Kuwee 26 - Bibeli do fee

¹ I maà cea ara nŋɛ iwɛ̃ ŋa. I maà gbea ara nŋɛ jĩi hee má jɛ i ma mii gɔ ku jɛ iwɛ̃ nŋɛ. Nɔ i maà jilɛa ara nŋɛ kuta iyi à cea booda kusĩa gɔ i gulɛ i maa tɔɔɛ ŋa, domi amui ǹ jɛ Aɔ̃ Lafɛ̃ɛ nŋɛ.

² I ya jirima ajɔi kusĩmim ŋa, nɔ i ya jirima ile kumám ŋa. Amui Aɔ̃ Lafɛ̃ɛ.

Kuwee

³ Bii ì waa too woodam ŋau ŋa, bii ì waa jirima ŋa ŋa, nɔ ì waa ceò ŋa icɛ ŋa,

⁴ an jɔ̀ ijĩ ku naa nŋɛ si waatiɛ, ku ba amaajɛi ilɛ ŋa a ce ncɛɛ, nɔ jĩi ŋa mɔ a so jiida.

⁵ Amaajɛi iko nŋɛ ŋau ku kpokpoɛ á bɔi hee waatii isoi jĩi ndii rezɛ̃ɛ ŋa ku ka, nɔ isoi jĩi ndii rezɛ̃ɛ ŋau ku ka mɔ á bɔi hee waatii ku gbɛ̃ mmuɛ má. Aa ba ijɛ ŋai jiida jiida, nɔ i wɛɛò laakai ku sũ si ilɛ nŋɛ má.

⁶ An da nŋɛ laakai ku sũ si ilɛ nŋɛ, nɔ inɛ kãma kaa bitandi ŋɛ si njoo nŋɛ. An jɔ̀ mɛɛmu laalɔi sako ŋau a fita hai si ilɛ nŋɛ, nɔ inɛ kãma kaa naa igũ ku ce si ilɛ nŋɛ má.

⁷ Aa lele mbɛɛ nŋɛ ŋai nɔ i kpa ŋa si igũ ŋa.

⁸ Si inɔ nŋɛ, amanɛ miiu á lele amanɛ cĩɔ, nɔ amanɛ cĩɔ á lele amanɛ dubu mɛɛwa, nɔ aa kpa mbɛɛ nŋɛ ŋau fei si igũ ŋa.

⁹ An ce nŋɛ jiida n jɔ̀ i maa bí ŋa, nɔ i kpɔ i kɔ̃ɔsi ŋa. Nɔ akabuui awaɛ ŋa á maa wɛɛi waati kãma fei.

¹⁰ Amaajɛ nwo ŋa iyi ì da ŋai aa ya maa jɛ ŋa. Aa ya wa nwo ŋaui i bɛi i ba bii aa dasi titɔ̃ ŋau ŋa.

¹¹ Si anini nŋɛi an jilɛ bi kuwam nɔ n kaa n fũsi ŋɛ awɔ má.

¹² An maa n wa si anini nŋɛ, an jɛ Aɔ̃ Lafɛ̃ɛ nŋɛ, nɔ iŋɛ mɔ i jɛ inɛm ŋa.

¹³ Amui ǹ jɛ Aɔ̃ Lafɛ̃ɛ nŋɛ iyi í nya ŋɛ wa hai ilɛi Ezibiti, amui ǹ nya ŋɛ wa hai si aru ku jɛ. Hai waati iyi ǹ leekĩ wahala iyi inɛi Ezibiti ŋa à kãa nŋɛ iyi wa wɔ ŋɛu bɛ, aa yɔkɔ i nɛ i wu iri lele ŋa.

Ikpe

¹⁴ Amma bii i kù waa gbɔ idem ŋa, nɔ i kù waa ceò woodam ŋau icɛ ŋa,

¹⁵ bii ì waa yaako woodam ŋau ŋa, nɔ bii í jɛ si idɔ nŋɛ i yɔɔ ŋa iyi woodam ŋau à jɛ laalɔ í jɔ̀ i kù waa ceò fei ndɛɛ icɛ ŋa, nɔ ì fũ akabuu iyi í wa aninii awaɛ ŋa,

¹⁶ to, bɛi an ce nŋɛ bɛbɛi wee. An jɔ̀ zigiida ku naa si ŋɛ, aa ce bɔ̃ɔ ŋa nɔ aa gbɛ ŋa, aa ce ara gbãa ŋa nɔ iju nŋɛ ŋa a jĩisa. Nɔ aa wahala ŋa. Mii iyi ì gbɛ̃ ŋa fei, ngbɛi. Mbɛɛ nŋɛ ŋa aa gba fei ndɛɛi.

¹⁷ An sinda n to nŋɛ anyii, nɔ mbɛɛ nŋɛ ŋa a jɛ ŋɛ igũ. Inɛ ŋa iyi à cé ŋɛ ŋau aa nyi a ta nŋɛ gbugbã má, nɔ aa maa sa ŋai baa bii a kù waa lele ŋɛ.

¹⁸ Bii í nɔ í jɛ do nŋu fei ì kɔ̀ ku gbɔ idem ŋa, an kɔ̃ɔsi ijuukpãi dulum du ŋɛi bɛi ikɔ mɛɛje.

¹⁹ An jɔ̀ faau nŋɛ ku leekĩ, domi i kaa nɛ gbugbã má ŋa. An jɔ̀ lelei Aɔ̃ ku yɛ nŋɛ bɛi isɔ, nɔ ilɛ nŋɛ ŋau aa gbɛi bɛi isɔ nkpa, domi ijĩ kaa naa.

²⁰ Aa ya ta gbugbã nŋɛ ŋai ngbɛ ngbɛ, ilɛ nŋɛ ŋa a kaa ya ce amaajɛ kãma, nɔ jĩi ndii ilɛ nŋɛ ŋau mɔ a kaa ya so iso kãma.

²¹ Bii ì lele idɔ nŋɛ nɔ ì kɔ̀ ku gbɔ idem ŋa, an kɔ̃ɔsi ijuukpãi dulum du ŋɛi bɛi ikɔ mɛɛje.

²² An jɔ̀ mɛɛmui sako ŋa a naa si ŋɛ a na a ce nfei ama nŋɛ ŋa, nɔ a ce nfei mɛɛmu ku sɛ̃ nŋɛ ŋa. Aa jɔ̀ akpɔ nŋɛ ku kaye nɔ kpãa nŋɛ ŋa fei aa baa a gbe ngbɛ.

²³ Bii ijuukpã iyi bɛ ŋa a kù jɔ̀ i kù kpaasi ŋa, nɔ ì kɔ̀ ì waa lele idɔ nŋɛ ŋa,

²⁴ amu mɔ an lele si ŋɛ nɔ n jɔ̀ ijuukpãi dulum du ŋɛ ku kɔ̃ɔsi bɛi ikɔ mɛɛje.

²⁵ An jɔ̀ igũ ku naa si ilɛ nŋɛ, ku ba ku kpã ŋɛ iju na akabuu iyi í wa aninii awaɛ ŋa iyi ì jɔ̀ í da ŋau. Bii ì sa ì koo ì manji ilu mmu ŋa, an jɔ̀ patapoo ku cuku si ŋɛ, si anyiɛ nɔ n jɔ̀ mbɛɛ nŋɛ ŋa a jɛ ŋɛ igũ.

²⁶ An jɔ̀ i kua mii ku jɛ ŋa. Inaabo mɛɛwa á yɔkɔ ku sɔ̃ pɛ̃ɛ nŋɛ si bi ku sɔ̃ pɛ̃ɛ akã, nɔ aa naa nŋɛ pɛ̃ɛ iyi kù re nkãma wa, iyi kaa nya ŋɛ baa ari mɔm.

²⁷ Bii í jɛ do nŋu fei ì kɔ̀ kù gbɔ idem ŋa, nɔ ì waa lele idɔ nŋɛ ŋa,

²⁸ amu mɔ an lele si ŋɛ do idɔɔkɔ̃, nɔ n kɔ̃ɔsi ijuukpãi dulum du ŋɛ ikɔ mɛɛje.

²⁹ Ama inɛmɔkɔ nŋɛ ŋa do ama inaabo nŋɛ ŋai aa ya ŋɔ ŋa.

³⁰ Na saabui kucé iyi an cé nŋɛi á jɔ̀ n lɛgɛ geete bii ì ya cea iwɛ̃ nŋɛ ŋa kuwee. An lɛgɛ tengi bii ì ya ce kuweei tuae nŋɛ ŋau. An kitigba iku nŋɛ ŋai si buubuui iwɛ̃ nŋɛ ŋau.

³¹ An lɛgɛ ilu nŋɛ ŋai a kpɔò bomma, ile bi kuwee nŋɛ ŋau mɔ a gbe ngbɛ, nɔ inunui tuae nŋɛ ŋau kaa dɔ̃ɔm si má.

³² An lɛgɛ ilɛ nŋɛui sãa sãa hee baa mbɛɛ nŋɛ ŋa iyi aa naa a buba siu a biti ntɔ ntɔ.

³³ An jɔ̀ igũ ku naa si ŋɛ nɔ n fangaa ŋɛ i nɛ ilɛ mmu ŋa. Ilɛ nŋɛu á gbe ngbɛi nɔ ilu nŋɛ ŋau mɔ a kpɔò bomma.

³⁴ Waati iyi ì wa bi mbɛɛ nŋɛ ŋau, ilɛ nŋɛ iyi ì sa ì nyɔ ŋau á maa sĩmiɛi si bɛi i ci ya tako i jirima kusĩmi ŋau ŋa.

³⁵ Si waati iyi ilɛ nŋɛu á wɛɛ ngbɛ, waati bɛɛbɛi á sĩmi nsũi iyi i ci ya jɔ̀ ku sĩmi si waati iyi ì tako ì wa bɛ ŋau.

³⁶ Inɛ nŋɛ ŋa iyi aa wa si ilɛi mbɛɛ nŋɛ ŋa, an jɔ̀ a ya wɛɛò zigiida nla nla hee baa bii í jɛ fufu í yaya wua akã gɔ lele, ibaɛ ku ya jɔ̀ a maa sa. Aa ya maa sai bɛi inɛ ŋa iyi à wa si wajui mbɛɛ iyi í wɛɛò jĩnɛi igũ, nɔ aa ya maa cukui baa bii inɛ gɔ kù waa lele ŋa.

³⁷ Aa ya maa kosi njɛ isɛi bɛi inɛ ŋa iyi à waa saa mbɛɛ ŋa, baa bii inɛ gɔ kù waa lele ŋa. A kaa yɔkɔ a leekĩ si wajui mbɛɛ ŋa pai.

³⁸ Ilɛ mmui aa ku ŋa, domi mbɛɛ nŋɛ ŋaui aa kpa ŋɛ.

³⁹ Inɛ nŋɛ gɔ ŋa iyi aa gbe si hunde, dulum du ŋaui á jɔ̀ a kua gbugbã si ilɛi mbɛɛ nŋɛ ŋau, bɛɛbɛ mɔi aa nyi a kua gbugbã má na dulum iyi baa nŋa ŋau à ce.

Aɔ̃ Lafɛ̃ɛ á ye gigii akabuuɛ

⁴⁰ Amma inɛ ŋa iyi à gbe si hunde ŋau aa na a mà iyi aŋa do bala nŋa ŋa à ce dulum na kurara ŋa iyi à ceem, nɔ à nyi à ce ide ku kɔ̀ má si gãmɛm.

⁴¹ Na nŋu, aa mà iyi amu mɔ ǹ lele idɔm na irii aŋai, nɔ ǹ jɔ̀ à sa à nɛ ilɛi mbɛɛ nŋa ŋa. Si bɛɛbɛi aa kaye ara nŋa si dee dee hai jɛ nŋa nɔ a sã gbesei dulum du ŋa ŋa.

⁴² An ye gigii akabuu iyi awaò bala nŋa ŋa à dĩ, Zakɔbu do Izaaki do Aburahamu, nɔ an ye gigii kuwãm si gãmɛi ilɛu takaɛ.

⁴³ Ilɛu á gbɔ ididɔ̃i ku maa sĩmiɛ si bɛi aŋa a kù wa bɛ má. Aa sã gbesei dulum du ŋa ŋa, domi a kù jirima idem ŋa, nɔ à yɛ taalei woodam ŋau si idɔ nŋa.

⁴⁴ Amma do nŋu fei, baa do iyi à wa si ilɛi mbɛɛ nŋa ŋa, n kaa n fũsi ŋa awɔ kpata kpata, n kaa n sinda n to nŋa anyi, n kaa n kpa iri nŋa, n kaa n fũ akabuu iyi í wa gãmɛi awaò ŋa, domi amui ǹ jɛ Aɔ̃ Lafɛ̃ɛ nŋa.

⁴⁵ An maa n ye gigii akabuu iyi ǹ dĩ do bala nŋa ŋa iyi ǹ nya wa hai ilɛi Ezibiti ŋau si wajui dimi mmu ŋa, ǹ ni an jɛ Ilaaɔ̃ Lafɛ̃ɛ nŋau. Amui ǹ jɛ Aɔ̃ Lafɛ̃ɛ.

⁴⁶ Wooda ŋa do ikɔ ŋa iyi Aɔ̃ Lafɛ̃ɛ í jɔ̀ Moizi í sɔ̃ inɛi Izirɛli ŋa mbɛ si iri kutai Sinai.