Kuwee 16 - Bibeli do fee

Ajɔ nlai dulum ku kpa

¹ Si anyii ikui ama inɛmɔkɔ minjii Arɔ̃ɔ ŋa iyi à bɔ si wajui Aɔ̃ Lafɛ̃ɛ [do tuae gɔ iyi kù jɛ dee deeu], Aɔ̃ Lafɛ̃ɛ í sɔ̃ Moizi í ni,

² sɔ̃ Arɔ̃ɔ igbãɛu ku maà ya kua acɔ iyi wa fɛɛfɛ ile iyi í má do iyi í re do kumáu waati kãma fei, tengi bii kpakoi akabuum nɔu í wa do ama ambiiɛ, ku ba ku maà ku, domi an ya n na n naa bi ama ambii kpakoi akabuuu si kudũi ijĩ.

³ Do yaase bɛi Arɔ̃ɔ á ya lɔò ile iyi í re do kumáu wee. Kɛtɛ kombo saasaabɔi á ya lɔò bɛ, koo ceò kuwee iyi á kpa idei dulum, do angudã kombo akã iyi á jo si ina fei sãa sãa.

⁴ Ibɔ kumboo iyi í jɛ ibɔi kuweeu do pɛɛtui á ya dasi, nɔ ku dĩ kungbã, si anyiɛ nɔ ku dĩ bɔngɔtɔbɛɛ si iriɛ. Jĩnɛ ŋau bɛ fei, à ya ce ŋai do acɔ ku nɛ gbugbã. Jĩnɛ ŋa iyi woo wee nlau á ya dasi mbɛ waati iyi í wɛ í tã.

⁵ Iwo kombo minjii inɛi Izirɛli ŋa aa na Arɔ̃ɔ ku ceò kuwee iyi á kpa idei dulum du ŋa do angudã kombo akã iyi aa jo si ina fei sãa sãa.

⁶ Arɔ̃ɔ á na kɛtɛ komboɛi iyi á ceò kuwee iyi á kpa idei dulum dɛɛ do ti inɛi kpasɛ̃ɛ ŋa.

⁷ Si anyiɛ, á so iwo kombo minji ŋaui ku leekĩ ŋa si wajui amu Aɔ̃ Lafɛ̃ɛ tengii anui ile bi kukou.

⁸ Arɔ̃ɔ á ta kpasa si iwo kombo minji ŋaui, akã ku jɛ ti amu Aɔ̃ Lafɛ̃ɛ, akã mɔ ti Azazɛli.

⁹ Iwo kombo iyi kpasa í so ku jɛ ti amu Aɔ̃ Lafɛ̃ɛu, nŋui Arɔ̃ɔ á ceò kuwee ku kpaò idei dulum du ŋa ŋau.

¹⁰ Iyi í jɛ ti Azazɛliu mɔ, njaawɛ bɛɛbɛi aa naa a leekĩɛ si wajui amu Aɔ̃ Lafɛ̃ɛ, ku ba a tɔɔò suurui dulum du ŋa nɔ a fũsiɛ awɔ ku nɛ gbaa ku jɛ ti Azazɛli.

¹¹ Arɔ̃ɔ á ceò kɛtɛ komboɛu kuwee iyi á kpaò dulum dii nŋu takaɛ do ti inɛi kpasɛ̃ɛ ŋa. Á saka kɛtɛ komboɛui ku ceò kuweeu.

¹² Á so jĩnɛ iyi í wa bi kuweeui, nɔ ku bu ina iyi í wa bii à ya ce kuwee si wajui amu Aɔ̃ Lafɛ̃ɛu ku dasi hee ku kɔ̃, nɔ ku bu tuae fùfù ku dɔ̃ inunu awɔ kutu minji, nɔ ku kooò fei ndɛɛ si inɔi ile iyi í re do kumáu.

¹³ Á dasi tuaeu inai si wajum ku ba cuaɛ ku bii kpakoi akabuuu do ama ambiiɛ fei ku ba Arɔ̃ɔ ku maà ku má.

¹⁴ Á bu njɛi kɛtɛui nɔ ku fãa si wajui kpakoi akabuuu do amaawɔ do ikpa nunui daakɔ. Do amaawɔɛu, tuuba mɛɛjei á fã njɛu si wajui kpakou.

¹⁵ Á saka iwo kombo iyi á kpa idei dulum nɔui na irii zamaau, nɔ ku bu njɛu ku kooò inɔ ile iyi í re do kumáu. Á cea njɛui bɛi í tako í cea ti kɛtɛ kombou. Á fãsi njɛu si kpakoi akabuuu do si wajui kpakou.

¹⁶ Bɛɛbɛi á ce kuwee iyi á kpa idei dulum nɔu na riisii inɛi Izirɛli ŋa do na wooda ku kua nŋa ŋau do kurara nŋa ŋau fei. Bɛɛbɛ mɔi á cea ile bi kuko iyi í wa bi tu ŋa si aninii riisi nŋau.

¹⁷ Inɛ kãma kaa wa inɔi ile bi kukou waati iyi Arɔ̃ɔ í bɔ ku ce kuwee iyi á kpa idei dulum si inɔ ile iyi í re do kumáu hee koo fitaò wa. Á ce kuweeui ti nŋu takaɛ do ti inɛi kpasɛ̃ɛ ŋa do ti zamaai Izirɛliu fei.

¹⁸ Bii wa fita wa, á tooi do ikpa bi kuwee iyi í wa wajui amu Aɔ̃ Lafɛ̃ɛu, nɔ ku ce si nŋu mɔ kuwee iyi á jɔ̀ ku maaju, nɔ ku bu njɛi kɛtɛ kombou do ti iwo kombou ku jɔ́si ngoi gonta mɛɛi bi kuweeu ku kaakoɛò.

¹⁹ Á bu njɛui si amaawɔɛ nɔ ku fãsi bi kuweeu zakai tuuba mɛɛje. Á ceaa bɛɛbɛi ku ba ku maaju nɔ ku nyaa ikã ku jɛ ti amu Aɔ̃ Lafɛ̃ɛ na riisii inɛi Izirɛli ŋau.

²⁰ Bii Arɔ̃ɔ í ce kuwee iyi á nya riisii ile iyi í re do kumáu, do ile bi kukou, do bi kuweeu í tã, á jɔ̀ a naaò iwo kombo njaawɛu mɔ wa mái.

²¹ Arɔ̃ɔ á lesi awɔ minjiɛi si irii iwo kombo njaawɛu nɔ ku ce tuubai dulum dii inɛi Izirɛli ŋau fei do ti wooda ku kua nŋa ŋau fei do ti kurara nŋa ŋau fei. Fei ndɛɛ fei si irii iwo kombou bɛi á kosi, si anyiɛ ku bɛi ku leleɛ ku nɛ gbaau. Inɛ iyi à cica ku ce icɛu, lafɛ̃ɛi á gbãa koo jɔ̀ɔ bɛ.

²² Iwo komboui á so laalɔ nŋa ŋau fei ku nɛò hee jĩijĩ. Aa looi ku nɛ gbaa. Bii à le iwou í nɛ gbaa,

²³ Arɔ̃ɔ á lɔ inɔ ile bi kukoui, nɔ ku bɔ jĩnɛ ŋa iyi í dasi í bɛi í lɔò ile iyi í re do kumáu ku jilɛ ŋa bɛ.

²⁴ Á dɛdɛ inyii nɔ ku bɔ si inya gɔ iyi à nya ikã koo wɛ, nɔ ku so jĩnɛi takoɛ ŋau ku dasi. Si anyiɛ, á fita wai ku na ku ce kuwee ŋa iyi à ya jo si ina fei sãa sãau. Á ce ti nŋu takaɛi do ti zamaau fei.

²⁵ Á jo ikpoi mɛɛmu ŋa iyi í ceò kuwee iyi á kpa idei dulum nɔui si antaii bii à ya ce kuweeu.

²⁶ Inɛ iyi í lele iwo kombo iyi í jɛ ti Azazɛli í nɛò gbaau, á fɔ jĩnɛɛ ŋai nɔ ku dɛ inyi ku wɛ, si anyiɛ ku bɛi ku lɔ wa bi asɔu.

²⁷ Kɛtɛ kombo do iwo kombo iyi à ceò kuwee iyi á kpa dulum ŋa nɔ à bu njɛ nŋa à fãsi ile iyi í re do kumáu ku ba ku maaju, aa so ŋa a fitaòi hai asɔu, nɔ a jo bata nŋa ŋau, do iŋau, do mii ndii inɔ ŋau.

²⁸ Inɛ iyi à cica ku ce icɛu bɛ, bii lafɛ̃ɛ í tã á fɔ jĩnɛɛ ŋai nɔ nŋu takaɛ ku dɛ inyi ku wɛ ku bɛi ku lɔ wa bi asɔu.

²⁹ Wooda nŋu bɛi aa maa too si hee do ajɔ fei ŋa. Cukpa mɛɛjesia, si ajɔ mɛɛwasiai cukpau, aa ya dĩ anu ŋai, nɔ i maà ya ce icɛ kãma ŋa hai iŋɛ inɛi Izirɛli ŋa hee do inɛ njoo ŋa iyi à wa bi tu ŋɛ ŋau fei.

³⁰ Aa ce bɛɛbɛi, domi ajɔ nŋu bɛi aa ce nŋɛ kuwee iyi á jɔ̀ i maaju ŋa. Aa maaju ŋai si wajui amu Aɔ̃ Lafɛ̃ɛ na dulum du ŋɛ ŋau fei.

³¹ Aa nya ajɔu ikã ŋai ku jɛ ajɔi kusĩmi nŋɛ do anu ku dĩ. Wooda nŋu bɛi aa maa too si hee do ajɔ fei ŋa.

³² Kuwee iyi á kpa idei dulum nɔu, woo wee nla iyi à cica à nya ikãui á coo, nŋu iyi á na ku sãsi agbɛi baaɛ ku jɛ woo wee nlau. Jĩnɛi acɔ ku nɛ gbugbã ŋai á dasi, jĩnɛ ŋau jĩnɛ ŋa iyi à nya ikãui.

³³ Á cea ile iyi í re do kumáu buki iyi á jɔ̀ ku maaju, do ile bi kukou, do tengi bii à ya ce kuweeu, nɔ ku cea zamaau do woo wee ŋau fei kuwee iyi á kpa idei dulum du ŋa.

³⁴ Wooda iyi ihɛ̃ á maa wɛɛi hee do ajɔ fei. Aa ya coo ŋai ku ba adɔ̃ akã fei a ya kpa idei dulum iyi inɛi Izirɛli ŋau à ce fei. Wooda ŋa iyi Aɔ̃ Lafɛ̃ɛ í na Moiziu fei, à ceò icɛ.