Kuwee 4 - Bibeli do fee

Kuwee iyi á kpa idei dulum ŋa Kuwee iyi woo wee nlau takaɛ á ce na dulum dɛɛ

¹ Aɔ̃ Lafɛ̃ɛ í sɔ̃ Moizi í ni,

² sɔ̃ inɛi Izirɛli ŋau i ni, bii inɛ gɔ í na í ce dulum í kua woodai amu Aɔ̃ Lafɛ̃ɛ nɔ kù jɛ do idɔɔbiɛ, bii í ce mii iyi kù sĩa ku ce, bɛi í nɛ ku ce wee.

³ Bii í jɛ woo wee nlaui í ce dulum nɔ laalɔu í to si inɛ ŋau fei, í gbe ku ceem kuwee do kɛtɛ kombo iyi kù nɛ leebu kãma, n bɛi n kpa idei dulum dɛɛ.

⁴ Á gbã kɛtɛ komboui ku naaò wa anui ile bi kukou, nɔ ku lesi awɔɛ si irii kɛtɛu ku bɛi ku sakaɛò si wajum bɛ.

⁵ Nɔ ku bu njɛu ku lɔò inɔ ile bi kukou.

⁶ Á dasi amaawɔɛi si njɛu nɔ ku fãa si wajum fii mɛɛje tengi bi acɔi ile iyi í re do kumáu í wa.

⁷ Á nyi ku jɔ́si njɛu mái si antaii bii à ya ce kuweeu si ngoi gonta ŋau, tengi bii à ya jo tuae iyi inunuɛ í ya dɔ̃a amu Aɔ̃ Lafɛ̃ɛ siu. Nɔ tengi bii à ya jo tuaeu, í wai si inɔ ile bi kukou. Á dikã njɛi kɛtɛu feii si icui bii à ya ce kuwee iyi à ya jo si ina fei sãa sãa anui ile bi kukou.

⁸ Á nya ikpou feii do iyi wa bii mii ndii inɔ ŋau fei,

⁹ do kpaa minji ŋau do ikpo iyi í kaako ŋau, do bubui idɔu iyi à ya nya ajɔ do kpaa ŋau.

¹⁰ Woo wee nlau á nya inɛ nŋu ŋau mɔi bɛi à ya nya ti kuweei anu akã ŋau nɔ ku joo si antaii bii à ya ce kuwee iyi à ya jo si ina fei sãa sãa ŋau.

^11-12 Amma batai kɛtɛu do iŋau fei, do iriu, do kɔbisi ŋau do mii ndii inɔ ŋau do imii caakaɛu fei sãa sãa, si inya gɔ iyi à nya ikai aa so a bɔò do anyii bii à bubau tengi bii à ya timbi ilúlu ŋau, nɔ ku joo si antaii ilúluu.

Kuwee iyi á kpa idei dulum dii zamaau fei

¹³ Bii í nɔ í jɛ inɛi Izirɛli ŋau fei à ce dulum à kua woodai amu Aɔ̃ Lafɛ̃ɛ nɔ kù jɛ do idɔɔbi nŋa, bii à ce mii iyi kù sĩa a ce, nɔ a kù mà,

¹⁴ waati iyi à na à mà dulum iyi à ce í gbe a dɛ kɛtɛ kombo a ceò kuwee iyi amu Aɔ̃ Lafɛ̃ɛ an kpaò idei dulum du ŋa. Aa mu kɛtɛui a naaò wa anui ile bi kukou.

¹⁵ Inɛ ngboi Izirɛli ŋau aa lesi irii kɛtɛu awɔi nɔ a sakaɛ si wajum bɛ.

¹⁶ Nɔ woo wee nlau ku bu njɛu ku lɔò inɔ ile bi kukou.

¹⁷ Á dasi amaawɔɛi si inɔ njɛu nɔ ku fãa si wajum fii mɛɛje tengi bii acɔi ile iyi í re do kumáu í wa.

¹⁸ Á nyi ku jɔ́si njɛu mái si antaii bii à ya ce kuweeu si ngoi gonta ŋau, tengi bii à ya jo tuae iyi inunuɛ í ya dɔ̃a amu Aɔ̃ Lafɛ̃ɛ siu. Nɔ tengi bii à ya jo tuaeu í wai si inɔ ile bi kukou. Á dikã njɛi kɛtɛu feii si icui bii à ya ce kuwee iyi à ya jo si ina fei sãa sãa ŋau anui ile bi kukou.

¹⁹ Á nya ikpoi kɛtɛu feii nɔ ku joo si antaii bi kuweeu.

²⁰ Á so mii ndii kɛtɛu iyi í gbe feii ku fitaò do anyii bii à bubau. Bɛɛbɛi woo weeu á ya cea inɛi Izirɛli ŋau waati kãma fei ku ba amu Aɔ̃ Lafɛ̃ɛ n kpa idei dulum du ŋa ŋau.

²¹ Á so mii ndii kɛtɛu iyi í gbe feii ku fitaò do anyii bii à bubau, ku bɛi ku joo bɛi í cea ti sinteu. Nŋu bɛi í jɛ kuwee iyi aa cea amu Aɔ̃ Lafɛ̃ɛ n bɛi n kpa idei dulum dii zamaau.

Kuwee iyi inɛ ngbo í nɛ ku ce

²² Bii í nɔ í jɛ inɛ ngbo gɔ mɔi í ce dulum iyi kù jɛ do idɔɔbiɛ nɔ í kua akãi wooda iyi amu Aɔ̃ Lafɛ̃ɛɛ ǹ jilɛu, í ce mii iyi kù sĩa ku cei.

²³ Bii í na í mà dulum iyi nŋu í ce, á cea amu Aɔ̃ Lafɛ̃ɛ kuweei do iwo kombo iyi kù nɛ leebu kãma.

²⁴ Á lesi awɔɛi si irii iwo kombou, nɔ ku sakaɛ tengi bii à ya saka mɛɛmui kuwee iyi à ya jo si ina fei sãa sãa ŋau si wajum. Nŋu bɛi í jɛ kuwee iyi á ce n bɛi n kpa idei dulum dɛɛ ŋau.

²⁵ Woo weeu á dasi amaawɔɛi si njɛu nɔ ku jɔ́si tengi bii à ya ce kuweeu si ngoi gonta ŋau, nɔ ku dikãɛ si icui bii à ya ce kuweeu má.

²⁶ Á jo ikpoi iŋau feii si antaii bi kuweeu bɛi à ya cea iŋai kuweei anu akãu. Bɛɛbɛi woo weeu á ce ku ba ku kpaò idei dulum dii inɛ ngbou nɔ n ceaa suuru.

Kuwee iyi inɛ ŋa iyi à gbe à nɛ ku ce

²⁷ Bii í jɛ si inɔi inɛi Izirɛli ŋau inɛ gɔ í ce dulum nii iyi kù jɛ do idɔɔbiɛ, nɔ í kua akãi wooda ŋa iyi amu Aɔ̃ Lafɛ̃ɛ ǹ jilɛu, í ce mii iyi kù sĩa ku cei.

²⁸ Bii í na í mà dulum iyi nŋu í ce, á ce kuweei do iwo abo iyi kù nɛ leebu kãma na dulum iyi í ceu.

²⁹ Á lesi awɔɛi si irii mɛɛmuu nɔ ku sakaɛ tengi bii à ya ce kuwee iyi à ya jo si ina fei sãa sãa ŋau.

³⁰ Woo weeu á dasi amaawɔɛi si njɛu, nɔ ku jɔ́si ngoi gontai bi kuwee ŋau, nɔ si anyiɛ á dikã njɛu feii si icui bii à ya ce kuweeu.

³¹ Woo weeu á nya ikpo ŋau feii bɛi à ya cea ti kuweei anu akãu, nɔ ku joo si antaii bii à ya ce kuweeu nɔ inunuɛ á dɔ̃a amu Aɔ̃ Lafɛ̃ɛ si. Bɛɛbɛi woo weeu á ce ku ba ku kpaò idei dulum dii lafɛ̃ɛ, nɔ n ceaa suuru.

³² Bii í nɔ í jɛ angudãi wa ceò kuweeu, angudã aboi á jɛ iyi kù nɛ leebu kãma.

³³ Á lesi awɔɛi si irii mɛɛmuu nɔ ku sakaɛ tengi bii à ya saka mɛɛmui kuwee iyi à ya jo si ina fei sãa sãa ŋau.

³⁴ Woo weeu á dasi amaawɔɛi si njɛu, nɔ ku jɔ́si ngoi gontai bi kuwee ŋau bii à ya ce kuwee iyi à ya jo si ina fei sãa sãa ŋau, nɔ si anyiɛ á dikã njɛu feii si icui bii à ya ce kuweeu.

³⁵ Woo weeu á nya ikpo ŋau feii bɛi à ya cea ti kuweei anu akã ŋau, nɔ ku joo si antaii bii à ya ce kuweeu do kuwee ŋa iyi à jo si wajum nɔu. Bɛɛbɛi woo weeu á ce ku kpaò idei dulum dii inɛɛu, nɔ n ceaa suuru.