Kuwee 6 - Bibeli do fee

Kuwee iyi à ya jo si ina fei sãa sãa

¹ Aɔ̃ Lafɛ̃ɛ í sɔ̃ Moizi í ni,

² na Arɔ̃ɔ do amaɛ ŋa woodau ihɛ̃ i ni, woodai kuwee iyi à ya jo si ina fei sãa sãa wee. Kuwee iyi aa jo si ina fei sãa sãau si antaii bi kuweeu bɛi aa lesi hai alɛ hee iju koo máò, nɔ ina ku maa jo si antaiɛ.

³ Woo weeu ibɔi acɔ ku nɛ gbugbãi á dasi nɔ ku dasi pɛɛtu iyi à ce do acɔ ku nɛ gbugbãu, nɔ ku wa ilúlui kuweeu ku jilɔɔ kɔkɔi bi kuweeu takaɛ.

⁴ Si anyiɛ ku bɛi ku bɔ jĩnɛɛ ŋau nɔ ku dasi mmuɛ ŋa má nɔ ku so ilúluu hai tengi bii à bubau ku bɔò si inya gɔ iyi à nya ikã.

⁵ Inau á maa joi si bi kuweeu kaa ku má, daakɔ fei woo weeu á ya sɔ̃a si inaui nɔ ku ce kuwee mmuɛ má, nɔ ku jo ikpoi iŋai kuweei anu akã.

⁶ Inau á maa joi waati kãma fei si antaii bi kuweeu kaa ku má.

Kuweei iyafũ

⁷ Iyi í jɛ woodai kuweei iyafũu wee. Amai Arɔ̃ɔ ŋai aa kooò si wajui amu Aɔ̃ Lafɛ̃ɛ tengi bii à ya ce kuweeu.

⁸ Woo weeu á bu iyafũ awɔ kutu akã ku yɔgɛɛ do ikpo do tuae ku dɔ̃ inunu, nɔ ku joo si antaii bi kuweeu. Nŋu bɛi á jɛ kuwee iyi inunuɛ á dɔ̃ɔm si. Nɔ a kaa gbɛjɛ ideɛ má.

⁹ Arɔ̃ɔ do amaɛ ŋai aa jɛ iyi í gbeu. Aa jɔ́ɔi hai nɛ levɛ̃ɛ si inya iyi à nya ikã si bantumai ile bi kukou.

¹⁰ A kaa sɔ̃ɔ do levɛ̃ɛ. Ikpɛ̃ iyi ǹ na ŋa mbɛ si kuwee iyi à ya jo si ina si wajum fei. Mii gɔi iyi à nya ikã í jɛ ti amu Aɔ̃ Lafɛ̃ɛ, bɛi ti kuwee iyi í ya kpa idei dulum do bɛi ti kuweei ku teese ŋau.

¹¹ Ama inɛmɔkɔi Arɔ̃ɔ ŋa fei aa jɛ. Idei kuwee ŋa iyi aa jo si inau bɛ í baa í jɛ wooda iyi tɔku nŋɛ ŋa aa maa too si hee do ajɔ fei. Inɛ iyi à nya ikã í má, nŋui í nɛ kpãa ku luu.

¹² Aɔ̃ Lafɛ̃ɛ í sɔ̃ Moizi í ni,

¹³ kuwee iyi Arɔ̃ɔ do amaɛ ŋa aa ceem wee. Hai ajɔ iyi à nya ŋa ikã a ce icɛi woo wee ŋau, iyafũ kiloo mɛɛtai aa ya mua amu Aɔ̃ Lafɛ̃ɛ ajɔ akã fei. Daakɔ bubuɛi aa ya nam, alɛ nɔ a ya nam bubu iyi í gbeu.

¹⁴ Aa ya fɔ iyafũui do ikpo nɔ a ya sɔ̃ɔ si pɛrɛnti. Si anyiɛ aa ya bububuui a bɛi a nam, nɔ inunu jiidaɛ á dɔ̃ɔm si.

¹⁵ Inɛ iyi à nya ikã í jɛ woo wee nla si inɔi amai Arɔ̃ɔ ŋau, nŋui á sãsi agbɛɛ nɔ nŋu mɔ á ya maa ce kuweeui. Nŋu bɛi í jɛ wooda iyi amu Aɔ̃ Lafɛ̃ɛ ǹ jilɛ hee do ajɔ fei. Aa ya jooi fei sãa sãa.

¹⁶ Kuweei iyafũ iyi woo weeu í ce fei, aa ya jooi si ina fei sãa sãa, a kaa jɔ́ɔ.

Kuwee iyi inɛ á ce a kpaò idei dulum dɛɛ

¹⁷ Ŋɔi Aɔ̃ Lafɛ̃ɛ í sɔ̃ Moizi má í ni,

¹⁸ sɔ̃ Arɔ̃ɔ do amaɛ ŋau i ni, iyi í jɛ woodai kuwee iyi á kpa idei dulum wee. Tengi bii à ya saka mɛɛmu iyi à waa ceò kuwee iyi à ya jo si ina fei sãa sãau, tengi bɛi aa saka mɛɛmu iyi à waa ceò kuwee iyi á kpa idei dulum nɔu si wajum. Mii iyi í mái á jɛ ntɔ ntɔ.

¹⁹ Woo wee iyi í ce kuweeui á yɔkɔ ku ŋɔ iŋai kuweeu, á ŋɔɔi si inya iyi à nya ikãu si bantumai ile bi kukou.

²⁰ Inɛ iyi à nya ikã í má, nŋui í nɛ kpãa ku lu iŋau. Bii njɛu í fãsi ibɔ gɔ, tengi bii njɛu í fãsiu, aa fɔɔi si inya iyi à nya ikã.

²¹ Cakai ama si bii í se iŋau, bii í tã á lɛgɛɛi, bii í nɔ í jɛ si cakai isɔ nkpa mɔi í soo si, á wiɛɛi sãa sãa do inyi.

²² Inɛ ŋa iyi à jɛ inɛmɔkɔ ŋa si inɔi woo wee ŋau fei aa yɔkɔ a ŋɔ. Mii gɔi iyi í má ntɔ ntɔ.

²³ Amma mɛɛmu iyi à ceò kuwee iyi á kpa idei dulum, nɔ à bu njɛɛ à bɔò ile bi kukou à koo à fãsi ile kumáu, a kaa ŋɔɔ, aa jo inɛ nŋui si ina.