Kuwee 17 - Bibeli do fee

Iyi í jɛ woodai njɛ

¹ Aɔ̃ Lafɛ̃ɛ í sɔ̃ Moizi í ni,

² sɔ̃ Arɔ̃ɔ do amaɛ ŋa do inɛi Izirɛli ŋau fei i ni ide iyi amu Aɔ̃ Lafɛ̃ɛ ǹ fɔ wee.

³ Bii inɛi Izirɛli gɔ í saka kɛtɛ walakɔ angudã walakɔ iwo tengi bii à ce asɔu walakɔ do anyii asɔu,

⁴ bii kù kooò anui ile bi kukou ku ceaò amu Aɔ̃ Lafɛ̃ɛ kuwee, í kua woodam nii si njɛ iyi í nikãu, nɔ aa nyaai hai bi zamaau.

⁵ Wooda iyi ihɛ̃ í wɛɛi na ku tilasi inɛi Izirɛli ŋa a maà ya kpa mɛɛmu ŋa bii à ba fei, amma a ya kooò bi woo weeu anui ile bi kukou ku ba ku ceaò amu Aɔ̃ Lafɛ̃ɛ kuweei anu akã.

⁶ Woo weeu á bu njɛui ku fãsi tengi bii à ya ceem kuweeu, do anui ile bi kukou, nɔ ku jo ikpoi iŋa iyi inunuɛ á dɔ̃ɔm siu.

⁷ Si bɛɛbɛ inɛi Izirɛli ŋau aa jɔ̀ kuwee iyi à ya maa cea iwɛ̃ ŋa iyi à yɛ bɛi iwo kombo ŋa. Wooda iyi ihɛ̃ á maa wɛɛi waati kãma fei do si kudede ikã ikãi inɛi Izirɛli ŋau fei.

⁸ Bii inɛi Izirɛli gɔ walakɔ inɛ njoo gɔ iyi í wa inɔi inɛi Izirɛli ŋa wa bi ku ce kuwee iyi à ya jo si ina fei sãa sãa walakɔ kuwee mmu gɔ,

⁹ í gbe ku naaò mɛɛmuu wa tengii anui ile bi kukou ku bɛi ku ceaò amu Aɔ̃ Lafɛ̃ɛ kuweeu. Bii kù ce bɛɛbɛ aa nyaa hai si inɔi inɛi Izirɛli ŋaui.

¹⁰ Bii inɛi Izirɛli gɔ walakɔ inɛ njoo gɔ iyi í wa inɔ nŋa í jɛ njɛi iŋa, amu Aɔ̃ Lafɛ̃ɛ an fa aram hai bi lafɛ̃ɛ, nɔ n nya lafɛ̃ɛ ikã hai si inɔi zamaau.

¹¹ Ntɔ ntɔ, kuwɛɛi ilu hunde, si njɛi í wa. Amu Aɔ̃ Lafɛ̃ɛ ǹ na ŋɛ kpãai i ceò njɛ wũaa si bi kuweeu na faaba nŋɛ ku ba ku kpa idei dulum du ŋɛ. Njɛi í ya jɔ̀ inɛ ku ba amu Aɔ̃ Lafɛ̃ɛ n ceaa suuru, nɔ nŋui í ya jɔ̀ inɛ ku wɛɛ.

¹² Na ŋɔi í jɔ̀ amu Aɔ̃ Lafɛ̃ɛ ǹ sɔ̃ inɛi Izirɛli ŋa ǹ ni, inɛ kãma nŋɛ ku maà jɛ njɛi iŋa, nɔ baa inɛ njoo iyi í wa bi tu ŋɛ ku maà na ku jɛ.

¹³ Bii inɛi Izirɛli gɔ walakɔ inɛ njoo gɔ í bɔ adɛ nɔ í kpa mɛɛmu gɔ walakɔ yɛi gɔ iyi à ya ŋɔ, á jɔ̀ njɛu ku nikã ilɛ titãi nɔ ku biiɛ do sãa.

¹⁴ Ntɔ ntɔ, hundei inɛ fei si njɛi araɛi í wa, ŋɔi í jɔ̀ ǹ sɔ̃ inɛi Izirɛli ŋau ǹ ni, i maà ya jɛ njɛi mɛɛmu kãma ŋa, domi kuwɛɛi ilu hundei fei si njɛɛi í wa. Inɛ iyi í jɛ njɛ fei aa nya lafɛ̃ɛ ikãi.

¹⁵ Bii inɛi Izirɛli gɔ walakɔ inɛ njoo gɔ iyi í wa inɔ nŋa í ŋɔ iŋai mɛɛmu gɔ iyi í ku do araɛ, walakɔ iyi mɛɛmui sako gɔ í gagaga, lafɛ̃ɛ á fɔ jĩnɛɛ ŋai nɔ nŋu takaɛ mɔ ku wɛ, nɔ do nŋu fei á wɛɛò riisii hee alɛ koo lɛò, si anyiɛ ku bɛi ku maaju má.

¹⁶ Amma bii kù fɔ jĩnɛɛ ŋa, nɔ nŋu takaɛ kù wɛ, á yɛ ijuukpãi kuraraɛu.