Kuwee 12 - Bibeli do fee

Kuwee iyi inaabo í nɛ ku ce waati iyi í bí

¹ Aɔ̃ Lafɛ̃ɛ í sɔ̃ Moizi í ni,

² sɔ̃ inɛi Izirɛli ŋa i ni, bii inaabo í nɛ asĩ nɔ í bí ama inɛmɔkɔ á jɛ ilu riisii zakai ajɔ mɛɛje bɛi waati iyi awɔɛ í ya maa muu.

³ Si ajɔ mɛɛjɔsiaɛ aa dasi amau bangoi.

⁴ Si anyiɛ, ajɔ kuntaa do mɛɛtai iyei amau á nyi ku ce má ku bɛi ku maaju na saabui njɛ iyi í nikã si waatii kubíu. Nɔ kù sĩa ku lu mii kumá kãma hee má jɛ ku bɔ ile bi kukou, í gbe hee ajɔ ciiji iyi í nɛ ku ceu ku kɔ̃.

⁵ Bii í nɔ í jɛ ama inaaboi í bí, á jɛ ilu riisii bɛi waati iyi awɔɛ wa muu, amma azuma minjii inɛ nŋu á jɛ, si anyiɛ ajɔ kita do mɛɛfai á ce ku bɛi ku maaju na saabui njɛ iyi í nikã si waatii kubíu.

⁶ Bii í jɛ ama inɛmɔkɔ walakɔ ama inaaboi, bii waati iyi í nɛ ku ceu í kɔ̃, abou á koo ba woo weeui anu ile bi kukou. Bii wa koo ama angudãi adɔ̃ akãi á maa mu iyi á ceò kuwee iyi à ya jo si ina fei sãa sãau, do ankasiidi ku mungau akã walakɔ kufe iyi á ceò kuwee iyi á kpa idei dulum.

⁷ Mii ŋau bɛi woo weeu á ceò kuwee si wajui amu Aɔ̃ Lafɛ̃ɛ nɔ ku ce buki iyi á jɔ̀ abou ku maaju. Iyi í jɛ woodai abo iyi í bí ama inɛmɔkɔ walakɔ ama inaabo mbɛ.

⁸ Bii kù nɛ daamai angudã iyi à waa fãau ihɛ̃, kufe minjii á dɛdɛ walakɔ ankasiidi minji, akã ku jɛ iyi aa ceò kuwee iyi à ya jo si ina fei sãa sãau, akã mɔ ku jɛ ti ku kpa idei dulum nɔu. Woo weeui á ce buki iyi á jɔ̀ abou ku maaju.