Kuwee 14 - Bibeli do fee

Kuwee iyi ilu bɔ̃ɔi batai ara í nɛ ku ce

¹ Aɔ̃ Lafɛ̃ɛ í sɔ̃ Moizi í ni,

² yaase bɛi inɛ iyi í ce bɔ̃ɔi batai ara á ceò bukii kuwee iyi á jɔ̀ ku maaju wee. Aa kooɛ bi woo weeui.

³ Woo weeui á fita wa hai bii à ce asɔu koo cɔ inɛɛu. Bii inɛɛu í ba iri,

⁴ woo weeu á ni ku naaò yɛi njaawɛ minji gɔ ŋa iyi à maaju wai do jĩi ndii sɛɛdi, do ikũ nkpa iyi à ce do ntoi angudã, do amaawɔi jĩi ndii izɔpu.

⁵ Woo weeu á jɔ̀ a saka akãi yɛi ŋaui si cakai amà gɔ iyi í nɛ inyii isɔ̃.

⁶ Si anyiɛ á so yɛi njaawɛui do jĩi ndii sɛɛdiu, do ikũ nkpa iyi à ce do ntoi angudãu do amaawɔi jĩi ndii izɔpuu ku mileɛ si njɛi yɛi iyi à saka si inyiu nɔ ku nyaa má.

⁷ Á fãsi inɛ iyi wa ce bukii riisi ku nya na bɔ̃ɔi batai araɛui tuuba mɛɛje, ku bɛi ku ni inɛɛu í maaju, nɔ ku jɔ̀ yɛi njaawɛu ku fo ku nɛ sako.

⁸ Inɛɛu á fɔ jĩnɛɛ ŋai, nɔ ku wa ntoɛ ŋa hee do ntoi iriɛ ŋa fei, nɔ ku wɛ si inyi iyi á jɔ̀ ku maaju. Si anyii nŋuu á yɔkɔ ku lɔ inɔ asɔu, amma ajɔ mɛɛjei á ce iyi kaa lɔ si ilei acɔi nŋu takaɛ.

⁹ Si ajɔ mɛɛjesiau á nyi ku wa ntoi iriɛ ŋa mái do agbãɛ do ntoi geetei ijuɛ ŋa hee do nto ŋa iyi à wa si araɛ fei. Á fɔ jĩnɛɛ ŋai nɔ ku wɛ ku ba ku maaju.

¹⁰ Si ajɔ mɛɛjɔsiaɛ á mu angudã kombo minji hai nɛ leebui, do ama angudã zãui adɔ̃ akã iyi kù nɛ leebu, do kuweei iyafũ kiloo mɛɛsã iyi à taki do ikpo, do ikpo liiti bubu.

¹¹ Woo wee iyi wa ce bukiu á kooò inɛɛu do amua ŋau fei si wajui amu Aɔ̃ Lafɛ̃ɛi tengii anui ile bi kukou.

¹² Woo weeu á so akãi angudã kombo ŋa iyi í jɛ ti ku ce kuweei ku teeseu, do ikpo liiti bubuu ku naaò wa si wajum ku maa gbugbã gbugbãɛò si bɛi à nɛ dɔ̃ɔnɛi ku ceɛu.

¹³ Á saka angudãui tengi bii à ya saka mɛɛmu ŋa iyi à ya ceò kuwee iyi á kpa idei dulum ŋau do kuwee ŋa iyi à ya jo si ina fei sãa sãa si inya iyi à nya ikãu. Mɛɛmu iyi à ya ceò kuweei ku teeseu do kuwee iyi á kpa idei dulum nɔu ti woo weeui í ya jɛ, domi mii kumái jiida jiida.

¹⁴ Woo weeu á bu njɛi mɛɛmu iyi à ceò kuweei ku teeseui ku daa inɛ iyi wa ce bukii riisi ku nyau si itĩ njɛɛ do si awɔ ngbo njɛɛ do si isɛ ngbo njɛɛ.

¹⁵ Si anyiɛ woo weeu á daa ikpoui si awɔ cangaɛ.

¹⁶ Woo weeu á dasi amaawɔ njɛɛ si ikpo iyi í wa si awɔ cangaɛui, nɔ do amaawɔɛu ku fã ikpou si wajui amu Aɔ̃ Lafɛ̃ɛ tuuba mɛɛje,

¹⁷ si anyiɛ nɔ ku jɔ́a inɛɛu si itĩ njɛɛ, do si awɔ ngbo njɛɛ, do si isɛ ngbo njɛɛ tengi bii í tako í dasi njɛi angudãu.

¹⁸ Ikpo iyi í gbe si awɔ njɛi woo weeu nŋui á tontooa inɛɛu si iriɛ, nɔ ku ceaa bɛi à nɛ dɔ̃ɔnɛi bukii ara ku maaju ku ce si wajui amu Aɔ̃ Lafɛ̃ɛ.

¹⁹ Woo weeu á ce kuwee iyi á kpa idei dulum nɔui iyi á jɔ̀ inɛɛu ku maaju. Si anyii nŋuu á saka mɛɛmu iyi à ya ceò kuwee iyi à jo si ina fei sãa sãaui,

²⁰ nɔ ku joo si antaii bi kuweeu do kuweei iyafũu. Do yaase bɛɛbɛi á cea inɛɛu kuweei ankãanyi iyi á jɔ̀ ku maajuu.

Kuweei ilu are iyi wa ce bɔ̃ɔi batai ara

²¹ Bii inɛ í jɛ ilu are nɔ kù nɛ kpãa iyi á baò jĩnɛi kuwee ŋau bɛ, angudã akãi á dɛ iyi í jɛ ti ku ceò kuweei ku teeseu. Nŋui á naaò wa si wajui amu Aɔ̃ Lafɛ̃ɛ ku naa ku ceò kuweei riisi ku nya do kuweei iyafũ kiloo mɛɛta iyi à taki do ikpo, do ikpo liiti bubu.

²² Á nyi ku dɛdɛ kufe minji mái walakɔ ankasiidi minji zaka bɛi gbugbãi nŋu takaɛ í mungau. Akã ku jɛ ti kuwee iyi á kpa idei dulum, akã mɔ ku jɛ ti kuwee iyi à ya jo si ina fei sãa sãau.

²³ Si ajɔ mɛɛjɔsiaɛ á naaò amuaɛ ŋau wa bi woo weeu anui ile bi kukou ku ceò kuweei riisi ku nyau.

²⁴ Woo weeu á mu angudã iyi aa ceò kuweei ku teeseui do ikpo liiti bubuu ku gbugbã gbugbãɛ cingaa do cingaa fei si wajum.

²⁵ Woo weeu á saka angudãui nɔ ku bu njɛu ku jɔ́a inɛ iyi í ce kuweeu takaɛ si itĩ njɛɛ, do si awɔ ngbo njɛɛ do si isɛ ngbo njɛɛ.

²⁶ Woo weeu á daa ikpoui si awɔ cangaɛ.

²⁷ Nɔ do amaawɔ njɛɛi á buò ikpo iyi í wa si awɔ cangaɛu ku fãa tuuba mɛɛje si wajum.

²⁸ Si anyiɛ á bu keekei ku jɔ́a inɛɛu si itĩ njɛɛ, do si awɔ ngbo njɛɛ, do si isɛ ngbo njɛɛ tengii bii í tako í jɔ́a si njɛi angudãi kuweei ku teeseu.

²⁹ Ikpo iyi í gbe si awɔ njɛi woo weeu nŋui á daa inɛɛu si iriɛ, nɔ ku ceaa bɛi à nɛ dɔ̃ɔnɛi bukii ara ku maaju ku ce si wajum.

³⁰ Nɔ ku ce kuwee do akãi kufe ŋau walakɔ do akãi ankasiidi ku mungau iyi inɛɛu í bau.

³¹ Akã ku jɛ ti ku kpa idei dulum, minjisiau mɔ iyi aa jo si ina fei sãa sãau do kuweei iyafũu. Bɛɛbɛi á cea inɛ iyi wa ce bukii kuweei riisi ku nyau si wajui amu Aɔ̃ Lafɛ̃ɛ.

³² Iyi í jɛ woodai bukii ara ku maajui ilu are iyi í ce bɔ̃ɔi batai ara mbɛ.

Kubũmbusu iyi í wa si idĩi ile

³³ Aɔ̃ Lafɛ̃ɛ í sɔ̃ Moizi do Arɔ̃ɔ, í ni,

³⁴ waati iyi aa na i lɔ si ilɛi Kanaã iyi ǹ ni an na ŋɛu ŋa, bii ǹ jɔ̀ idĩi ile bii ì wa si ŋa si ilɛ titɔ̃u í bũmbusu,

³⁵ inɛ iyi ileɛ í ce bɛɛbɛu á koo sɔ̃ woo weeui ku ni, ǹ yɛ kubũmbusu gɔ í sinti ku fita si idĩi ilem.

³⁶ Hee woo weeu ku maa bɔ ku cɔ kubũmbusui ileu, á ni a wa mii ŋa iyi à wa inɔ ileu feii ku ba gɔgɔɛ gɔ ku maà na ku so riisi, si anyiɛ ku bɛi ku lɔ koo cɔ ileu.

³⁷ Bii í yɛ idĩu í ce boogu boogu walakɔ nkpa nkpa, nɔ ilau í lɔ si aninii idĩu,

³⁸ á fitai hai inɔ ileu, nɔ ku cĩmbo gamboi ileu zakai azuma akã.

³⁹ Si ajɔ mɛɛjesiau woo weeu á nyi mái. Bii í yɛ kubũmbusuu í la í kɔ̃ɔsi si arai idĩu,

⁴⁰ á ni a nya kuta ŋa iyi à ba kubũmbusuui nɔ a nyɔ ŋa angulei ilu si inya gɔ iyi í riisi.

⁴¹ Á jɔ̀ a kɛkɛɛ arai idĩui do ikpa inɔ nɔ a koo a nyɔɔ angulei iluu tengi bii à ya nikã mii riisi ŋa.

⁴² Si anyiɛ aa dɛ kuta mmuɛ mái a sãsi agbɛi kuta sinte ŋau nɔ a fɔ pɔkɔdɔ mmuɛ a teese a tɔɔkɔò ileu.

⁴³ Bii kubũmbusuu í nyi í sisi í fita si ileu má, si anyii kuta ŋa iyi à nya do iyi à kɛkɛɛ kutɔɔkɔu fei,

⁴⁴ woo weeu á koo sisi ku cɔɔ mái. Bii í jɛ kubũmbusuu í fita si má ntɔ ntɔi, kubũmbusuu kaa nya si ileu mái, inɛ nŋu í baa í jɛ ile hai maaju mbɛ bɛi.

⁴⁵ Aa lɛgɛ ileui hee do tengi bii í nɛ kuta ŋau fei, do jĩi ŋau do sãai ku tɔɔkɔu fei, nɔ a koo a nikã fei ndɛɛ angulei iluu tengi bii à ya nikã mii riisi ŋau.

⁴⁶ Inɛ iyi í lɔ inɔ ileu si waati iyi à cĩmboɛu, lafɛ̃ɛ á jɛ ilu riisii hee alɛ koo lɛò.

⁴⁷ Inɛ mɔ iyi í sũ inɔ ileu walakɔ í lɔ bɛ í jɛ ngɔgɔ lafɛ̃ɛ á fɔ jĩnɛɛ ŋai.

⁴⁸ Bii í nɔ í jɛ waati iyi woo weeu í nyi í koo í cɔ ileu í ba wee kubũmbusu kãma kù fita si bii à teese à tɔɔkɔu má, á ni ileu í maajui domi kubũmbusuu í leekĩ.

⁴⁹ Iyi í jɛ kuwee iyi aa ce ileu ku bɛi ku maaju wee. Woo weeu á dɛ yɛi minji, do jĩi ndii sɛɛdi, do ikũ nkpa iyi à ce do ntoi angudã do amaawɔi jĩi ndii izɔpu ku bɛi ku ceò kuweeu.

⁵⁰ Á saka akãi yɛiui si cakai amà iyi í nɛ inyii isɔ̃.

⁵¹ Si anyiɛ á so jĩi ndii sɛɛdiui, do amaawɔi izɔpuu, do ikũ nkpau do yɛi iyi ihɔ̃u mɔ má. Á so fei ndɛɛi ku sɔsi njɛi yɛi iyi í sakau do si inyii isɔ̃u nɔ ku fãsi ileu tuuba mɛɛje.

⁵² Á jɔ̀ ileu ku maajui do njɛi yɛiu, do inyii isɔ̃u, do yɛi iyi í wɛɛ njaawɛu, do jĩi ndii sɛɛdiu, do amaawɔi jĩi ndii izɔpuu do ikũ nkpau.

⁵³ Á jɔ̀ yɛi iyi í wɛɛ njaawɛui ku fo ku nɛ sako. Do yaase bɛɛbɛi á nyaò riisii ileu nɔ ileu ku baa ku maaju.

⁵⁴ Iyi í jɛ woodai bɔ̃ɔi batai ara fei mbɛ do ti kpakaai,

⁵⁵ do ti ibɔ ŋa, do ile ŋa

⁵⁶ do ti ara iyi í wu bii gɔ, do juju, do ti ngoli ŋa.

⁵⁷ Wooda ŋau bɛi aa jɔ̀ a mà dimii bɔ̃ɔ iyi amanɛ ŋa à waa ce í jɔ̀ à jɛò inɛ hai maaju, walakɔ bɛi jĩnɛ ŋa à yɛ í jɔ̀ à soò riisi, walakɔ do si kpãa iyi à máò iju.