Kuwee 5 - Bibeli do fee

Kuweei dulum ikã ikã ŋa

¹ Bii inɛ gɔ í jɛ sɛɛdai mii iyi inɛ gɔ í ce, nɔ í gbɔ woo kiiti wa kpe inɛ ŋa iyi à jɛ sɛɛdai mii nɔu, nŋu iyi í jɛ sɛɛdau, bii kù fɔ mii iyi í yɛ walakɔ mii iyi í gbɔ nŋui dulum nɔu á baa ku jɛ si iriɛ.

² Bii inɛ í lu mii gɔ iyi kù maaju si kumà hai mà, bɛi ikui mɛɛmui sako walakɔ ti mɛɛmui inɔ ilu walakɔ ikui iŋa hai nɛ nto, nŋu takaɛ mɔ í baa í jɛ inɛ iyi kù maaju nɔ í jɛ ilu taalei.

³ Bii í nɔ í jɛ ti amanɛ mɔi inɛ í lu si kumà hai mà si bɛi kù maaju, do ankãanyi bii í na í mà, ilu taalei á jɛ.

⁴ Bii inɛ gɔ wa fɔ ide do kugbasi, nɔ kù waa saalu ide laalɔ walakɔ ide jiida gɔ iyi wa bi ku ce nɔ kù mà titã, do ankãanyi bii í na í mà á baa ku jɛ ilu taalei.

⁵ Inɛ iyi í ce dulum si ide ŋa iyi à fɔ nsɛiu bɛ fei, waati iyi lafɛ̃ɛ í na í mà í sĩa ku tɔɔ suurui dulum dɛɛ.

⁶ Si anyiɛ amu Aɔ̃ Lafɛ̃ɛ n bɛi n kpa idei dulum dɛɛ í gbe ku ceem kuwee do angudã walakɔ do iwo abo. Nɔ woo weeui á so ku kooò tengi bii à ya ce kuwee iyi á jɔ̀ amu Aɔ̃ Lafɛ̃ɛ n kpa idei dulum nɔu.

Kuweei ilu are ŋa

⁷ Bii inɛ gɔ í ce dulum, nɔ kaa ba angudã walakɔ iwo iyi á kpaò idei dulum dɛɛ iyi í ce, á yɔkɔ ku naaò kufe minji wa walakɔ ankasiidi minji. Akã nŋui á kpaò idei dulum dɛɛ, akã mɔ iyi aa jo si ina fei sãa sãa.

⁸ Lafɛ̃ɛ á so ŋai ku kooò bi woo weeu, nɔ woo weeu mɔ iyi í jɛ ti ku kpa idei dulum nɔui á tako ku ceò kuweeu titã. Woo weeu á lawɛ irii yɛiui hee kɔkɔi kpakɔɛ, amma kaa nyaa ikã ikã.

⁹ Á fãsi njɛi yɛiu si cingaa akãi bi kuweeui, bubui njɛu mɔ á nikãɛ si icui bi kuweeu bɛ. Nŋu bɛi í jɛ kuwee iyi á kpa idei dulum.

¹⁰ Yɛi akã iyi í gbeu mɔ, kuwee iyi à ya jo si ina fei sãa sãai á ceò, á cooi ku too si wooda ŋa iyi à jilɛu. Bɛɛbɛi woo weeu á cea inɛ iyi í ce dulum nɔu, nɔ aa kpa idei dulum dɛɛ.

¹¹ Bii lafɛ̃ɛ kaa nɔ ku ba kufe minji walakɔ ankasiidi minji, á yɔkɔ ku naaò iyafũ kiloo mɛɛta wa iyi á ceò kuwee ku ba ku kpa idei dulum dɛɛ, amma ku maà dasi ikpo do tuae iyi à ya jou domi kuwee iyi á kpa idei dulum nii.

¹² Iyafũ iyi í naaò wau woo weeu á bu awɔ kutu akãi iyi á jɔ̀ ku maa yeò gigiɛ, nɔ ku joo si antaii tengi bii à ya ce kuweeu do kuwee iyi à jo si wajui amu Aɔ̃ Lafɛ̃ɛ. Nŋu mɔ kuwee iyi á kpa idei dulum nii bɛ.

¹³ Bɛɛbɛi woo weeu á ce ku kpaò idei dulum dii inɛ iyi í ce baa akãi mii ŋau bɛ fei, nɔ aa kpa idei dulum dii lafɛ̃ɛ. Mbɔi kuweeu iyi á gbeu ti woo weeui á jɛ bɛi à ya ce iyi í jɛ ti kuweei iyafũu.

Kuweei ku teese

¹⁴ Aɔ̃ Lafɛ̃ɛ í sɔ̃ Moizi í ni,

¹⁵ bii inɛ gɔ í ce mii iyi kù jɛ dee dee nɔ í ce dulum iyi kù jɛ do idɔɔbiɛ si mii ŋa iyi í nɛ ku nya ikã a jɛ ti amu Aɔ̃ Lafɛ̃ɛ, angudã kombo iyi kù nɛ leebu kãmai á ceaò amu Aɔ̃ Lafɛ̃ɛ kuweei ku teese. Angudã iyi kuwoɛ á to kuwo iyi à jilɛ si gãmɛi kuwoi fiai ile kumáui á mu wa.

¹⁶ Lafɛ̃ɛ si miiu fei á nyi ku kɔ̃ɔsi akã mái, zaka bɛi í jɔ̀ ile kumáu í kuau. Woo weeui á na. Nɔ nŋu mɔ ku bɛi ku ce kuwee iyi á kpa idei dulum nɔu do angudã kombou. Nɔ an ceaa suuru.

¹⁷ Bii inɛ gɔ í kua baa akãi woodai amu Aɔ̃ Lafɛ̃ɛ bii í jɛ lafɛ̃ɛ kù mài í baa í jɛ ilu taale nɔ á so asoi dulum dɛɛ.

¹⁸ Na nŋu, angudã kombo iyi kù nɛ leebu kãmai á ceaò amu Aɔ̃ Lafɛ̃ɛ kuwee ku ba n kpa idei dulum dɛɛ. Angudã iyi kuwoɛ í to kuwo iyi à jilɛ si gãmɛi kuwoi fiai ile kumáui á naaò wa. Nɔ woo weeu ku ce kuweeu na dulum iyi inɛɛu í ce iyi kù màu, nɔ an kpa idei dulum dɛɛ.

¹⁹ Nŋu bɛi í jɛ kuwee iyi á kpa idei dulum, domi ntɔ ntɔ inɛɛu í jɛ ilu dulum nii bi amu Aɔ̃ Lafɛ̃ɛ.

²⁰ Aɔ̃ Lafɛ̃ɛ í sɔ̃ Moizi í ni,

²¹ bii inɛ gɔ í ce dulum si wajum, na ibo gɔ iyi í sɔa kpaasiɛ si mii gɔ iyi kpaasiu í naa ku jilɛ, bii í ce ilei mii nɔu, walakɔ bii í zamba kpaasiɛu í so mii nɔu,

²² walakɔ bii í tasi mii ndii kpaasi gɔ iyi í nyɔ nɔ í ni nŋu kù tasi, walakɔ bii wa ce kugbasi si ibo ku ba ku singa dimii daa bɛɛbɛ fei, lafɛ̃ɛ í ce dulum nii.

²³ Bii inɛ í ce dulum bɛɛbɛ nɔ í baa í jɛ ilu taale, í nɛ ku sindo mii iyi í ce ileui, walakɔ mii iyi í zamba kpaasiɛ siu, walakɔ mii iyi í tasiu, walakɔ mii iyi à naa ku singau,

²⁴ walakɔ mii iyi í ce si kugbasi ibou. Á teese fei ndɛɛi nɔ ku kɔ̃ɔsi miiusiaɛ má ku bɛi ku sindoa inɛ iyi í nɔɔ ajɔ iyi nŋu takaɛ í ce kuweei ku teeseu.

²⁵ Á naa bi woo weeui ku ce kuweei ku teeseu si wajum, do angudã kombo iyi kù nɛ leebu kãma. Nɔ kuwoi angudãu á to kuwo iyi à jilɛ si gãmɛi kuwoi fiai ile kumáu.

²⁶ Nɔ woo weeu ku ce kuweeu na dulum iyi inɛɛu í ce si wajui amu Aɔ̃ Lafɛ̃ɛ, nɔ an kpa idei dulum dɛɛ baa bii bɛirei taaleɛu í to.