Kuwee 13 - Bibeli do fee

Bɔ̃ɔi batai arai amanɛ

¹ Aɔ̃ Lafɛ̃ɛ í sɔ̃ Moizi do Arɔ̃ɔ í ni,

² bii arai inɛ í wu bii gɔ walakɔ í nɛ juju í ya maa ce inyi, walakɔ í nɛ agbɛ fũfũ iyi í jɔ bɔ̃ɔi batai ara, aa kooɛi bi Arɔ̃ɔ woo weeu walakɔ bi inɛ akãi amaɛ ŋa.

³ Woo weeui á cɔ arai inɛɛu tengi bii kù waa nɛ baaniu. Bii ntoi tengi bɛ í fũuta, nɔ í nɛ juju iyi í jĩisa hee í to si bãasĩi ara, bɔ̃ɔi batai ara mbɛ. Woo wee iyi í cɔɔu nŋui á ni inɛɛu kù maaju.

⁴ Bii arau í nɛ agbɛ fũfũ nɔ si batai araui agbɛu í leekĩ, nɔ ntoi tengi bɛ kù fũuta, woo weeu á nya inɛɛu ikãi zakai azuma akã.

⁵ Si ajɔ mɛɛjesiau woo weeu á nyi ku teese ku cɔɔ mái. Bii í yɛ agbɛu kù kpaasi nɔ kù la kù kɔ̃ɔsi, á nyi ku nya lafɛ̃ɛ ikã isɛ gbeejisia mái zakai azuma akã.

⁶ Si ajɔ mɛɛjesiaɛ woo weeu á cɔɔ mái. Bii agbɛ fũfũu wa tã nɔ kù la kù kɔ̃ɔsi, woo weeu á ni inɛɛu í maaju, agbɛ fũfũɛu kù jɛ bɔ̃ɔ, lafɛ̃ɛ á fɔ ibɔɛ ŋai nɔ ku jɛ inɛ kumaaju.

⁷ Amma si anyiɛ bii agbɛ fũfũu í na í la í kɔ̃ɔsi má, í gbe ku nyi bi woo weeu ku nyi ku cɔɔ má.

⁸ Woo weeu á cɔɔ mái. Bii í yɛ iyi agbɛ fũfũu í la í kɔ̃ɔsi, nŋui á fɔ ku ni inɛɛu kù maaju, nɔ ku ni bɔ̃ɔi batai arai.

⁹ Bii bɔ̃ɔi batai ara í mu inɛ gɔ bi woo weei à ya bɔòɛ.

¹⁰ Woo weeui á cɔɔ. Bii arau í wu bii gɔ, nɔ í jɔ̀ batau do ntoi tengi bɛ í fũuta nɔ í ce juju si arau,

¹¹ inɛ nŋu bɛ dimii bɔ̃ɔi batai ara gɔi bɛ jiida jiida. Woo weeui á fɔ ku ni inɛɛu kù maaju, kù nɛ ku nyaa ikã gɔ má domi ti inɛ nŋu í fita gbugbãai gbakã.

¹² Bii bɔ̃ɔi batai ara gɔ í fangaa si arai inɛ nɔ í bii hai iriɛ hee ku koo si isɛɛ ŋa í gbe woo weeu ku cɔɔ ku ce ncɛɛ,

¹³ nɔ bii í yɛ bɔ̃ɔu í bii si arau fei á ni inɛɛu í maajui si bɛi arau fei í baa í fũuta.

¹⁴ Amma ajɔ iyi á yɛ juju si arau, hai ajɔ nŋu inɛɛu kaa jɛ inɛ kumaaju má.

¹⁵ Bii woo weeu í cɔ jujui arai lafɛ̃ɛ, nŋui á fɔ ku ni inɛɛu kù maaju, domi bii arai amanɛ í nɛ dimii juju bɛɛbɛ, lafɛ̃ɛ kù maaju, wa ce bɔ̃ɔi batai arai.

¹⁶ Bii jujui arau í na í tã, lafɛ̃ɛ á nyi bi woo weeu mái,

¹⁷ woo weeu á nyi ku teese ku cɔɔ mái. Bii í yɔɔ iyi jujui arau í tãi ntɔ ntɔ, á fɔ mái ku ni inɛɛu í maaju.

¹⁸ Bii inɛ gɔ í ce ngoli si araɛ nɔ í tã,

¹⁹ bii agbɛu í na í nyi í wu má nɔ í ya maa ce inyi fũfũ, walakɔ fũfũ ku yɔgɛɛò nkpa, lafɛ̃ɛ á koo nyisi araɛ bi woo weeui.

²⁰ Woo weeui á cɔ tengi bii kù waa nɛ baaniu. Bii jujuu í jĩisa hee í tosi bãasĩi arau, nɔ ntoi tengi bɛ í fũuta, woo weeu á ni inɛɛu kù maajui. Dimii bɔ̃ɔi batai ara gɔi iyi í fita si dalai jujuu nɔ í la wa koo.

²¹ Amma bii woo weeu í cɔ nɔ kù yɛ nto fũfũ si agbɛu, nɔ kù jĩisa kù to hee si bãasĩi arau, bii batai ara tengi bɛ í fũuta, á nya lafɛ̃ɛ ikãi zakai azuma akã.

²² Si anyiɛ bii í jɛ bɔ̃ɔu í na í la í kɔ̃ɔsii, woo weeu á ni inɛɛu kù maajui. Dimii bɔ̃ɔi batai ara gɔi wa ce.

²³ Amma bii agbɛi jujuu kù kpaasi nɔ kù la kù kɔ̃ɔsi si arau, woo weeu á ni inɛɛu í maajui.

²⁴ Amma bii ina í bɔ inɛ gɔ, nɔ agbɛu í fũuta wa ce inyi fũfũ walakɔ bii agbɛu í ce fũfũ ku yɔgɛɛò nkpa,

²⁵ woo weeu á cɔ tengi bii kù waa nɛ baaniui. Bii ntoi tengi bɛ ŋau à fũuta nɔ agbɛu í jĩisa, dimii bɔ̃ɔi batai ara gɔi í sinti si bii ina í bɔu bɛ, woo weeu á ni inɛɛu kù maajui.

²⁶ Amma bii woo weeu í cɔɔ nɔ kù yɛ nto fũfũ, nɔ agbɛu kù jĩisa, bii wa fũuta, á nya inɛɛu ikãi zakai azuma akã.

²⁷ Bii si ajɔ mɛɛjesiau woo weeu í yɛ bɔ̃ɔu í la í kɔ̃ɔsi, á ni inɛɛu kù maajui, dimii bɔ̃ɔi batai ara gɔi.

²⁸ Amma bii jujuu í gbe inya akã bɛ, nɔ wa fũuta, jujui ku bɔ nŋu akãi, woo weeu á ni inɛɛu í maajui, domi agbɛi ku bɔ nŋu akãi.

²⁹ Bii inɛmɔkɔ gɔ walakɔ inaabo gɔ í nɛ bɔ̃ɔi batai ara si iri walakɔ si agbã lɛlɛ,

³⁰ woo weeu á cɔɔi. Bii jujuu í jĩisa do bii í jɛ ntoi tengi bɛ í ce igbaagba nɔ í kere, woo weeu á ni inɛɛu kù maajui. Wa ce kpakaarii, bɔ̃ɔi batai arai í sintia si iriu bɛ walakɔ si agbã lɛlɛ.

³¹ Amma bii woo weeu í cɔɔ nɔ í ba wee jujuu kù jĩisa nɔ do nŋu fei ntoi tengi bɛ kù waa dũ, á nya inɛɛu ikãi zakai azuma akã.

³² Si ajɔ mɛɛjesiau bii woo weeu í cɔɔ má nɔ í yɛ bɔ̃ɔu kù la kù kɔ̃ɔsi si iriu, bii kù nɛ nto iyi í ce igbaagba, nɔ kù jĩisa,

³³ inɛ iyi wa ce bɔ̃ɔu á wa ntoi iriɛui, amma kaa wa tengi bii jujuu í wa. Si anyiɛ woo weeu á nyi ku nyaa ikã mái zakai azuma akã.

³⁴ Woo weeu á nyi ku cɔ kpakaariu mái si ajɔ mɛɛjesiau. Bii kù la kù kɔ̃ɔsi nɔ kù jĩisa kù to si bãasĩi arau, woo weeu á ni í maajui, á fɔ jĩnɛɛ ŋai nɔ ku baa ku jɛ inɛ kumaaju.

³⁵ Amma si anyiɛ bii bɔ̃ɔu í na í la í kɔ̃ɔsi si iriu, baa do iyi woo weeu í ni í maaju wo, á nyi ku teese ku cɔɔ mái.

³⁶ Nɔ bii bɔ̃ɔu í la í kɔ̃ɔsi, kù nɛ woo weeu ku cɔ mà ntoi iriu í ce igbaagba kãma má. Inɛɛu í baa í jɛ inɛ iyi kù maaju mbɛ.

³⁷ Bii í nɔ í jɛ í yɔɔ iyi bɔ̃ɔu kù kɔ̃ɔsi kãmai, bii ntoi iriu í la í kɔ̃ɔsi nɔ wa dũ, í yɛ bɛi bɔ̃ɔu í tãi bɛ. Í maaju mbɛ, nɔ woo weeu takaɛi á ni inɛɛu í maaju.

³⁸ Bii inɛmɔkɔ walakɔ inaabo wa yɛ si araɛ agbɛ fũfũ gɔ ŋa,

³⁹ woo weeu á cɔɔi, bii í jɛ agbɛ ŋau à yɛ fũfũ, bɔ̃ɔu kù jɛ taale nɔ lafɛ̃ɛ inɛ kumaajui.

⁴⁰ Bii irii inɛmɔkɔ gɔ ku na kù nɛ nto, do nŋu fei lafɛ̃ɛ inɛ kumaajui.

⁴¹ Baa bii í nɔ í jɛ ikpa ikpoɛ mɔi ku na kù nɛ nto, lafɛ̃ɛ inɛ kumaajui.

⁴² Amma tengi bii kù nɛ ntou, bii do wajui walakɔ bii do anyi mɔi, bii í nɛ juju iyi í ce fũfũ ku yɔgɛɛò nkpa, dimii bɔ̃ɔi batai ara gɔi wa fita wa bɛ.

⁴³ Woo weeu á cɔɔi. Bii í yɛ í ce juju iyi í ce fũfũ ku yɔgɛɛò nkpa si tengi bii kù nɛ nto do waju walakɔ do anyiu, bii í jɔ bɔ̃ɔi batai ara iyi í ya fita si batai araui,

⁴⁴ lafɛ̃ɛ wa ce bɔ̃ɔi batai arai, kù jɛ inɛ kumaaju, woo weeu á ni lafɛ̃ɛ kù maajui na saabui juju iyi í wa si iriɛu.

⁴⁵ Inɛ iyi wa ce bɔ̃ɔi batai ara, jĩnɛ jambii ŋai á ya dasi, kaa ya wa iriɛ, amma á ya bii agbã lɛlɛɛi hee ku bɔ si anu leleɛ, nɔ ku dɔ̃ anu ku maa ni, ku riisi, ku riisi.

⁴⁶ Zaka bɛi kukpɛi bɔ̃ɔu í to, bɛɛbɛi nŋu mɔ á jɛ ilu riisi. Na ŋɔi í jɔ̀ á nɛ bi kuwaɛi ikã do ikpa anyii asɔu.

Jĩnɛ ŋa iyi à bũmbusu

⁴⁷ Bii jĩnɛ iyi à ce do ntoi angudã walakɔ do acɔ ku nɛ gbugbã í bũmbusu,

⁴⁸ bii si acɔ ŋai walakɔ si ibɔ ku mungau ŋa iyi à ce do ntoi angudã, walakɔ iyi à ce do acɔ ku nɛ gbugbã, bii í nɔ í jɛ si bata ŋai, walakɔ mii ŋa iyi à ce do bata,

⁴⁹ bii kubũmbusu ŋau à ce boogu boogu, walakɔ nkpa nkpa, kubũmbusu iyi bɛ ŋai woo wee í nɛ ku cɔ.

⁵⁰ Bii woo weeu í cɔ jĩnɛ iyi í bũmbusuu í tã á sɔkɔ si ilei zakai azuma akã.

⁵¹ Si ajɔ mɛɛjesiau á sisi ku cɔɔ mái. Bii kubũmbusuu í la í kɔ̃ɔsi si jĩnɛu, dimii kubũmbusu gɔi iyi kaa nya. Jĩnɛu á baa ku jɛ jĩnɛ hai maajui.

⁵² Woo weeu á jo jĩnɛui baa bii í jɛ jĩnɛ iyi à ce do ntoi angudãi, walakɔ iyi à ce do acɔ ku nɛ gbugbã, walakɔ iyi à ce do bata fei. Si bɛi a kaa yɔkɔ a nya kubũmbusu iyi í wa si jĩnɛu, inai á jo jĩnɛu mam mam.

⁵³ Amma bii woo weeu í sisi í cɔ jĩnɛu nɔ í yɛ iyi kubũmbusuu kù la kù kɔ̃ɔsi,

⁵⁴ á jɔ̀ a fɔɔi, nɔ á sɔkɔ si ile azuma minjisia má.

⁵⁵ Waati iyi woo weeu á na ku cɔ jĩnɛu má si anyii kufɔ iyi à fɔɔ à bɛi à cĩmbo siu, bii í yɛ kubũmbusu iyi í wa siu kù kpaasi, baa bii kù fangaa si jĩnɛu, aa jilɔɔ si jĩnɛ hai maajui. Aa jooi do bii kubũmbusuu í bɛjɛu fei.

⁵⁶ Amma bii woo weeu í cɔɔ nɔ í yɛ agbɛu í fũuta si na iyi í jɔ̀ à fɔɔ, á bu tengi bii í ba kubũmbusuui baa bii í jɛ si jĩnɛ yoomai ku nyɔɔ.

⁵⁷ Si anyiɛ bii kubũmbusuu í na í fita si jĩnɛu má, baa bii í jɛ jĩnɛ dimi yoomai, kubũmbusuui í la wa baa do ankãanyi bɛ má. Jĩnɛ iyi í nɛ kubũmbusuu aa jooi.

⁵⁸ Bii à fɔ jĩnɛ iyi í bũmbusu, bii acɔ ŋai, walakɔ ibɔ ku mungau ŋai, walakɔ jĩnɛ gɔ ŋa iyi à ce do batai, nɔ kubũmbusuu í nya, aa fɔɔ isɛ gbeejisia mái ku bɛi ku maaju.

⁵⁹ Iyi í jɛ woodai jĩnɛ ŋa iyi à bũmbusu ŋau mbɛ, jĩnɛ ŋa iyi à ce do ntoi angudã walakɔ do acɔ ku nɛ gbugbã, walakɔ do itɔ, walakɔ ibɔ ku mungau ŋa, walakɔ iyi à ce do bata ŋa. Wooda ŋau bɛi aa jɔ̀ inɛ ku mà bii í jɛ jĩnɛ gɔ í nɛ riisi, walakɔ bii wa maaju.