Kuwee 19 - Bibeli do fee

Yaase bɛi Aɔ̃ Lafɛ̃ɛ í bi a jirima nŋu

¹ Aɔ̃ Lafɛ̃ɛ í sɔ̃ Moizi í ni,

² sɔ̃ inɛi Izirɛli ŋau fei i ni amu Aɔ̃ Lafɛ̃ɛ ǹ ni, i jɛ inɛ kumá ŋa, domi amu Aɔ̃ Lafɛ̃ɛ nŋa ǹ má.

³ Iŋɛ fei i jirima iyeò baa nŋɛ ŋa, nɔ i jirima ajɔi kusĩmim ŋa. Amui ǹ jɛ Aɔ̃ Lafɛ̃ɛ nŋɛ.

⁴ I maà ti i sinda si iwɛ̃ ŋa nɔ i maà cea ara nŋɛ iwɛ̃ ŋa iyi à ya yɔ do isɔ. Amui ǹ jɛ Aɔ̃ Lafɛ̃ɛ nŋɛ.

⁵ Bii ì waa ceem kuweei anu akã, i coo do yaase bɛi á dɔ̃ɔm si ŋa.

⁶ Mɛɛmu iyi à ceem do kuweeu, aa yɔkɔ a ŋɔ iŋaɛ ajɔ iyi à ce kuweeu do iju kumáɛ, amma bii mbɔɛ í kɔ í gbe si ajɔ mɛɛtasiaɛu bɛbɛi aa kosi inai a joo.

⁷ Si ajɔ mɛɛtasiau inɛ iyi í ŋɔ iŋau bɛbɛi riisii í ŋɔ, kuweeu kaa dɔ̃ɔm si má.

⁸ Inɛ iyi í nɔ í ŋɔɔ fei á yɛ ijuukpãi dulum dɛɛ, domi mii iyi à nya ikã ku jɛ titom nii í bɛjɛ bɛ. Aa nya lafɛ̃ɛi hai si inɔi inɛi Izirɛli ŋa.

⁹ Bii ì waa da amaajɛi iko nŋɛ ŋa si ilɛ nŋɛ, i ya jɔ̀ kɔkɔlɛ gɔ ŋa si iko nŋɛ ŋa i maà daa ŋa, nɔ i maà ya fengee amaajɛi iko nŋɛ ŋa.

¹⁰ Nɔ i maà ya fengee isoi jĩi ndii rezɛ̃ɛi iko nŋɛ ŋau nɔ iyi à cuku ŋau i maà ya so inɛ nŋu ŋau ŋa. I jɔ̀a ilu are ŋa do inɛ njoo ŋa inɛ nŋu ŋau bɛ. Amui ǹ jɛ Aɔ̃ Lafɛ̃ɛ nŋɛ.

¹¹ I maà ya ce ile ŋa, nɔ i maà sɔ ibo ŋa, nɔ i maà ya zamba njɛ ŋa.

¹² I maà ya ce kugbasi ibo do irim ŋa, domi aa na i dasi irii amu Aɔ̃ Lafɛ̃ɛ nŋɛ riisi ŋa. Amui ǹ jɛ Aɔ̃ Lafɛ̃ɛ nŋɛ.

¹³ I maà taa kpaasi nŋɛ gbugbã ŋa. I maà gba mii ndɛɛ do bisi ŋa, nɔ i maà gɛɛ fiai woo ce icɛ nŋɛ hee iju koo máò.

¹⁴ I maà bu dekĩ gɔ, nɔ i maà jilɛa fɛɛju ngɔgɔ si wajuɛ hee ku ko si isɛ ku kɛkɛɛ. I jɔ̀ kookoosu nŋɛ ku nyisi iyi ì waa jirimam ŋa. Amui Aɔ̃ Lafɛ̃ɛ.

¹⁵ I maà ya ce laalɔ si kiiti nŋɛ ŋa, i maà ce araarei inɛ na gbugbã hai nɛɛ baa bii kù nɛ ntɔ ŋa, nɔ i maà ce araarei inɛ gɔ mɔ si na iyi í jɔ̀ í jɛ inɛ nla. Amma i kiiti inɛ fei dee dee si bɛi í jɔ.

¹⁶ I maà ya sɔ irii njɛ ŋa. I maà ya fɔ taalei kpaasi nŋɛ hee ku to a mu a kpaa. Amui Aɔ̃ Lafɛ̃ɛ.

¹⁷ I maà ya cé inɛ mmu ŋa si idɔ nŋɛ. I ya sisi nŋa kurara nŋa iyi à ce ku ba i maà kãa ara nŋɛ dulum na iri nŋa.

¹⁸ Inɛ kãma ku maà jaa araɛ, nɔ ku maà mu inɛɛ ŋa do mbɛɛtɛ. Inɛ fei ku bi inɛ mmu bɛi í bi araɛ. Amui ǹ jɛ Aɔ̃ Lafɛ̃ɛ nŋɛ.

¹⁹ I ya jirima woodam ŋau ihɛ̃ ŋa. Si mɛɛmu gaa nŋɛ ŋa, i maà ya jɔ̀ mɛɛmu ŋa iyi a kù jɛ dimi akã a ya gũ njɛ. I maà ya gbɛ̃ si iko nŋɛ ŋa amaajɛ dimi ikã ikã minji si banza akã. I maà ya dasi ibɔ iyi à wɔ̃ acɔɛ do ikũ dimi ikã ikã minji ŋa.

²⁰ Bii inɛ gɔ i sũò inaabo aru iyi í jɛ mudɛ̃ɛi inɛ mmu gɔ, nɔ í ko a kù yaa hee má jɛ ku nɛ araɛ, aa kpã ŋa ijui. Amma kù jɛ a kpa ŋa si na iyi í jɔ̀ abou í jɛ woo ce icɛ.

²¹ Lafɛ̃ɛ de na kuraraɛ iyi í ceu, á dɛ angudã komboi ku kooò anui ile bi kukou ku ceaò amu Aɔ̃ Lafɛ̃ɛ kuweei ku teese.

²² Woo weeui á cea inɛɛu kuwee si wajum na dulum iyi í ceu do angudã kombo iyi í kooò, nɔ amu Aɔ̃ Lafɛ̃ɛ an ceaa suuru.

²³ Waati iyi ì na ì to si ilɛi Kanaãu, nɔ ì lɔ jĩi ikã ikã ku so iso ŋa, aa jɔ̀ adɔ̃ mɛɛta ku lɔi i maà jɛ isoi jĩi nɔu ŋa, domi aa jilɛ ŋa si jĩi riisi ŋai titã.

²⁴ Isoi jĩi ŋa iyi aa ba si adɔ̃ mɛɛsiau fei aa nyaa ikãi ku jɛ titom bii ì waa ce jingaui amu Aɔ̃ Lafɛ̃ɛ ku saabu ŋa.

²⁵ Nɔ si adɔ̃ miiusiaɛ aa jɛ ŋa. Si bɛɛbɛ isoi jĩi ndu ŋɛ ŋa aa kpɔ a maa kɔ̃ɔsii. Amui ǹ jɛ Aɔ̃ Lafɛ̃ɛ nŋɛ.

²⁶ I maà ya ŋɔ iŋai mɛɛmu gɔ iyi njɛɛ kù nikã ilɛ ŋa. I maà ya ce dobu dobu ŋa hee má jɛ alisi.

²⁷ I maà ya ja ntoi iri nŋɛ ŋa i kaakoɛò, nɔ i maà ya wa cingaa agbã nŋɛ ŋa.

²⁸ I maà bu ara nŋɛ na inɛ gɔ iyi í ku. Nɔ i maà ce si ara nŋɛ lamba ku jɛ bɛi nyinda. Amui Aɔ̃ Lafɛ̃ɛ.

²⁹ I maà tale si ama inaabo nŋɛ ŋa sakara ku ce [si Aɔ̃ ku tɔɔ nŋɛ] i cã anyi nŋa ŋa, ku ba ilɛu fei ku maà na ku sinda si iwɛ̃ ŋa nɔ ku kɔ̃ò laalɔ ŋa ku ce.

³⁰ I ya jirima ajɔi kusĩmim ŋa, nɔ i ya jirima ile bi kukou ŋa. Amui Aɔ̃ Lafɛ̃ɛ.

³¹ I maà ti i sinda si woo tɔɔ hundei iku ŋa, walakɔ si woo ce alisi ŋa. I maà ti i maa dɛdɛ ŋa má ŋa, ku ba i maà ti i dasi ara nŋɛ riisi do aŋa. Amui ǹ jɛ Aɔ̃ Lafɛ̃ɛ nŋɛ.

³² I ya dede do jirima si wajui mɔkɔ ngbo ŋa. I ya jirima Aɔ̃ Lafɛ̃ɛ nŋɛ. Amui ǹ jɛ Aɔ̃ Lafɛ̃ɛ.

³³ Bii inɛ njoo gɔ í naa í wa ilɛ nŋɛ, i maà ya taa gbugbã ŋa.

³⁴ I ya cea inɛ njoo iyi í wa bi tu ŋɛ bɛi aa cea ilu ide iyi í wa bi tu ŋɛ, i buu bɛi ì bi iŋɛ taka nŋɛ, domi iŋɛ mɔ ì tako ì jɛ inɛ njoo ŋa wo si ilɛi Ezibiti. Amui ǹ jɛ Aɔ̃ Lafɛ̃ɛ nŋɛ.

³⁵ I maà ya ce mii iyi kù jɛ dee dee má ŋa, si mii ŋa ku wã, hee do si gũa nŋɛ ŋa fei.

³⁶ I jɔ̀ i nɛ gũa ŋa iyi à jɛ dee dee ŋa si mii ŋa ku wã. Amui ǹ jɛ Aɔ̃ Lafɛ̃ɛ nŋɛ. Amui ǹ nya ŋɛ wa hai ilɛi Ezibiti.

³⁷ I jirima woodam do ikɔm ŋa nɔ i ceò ŋa icɛ ŋa. Amui Aɔ̃ Lafɛ̃ɛ.