Kuwee 23 - Bibeli do fee

Waatii jingaui inɛi Izirɛli ŋa

¹ Aɔ̃ Lafɛ̃ɛ í sɔ̃ Moizi í ni,

² sɔ̃ inɛi Izirɛli ŋau i ni, jingaui amu Aɔ̃ Lafɛ̃ɛ iyi aa ce ŋaui aa jɛ kutɔtɔɔ ŋa iyi à má. Jingaum ŋau wee.

Ajɔi kusĩmi

³ Si azuma akã fei ajɔ mɛɛfai aa ce icɛ ŋa. Ajɔ mɛɛjesiau ajɔi kusĩmii iyi aa nya ikã ŋa ku ba i ya tɔtɔɔ na irim ŋa. I maà ce icɛ kãma ajɔ nŋu bɛ ŋa, domi ajɔi kusĩmii amu Aɔ̃ Lafɛ̃ɛi tengi bii ì wa fei ŋa.

⁴ Jingaui amu Aɔ̃ Lafɛ̃ɛ iyi aa nya ikã ŋau, mbɔ ŋa iyi à gbe si waati bii aa ya tɔtɔɔ ŋa wee.

Jingaui Iku ku kua do ti Pɛ̃ɛ hai nɛ levɛ̃ɛ

⁵ Si ajɔ maatɛ̃ɛsiai cukpa sintei adɔ̃, hai alɛɛ gbakã aa jɛ jingaui Iku ku kua i naò irii amu Aɔ̃ Lafɛ̃ɛ nŋɛ bɛɛrɛ ŋai.

⁶ Si ajɔ maatũsiai cukpa akãu bɛi aa sinti jingaui Pɛ̃ɛ hai nɛ levɛ̃ɛu. Aa jɛ pɛ̃ɛ hai nɛ levɛ̃ɛ ŋaui ajɔ mɛɛje.

⁷ Ajɔ sintei azumau bɛ, aa tɔtɔɔ njɛ i tɔɔ ŋai, ajɔ nŋu bɛ i nyaa ikã ŋa, i maà ce icɛ kãma iyi ì nɛ dɔ̃ɔnɛi ku ce ŋa.

⁸ Si azumau iju iyi wa má fei, aa ya ceem kuwee iyi à ya jo si ina si wajum ŋai. Si ajɔ mɛɛjesiau aa nyi i tɔtɔɔ mái i ce kutɔɔ do irim ŋa. Ajɔ nŋu bɛ má i kaa ce icɛ kãma iyi ì nɛ dɔ̃ɔnɛi ku ce ŋa.

Jingaui Amaajɛ sinte

⁹ Aɔ̃ Lafɛ̃ɛ í sɔ̃ Moizi má í ni,

¹⁰ sɔ̃ inɛi Izirɛli ŋau i ni, waati iyi aa na i to ilɛ iyi an mu nŋɛu, bii ì da amaajɛ sinte nŋɛ ŋa, i ya naaò kambo akã wa bi woo wee ŋa.

¹¹ Woo weeu á gbugbã kamboui si wajum cingaa bii fei ku ba kuce nŋɛu ku dɔ̃ɔm si. Woo weeu á gbugbã gbugbãɛi si ajɔi kusĩmiu bii iju í má.

¹² Ajɔ nŋu bɛ mɔi aa ceem kuwee iyi à ya jo si ina fei sãa sãa do ama angudãi adɔ̃ akã iyi kù nɛ leebu gɔ.

¹³ Aa tɔtɔɔ i ce kuweeui do iyafũ kiloo mɛɛfa. Aa takiɛi do ikpo nɔ a joo si ina ku ba inunui cuau ku dɔ̃ɔm si, do kuweei vɛ̃ɛ liiti akã do bubu.

¹⁴ I maà jɛ sɔndai amaajɛu kãma ŋa, i maà jɛ pɛ̃ɛ ŋa nɔ i maà ŋɔ ijui amaajɛ ku sɔ̃. I maà jɛ sɔndai amaajɛ titɔ̃ kãma bii i kù ceem kuweeu ŋa. Woodau ihɛ̃ aa ya maa jirimaɛi iŋɛ do tɔku nŋɛ ŋa tengi bii ì wa fei ŋa.

Jingaui Isoi jĩi ŋa ku ka

¹⁵ Iju kumái ajɔi kusĩmiu, hai ajɔ iyi ì naaò amaajɛ sintei iko nŋɛ ŋa wa ku ba a gbugbã gbugbãɛu, azuma mɛɛjei aa ka ŋa cau cau.

¹⁶ Do yaase bɛɛbɛ, ajɔ ciitaai aa ka ŋa hee koo to iju kumái azuma mɛɛjesiai ajɔi kusĩmiu, i bɛi i ceem kuweei iyafũ titɔ̃ mmuɛ má ŋa.

¹⁷ Iŋɛ fei i dɛ pɛ̃ɛ wa ara minji minji hai kpasɛ̃ nŋɛ ŋa i naa i ceem do kuwee. Pɛ̃ɛ akã fei aa cooi do iyafũ kiloo mɛɛta, nɔ i sɔ̃ɔ do levɛ̃ɛ ŋa. Aa ya ceem kuweeui do pɛ̃ɛ iyi à ce do amaajɛ sinte ŋa.

¹⁸ Si waati iyi ì waa ce kuweei pɛ̃ɛu, i naam ama angudã ara mɛɛje iyi a kù nɛ leebu kãma wa, do kɛtɛ kombo akã, do angudã kombo minji. Fei ndɛɛ aa ceem do kuwee iyi à ya jo si ina fei sãa sãai, do kuweei iyafũu do vɛ̃ɛu. Inunui kuwee ŋau, á dɔ̃a amu Aɔ̃ Lafɛ̃ɛ si.

¹⁹ Si anyiɛ nɔ i ceem kuwee mmuɛ do iwo kombo i kpaò dulum du ŋɛ ŋa, do angudã minji iyi à nɛ adɔ̃ akã i ceem do kuweei anu akã ŋa.

²⁰ Woo weeu á gbugbã iŋai kuwee ŋaui si wajui amu Aɔ̃ Lafɛ̃ɛ do amaajɛ sinte ŋau do angudã minji ŋau. Mii ŋau fei ti woo weeui aa jɛ, domi aa nya ŋa ikãi a jɛ titom.

²¹ Ajɔ nŋu bɛ gbakã, aa ce kutɔtɔɔ ŋai i tɔɔ do irim ŋa. I maà ce icɛ nŋɛ kãma iyi ì nɛ dɔ̃ɔnɛi ku ce ajɔ nŋu bɛ ŋa. Woodau ihɛ̃ aa ya maa jirimaɛi iŋɛ do tɔku nŋɛ ŋa tengi bii ì wa fei ŋa.

²² Bii ì waa da amaajɛi ilɛ nŋɛ ŋa, i ya jɔ̀ kɔkɔlɛ gɔ ŋa i maà daa ŋa. Bii í gbe keeke, i maà ya fengeeɛ ŋa. I jɔ̀a ilu are ŋa, do inɛ njoo ŋa. Amui ǹ jɛ Aɔ̃ Lafɛ̃ɛ nŋɛ.

Ajɔi gigi ku ye do ibai kuu ŋa

²³ Aɔ̃ Lafɛ̃ɛ í nyi í sɔ̃ Moizi má í ni,

²⁴ sɔ̃ inɛi Izirɛli ŋau i ni, si ajɔ sintei cukpa mɛɛjesia, i sĩmi ajɔ akã ŋa. Aa tɔtɔɔ ŋai do irim iŋɛ fei, domi ajɔ nŋu ajɔi gigi ku yei do ibai kuu ŋa.

²⁵ Ajɔ nŋu i maà ce icɛ kãma ŋa nɔ i ceem kuwee ŋa iyi à ya jo si ina.

Ajɔ nlai dulum ŋa ku kpa

²⁶ Aɔ̃ Lafɛ̃ɛ í sɔ̃ Moizi má í ni,

²⁷ ajɔ mɛɛwasiai cukpa mɛɛjesiau, ajɔ nlai dulum ŋa ku kpai á jɛ. Aa tɔtɔɔ ŋai do irim i dĩ anu nɔ i ceem kuwee ŋa iyi à ya jo si ina.

²⁸ Ajɔ nŋu bɛ i maà ce icɛ kãma ŋa, domi ajɔi dulum ŋa ku kpai, ajɔ nŋu bɛi aa ce nŋɛ bukii dulum ku kpa si wajui amu Aɔ̃ Lafɛ̃ɛ nŋɛ.

²⁹ Inɛ iyi í ce atafii si anu ku dĩi ajɔ nŋu bɛ fei, aa nyaai hai si inɔi inɛi Izirɛli ŋau.

³⁰ Nɔ si inɔi inɛi Izirɛli ŋau inɛ iyi í ce icɛ gɔ ajɔ nŋu bɛ fei an kpa lafɛ̃ɛi.

³¹ I maà ce icɛ kãma ajɔ nŋu bɛ ŋa. Woodau ihɛ̃ aa ya maa jirimaɛi iŋɛ do tɔku nŋɛ ŋa tengi bii ì wa fei ŋa.

³² Aa ya sĩmi ŋai bɛi ajɔi kusĩmi iyi ihɔ̃u, nɔ i dĩ anu ŋa. I ya jirima ajɔi kusĩmiu ŋa, hai alɛi ajɔ mɛɛsãsiai cukpau hee ku bɔ alɛ ajɔ mmu má.

Jingaui Kusu ŋa

³³ Aɔ̃ Lafɛ̃ɛ í sɔ̃ Moizi má í ni,

³⁴ sɔ̃ inɛi Izirɛli ŋau i ni, hai si ajɔ maatũsiai cukpa mɛɛjesiau, aa jɛ jingau ŋai azuma akã na irii amu Aɔ̃ Lafɛ̃ɛ.

³⁵ Ajɔ sinteu aa tɔtɔɔ ŋai i tɔɔ do irim ŋa, nɔ i maà ce icɛ kãma ajɔ nŋu bɛ ŋa.

³⁶ Si azumau ajɔ akã fei aa ya ceem kuwee ŋai. Ajɔ mɛɛjɔsiau má, bɛɛbɛi aa tɔtɔɔ má do irim ŋa, nɔ i nyi i ceem kuwee iyi à ya jo si ina má ŋa. Ajɔi kutɔtɔɔi ankãanyiu má, i maà ce icɛ kãma ŋa.

³⁷ Mii ŋa iyi aa ya ce si waatii jingaui amu Aɔ̃ Lafɛ̃ɛ ŋau wee. Aa ya tɔtɔɔ njɛ ŋai i ce kutɔɔ do irim, nɔ i ceem kuwee ŋa iyi à ya jo si ina si wajum, do iyi à ya jo si ina fei sãa sãa, do kuweei iyafũ, do kuweei anu akã, do kuweei vɛ̃ɛ ŋau. Aa ce fei ndɛɛi do ajɔɛ si yaase bɛi à ya coo.

³⁸ Kuwee ŋau ihɛ̃i aa ce a kɔ̃ɔm si iyi à ya ceem ajɔi kusĩmiu, bɛi amua ŋa, do kuwee ŋa iyi aa yɔkɔ i ceem do idɔɔbi nŋɛ, walakɔ ku ba i kɔ̃ kuwã gɔ iyi ì ce ŋa.

³⁹ Ajɔ maatũsiai cukpa mɛɛjesiau, bii ì da amaajɛi ilɛ nŋɛ ŋa, i cea amu Aɔ̃ Lafɛ̃ɛ jingau ŋa ajɔ mɛɛje. Ajɔ sinteu ajɔi kusĩmii á jɛ. Nɔ ajɔ mɛɛjɔsiau mɔ má, ajɔi kusĩmii.

⁴⁰ Ajɔ sinteu i dɛdɛ isoi jĩi kusĩa ŋau, do amaawɔi kpakpa ŋa, do amaawɔi jĩi ŋa iyi à kuku, do jĩi ndii itĩi ido ŋau, nɔ i wɛɛò inɔ didɔ̃ si wajum ŋa ajɔ mɛɛje.

⁴¹ Adɔ̃ fei aa ya ceem jingauu bɛ ŋai ajɔ mɛɛje. Woodau ihɛ̃ aa ya maa jirimaɛi iŋɛ do tɔku nŋɛ ŋa tengi bii ì wa fei ŋa. Aa ya coo ŋai si cukpa mɛɛjesia.

⁴² Ajɔ mɛɛje ŋau bɛ fei, si ile kusu ŋai aa ya wa ŋa. Waati bɛɛbɛ inɛi Izirɛli fei, si ile kusui á ya wa,

⁴³ ku ba tɔku nŋɛ ŋa a mà iyi waati iyi ǹ nya ŋɛ wa hai ilɛi Ezibiti si ile kusu ŋai ǹ jɔ̀ ì wa ŋa. Amui ǹ jɛ Aɔ̃ Lafɛ̃ɛ nŋɛ.

⁴⁴ Bɛɛbɛi Moizi í sisia inɛi Izirɛli ŋau jingau ŋa iyi aa ya cea Aɔ̃ Lafɛ̃ɛ.