Kuwee 3 - Bibeli do fee

Kuweei anu akã

¹ Nɔ Aɔ̃ Lafɛ̃ɛ í sɔ̃ Moizi má í ni, bii inɛ gɔ wa ceem kuweei anu akã, bii í jɛ hai si inɔi mɛɛmu gaa ŋa iyi à lai, á yɔkɔ ku mu kɛtɛ kombo walakɔ abo iyi kù nɛ leebu kãma ku ceò kuweeu.

² Lafɛ̃ɛ á gbã mɛɛmuui ku kooò anui ile bi kukou nɔ ku lea awɔ si iri ku bɛi ku sakaɛ. Nɔ woo wee ŋa, amai Arɔ̃ɔ ŋau a fãsi njɛu si bi kuweeu a kaakoɛò.

³ Si iŋai kuweei anu akãu, iyi á jɛ ti amu Aɔ̃ Lafɛ̃ɛ wee. Ikpo iyi wa bii mii ndii inɔ ŋau,

⁴ do kpaa minji ŋau do ikpo iyi í kaako ŋau, do bubui idɔu iyi à ya nya ajɔ do kpaa ŋau.

⁵ Amai Arɔ̃ɔ ŋau aa jo fei ndɛɛi si bi kuweeu do kuwee iyi à ya jo si ina fei sãa sãau. Nŋu bɛi í jɛ kuwee iyi inunuɛ í ya dɔ̃ɔm si.

⁶ Bii í nɔ í jɛ inɛ gɔ wa cea amu Aɔ̃ Lafɛ̃ɛ kuweei anu akã do mɛɛmu gaa ŋa iyi à kere, lafɛ̃ɛ ku mu mɛɛmu akɔ walakɔ abo iyi kù nɛ leebu kãma.

⁷ Bii í jɛ angudãi inɛ wa ceò kuweeu á gbãai ku naaòɛ wa si wajum,

⁸ nɔ ku lea awɔ si iri ku bɛi ku sakaɛ anui ile bi kukou, nɔ woo wee ŋau a fãsi njɛu a kaakoò bi kuweeu.

⁹ Si iŋai kuweeu, iyi aa jo si ina ku jɛ ti amu Aɔ̃ Lafɛ̃ɛ wee. Akpaamuu fei hee ku koo si bũu, do ikpo iyi wa bii mii ndii inɔ ŋau fei,

¹⁰ do kpaa minji ŋau do ikpo iyi í kaako ŋau, do bubui idɔu iyi à ya nya ajɔ do kpaa ŋau.

¹¹ Woo weeu á jo fei ndɛɛi si antaii bi kuweeu. Nŋu bɛi í jɛ iŋai kuwee iyi aa jo si ina si wajum.

¹² Bii í nɔ í jɛ do iwoi inɛ gɔ wa ceem kuwee, á gbãai ku bɔòɛ si wajum,

¹³ nɔ ku lea awɔ si iri ku bɛi ku sakaɛ anui ile bi kukou, nɔ woo wee ŋau a fãsi njɛu a kaakoò bi kuweeu.

¹⁴ Si iŋai kuweeu iyi aa jo si ina iyi á jɛ ti amu Aɔ̃ Lafɛ̃ɛ wee. Ikpo iyi wa bii mii ndii inɔ ŋau,

¹⁵ do kpaa minji ŋau do ikpo iyi í kaako ŋau, do bubui idɔu iyi à ya nya ajɔ do kpaa ŋau.

¹⁶ Woo weeu á jo fei ndɛɛi si antaii bi kuweeu. Nŋu bɛi í jɛ iŋai kuwee iyi à ya jo si ina iyi inunuɛ á dɔ̃a amu Aɔ̃ Lafɛ̃ɛ si. Ikpou fei ti amu Aɔ̃ Lafɛ̃ɛi á jɛ.

¹⁷ Wooda iyi tɔku nŋɛ ŋa aa maa too si hee do ajɔ fei tengi bii ì wa ŋa fei wee. I maà ya ŋɔ iŋa do ikpoɛ walakɔ do njɛɛ ŋa.