Kuwee 21 - Bibeli do fee

Wooda iyi í jɛ ti woo wee ŋa Kuwɛɛi woo wee ŋa

¹ Aɔ̃ Lafɛ̃ɛ í sɔ̃ Moizi í ni, sɔ̃ amai Arɔ̃ɔ woo wee ŋau i ni, woo wee kãma ku maà bɔ kɔkɔi ikui nyaanzeɛ gɔ ku ba ku maà dasi araɛ riisi,

² í gbe bii í jɛ ti nyaanzei kpasɛ̃ɛ gɔi. Bii í jɛ ti iyeɛ, walakɔ ti baaɛ, walakɔ ti ama inɛmɔkɔɛ walakɔ ti ama inaaboɛ, walakɔ ti ifɔɛ walakɔ ti igbãɛ,

³ do ti wecĩɛ iyi kù mà mɔkɔ, á yɔkɔ ku dasi araɛ riisi.

⁴ Amma ti inɛi kpasɛ̃ mmu, woo wee kù nɛ ku dasi araɛ riisi.

⁵ Bii iku gɔ í ce, woo wee ŋau a kù nɛ a ja ntoi iri nŋa hee má jɛ a wa cingaai agbã nŋa ŋa, a kù nɔ a kù nɛ a bu ara nŋa kãma.

⁶ Aa jɛ inɛ ŋa iyi à nya ikã na icɛi amu Ilaaɔ̃ Lafɛ̃ɛ nŋa, nɔ a ce laakai a maà dasi irim anyɔ. Aŋai aa ya koo a ce kuwee ŋa iyi à ya jo si ina si wajum iyi á jɛ sɔndam, nɔ aa ya jɛ inɛ kumá ŋa.

⁷ Woo wee ŋa a kaa so inaabo iyi í ce sakara ku jɛ abo nŋa, walakɔ inaabo iyi í mà mɔkɔ. A kaa nɔ a so inaabo gɔ iyi mɔkɔɛ í kɔ̀siɛ wa, domi à jɛ inɛ kumá ŋa iyi à nya ikã na icɛm.

⁸ Inɛi Izirɛli fei ku jirima kumái woo wee ŋau, domi aŋai à waa ceem kuwee ŋa iyi ì waa naam wa ŋau. Na nŋu, inɛ fei ku jirima kumái woo wee ŋau, domi amu Aɔ̃ Lafɛ̃ɛ amu takam ǹ mái, amu iyi ǹ nya ŋɛ ikã i jɛ inɛ kumá ŋa.

⁹ Bii ama inaaboi woo wee gɔ wa ce sakara wa kpaò jirimai araɛ, jirimai baai wa kpa bɛ. Aa jooi njaawɛ.

¹⁰ Woo wee nlaui í jɛ inɛ ngboi woo wee ŋa iyi à gbe ŋau fei, nŋu iyi à tontooa ikpo iyi à ya tontooa inɛ ŋa iyi à cicau si iri, nɔ à nyaa ikã à daa si ibɔi kuwee ŋau, kù sĩa ku jɔ̀ iriɛ hai teese na inɔ kufɔi iku hee má jɛ ku ga jĩnɛɛ ŋa.

¹¹ Kaa bɔ bi iku gɔ, kaa nɔ ku dasi araɛ riisi baa na ikui baaɛ walakɔ ti iyeɛ.

¹² Kaa fita hai ile bi kukou ku ba ku maà na ku jɔ̀ ku so riisi, domi ǹ nyaa ikãi na icɛm do saabui ikpo kumáu. Amui Aɔ̃ Lafɛ̃ɛ.

¹³ Mudɛ̃ɛ iyi kù mà mɔkɔi á so ku jɛ aboɛ.

¹⁴ Kaa so jaaɔ̃, kaa nɔ ku so inaabo gɔ iyi í kɔ̀ mɔkɔɛ wa, walakɔ iyi mɔkɔɛ í kɔ̀ɔ wa. Kaa so inaabo iyi kù nɛ jirima hee má jɛ woo ce sakara. Amma inaabo iyi kù mà mɔkɔi á so si inɔi inɛi Leviii ŋa,

¹⁵ ku ba ku maà jɔ̀ riisi ku lɔ si nyaanzeɛ wa. Amu Aɔ̃ Lafɛ̃ɛi ǹ cicaɛ ǹ nyaa ikã na icɛm.

Mii iyi á ganji icɛi kuweeu

¹⁶ Aɔ̃ Lafɛ̃ɛ í sɔ̃ Moizi í ni,

¹⁷ sɔ̃ Arɔ̃ɔ ide ŋau ihɛ̃ i ni, amaɛ ŋa, do tɔkuɛ ŋa, inɛ nŋa iyi í na í nɛ leebu si ara ku maà naa kɔkɔi amu Aɔ̃ Lafɛ̃ɛ kuwee ku ceem.

¹⁸ Inɛ iyi í nɛ leebu kãma kaa ce icɛi kuweeu. Fɛɛju, do ilu kutɛ akã, do inɛ iyi í nɛ leebu gɔ si wajuɛ, walakɔ inɛ iyi ikɔ̃ akãi araɛ í sɔ í re,

¹⁹ do inɛ iyi kutɛɛ walakɔ ikpaɛ í cɛ,

²⁰ do ilu kɔɔma, do inɛ iyi í jɛ kusu, do inɛ iyi ijuɛ í le, do inɛ iyi wa ce bɔ̃ɔi kuusa, do inɛ iyi njɛi kpangoɛ ŋa í lɛgɛ.

²¹ Inɛ iyi í jɛ dimii Arɔ̃ɔ woo weeu iyi í nɛ leebu gɔ si araɛ fei kaa naa kɔkɔi amu Aɔ̃ Lafɛ̃ɛ ku ce kuwee iyi à ya jo si ina si wajum. Na leebu iyi í nɛui í jɔ̀ kaa naaò kuwee gɔ wa bi tom.

²² Á yɔkɔ ku jɛ ijɛ iyi à ceaò amu Aɔ̃ Lafɛ̃ɛ kuwee. Á yɔkɔ ku jɛ ijɛ ŋa mɔ iyi à má jiida jiida do ijɛ ŋa iyi à má si azaga,

²³ amma na saabui leebuɛu kù nɛ kpãai ku maai bi acɔi ile kumáu hee má jɛ ku maai si bi kuweeu. Kù sĩa ku riisi ile bi kukom, domi amui ǹ jɛ Aɔ̃ Lafɛ̃ɛ, nɔ amui ǹ ya n nya inɛ ŋa iyi aa ya ceem icɛi kuweeu ikã.

²⁴ Bɛɛbɛi Moizi í sisia Arɔ̃ɔ do amaɛ ŋa do inɛi Izirɛli ŋau ide ŋau fei.