Kuwee 25 - Bibeli do fee

Adɔ̃i kusĩmii ilɛ

¹ Aɔ̃ Lafɛ̃ɛ í sɔ̃ Moizi si iri kutai Sinai í ni,

² sɔ̃ inɛi Izirɛli ŋau i ni, waati iyi ì na ì to si ilɛ iyi amu Aɔ̃ Lafɛ̃ɛ an mu nŋɛu, i jirimam ŋa, i ya jɔ̀ ilɛu ku sĩmi adɔ̃ gɔ ŋa.

³ Adɔ̃ mɛɛfai aa ya gbɛ̃ amaajɛi iko nŋɛ ŋa, nɔ i ya kɔta amaawɔi jĩi ndii rezɛ̃ɛ nŋɛ ŋa nɔ i ka iso ŋau ŋa.

⁴ Amma adɔ̃ mɛɛjesiau aa nyaa ikã ŋai ku jɛ titom. Adɔ̃i kusĩmii á jɛ ti ilɛu, i kù nɛ ilɛ nŋɛ ŋa ku gbɛ̃ hee má jɛ i kɔta amaawɔi jĩi ndii rezɛ̃ɛ nŋɛ ŋa.

⁵ Baa bii amaajɛ ŋau à fita calɛ i maà ti i daa ŋa, nɔ i maà ka isoi jĩi ndii rezɛ̃ɛ iyi i kù kɔta amaawɔɛ ŋa. Adɔ̃i kusĩmii ilɛui á jɛ adɔ̃ nŋu bɛ.

⁶ Aa yɔkɔ i jɛ amaajɛ calɛ ŋa iyi à fita si adɔ̃i kusĩmiu ŋa iŋɛ do inɛmɔkɔ do inaabo woo ce icɛ nŋɛ ŋa, do woo ce icɛ ŋa iyi ì waa sãa fia ŋa, do inɛ njoo ŋa iyi à wa ide nŋɛ ŋa.

⁷ Do amaajɛ nŋu ŋau bɛi aa woò mɛɛmu nŋɛ ŋa, hee do mɛɛmui sakoi ilɛ nŋɛ ŋa.

Adɔ̃i ara ku nɛ

⁸ Aa jɔ̀ adɔ̃ mɛɛje mɛɛje ikɔ mɛɛje ku lɔ ŋai, fei sãa sãa ku jɛ bɛi adɔ̃ ciiji do mɛɛsã.

⁹ Si anyiɛ, si ajɔ mɛɛwasiai cukpa mɛɛjesiau, ajɔ nlai dulum ŋa ku kpai á jɛ. I fã kuu si ilɛu fei i maa dakpɛò ŋa.

¹⁰ Do yaase bɛɛbɛi aa nyaò adɔ̃ ciitaasiau ikã ŋa ku jɛ titom, nɔ i sɔ̃ inɛi ilu ŋau fei idei ara ku nɛ si ilɛu fei ŋa. Adɔ̃ nŋu adɔ̃i ara ku nɛi aa kpoo. Adɔ̃ nŋu bɛi inɛ fei á nyi si ilɛɛ ŋa, nɔ inɛ fei ku nyi si nyaanzeɛ.

¹¹ Si adɔ̃ ciitaasia fei, aa ya ce jingaui ara ku nɛu ŋai. I kaa ya gbɛ̃ nkãma ŋa, nɔ i maà ya mu baa amaajɛ calɛ ŋau ŋa, nɔ i maà ya ka isoi jĩi ndii rezɛ̃ɛ ŋa iyi i kù kɔta amaawɔ nŋa ŋau ŋa.

¹² Adɔ̃i ara ku nɛu bɛ, aa ya nyaa ikã ŋai ku jɛ mii iyi í má. Amaajɛ calɛi iko nŋɛ ŋai aa jɛ ŋa.

¹³ Si adɔ̃i ara ku nɛu bɛ, inɛ fei á ya gba ilɛɛ iyi í tai.

¹⁴ Bii ì waa bi i taa inɛ nŋɛ gɔ iko gɔ, walakɔ bii ì waa ra iko gɔ hai bi inɛ nŋɛ gɔ, i maà ti i jɔ̀ idei takii gɔ ku lɔ si.

¹⁵ I ya ta, walakɔ i ya ra i maa kau jiai adɔ̃i amaajɛ ŋau ku da iyi wa gbe hee adɔ̃i ara ku nɛ mmuɛu koo toò wa ŋa.

¹⁶ Bɛi adɔ̃u í kpɔ wa kɔ̃ɔsi fei, bɛɛbɛ mɔi fiau á maa kɔ̃ɔsi, bii adɔ̃u kù nɔ kù kpɔ mɔi, fiau á kayei, domi si jiai adɔ̃i amaajɛ ŋa ku dau bɛi í taɛ.

¹⁷ I jirimam ŋa, amu iyi ǹ jɛ Aɔ̃ Lafɛ̃ɛ nŋɛ, nɔ i maà takii inɛ nŋɛ kãma gɔ.

¹⁸ I jirima woodam ŋa. I jirima idem ŋa nɔ i ceò ŋa icɛ ŋa, ku ba i maa wɛɛò laakai ku sũ si ilɛu ŋa.

¹⁹ Ilɛ nŋɛu á ya ce amaajɛ ŋai jiida, nɔ i jɛ hee ku to ŋɛ, nɔ i wɛɛò laakai ku sũ ŋa.

²⁰ Á yɔkɔ ku jɛ aa maa bee ara nŋɛ i ni ŋa, aa ka nɛ ijɛ iyi aa ka maa jɛ mbɛ si bɛi a kù nɛ kpãai iko nwa ŋa ku gbɛ̃ adɔ̃ akã si adɔ̃ mɛɛje fei, nɔ a kù nɛ kpãai ka da baa amaajɛ calɛ ŋa iyi à fita si iko nwa ŋau?

²¹ An wee nŋɛ, nɔ amaajɛ iyi aa ba si adɔ̃ mɛɛfasiau ŋa á to ti adɔ̃ mɛɛta.

²² Si adɔ̃ mɛɛjɔsia nɔ i gbɛ̃ iko nŋɛ ŋau má ŋa, amma si adɔ̃ nŋu bɛ amaajɛ nwo nŋɛ ŋaui aa kɔ i maa i jɛ ŋa. Kosĩa á gbe nŋɛ má i maa degbeò adɔ̃ mɛɛsãsiau ŋa.

Inɛ iyi í nɛ kpãai ilɛ iyi à ta ku ya

²³ Inɛ kaa ta ilɛ nɔ ku jɛ í tã mbɛ hee do ajɔ fei, domi ilɛu amui ǹ nɔɔ, nɔ ǹ wa n yɛ ŋɛi bɛi inɛ njoo ŋa si ilɛu ihɛ̃.

²⁴ Na ŋɔi í jɔ̀ ilɛ iyi an mu nŋɛu, i jilɛ wooda iyi á jɔ̀ baa bii inɛ gɔ í ta iyi í jɛ tɛɛ ku na ku yɔkɔ ku yaa má.

²⁵ Bii are í na í cuku si inɛi ilɛ nŋɛ gɔ, nɔ í coo tilasi wa ta ilɛɛ gɔ, nyaanzeɛ gɔ iyi í nɛ kpãai ku yaɛi á yaa.

²⁶ Bii í jɛ lafɛ̃ɛ kù nɛ nyaanze gɔ iyi í nɛ kpãai ku yaɛi, bii nŋu takaɛ í na í ba daama iyi á yɔkɔ ku yaò ndɛɛ,

²⁷ á ce doai fia iyi í nɛ ku sãa inɛ iyi í ra ilɛui hai zaka bɛi jiai adɔ̃ iyi wa gbe ara ku nɛ mmuɛ koo toò wa. Á sãa inɛɛu njɛ fiaɛi ku bɛi ku gba ilɛɛ.

²⁸ Bii kù ba mii iyi á sãò, ilɛu ti inɛ iyi í raaui á jɛ hee koo toò adɔ̃i ara ku nɛu. Si adɔ̃i ara ku nɛu bɛi inɛ iyi í ra ilɛu á sindoa ilu ilɛu ilɛɛ.

²⁹ Bii inɛ gɔ í ta kpasɛ̃ɛ bii í ya sũ si inɔ ilu iyi à ma bindi à kaakoɛ, í nɛ kpãai ku yaɛ si afei adɔ̃ akã.

³⁰ Bii í jɛ lafɛ̃ɛ kù ya kpasɛ̃u hee adɔ̃ akãu í lɔ, ti inɛ iyi í raaui á jɛ, nŋu do tɔkuɛ ŋa hee do ajɔ fei. Baa bii í jɛ adɔ̃i ara ku nɛu í to, njɛ kù nɛ ku fita má.

³¹ Amma bii kpasɛ̃ gɔ iyi í wa ilɛɛko iyi kù nɛ bindi bɛɛbɛi, wooda akãui á jɛ do ti ilɛu. Inɛ nŋu, kpãai ku yaɛ á wɛɛi hee do ajɔ fei. Bɛi í jɛò fei, si adɔ̃i ara ku nɛu, ilu kpasɛ̃u á gba ndɛɛi.

³² Amma ilui inɛi Levii ŋa do kpasɛ̃ nŋa ŋa iyi à nɛ, wooda í wɛɛ nŋa à ya ndu ŋa waati iyi à bi fei.

³³ Baa bii í jɛ inɛi Levii gɔi í ra kpasɛ̃i inɛi Levii kpaasiɛ, bii adɔ̃i ara ku nɛu í to á sindoa ndɛɛi. Í nɛ ku ce bɛɛbɛi, domi ilui inɛi Levii ŋa, aŋai à nɛ ndu ŋa si inɔi inɛi Izirɛli ŋa.

³⁴ Amma iko ŋa iyi à wa kɔkɔi ilui inɛi Levii ŋau a kaa taa, domi nŋu bɛi í jɛ tu ŋa hee do ajɔ fei.

Gbese ku dasi ilu are ŋa

³⁵ Bii are í na í cuku si inɛ nŋɛ gɔ, i sobiɛ ŋa ku ba ku yɔkɔ ku maa mɔsi kuwɛɛɛ bi tu ŋɛ. Bɛɛbɛ mɔi aa ya ce ŋa baa bii í jɛ inɛ njooi í wa bi tu ŋɛ.

³⁶ I maà dɛ siɛ riba kãma ŋa. I jɔ̀ kuce nŋɛ ku nyisi iyi ì waa jirimam ŋa, nɔ i jɔ̀ ku maa wa kɔkɔ nŋɛ.

³⁷ Bii ì wɛ̃a inɛ nŋɛ gɔ fia, i maà daa si inyi ŋa, nɔ bii ì wɛ̃a mii ku jɛ, i maà beeɛ ku re zaka bɛi ì náa ŋa.

³⁸ Amui ǹ jɛ Aɔ̃ Lafɛ̃ɛ nŋɛ, amui ǹ nya ŋɛ wa hai ilɛi Ezibiti, ku ba n mu nŋɛ ilɛi Kanaã nɔ n jɛ Ilaaɔ̃ Lafɛ̃ɛ nŋɛ.

Inɛ iyi í nɛ kpãai inɛɛ ku ya

³⁹ Bii are í na í ba inɛ nŋɛ gɔ iyi í wa kɔkɔ nŋɛ, nɔ wa bi ku ta araɛ bɛi aru bi tu ŋɛ, i maà tilasiɛ í kãa icɛ bɛi aru,

⁴⁰ amma i cea bɛi woo ce icɛ ku gba fia, walakɔ bɛi inɛ njoo iyi í wa kpasɛ̃ nŋɛ. Á maa ce nŋɛ icɛi hee adɔ̃i ara ku nɛu koo toò.

⁴¹ Si adɔ̃i ara ku nɛu bɛi á nɛ araɛ, nŋu do amaɛ ŋa fei. Á nɛ bi nyaanzeɛ ŋai, nɔ ku nyi si ilɛɛ ŋa.

⁴² Inɛi Izirɛli ŋa arum ŋai, amui ǹ nya ŋa wa hai ilɛi Ezibiti, na ŋɔi í jɔ̀ a kaa ta ŋa má bɛi à ya ta inɛ ŋa a jɛ aru.

⁴³ I maà ta nŋa gbugbã ŋa. I jɔ̀ isɛɛnɛ nŋɛ ku nyisi iyi ì waa jirima amu Ilaaɔ̃ Lafɛ̃ɛ nŋɛ.

⁴⁴ Bii ì waa bi aru ŋa, hai bi inɛ ŋa iyi à waa kaako ŋɛ ŋau bɛi aa ba ŋa.

⁴⁵ Aa yɔkɔ i ra aru ŋa hai bi inɛ njoo ŋa iyi à wa bi tu ŋɛ ŋau bɛ, walakɔ si tuubai nyaanze nŋa ŋa iyi à bí si ilɛ nŋɛ ŋau, nɔ iŋɛi aa nɛ ŋa ŋa.

⁴⁶ Si anyi nŋɛ nɔ i na i jɔ̀a ama nŋɛ ŋa a jɛ tubu nŋa ku ba a jɛ ti aŋa mɔ. Aa mu ŋai a jɛ aru nŋɛ hee do ajɔ fei. Amma si gãmɛi iŋɛ inɛi Izirɛli ŋa iŋɛ duusɔ̃ɔ, inɛ kãma nŋɛ ku maà taa kpaasiɛ gbugbã.

⁴⁷ Bii inɛ njoo gɔ iyi í wa si ilɛ nŋɛ í na í jɛ ilu fia, nɔ inɛi ilɛ nŋɛ gɔ are í na í dasiɛ nɔ í ta araɛ bi inɛ njoo ilu fiau, walakɔ bi inɛ mmu gɔ iyi í jɛ si tuubai inɛ njoo ŋau,

⁴⁸ igbãɛ walakɔ ifɔɛ gɔ á yɔkɔ ku yaa.

⁴⁹ Bii kù nɛ igbã walakɔ ifɔ gɔ iyi á yɔkɔ ku yaa mɔi, asiɛ gɔ á yaa, walakɔ amai asiɛ gɔ. Bii kù jɛ bɛɛbɛ mɔ si nyaanzeɛ inɛ mmu gɔ á yɔkɔ ku yaa. Baa nŋu takaɛ mɔ á yɔkɔ ku ya araɛ bii í ba kpãaɛ.

⁵⁰ Á ce doaɛi nŋu do inɛ iyi í raau hai adɔ̃ iyi í ta araɛu hee ku naa adɔ̃i ara ku nɛu, nɔ jiai fia iyi á sã í wa si jiai adɔ̃ bɛi í ce. Á ce doai fiaui si zaka bɛi á ya sãa woo ce icɛ ajɔ akã fei.

⁵¹ Bii í jɛ adɔ̃i ara ku nɛu nkpɔ nkpɔi wa gbe, fia nkpɔ nkpɔi nŋu mɔ á sã ku bɛi ku yaò araɛ. Á ce doai fia zaka bɛi à raaui ku bɛi ku yaò araɛ.

⁵² Bii í jɛ adɔ̃i ara ku nɛ iyi í gbeu kù kpɔ má, á ce doai fiai adɔ̃ ŋa iyi à gbeui ku sãsi.

⁵³ Bii í wa bi inɛ iyi í raau, lafɛ̃ɛ á maa muui bɛi amaacɛ iyi aa sãa fiaɛ bii adɔ̃ í ka. I ya maa ce laakaiɛ ŋa ku ba lafɛ̃ɛɛu ku maà muu do kugaabu.

⁵⁴ Bii kù ya araɛ do yaase ŋau bɛ kãma, si adɔ̃i ara ku nɛui á fita, nŋu do amaɛ ŋa.

Amui ǹ jɛ Aɔ̃ Lafɛ̃ɛ nŋɛ

⁵⁵ Arum ŋai iŋɛ inɛi Izirɛli ŋa ì jɛ ŋa. Amui ǹ nya ŋɛ wa hai ilɛi Ezibiti. Amui ǹ jɛ Aɔ̃ Lafɛ̃ɛ nŋɛ.