Kuwee 24 - Bibeli do fee

Bi ku lesi fitilai ile bi kukou

¹ Aɔ̃ Lafɛ̃ɛ í sɔ̃ Moizi í ni,

² jɔ̀ inɛi Izirɛli ŋau a naaɛ ikpoi olivi iyi à fɔ̃ wa ku jɛ ti ile bi kukou ku ba fitila ŋau à ya maa jo waati kãma fei.

³ Arɔ̃ɔi á ya teese fitilai anui ile bi kukou do wajui acɔ iyi wa bii kpakoi akabuuu. Fitila ŋau aa maa joi alɛò daakɔ si wajum. Wooda iyi bɛ á maa wɛɛi do ajɔ fei na tɔku nŋɛ ŋa.

⁴ Arɔ̃ɔi á lesi fitila ŋau si antaii bi ku lesi fitila iyi à ce do wura alalau ku ba fitila ŋau a ya maa jo waati kãma fei si wajum.

Pɛ̃ɛ ŋa iyi à ceaò Aɔ̃ Lafɛ̃ɛ kuwee

⁵ Aɔ̃ Lafɛ̃ɛ í sɔ̃ Moizi má í ni, so iyafũ i ceò pɛ̃ɛ ara maateeji. Pɛ̃ɛ akã fei kuwoɛ kiloo minjii á jɛ.

⁶ Aa koo jilɛ ŋai ikɔ minji, si ikɔ akã fei ara mɛɛfa. Aa jilɔɔi si taabu iyi à ce do wura alalau si wajum.

⁷ Nɔ i dasi tuae kumáu si ikɔ ŋau fei, si anyiɛ nɔ i naa i joo na bɛɛrɛm si agbɛi pɛ̃ɛu a maa yeò gigiɛ.

⁸ Si ajɔi kusĩmi fei Arɔ̃ɔ á ya jilɛ pɛ̃ɛ ŋaui si wajum. Pɛ̃ɛ ŋa iyi inɛi Izirɛli ŋa aa ya maa naaò wa hee do ajɔ feiu. Akabuu gɔi iyi aa ya maa jirima dee dee waati kãma fei.

⁹ Pɛ̃ɛ ŋau ti Arɔ̃ɔ do ti amaɛ ŋai á baa ku jɛ, nɔ aa ya jɔ́ɔi si inya gɔ iyi à nya ikã. Pɛ̃ɛ ŋau à mái jiida jiida si na iyi í jɔ̀ à ceem do kuwee iyi à ya jo si ina, nɔ ikpɛ̃ iyi bɛ í baa í jɛ ti woo wee ŋau hee do ajɔ fei.

Ijuukpãi inɛ iyi í ceekpe Aɔ̃ Lafɛ̃ɛ

^10-11 Inaaboi Izirɛli gɔ iyi à ya kpe Kelomi ama inaaboi Dibiri si dimii Dãa, í so mɔkɔ. Mɔkɔu í jɛ inɛi Ezibiti. À bí ama inɛmɔkɔ. Ajɔ nŋu gɔ ija í dede si asɔi inɛi Izirɛli ŋa hai si afei inɛɛu do inɛi Izirɛli gɔ. Ŋɔi ama inɛmɔkɔi Kelomiu í bu Aɔ̃ Lafɛ̃ɛ, domi wa yaako Aɔ̃ Lafɛ̃ɛ si ide ku fɔɛ. Ŋɔi gbakã à muu à naaɛ wa bi Moizi,

¹² nɔ à waa degbeɛ jiida jiida à waa degbeò Aɔ̃ Lafɛ̃ɛ takaɛ ku fɔ ijuukpã iyi aa nyisiɛ.

¹³ Aɔ̃ Lafɛ̃ɛ í sɔ̃ Moizi í ni,

¹⁴ i fitaò inɛ iyi i bum nɔu hai asɔ nŋɛ, nɔ inɛ ŋa iyi à gbɔ bɛi í dɔ̃ɔm nɔu fei a lea awɔ si iri, si anyiɛ zamaau ku bɛi ku taa kuta.

¹⁵ Aɔ̃ Lafɛ̃ɛ í nyi í ni Moizi ku sɔ̃ inɛi Izirɛli ŋau ku ni, inɛ iyi í ceekpe Aɔ̃ Lafɛ̃ɛɛ fei á ba wahalai dulum dɛɛ.

¹⁶ Inɛ iyi í bu Aɔ̃ Lafɛ̃ɛ fei, zamaau á ta lafɛ̃ɛ kutai ku kpaa. Bii í yɔkɔ lafɛ̃ɛ ku jɛ inɛ njoo walakɔ ilu ide, á kui na irii Aɔ̃ Lafɛ̃ɛ iyi í buu.

¹⁷ Bii inɛ gɔ í cã inɛ mmu í kpaa, aa kpa nŋu mɔi.

¹⁸ Inɛ iyi í cã mɛɛmui inɛ gɔ í kpaa, á dɛ mɛɛmu njaawɛ mmuɛi ku sãsi.

¹⁹ Bii inɛ gɔ í mɛɛ inɛ mmu, zaka bɛi í mɛɛ inɛɛu zaka bɛɛbɛi aa mɛɛ nŋu mɔ.

²⁰ Bii í cɛ bii gɔi inɛ mmu, aa cɛ ti nŋu mɔi. Bii í nya ijui inɛ mmu aa nya ijui nŋu mɔi. Bii í nya inyíi inɛ mmu aa nya ti nŋu mɔi. Laalɔ iyi í cea inɛ mmuu, laalɔ nŋu mɔi aa sãa nŋu mɔ.

²¹ Inɛ iyi í kpa mɛɛmui inɛ gɔ á sãsi mmuɛi. Inɛ mɔ iyi í kpa amanɛ, aa kpa nŋu mɔi.

²² Wooda akãu bɛi á jɛ ti inɛ njoo do ilu ide fei. Amui ǹ jɛ Aɔ̃ Lafɛ̃ɛ nŋɛ.

²³ Nɔ Moizi í sisia inɛi Izirɛli ŋa wooda ŋau. Ŋɔi à nya inɛ iyi í bu Aɔ̃ Lafɛ̃ɛu hai asɔ à fitaɛ à koo à taa kuta à kpaa. Inɛi Izirɛli ŋau à ce bɛi Aɔ̃ Lafɛ̃ɛ í tako í sɔ̃ Moiziu.