Kuwee 18 - Bibeli do fee

Jirima iyi í nɛ ku wa si gãmɛi abo do mɔkɔ

¹ Aɔ̃ Lafɛ̃ɛ í sɔ̃ Moizi í ni,

² sɔ̃ inɛi Izirɛli ŋau i ni amui ǹ jɛ Aɔ̃ Lafɛ̃ɛ nŋɛ.

³ I maà ce bɛi inɛi Ezibiti ŋa ilɛ bii ì buba ŋau à ya ce ŋa. Nɔ i maà ce kucei inɛi ilɛi Kanaã ŋa bii ǹ wa n bɔò ŋɛu. I maà too si kuce nŋa ŋa.

⁴ I mu idem ŋa, nɔ i jirima woodam ŋa. I jirima woodam ŋa, domi amui ǹ jɛ Aɔ̃ Lafɛ̃ɛ nŋɛ.

⁵ I jirima idem do woodam ŋa. Inɛ iyi wa ceò woodam ŋau icɛ na iri nŋai á maa wɛɛ. Amui ǹ jɛ Aɔ̃ Lafɛ̃ɛ.

⁶ Inɛi Izirɛli kãma ku maà tɔtɔɔ sɛ̃ɛ do inaabo gɔ iyi í jɛ nyaanzeɛ. Amui ǹ jɛ Aɔ̃ Lafɛ̃ɛ.

⁷ Maà tɔtɔɔ sɛ̃ɛ do iyeɛ, domi bii ì ce bɛɛbɛ, ì dasi baaɛ do iyeɛ anyɔi.

⁸ Maà tɔtɔɔ sɛ̃ɛ do igui iyeɛ gɔ, bii ì ce bɛɛbɛ, ì dasi baaɛ anyɔi.

⁹ Maà sũò wecĩɛ, iyi iŋɛò i kù jɛ iye akã walakɔ baa akã baa bii í jɛ a kù bii iŋɛò fei kpasɛ̃ akã bɛ.

¹⁰ Maà sũò tɔku inaaboɛ, bii ì ce bɛɛbɛ ì dasi araɛ anyɔi.

¹¹ Maà tɔtɔɔ sɛ̃ɛ do amai igui iyeɛ, domi amai baaɛi nɔ wecĩɛi wa jɛ.

¹² Maà tɔtɔɔ sɛ̃ɛ do wecĩi baaɛ, domi nyaanzei baaɛi.

¹³ Maà tɔtɔɔ sɛ̃ɛ do inaabo iyi í jɛ igbãi iyeɛ walakɔ ifɔi iyeɛ, domi nyaanzei iyeɛi.

¹⁴ Maà dasi igbãi baaɛ walakɔ ifɔi baaɛ anyɔ i koo i maa sũò aboɛ, domi í yɛ bɛi iyeɛ mbɛ má.

¹⁵ Maà sũò aboi amaɛ.

¹⁶ Maà dasi ifɔɛ walakɔ igbãɛ anyɔ i koo i maa sũò aboɛ.

¹⁷ Maà sũò inaabo nɔ si anyiɛ i sũò ama inaaboɛ má walakɔ tɔkuɛ gɔ, domi aŋa fei nyaanze akã mbɛ, nɔ dimi bɛɛbɛ ku ce, laalɔ nla nlai.

¹⁸ Maà so igbãi aboɛ, walakɔ ifɔɛ i ce abo bii aboɛ takaɛ í wɛɛ si hunde, domi aa na a maa ja igui.

¹⁹ Maà sũò inaabo waati iyi awɔɛ wa mu, domi waati bɛɛbɛ abou kù maaju.

²⁰ Maà sũò aboi kpaasiɛ, domi bɛɛbɛ ku ce á dasiɛ riisi.

²¹ I maà so ama nŋɛ ŋa i ceaò iwɛ̃ iyi à ya kpe Molɔku kuwee, domi bii ì ce bɛɛbɛ ŋa ì riisi irii amu Aɔ̃ Lafɛ̃ɛ nŋɛi.

²² Iŋɛ inɛmɔkɔ ŋa i maa sũò njɛ ŋa, domi bɛɛbɛ ku ce, laalɔ nla nlai.

²³ I maà sũò mɛɛmu gɔ i dasiò ara nŋɛ riisi. Kù sĩa inaabo mɔ ku maai si mɛɛmu gɔ hee aŋaò a tɔtɔɔ, domi bɛɛbɛ mɔ ku ce, laalɔ nla nlai.

²⁴ I maà dasi ara nŋɛ riisi do mii ŋau bɛ kãma gɔ, domi mii bɛɛbɛ ŋau bɛ feii inɛ ŋa iyi an lele hai si waju nŋɛ ŋau à waa ce.

²⁵ Ilɛu í riisi tã, nɔ an kpã ŋa iju na laalɔu, nɔ ilɛu á fũsi inɛɛ ŋau awɔ.

²⁶ I jirima idem do woodam ŋa, nɔ i maà ce laalɔ ŋau bɛ kãma ŋa, hai iŋɛ ilu ide ŋa hee do inɛ njoo ŋa iyi à wa inɔ nŋɛ fei.

²⁷ Ntɔ ntɔ, laalɔ nŋu ŋau bɛ feii inɛ ŋa iyi à tako ŋɛ à wa si ilɛu à ce nɔ ilɛu í so riisi.

²⁸ I ce laakai ŋa ku ba ilɛu ku maà na ku fũsi iŋɛ mɔ awɔ bii ì na ì riisiɛ ŋa bɛi inɛ sinte ŋau à ce í jɔ̀ í fũsi ŋa awɔu.

²⁹ Ntɔ ntɔ, inɛ ŋa iyi aa na a ce laalɔ dimi bɛɛbɛ fei aa nya ŋai hai si inɔi inɛi Izirɛli ŋau.

³⁰ I ce bɛi ǹ sɔ̃ ŋɛu fei ŋa, i maà too si laalɔ iyi í tako í wa si ilɛu hai waati iyi i kù to wa bɛ ŋa, ku ba i maà na i na ara nŋɛ si hee i so riisi ŋa. Amui ǹ jɛ Aɔ̃ Lafɛ̃ɛ nŋɛ.