Kuwee 27 - Bibeli do fee

Ku kɔ̃ɔsi Jiai amua ŋa

¹ Aɔ̃ Lafɛ̃ɛ í sɔ̃ Moizi í ni,

² sɔ̃ inɛi Izirɛli ŋau i ni, bii inɛ gɔ wa bi ku kɔ̃ kuwã iyi í ceem si gãmɛi amuai amanɛ, á yɔkɔ ku na fia si agbɛi inɛɛu,

³ si bɛi aa fɔ jiaɛ ihɛ̃. Ti inɛ iyi í nɛ adɔ̃ kɔnfia ku bɔ adɔ̃ kita, sikilii ciitaai inɛ iyi í ce kuwãu á sã si bɛi à ya wã fiai ile kumáu.

⁴ Bii í jɛ inaaboi, sikilii kuntaai.

⁵ Bii í jɛ amai adɔ̃ miiu ku bɔ adɔ̃ kɔnfia mɔi, bii inɛmɔkɔi, sikilii kɔnfiai, bii inaabo mɔi, sikilii mɛɛwai.

⁶ Amai cukpa akã ku bɔ adɔ̃ miiu mɔ, bii inɛmɔkɔi, sikilii miiui, bii inaabo mɔi, sikilii mɛɛtai.

⁷ Bii í jɛ inɛ iyi í nɛ adɔ̃ kita do ku lesi mɔi, bii inɛmɔkɔi, sikilii maatũi, bii inaabo mɔi, sikilii mɛɛwa.

⁸ Inɛ iyi í ce kuwãu, bii í jɛ ilu arei, nɔ kaa yɔkɔ ku na zaka bɛi à da ŋau bɛ, aa bɔò lafɛ̃ɛ bi woo weeui, nɔ ku daa zaka bɛi á sã, si bɛi daamaɛ í to, domi nŋui í ce kuwãu.

⁹ Iyi í jɛ ti mɛɛmu mɔ iyi aa yɔkɔ a ceem do kuwee fei, aa nyaa ikãi ku jɛ titom.

¹⁰ A kaa kpaasiɛ do mɛɛmu mmu gɔ iyi í jɛ laalɔ walakɔ iyi í jɛ jiidau. Bii inɛ í kpaasi mɛɛmu gɔ do mɛɛmu mmuɛ gɔ, aŋa fei aa nya ŋa ikãi a jɛ titom.

¹¹ Bii mɛɛmuu í jɛ mɛɛmu gɔ iyi kù maaju iyi a kaa yɔkɔ a ceem do kuwee, aa kooò mɛɛmuui bi woo weeu,

¹² nɔ ku da jiai fia gɔ si zaka bɛi jiidaɛ walakɔ laalɔɛ í mungau, nɔ bɛi woo weeu í fɔ bɛɛbɛi aa too si.

¹³ Bii ilu mɛɛmuu takaɛ wa bi ku yaa, zaka bɛi woo weeu í dau, si miiu fei á kɔ̃ɔsi akãi.

¹⁴ Bii inɛ gɔ í ceem amuai ileɛ, woo weeu á da jiai fia bɛi ileu á toi, si yaase bɛi gbugbãi ileu í to, do bɛi kù to. Bɛi woo weeu í fɔ bɛɛbɛi aa too si.

¹⁵ Inɛ iyi í nɛ ileu bii í na wa bi ku ya ndɛɛ mái, zaka bɛi woo weeu í dau, si miiu fei akãi á kɔ̃ɔsi, nɔ ileu ku baa ku jɛ tɛɛ má.

¹⁶ Bii inɛ í ceem amuai ilɛɛ gɔ, woo weeu á da jiai fiaui si zaka bɛi dimi iyi í ya gbɛ̃ si ilɛu í ya to. Dimi iyi í to tongoo cĩɔ mɛɛta fei, sikilii ciitaai á jɛ.

¹⁷ Bii í nɔ í jɛ hai adɔ̃i ara ku nɛu bɛ mɔi í ce amuai ikoɛu, zaka bɛi woo weeu í dau, zaka bɛɛbɛi á sã.

¹⁸ Bii í nɔ í jɛ si anyii adɔ̃i ara ku nɛui lafɛ̃ɛ í ceem amuai ikoɛu, woo weeu á ce doai fiaui, nɔ ku kayeɛ si jia bɛi adɔ̃i ara ku nɛ mmuɛ wa gbe.

¹⁹ Bii ilu ikou wa bi ndɛɛ ku ya, zaka bɛi woo weeu í dau, si miiu fei á kɔ̃ɔsi akãi ku bɛi ku gba ndɛɛ má.

²⁰ Bii í nɔ í jɛ kù ya ikoɛu, bii à taa inɛ mmu gɔ, nŋu takaɛ kaa yɔkɔ ku yaa má.

²¹ Bii adɔ̃i ara ku nɛ mmuɛ í to wa, ilɛu titom nii á baa ku jɛ, nɔ woo wee ŋaui aa nɔɔ. Á yɛi bɛi inya iyi à mua amu Aɔ̃ Lafɛ̃ɛ hee do ajɔ fei.

²² Bii inɛ gɔ í ceem amuai iko gɔ iyi í ra, nɔ kù jɛ tubuɛ,

²³ woo weeu á ce doai adɔ̃ bɛi adɔ̃i ara ku nɛ mmuɛ wa gbei ku bɛi ku da fiau. Ajɔ nŋu bɛ mɔi inɛ iyi í ce amuau á sã fia iyi à daau. Fiau titom nii á jɛ.

²⁴ Amma bii adɔ̃i ara ku nɛ í to, ikou, ti inɛ iyi í nɔɔui á baa ku jɛ, waatɔ inɛ njɛ iyi ikou í jɛ tubuɛ.

²⁵ Jiai fia iyi à waa ce si lasabu fei, aa cooi si jiai fiai ile kumáu, waatɔ sikilii akã. Sikiliiu fia iyi à ya kpe gɛra ara kɔnfiai.

Amua ikã ikã

²⁶ Inɛ kãma kù nɛ kpãai ku cea amu Aɔ̃ Lafɛ̃ɛ amuai mɛɛmu iyi à bí sinte si gaaɛ. Inɛ nŋu tilasi í jɛ titom tã, si bɛi í jɛ iyi à bí sinte. Bii í jɛ kɛtɛi, bii í nɔ í jɛ angudã mɔi, inɛ nŋu í jɛ titom tã.

²⁷ Bii í nɔ í jɛ ama sintei mɛɛmu gɔ iyi kù maajui, inɛ iyi í nɔɔu á yɔkɔ ku yaa. Zaka bɛi woo weeu í dau, si miiu fei á kɔ̃ɔsi akãi. Bii lafɛ̃ɛ kù yaa mɔ, woo weeu á yɔkɔ ku taa inɛ mmu gɔ bɛi í tako í dau.

²⁸ Mii iyi inɛ í jilɔɔ si idɔɛ nŋu ku na amu Aɔ̃ Lafɛ̃ɛ hee do ajɔ fei, kaa yɔkɔ ku taa má, hee má jɛ ku nyi ku yaa má. Bii í yɔkɔ ku jɛ amanɛi, walakɔ mɛɛmu gɔi, walakɔ ikoɛ. Mii iyi inɛ í jilɛ si nŋu ku na amu Aɔ̃ Lafɛ̃ɛ hee do ajɔ fei, titom nii á jɛ dee dee.

²⁹ Baa bii í jɛ amanɛi i kaa yɔkɔ i yaa má. Aa kpaai.

³⁰ Si amaajɛ ŋa, si tongoo mɛɛwa fei, tongoo akãi aa nya ku jɛ titom. Nɔ si isoi jĩi ara mɛɛwa fei, akãi aa ya nya ku jɛ titom.

³¹ Bii inɛ gɔ wa bi ku ya mii gɔ si mii mɛɛwasiaɛ ŋa iyi í nyau, á sãa woo wee ŋau fia bɛi à daui nɔ si miiu fei ku lesi akã má.

³² Iyi í jɛ ti kɛtɛ ŋa, do angudã ŋa do iwo ŋa, si mɛɛmu mɛɛwa fei, akã, titom nii á jɛ.

³³ Ilu mɛɛmuu kù nɛ ku cica si inɔi mɛɛmu ŋau iyi í jɛ jiida walakɔ iyi í jɛ laalɔ, nɔ kù nɛ kpãai ku kpaasi iyi í jɛ titom nɔu do mmuɛ gɔ. Bii à kpaasi mɛɛmu iyi í jɛ titom do mmuɛ gɔ, aŋa minji fei aa nya ŋa ikãi a jɛ titom, nɔ a kaa yɔkɔ a ya kãma nŋa gɔ má.

³⁴ Wooda ŋa iyi Aɔ̃ Lafɛ̃ɛ í na Moizi mbɛ si antaii iri kutai Sinaiu na irii inɛi Izirɛli ŋa.