Kuwee 22 - Bibeli do fee

Yaase bɛi aa jɛò kuwee ŋa iyi à cea Aɔ̃ Lafɛ̃ɛu

¹ Aɔ̃ Lafɛ̃ɛ í sɔ̃ Moizi í ni,

² sɔ̃ Arɔ̃ɔ do amaɛ ŋa waati ŋa iyi à nɛ a mu ara nŋa si kuwee kumá ŋa iyi inɛi Izirɛli ŋa à ceem, ku ba a maà bɛjɛ iri kumám. Amui Aɔ̃ Lafɛ̃ɛ.

³ Sɔ̃ ŋa i ni inɛ iyi á na ku dede ku jɛ woo wee si ama nŋa ŋa hee ku koo si tɔku nŋa ŋa, bii wa sɛkɛɛ si kuwee kumá ŋa iyi inɛi Izirɛli ŋau à ceem wa, nɔ nŋu takaɛ í nɛ riisi gɔ, aa ganji lafɛ̃ɛ si icɛu ku cei. Amui Aɔ̃ Lafɛ̃ɛ.

⁴ Woo wee iyi bɔ̃ɔi batai ara í muu walakɔ iyi wa ce bɔ̃ɔi kentu, kù nɛ kpãai ku jɛ ijɛi kuwee kumáu kãma waati iyi kù ce buki iyi á jɔ̀ ku maaju. Bɛɛbɛ mɔi á jɛ do woo wee iyi í lu inɛ gɔ iyi í dasi araɛ riisi na iku gɔ iyi lafɛ̃ɛ í lu, do woo wee iyi inyii inɛmɔkɔɛ í naa si araɛ,

⁵ do woo wee iyi í lu mii ku cã ilɛ gɔ í dasiò araɛ riisi, walakɔ woo wee iyi í lu inɛ gɔ iyi í dasiɛ riisi fei.

⁶ Woo wee iyi í lu mii dimi bɛɛbɛ gɔ fei, ilu riisii á jɛ hee alɛ koo lɛò. Kaa jɛ ijɛi kuwee kumáu kãma, í gbe hee bii í wɛ do inyi sãa sãa.

⁷ Si anyii ku lɔi nunu, lafɛ̃ɛ á maaju, nɔ á yɔkɔ ku jɛ ijɛi kuwee kumá ŋau, domi sɔndaɛi.

⁸ Woo wee kaa ŋɔ mɛɛmu iyi í ku do araɛ, kaa nɔ ku ŋɔ iŋa iyi mɛɛmui sako gɔ í gagaga, ku ba ku maà dasi araɛ riisi na nŋu bɛ. Amui Aɔ̃ Lafɛ̃ɛ.

⁹ Woo wee ŋau a too si bɛi ǹ sɔ̃ ŋa fei dee dee, ku ba a maà ti a na a so taale si mii iyi í jɛ idei sɔnda ŋau. Bii à jɔ̀ sɔnda ŋau à so riisi, aa kui. Amui Aɔ̃ Lafɛ̃ɛ, nɔ amui ǹ nya ŋa ikã ku ba a má.

¹⁰ Inɛ iyi kù jɛ nyaanzei woo wee kãma kù nɛ kpãai ku jɛ ijɛi kuweeu. Baa inɛ njoo iyi í naa bi woo weeu, walakɔ woo ce icɛɛ gɔ kù nɛ kpãai ku jɔ́ɔ.

¹¹ Amma aru iyi woo weeu í ra do fia á yɔkɔ ku jɛ. Bɛɛbɛ mɔi aru iyi à bí si inɔ kpasɛ̃u á yɔkɔ ku jɛ.

¹² Bii ama inaaboi woo wee gɔ í so inɛ mmu iyi kù jɛ woo wee, kù nɛ kpãai ku jɛ mii iyi à bu hai si kuwee kumá ŋau.

¹³ Amma ama inaaboi woo wee iyi í na í jɛ jaaɔ̃, walakɔ iyi aŋaò mɔkɔɛ a kù wɛɛa njɛ má, iyi kù nɛ ama kãma, nɔ í baa í naa í wa bi baaɛ bɛi waatii mudɛ̃ɛɛ, á yɔkɔ ku jɛ sɔnda iyi baaɛ mɔ wa jɛ fei. Bii baai nŋu bɛ í lɔ, inɛ mmu kãma kù nɛ kpãai ijɛi kuwee ŋau ku jɛ.

¹⁴ Inɛ mmu gɔ iyi í jɛ sɔnda kumáu si na iyi í jɔ̀ kù mà, á koo na woo weeu mii iyi í mungaò zaka bɛi í jɛui. Nɔ bii à kpɛ̃ sɔnda iyi í jɛu ikɔ miiu, akãi á kɔ̃ɔsi si antaiɛ má.

¹⁵ Woo wee ŋau a kù nɛ a jɔ̀ mii ŋa iyi inɛi Izirɛli ŋa à naaò wa a ceaò amu Aɔ̃ Lafɛ̃ɛ kuwee ŋau a so riisi.

¹⁶ Bii à jɔ́ɔ si waati iyi a kù nɛ kpãai ku jɛɛ, aa kãa inɛi Izirɛli ŋa taalei, nɔ í gbe a naa a ce ku teeseɛ. Amui ǹ jɛ Aɔ̃ Lafɛ̃ɛ nɔ amui ǹ ya n jɔ̀ kuwee ŋa a má.

Wooda ŋa iyi aa ya cicaò mɛɛmu ŋa iyi aa ceò kuwee

¹⁷ Aɔ̃ Lafɛ̃ɛ í sɔ̃ Moizi í ni,

¹⁸ sɔ̃ Arɔ̃ɔ do amaɛ ŋa do inɛi Izirɛli ŋau fei i ni, bii inɛ gɔ si inɔi inɛi Izirɛli ŋa, walakɔ inɛ njoo gɔ iyi í wa si ilɛi Izirɛli, wa bi ku cea amu Aɔ̃ Lafɛ̃ɛ kuwee iyi à ya jo si ina fei sãa sãau do idɔɔbiɛ walakɔ ku kɔ̃ kuwã gɔ iyi í ce,

¹⁹ bii wa bi kuweeɛ ku dɔ̃ɔm si, í gbe ku naaò mɛɛmu kombo iyi kù nɛ leebu gɔ wa si inɔi kɛtɛ, walakɔ angudã, walakɔ iwo.

²⁰ Kú maà naam mɛɛmu kãma iyi í nɛ leebu wa, domi kaa na ku dɔ̃ɔm si.

²¹ Bii wa bi ku ceem kuweei anu akã do kɛtɛ walakɔ do angudã ku ba ku kɔ̃ò kuwã gɔ iyi í ce, walakɔ bii wa cooi do idɔɔbiɛ, mɛɛmuu á jɛ mɛɛmu iyi kù nɛ leebu gɔi ku ba ku dɔ̃ɔm si.

²² Na nŋu, i maà kooò mɛɛmu fɛɛju kãma ŋa, nɔ i maà kooò mɛɛmu gɔ iyi kutɛ akãɛ í cɛ ŋa, walakɔ mɛɛmu gɔ iyi í ba kumɛɛ, walakɔ mɛɛmu iyi í nɛ ngoli ŋa, walakɔ mɛɛmu iyi wa ce kuusa, walakɔ mɛɛmu iyi batai araɛ í nɛ juju bii fei. I maà cea amu Aɔ̃ Lafɛ̃ɛ kuwee do mɛɛmu dimi bɛɛbɛ ŋa.

²³ Aa yɔkɔ i cea amu Aɔ̃ Lafɛ̃ɛ kuwee iyi í jɛ do idɔɔbiɛ do kɛtɛ walakɔ do angudã walakɔ do iwo iyi kutɛ akãɛ í sɔ í re, walakɔ iyi kutɛ akãɛ í kandaa hee í caa í re kutɛ kpaasi ŋau. Amma bii ì ceem kuwee do mɛɛmu dimi bɛɛbɛ gɔ i ba i kɔ̃ kuwã gɔ iyi ì ce, kaa dɔ̃ɔm si.

²⁴ I maà ceem kuwee do mɛɛmu iyi kpangoɛ í yuguu, walakɔ í lɛgɛ, walakɔ iyi à mu a daa walakɔ à buu. I maà cea mɛɛmu ŋa bɛɛbɛ si ilɛ nŋɛ.

²⁵ I maà ra mɛɛmu dimi bɛɛbɛ kãma hai bi inɛ njoo gɔ i ceaò amu Aɔ̃ Lafɛ̃ɛ nŋɛ kuwee ŋa. Bii à ceaa dimi bɛɛbɛ, í nɛ leebu ŋa mbɛ, nɔ kaa dɔ̃a amu Aɔ̃ Lafɛ̃ɛ si.

²⁶ Aɔ̃ Lafɛ̃ɛ í sɔ̃ Moizi má í ni,

²⁷ ama kɛtɛ, walakɔ ama angudã, walakɔ ama iwo, bii à búu azuma akãi á ce si fitii iyeɛ. Amma hai ajɔ mɛɛjɔsiaɛ bii à ceaò amu Aɔ̃ Lafɛ̃ɛ kuwee, á dɔ̃ɔm si.

²⁸ Amma hai kɛtɛ, walakɔ angudã hee ku koo si iwo, i maà saka gɔgɔɛ gɔ do amaɛ ajɔ́ ŋa.

²⁹ Bii ì waa cea amu Aɔ̃ Lafɛ̃ɛ kuweei anu akã, i coo do yaase bɛi á dɔ̃ɔm si ŋa.

³⁰ Iŋau ajɔ nŋuu bɛi aa ŋɔɔ ŋa, i maà jɔ̀ kãma hee iju ku má ŋa. Amui ǹ jɛ Aɔ̃ Lafɛ̃ɛ.

³¹ I jirima woodam ŋa, nɔ i ceò icɛ ŋa. Amui ǹ jɛ Aɔ̃ Lafɛ̃ɛ.

³² I maà riisi iri kumám nɔu ŋa, ku ba inɛi Izirɛli ŋau a mà iyi ǹ má. Amui ǹ jɛ Aɔ̃ Lafɛ̃ɛ iyi í nya ŋɛ ikã,

³³ nɔ amui ǹ nya ŋɛ wa hai ilɛi Ezibiti ku ba n jɛ Ilaaɔ̃ Lafɛ̃ɛ nŋɛ. Amui Aɔ̃ Lafɛ̃ɛ.