɔ do amaɛ ŋai aa ŋɔɔ.

³² Iŋau do pɛ̃ɛu iyi í gbe fei aa joo ŋai.

³³ Ajɔ mɛɛjei aa ce i kaa fita hai anui ile bi kukou ŋa, hee ajɔi icɛ ku sinti nŋɛu koo kɔ̃, domi ajɔ mɛɛjei ì nɛ i ce bɛ ŋa si buki iyi aa ce a nya ŋɛò ikãu.

³⁴ Mii iyi à ce nnyiu ihɛ̃, Aɔ̃ Lafɛ̃ɛi í ni a ce nŋɛ bɛɛbɛ ku kpaò idei dulum du ŋɛ.

³⁵ Na nŋu ajɔ mɛɛjei aa ce anui ile bi kukou ŋa dasã do idũ, i bɛi i sinti icɛi Aɔ̃ Lafɛ̃ɛu ku ce ku ba i maà ku ŋa, domi bɛɛbɛi Aɔ̃ Lafɛ̃ɛ takaɛ í sɔ̃m.

³⁶ Nɔ Arɔ̃ɔ do amaɛ ŋau à ce bɛi Aɔ̃ Lafɛ̃ɛ í sɔ̃ Moiziu fei.