Kuwee 15 - Bibeli do fee

Iyi í jɛ woodai riisii inɛmɔkɔ

¹ Ide iyi Aɔ̃ Lafɛ̃ɛ í sɔ̃ Moizi do Arɔ̃ɔ

² í ni a sɔ̃ inɛi Izirɛli ŋa wee. Bii inɛmɔkɔ gɔ wa ce bɔ̃ɔi kentu, inyi iyi inɛmɔkɔɛ wa ceu kaa maaju.

³ Inyi iyi wa cãu, bii í leekĩ walakɔ bii kù leekĩ, do nŋu fei, á dasi inɛ riisii.

⁴ Daayi bii lafɛ̃ɛ í sũ fei, daayiu á riisii, nɔ mii iyi í buba si fei mii nɔu mɔ á riisi.

⁵ Inɛ iyi í lu daayiu fei í gbe ku fɔ jĩnɛɛ ŋa nɔ nŋu takaɛ ku wɛ, amma á wɛɛò riisiui hee alɛ koo lɛò.

⁶ Inɛ mɔ iyi í nɔ í buba si agbɛ bii í bubau í gbe nŋu mɔ ku fɔ jĩnɛɛ ŋai nɔ nŋu takaɛ ku wɛ. Do nŋu fei, nŋu mɔ á wɛɛò riisiui hee alɛ koo lɛò.

⁷ Inɛ mɔ iyi í lu arai inɛ dimi bɛɛbɛ, á fɔ jĩnɛɛ ŋai, nɔ nŋu takaɛ ku wɛ, amma á maa wɛɛò riisiu hee alɛ koo lɛò.

⁸ Inɛ iyi kù waa nɛ baaniu bii í tu antɔ si inɛ iyi í maaju, í gbe lafɛ̃ɛ ku fɔ jĩnɛɛ ŋa, nɔ nŋu takaɛ mɔ ku wɛ, amma riisiu á kɔ̀ ku maa wɛɛa hee alɛ koo lɛò.

⁹ Mii iyi inɛɛu í gũ í bɔò bii gɔ fei á ba riisii.

¹⁰ Inɛ iyi í lu mii gɔ iyi í wa si arai baabɔ̃ɔu fei á ba riisii nɔ ku wɛɛò riisiu hee alɛ koo lɛò. Nɔ inɛ mɔ iyi í so mii ndɛɛ gɔ fei, í gbe ku fɔ jĩnɛɛ ŋa nɔ nŋu takaɛ ku wɛ, amma á wɛɛò riisiui hee alɛ koo lɛò.

¹¹ Inɛ iyi baabɔ̃ɔu í lu hai wɔɔ, í gbe lafɛ̃ɛ ku fɔ jĩnɛɛ ŋa nɔ ku wɛ má, amma á wɛɛò riisiui hee alɛ koo lɛò.

¹² Mii iyi à ce do amà iyi baabɔ̃ɔu í lu fei, aa lɛgɛɛi. Bii í nɔ í jɛ iyi à ce do jĩi mɔi aa wiɛɛi do inyi.

¹³ Bii inɛɛu í ba iri hai si bɔ̃ɔu, ajɔ mɛɛjei á ka ku bɛi ku maaju, nɔ ku fɔ jĩnɛɛ ŋa, nɔ ku wɛò inyii isɔ̃ ku bɛi ku maaju bɛbɛi dee dee.

¹⁴ Si ajɔ mɛɛjɔsiaɛ, kufe minjii á mu, walakɔ ankasiidi ku mungau minji ku kooò ŋa anui ile bi kukou si wajui amu Aɔ̃ Lafɛ̃ɛ koo na woo weeu.

¹⁵ Woo weeu á ceò akã kuwee iyi á kpa idei dulum nii, akã mɔ ku ceò kuwee iyi à ya jo si ina fei sãa sãau. Si anyiɛ woo weeu á cei bɛi à nɛ dɔ̃ɔnɛi bukii ara ku maaju ku ce ku bɛi ku maaju hai si bɔ̃ɔu.

¹⁶ Inɛ iyi inyii inɛmɔkɔɛ í nikã siɛ bii wa sũ idũ, lafɛ̃ɛ á dɛ inyii ku wɛ mam mam, amma á wɛɛò riisii hee alɛ koo lɛò.

¹⁷ Hai jĩnɛɛ ŋa do acɔi bata iyi wa bii, bii inyii inɛmɔkɔɛu í lu fei á wiɛi mam mam do inyi, amma kãma nŋa kaa maaju hee alɛ koo lɛò.

¹⁸ Bii inɛmɔkɔ do inaabo à tɔtɔɔ sɛ̃ɛ, tilasii aŋa minji fei a wɛ, amma aa wɛɛi do riisi hee alɛ koo lɛò.

Riisii inaabo

¹⁹ Bii awɔi inaabo wa mu nɔ njɛ wa nikã, á wɛɛò riisii zakai azuma akã. Inɛ mɔ iyi í luu á wɛɛò riisi hee alɛ koo lɛò.

²⁰ Si daayi bii í sũ do kitã iyi í buba si fei waati iyi awɔɛ wa muu á so riisii.

²¹ Inɛ iyi í lu daayiu fei í gbe ku fɔ jĩnɛɛ ŋa, nɔ ku dɛ inyi ku wɛ, amma á wɛɛò riisiui hee alɛ koo lɛò.

²² Inɛ mɔ iyi í lu mii gɔ iyi í buba si fei, í gbe ku fɔ jĩnɛɛ ŋa, nɔ ku dɛ inyi ku wɛ, amma á wɛɛò riisiui hee alɛ koo lɛò.

²³ Bii mii gɔ í wa si antaii daayi bii í sũ siu, walakɔ tengi bii í buba siu, inɛ iyi í luu fei á wɛɛò riisii hee alɛ koo lɛò.

²⁴ Inɛmɔkɔ iyi í sũò inaabo dimi bɛɛbɛ, bii njɛu í luu, á wɛɛò riisiui ajɔ mɛɛje, nɔ daayi bii nŋu mɔ í sũ si fei á ba riisiui.

²⁵ Bii awɔi inaabo wa mu nɔ í ce ajɔ nkpɔ nkpɔ hee í koo í lɔ kɔɔi bɛi í ya naau, bɛɛbɛi nŋu mɔ á maa wɛɛ kaa maaju hee ku to zaka bɛi njɛ ku dikãɛu í kpɛ wa to bɛi í ya tako ku ce wo.

²⁶ Daayi bii í sũ si walakɔ mii iyi í buba si fei á ba riisii bɛi si waatii awɔ ku muɛ ŋau.

²⁷ Inɛ iyi í lu daayiu walakɔ kitã bii í buba siu fei á fɔ jĩnɛɛ ŋai, nɔ nŋu takaɛ ku wɛ, amma á wɛɛò riisiui hee alɛ koo lɛò.

²⁸ Bii awɔ ku muu í leekĩ, azuma akãi abou á ce ku bɛi ku maaju má.

²⁹ Si ajɔ mɛɛjɔsiau abou á dɛ kufe minjii walakɔ ankasiidi minji ku kooò bi woo weeu tengii anui ile bi kukou.

³⁰ Woo weeu á ceò akãi yɛi ŋau kuwee iyi á kpa idei dulum nii, akã mɔ ku ceò kuwee iyi à ya jo si ina fei sãa sãau. Si anyiɛ woo weeu á cea abou bukii ara ku máui si wajui amu Aɔ̃ Lafɛ̃ɛ abou ku bɛi ku maaju na awɔ ku muɛu.

³¹ I sɔ̃ inɛi Izirɛli ŋau a mu ara nŋa nɔ a jĩò ile bi kukou bii à wɛɛò riisi. Si bɛɛbɛ a kaa ku, domi a kaa ba a riisi bi kuwai amu Aɔ̃ Lafɛ̃ɛ iyi í wa si anini nŋau má.

^32-33 Wooda iyi í jɛ ti inɛ iyi bɔ̃ɔ dimi bɛɛbɛ í baa, walakɔ bii inyii inɛmɔkɔɛ í naa nɔ í jɔ̀ kù maaju, walakɔ inaabo iyi awɔɛ wa mu do inɛmɔkɔ iyi í sũ do inaabo iyi í wɛɛò riisi mbɛ.