Kuwee 7 - Bibeli do fee

Kuweei ku teese

¹ Ŋɔi Aɔ̃ Lafɛ̃ɛ í sɔ̃ Moizi má í ni, iyi í jɛ ti woodai kuweei ku teese wee. Kuweei ku teeseu á jɛ mii gɔ iyi í má ntɔ ntɔ.

² Tengi bii aa ya saka mɛɛmui kuwee iyi à ya jo si ina fei sãa sãau, tengi bɛi aa saka ti ku teeseu mɔ, nɔ a fãsi njɛu a kaakoò bi kuweeu.

³ Aa nam ikpou feii, do akpaamuu, do ikpo iyi wa bii mii ndii inɔ ŋau fei,

⁴ do kpaa minjiu do ikpo iyi í kaako ŋau, do bubui idɔ iyi aa nya ajɔ do kpaa ŋau.

⁵ Woo weeu á jo mii ŋau bɛ feii si antaii bi kuweeu ku jɛ ti amu Aɔ̃ Lafɛ̃ɛ. Nŋu bɛi í jɛ kuweei ku teese.

⁶ Si inɔi woo wee ŋau inɛmɔkɔ fei á yɔkɔ ku ŋɔ iŋau. Aa ŋɔɔi si inya iyi à nya ikãu, domi mii gɔi iyi í má ntɔ ntɔ.

⁷ Bɛɛbɛi aa ce kuweei ku teeseu bɛi kuwee iyi á kpa idei dulum nɔu. Kuwee minji ŋau bɛ fei, wooda akãu bɛi aa nɛ. Iŋau takaɛ ti woo weeui á jɛ.

⁸ Woo wee iyi í cea inɛ gɔ kuwee iyi à ya jo si ina fei sãa sãa, nŋui á nɛ batai iŋa iyi í ceò kuweeu.

⁹ Kuweei iyafũ iyi à sɔ̃ si inɔ fuu do iyi à sɔ̃ si isɔ ku banda iŋa, do iyi à sɔ̃ si alului isɔ fei ti woo weeui á jɛ.

¹⁰ Kuweei iyafũ iyi à fɔ do ikpo, do kuweei iyafũ iyi í gbɛ fei ti amai Arɔ̃ɔ ŋai á jɛ, nɔ ti aŋa fei á maa mungai.

Kuweei anu akã

¹¹ Iyi í jɛ ti kuweei anu akã iyi aa cea amu Aɔ̃ Lafɛ̃ɛ wee.

¹² Bii inɛ gɔ wa ce kuweei anu akã ku saabuò amu Aɔ̃ Lafɛ̃ɛ, á cooi do kaa hai nɛ levɛ̃ɛ iyi à fɔ do ikpo, do kaa hai nɛ levɛ̃ɛ iyi à fãsi ikpo, do kaai iyafũ iyi à fɔ do ikpo.

¹³ Si kuweei anu akã iyi á ceu, á kɔ̃ɔsi amuai pɛ̃ɛ iyi í nɛ levɛ̃ɛ mái.

¹⁴ Aa naaa amu Aɔ̃ Lafɛ̃ɛ amua ŋau fei wai kekee kekee, nɔ ti woo wee iyi í fã njɛi kuweei anu akãui á jɛ.

¹⁵ Iŋai kuweei anu akãu [iyi í gbeu] ajɔ iyi á ce kuweeui aa ŋɔɔ, a kaa jɔ̀ kãma hee iju ku má.

¹⁶ Bii inɛ gɔ í ce kuweei anu akã na kuwã gɔ iyi í kɔ̃, walakɔ bii í ce kuweeu do idɔɔbiɛ, aa ŋɔɔi ajɔ nŋu bɛ, bii í gbe, bii iju í má nɔ a ŋɔ má.

¹⁷ Mbɔi iŋau iyi í gbe si ajɔ mɛɛtasiau aa jooi.

¹⁸ Bii í jɛ si ajɔ mɛɛtasiau inɛ gɔ í ŋɔ iŋai kuweei anu akãu, kucei inɛɛu kaa dɔ̃ɔm si, kuweeɛu í baa í jɛ ngbɛ, domi iŋau í baa í jɛ mii laalɔi. Nɔ inɛ iyi í ŋɔɔ fei á so asoi dulum dɛɛi.

¹⁹ Bii iŋau í lu mii mmu gɔ iyi í riisi, a kaa ŋɔɔ má, si inai aa kosi. Inɛ iyi í maaju fei, á yɔkɔ ku ŋɔ iŋai kuweeu,

²⁰ amma inɛ iyi í nɛ riisi nɔ í ŋɔ iŋa iyi à ceaò amu Aɔ̃ Lafɛ̃ɛ kuweei anu akã, aa nya lafɛ̃ɛi hai si inɔi inɛɛ ŋa.

²¹ Nɔ bɛɛbɛ mɔi inɛ iyi í lɔ si riisii kpaasi gɔ, walakɔ í lu mɛɛmu gɔ iyi í riisi, walakɔ iŋa hai nɛ nto iyi í riisi fei, nɔ í ŋɔ iŋai kuweei anu akã iyi í jɛ ti amu Aɔ̃ Lafɛ̃ɛ, aa nya lafɛ̃ɛi hai si inɔi inɛɛ ŋa.

Wooda ŋa iyi inɛ ŋa aa too si

²² Aɔ̃ Lafɛ̃ɛ í sɔ̃ Moizi í ni,

²³ sɔ̃ inɛi Izirɛli ŋau i ni, i maà ya ŋɔ ikpoi iŋai kɛtɛ ŋa, do angudã, walakɔ iwo.

²⁴ Ikpoi mɛɛmu gɔ iyi í ku walakɔ iyi mɛɛmu gɔ í kpa, aa yɔkɔ i ceò mii ikã ikã baa yooma fei, amma i maa ya ŋɔɔ ŋa,

²⁵ domi inɛ iyi í ŋɔ ikpoi iŋa ŋa iyi à ceaò amu Aɔ̃ Lafɛ̃ɛ kuwee, aa nya lafɛ̃ɛ hai si inɔi inɛi Izirɛli ŋai.

²⁶ I maà ya jɛ njɛi mɛɛmu kãma ŋa hee do ti yɛi ŋa tengi bii ì na ì koo ì wa ŋa fei.

²⁷ Bii inɛ gɔ í jɛ njɛi iŋa, aa nya nŋu mɔi hai si inɔi inɛi Izirɛli ŋau.

²⁸ Aɔ̃ Lafɛ̃ɛ í sɔ̃ Moizi í ni,

²⁹ sɔ̃ inɛi Izirɛli ŋau i ni, inɛ iyi wa cea amu Aɔ̃ Lafɛ̃ɛ kuweei anu akã, á nam ikpɛ̃ iyi í jɛ titom nii.

³⁰ Nŋu takaɛi á naaò iyi aa jo si wajum nɔu wa. Á naaò ikpou wai do gɛndɛɛ. Gɛndɛu aa gbugbã gbugbãɛi si wajui amu Aɔ̃ Lafɛ̃ɛ.

³¹ Woo weeu á jo ikpoi iŋaui si antaii bi kuweeu, nɔ gɛndɛu ti Arɔ̃ɔ do ti amaɛ ŋai á jɛ.

³² Bii ì ce kuweei anu akã ŋa, itã njɛi iŋau, woo weeui aa na ŋa ku naaò wa si wajui amu Aɔ̃ Lafɛ̃ɛ.

³³ Si inɔi amai Arɔ̃ɔ ŋa, inɛ iyi í kooò njɛu do ikpoi kuweei anu akãu, itã njɛi iŋau titɛɛi á jɛ.

³⁴ Si kuweei anu akã ŋa iyi inɛi Izirɛli ŋau à ce, gɛndɛu iyi aa gbugbã gbugbãu, do itã iyi aa naaò wau, Arɔ̃ɔ do amaɛ ŋai an na. Nŋu bɛ í baa í jɛ wooda iyi inɛi Izirɛli ŋa aa maa too si hee do ajɔ fei.

³⁵ Ikpɛ̃ ŋa iyi à nya si kuwee iyi à ya jo si ina si wajum ŋau bɛ í baa í jɛ ti Arɔ̃ɔ do amaɛ ŋa bii à sinti icɛm ku ce.

³⁶ Wooda iyi amu Aɔ̃ Lafɛ̃ɛ ǹ jilɛa inɛi Izirɛli ŋa mbɛ hai waati iyi ǹ nya Arɔ̃ɔ do amaɛ ŋa ikã. Nŋu bɛi í baa í jɛ wooda iyi tɔku nŋa ŋa aa na a maa too si hee do ajɔ fei.

³⁷ Iyi í jɛ ti woodai kuwee iyi à ya jo si ina fei sãa sãa mbɛ, do kuweei iyafũ, do kuwee iyi á kpa idei dulum, do kuweei ku teese, do kuweei icɛ kusintii woo wee ŋa, do kuweei anu akã,

³⁸ iyi amu Aɔ̃ Lafɛ̃ɛ ǹ na Moizi wai hai si iri kutai Sinai ajɔ iyi ǹ ni inɛi Izirɛli ŋau a ceem kuwee si gbaai Sinaiu.