Kuwee 2 - Bibeli do fee

Kuweei iyafũ

¹ Nɔ Aɔ̃ Lafɛ̃ɛ í sɔ̃ Moizi má í ni, bii inɛ gɔ wa ceem kuwee do iyafũ, lafɛ̃ɛ ku dɛ iyafũ nɔ ku dasi ikpo nɔ ku dasi tuae,

² nɔ ku kooò bi woo wee ŋa amai Arɔ̃ɔ ŋau. Lafɛ̃ɛ á bu iyafũui awɔ kutu akã nɔ ku yɔgɛɛ do ikpo do tuaeu fei, ku bɛi ku na woo weeu ku joo si antaii bi ku ce kuweeu. Nɔ a kaa gbɛjɛ ideɛ. Nŋu bɛi á jɛ kuwee iyi inunuɛ á dɔ̃ɔm si.

³ Iyi à ceò kuwee í gbeu ti Arɔ̃ɔ do amaɛ ŋai á jɛ. Inɛ nŋu bɛi á jɛ kuwee iyi í má í re ntɔ ntɔ si kuwee ŋa iyi à ya jo si ina si wajum fei.

⁴ Bii inɛ gɔ wa ceem kuwee do kaa iyi à sɔ̃ si inɔ fuu, kaa iyi kù nɛ levɛ̃ɛ iyi à yɔgɛɛ iyafũɛ do ikpoi á naaò wa, walakɔ kaa iyi kù nɛ levɛ̃ɛ iyi à fãsi ikpo.

⁵ Bii wa ceem kuwee do kaa iyi à sɔ̃ si alului isɔ, í sĩa ku jɛ do iyafũ iyi à fɔ do ikpo nɔ ku maà nɛ levɛ̃ɛ.

⁶ Nɔ á bububuɛi ku fãsi ikpo si antaiɛ má.

⁷ Bii í jɛ kaa iyi wa ceem do kuweeu si isɔ ku banda iŋai wa sɔ̃ɔ, á cooi do iyafũ iyi à fɔ do ikpo.

⁸ Kuweei iyafũ iyi inɛ gɔ wa bi ku cea amu Aɔ̃ Lafɛ̃ɛ do mii ŋau bɛ fei, woo weeui á koo na, nɔ nŋu mɔ ku kooò bi ku ce kuwee si wajum.

⁹ Woo weeui á so mbɔi iyafũu do ikpou, do tuaeu fei, nɔ ku joo si antaii bi kuweeu. Nɔ a kaa gbɛjɛ ideɛ. Nŋu bɛi á jɛ kuwee iyi á dɔ̃ɔm si.

¹⁰ Mbɔi kuweeu iyi í gbeu, ti Arɔ̃ɔ do amaɛ ŋai á jɛ. Inɛ nŋu bɛi á jɛ kuwee iyi í má í re ntɔ ntɔ si kuwee ŋa iyi à jo si ina si wajum fei.

¹¹ Kuwee ŋa iyi aa cea amu Aɔ̃ Lafɛ̃ɛu fei, kãma kaa nɛ levɛ̃ɛ. Kuwee iyi aa ceem ŋa, iyi à ya jo si inau, a kaa coo do levɛ̃ɛ walakɔ do nyikɔ̃.

¹² Aa yɔkɔ i ceem kuwee do amaajɛ ŋa iyi à jĩa sinte ŋau ŋa do levɛ̃ɛ do nyikɔ̃, amma inɛ nŋu a kaa joo si antaii bi kuweeu bɛi kuwee ŋa iyi inunuɛ í ya dɔ̃ɔm siu.

¹³ Aa ya dasi imu si kuweei iyafũ iyi ì waa ce ŋaui, i maà ya jɔ̀ imu ku gaiziaɛ, domi imuu bɛi í jɛ bɛi akabuu iyi iŋɛ do amu Aɔ̃ Lafɛ̃ɛ i dĩ ŋa. Na ŋɔi í jɔ̀ kuwee iyi ì waa ce ŋa fei í sĩa ì ya dasi imu ŋa.

¹⁴ Bii ì waa kooa amu Aɔ̃ Lafɛ̃ɛ kuweei amaajɛ sintei iko nŋɛ ŋa i ya sɔ̃ɔ nɔ i nya iyafũɛ i bɛi i kooò ŋa.

¹⁵ Nɔ i ya dasi ikpo si antaiɛ ŋa, si anyiɛ nɔ i dasi tuaeu ŋa.

¹⁶ Woo weeui á jo iyi í jɛ ti ku ye gigiu, waatɔ iyafũ iyi à nya nɔ à tɔtɔɔɛ do ikpo, si anyiɛ nɔ à tɔtɔɔɛ do tuaeu fei. Nŋu bɛi á jɛ kuwee iyi aa jo si wajui amu Aɔ̃ Lafɛ̃ɛ.