Kuwee 20 - Bibeli do fee

Kutɔɔ ŋa iyi à ganji

¹ Aɔ̃ Lafɛ̃ɛ í sɔ̃ Moizi í ni,

² sɔ̃ inɛi Izirɛli ŋau i ni, bii inɛ gɔ si inɔi inɛi Izirɛli ŋau, walakɔ si inɔi inɛ njoo ŋa iyi à wa ilɛi Izirɛliu, inɛ gɔ í cea iwɛ̃ iyi à ya kpe Molɔkuu kuwee do ama akãɛ, aa kpa lafɛ̃ɛi. Inɛi ilɛ bɛ ŋau aa taa kutai a kpaa.

³ Nɔ amu takam an sinda si lafɛ̃ɛ wai nɔ n nyaa hai si aninii inɛɛ ŋa si na iyi í jɔ̀ í mu amaɛ í ceaò Molɔku kuwee nɔ í riisi irim do ile bi kukou.

⁴ Bii inɛi ilɛ ŋau à bii iju si mii dimi bɛɛbɛ nɔ a kù kpa inɛ iyi í ce bɛɛbɛu,

⁵ amu takam nii an sinda si lafɛ̃ɛ do nyaanzeɛ ŋa nɔ n nya ŋa hai si inɔi inɛi Izirɛli ŋau, nŋu do inɛ ŋa iyi aŋaò ŋa à tɔtɔɔ à cea Molɔku kuweeu.

⁶ Bii inɛ gɔ í sinda si woo tɔɔ hundei iku ŋa, walakɔ bii í sinda si woo ce alisi ŋa, an sinda si lafɛ̃ɛi, nɔ n nyaa hai si inɔi inɛi Izirɛli ŋa.

⁷ I nya ara nŋɛ ikã ku ba i jɛ inɛ kumá ŋa, domi amui ǹ jɛ Aɔ̃ Lafɛ̃ɛ nŋɛ.

Sɛ̃ɛ ku tɔtɔɔ iyi à ganji

⁸ I ya jirima woodam ŋa nɔ i ya maa ceò ŋa icɛ ŋa. Amui ǹ jɛ Aɔ̃ Lafɛ̃ɛ, amu iyi ǹ nya ŋɛ ikã ku ba i má ŋa.

⁹ Bii inɛ gɔ í ceekpe baaɛ walakɔ iyeɛ, aa kpa lafɛ̃ɛi. Taaleu fei si iriɛi á baa ku cuku si, si na iyi í jɔ̀ í ceekpe baaɛ walakɔ iyeɛ.

¹⁰ Bii inɛ í sũò aboi inɛ mmu gɔ, aa kpa nŋu do abou feii.

¹¹ Bii inɛ gɔ í sũò aboi baaɛ, í dasi baaɛ anyɔi. Aa kpa lafɛ̃ɛi do abou fei nɔ kurara nŋa ku bii si ŋa.

¹² Bii inɛ gɔ í sũò aboi amaɛ, aa kpa nŋu do abou feii, domi mii laalɔ nla nlai à ce. Nɔ kurara nŋau á bii si ŋai.

¹³ Bii inɛmɔkɔ í sũò inɛmɔkɔ kpaasiɛ bɛi à ya sũò inaabo, aŋa minji fei à ce mii laalɔi. Aa kpa ŋai, nɔ kurara nŋa ku bii si ŋa.

¹⁴ Bii inɛ í so inaabo do amaɛ í ce abo, mii laalɔ nla nlai, na nŋu aa jo ŋai si ina ku ba laalɔ dimi bɛɛbɛ ku maà na ku wa si anini nŋɛ.

¹⁵ Bii inɛ gɔ í sũò mɛɛmu gɔ, aa kpa lafɛ̃ɛi do mɛɛmuu fei.

¹⁶ Inaabo iyi í jɔ̀ mɛɛmu gɔ í sũòɛ, aa kpa aboui do mɛɛmuu fei, nɔ kurara nŋa ku bii si ŋa.

¹⁷ Bii inɛ gɔ í so wecĩɛ iyi wa jɛ ama inaaboi baaɛ walakɔ ama inaaboi iyeɛ í ce abo, anyɔ nla nlai. Aa nya ŋai hai si inɔi inɛ nŋa ŋa. Nɔ si bɛi í sũò wecĩɛu, á yɛ ijuukpãi dulum dɛɛ iyi í ceui.

¹⁸ Bii inɛ í sũò inaabo iyi awɔɛ wa mu, aa nya aŋa minji feii hai si inɔi inɛi Izirɛli ŋau, si bɛi aŋa minji fei à gbɔsi njɛ nɔ mɔkɔu í yɛ hai bii njɛɛ wa naa.

¹⁹ Maà sũò igbãi iyeɛ walakɔ ifɔi iyeɛ hee má jɛ dasɔ̃ɔɛ. Bii ì sũò nyaanze ara akãɛ, iŋɛò fei aa yɛ ijuukpãi dulum du ŋɛi.

²⁰ Bii inɛ í sũò aboi ifɔi baaɛ walakɔ igbãi baaɛ, í dasiɛ anyɔi. Nŋu do abou fei aa yɛ ijuukpãi dulum du ŋai nɔ aa ku hai nɛ amu ŋa.

²¹ Bii inɛ í so aboi ifɔɛ walakɔ igbãɛ, ide laalɔi. Í yɛ bɛi í dasi ifɔu walakɔ igbãɛu anyɔ mbɛ. Lafɛ̃ɛ nŋu do abou fei aa wɛɛi a kaa nɛ amu ŋa.

²² I jirima idem do woodam ŋa, nɔ i ceò fei ndɛɛ icɛ ŋa ku ba ilɛ bii ǹ wa n bɔ ku jilɛ ŋɛu ku maà kɔ̀si ŋɛ.

²³ I maà too si kucei inɛi ilɛ ŋa iyi an lele hai waju nŋɛ ŋau, domi mii iyi inɛ ŋau à ce fei, mii laalɔi hee n kù bi baa ide nŋa má.

²⁴ Ǹ sɔ̃ ŋɛ ǹ ni iŋɛi aa na i nɛ ilɛ nŋau ŋa. Amui an mu nŋɛ. Ilɛ gɔi bii amɔ do nyikɔ̃ wa kɔ̃. Amui ǹ jɛ Aɔ̃ Lafɛ̃ɛ nŋɛ iyi í fɛɛfɛ ŋɛ do dimi mmu ŋa.

²⁵ Na ŋɔi í jɔ̀ í sĩa i mà mɛɛmu ŋa iyi à jɛ iwɔ̀ do iyi a kù jɛ iwɔ̀ ŋau i wũa ŋa ŋa, do yɛi ŋa iyi à jɛ iwɔ̀ do iyi a kù jɛ iwɔ̀ ŋa. Kù sĩa i lu iyi à jɛ iwɔ̀ ŋau nɔ iŋɛ taka nŋɛ i dasi ara nŋɛ riisi. Hai mɛɛmu ŋa, do yɛi ŋa hee do mii ku cã ilɛ ŋau fei. Ǹ jɔ̀ aŋa fei à wɛɛ ikã ikãi ku ba i mà iyi à jɛ iwɔ̀ ŋau ŋa.

²⁶ I jɔ̀ i má ŋa na irim, domi amu Aɔ̃ Lafɛ̃ɛ ǹ má, nɔ ǹ fɛɛfɛ ŋɛ do inɛ mmu ŋa ku ba i jɛ tom ŋa.

²⁷ Bii inɛmɔkɔ walakɔ inaabo í nɛ gbugbãi iku ŋa ku ba ide ku fɔ, walakɔ bii í nɛ gbugbãi alisi ku ce ku fɔò mii iyi á na ku ce, aa taa kutai a kpaa nɔ taaleu fei si iriɛi á baa ku cuku si.