Kuwee 11 - Bibeli do fee

Mɛɛmu ŋa iyi à jɛ iwɔ̀ do iyi a kù jɛ iwɔ̀ ŋa

¹ Aɔ̃ Lafɛ̃ɛ í sɔ̃ Moizi do Arɔ̃ɔ í ni,

² i sɔ̃ inɛi Izirɛli ŋa i ni, mɛɛmu ŋa iyi aa ŋɔ si mɛɛmu ŋa iyi à wa si ilɛu ihɛ̃ fei wee ŋa.

³ Mɛɛmu ŋa iyi à nɛ kɔwe ku nɛ afã nɔ bii à waa sũ à ya kpɔ fɔfɔ ŋa iyi à ŋɔ wa a teese a ŋɔɔ má a bɛi a muu, mɛɛmu iyi bɛ ŋai aa ŋɔ ŋa.

⁴ Amma i kaa ŋɔ mɛɛmu gɔ ŋa si na iyi í jɔ̀ à ya kpɔ fɔfɔ iyi à ŋɔ nɔ a teese a ŋɔɔ má, walakɔ si na iyi í jɔ̀ à nɛ kɔwe ku nɛ afã ŋa. Mɛɛmu ŋa mɔ iyi à jɛ iwɔ̀ iyi i kaa ya ŋɔ ŋa wee. I maà ya ŋɔ kpookpo ŋa baa do iyi í ya kpɔ ijɛ iyi í jɛ wa ku teese ku ŋɔɔ amma kù nɛ kɔwe ku nɛ afã. I ya cɔɔ bɛi mii iyi í jɛ iwɔ̀ ŋa.

⁵ Nɔ i maà ya ŋɔ damaa ŋa, nŋu mɔ í ya kpɔ ijɛ iyi í jɛ wa ku teese ku ŋɔɔ amma nŋu mɔ kù nɛ kɔwe, i jilɛ nŋu mɔ si mɛɛmu iyi í jɛ iwɔ̀ ŋa.

⁶ I maà ya ŋɔ tabe ŋa, nŋu mɔ í ya kpɔ ijɛ iyi í jɛ ku teese ku ŋɔɔ amma kù nɛ kɔwe.

⁷ I maà ya ŋɔ kusɔɔ ŋa, domi baa do iyi í nɛ kɔwe ku nɛ afã, ci ya kpɔ ijɛ iyi í jɛ ku teese ku ŋɔɔ má.

⁸ I maà ya ŋɔ iŋai mɛɛmu ŋau bɛ ŋa, nɔ i maà ya lu baa iku nŋa ŋa, i ya jilɛ ŋa si mɛɛmu ŋa iyi à jɛ iwɔ̀ ŋa.

⁹ Si mɛɛmu ŋa mɔ iyi à wa inɔ inyi, iyi aa ŋɔ ŋa wee. Iyi à nɛ afa do kpaka ŋau bɛi aa ŋɔ ŋa si mɛɛmu ŋa iyi à wa inɔ inyi ŋau, si tenku ŋa do si ido ku mungau ŋau.

¹⁰ Amma i maà ŋɔ iyi a kù nɛ afa ŋa do kpaka ŋau si inɔi mɛɛmu ŋa iyi à wa inɔ inyi ŋau fei, hai iyi à wa si inyii tenku ŋa hee ku koo si iyi à wa si ido ku mungau ŋa fei.

¹¹ Inɛ nŋu ŋau bɛ, mii laalɔ ŋai, i maà ya ŋɔ ŋa nɔ i maà ya lu baa iku nŋa ŋa.

¹² Bɛɛbɛi andi mɛɛmu ŋa iyi à wa inɔ inyi fei iyi a kù nɛ afa do kpaka ŋau bɛ, i jilɛ ŋa si bɛi iwɔ̀ ŋa.

¹³ Si inɔi yɛi ŋa mɔ, yɛi ŋa iyi à jɛ iwɔ̀ iyi i kù nɛ i ŋɔ ŋa wee. Kungbã ŋa do yɛi ku cɔcɔ inyi dimi minji gɔ ŋa,

¹⁴ do kondi, do yembeeku, do yɛi mmuɛ ŋa iyi à yɛ bɛɛbɛ fei,

¹⁵ do gaagoã hee do dimi mmuɛ ŋa iyi à yɛ bɛɛbɛ fei,

¹⁶ do taataa, do gbĩgbĩ, do kelenkelen, do katɔ do yɛi ŋa iyi à yɛ bɛɛbɛ fei,

¹⁷ do gɔgɔ ŋa iyi à jɔ gbĩgbĩ, do pɛtui ido, do yɛi dimi mmu gɔ ŋa,

¹⁸ do yɛi kɔ̃ɔ sisɔ gɔ, do yɛi gɛlɛ sisɔ gɔ, do yɛi ku cɔcɔ inyi mmuɛ ŋa má,

¹⁹ do kɔɔkɔɔti, do bukaabo do iyi í yɛ bɛɛbɛ fei do gugbãdale, do pete.

²⁰ Andi kokoo iyi í ya nɛ ilɛ nɔ í nɛ ikpa do kutɛ mɛɛ fei i jilɛ ŋa si mii laalɔ ŋa.

²¹ Amma si inɔi kokoo ŋa iyi à ya nɛ ilɛ nɔ à nɛ ikpa do kutɛ mɛɛ ŋau, iyi à nɛ tãnga si kutɛ nŋa ŋa nɔ à ya fo à maa dingaa si ilɛu i ya ŋɔ inɛ nŋu ŋa.

²² Iyi aa ŋɔ ŋau wee. Ngootue do kɛtɛngbo do mii iyi í yɛ bɛɛbɛ fei.

²³ Andi kokoo ŋa iyi à gbe fei iyi à ya nɛ ilɛ nɔ à nɛ ikpa do kutɛ mɛɛ, i jilɛ ŋa si mii laalɔ ŋa.

Mii ŋa iyi aa dasi inɛ riisi

²⁴ Inɛ iyi í lu mɛɛmu ŋa iyi à jɛ iwɔ̀, lafɛ̃ɛ á so riisii hee alɛ koo lɛò.

²⁵ Nɔ inɛ iyi í so iku nŋa á fɔ ibɔɛ ŋa, nɔ nŋu takaɛ á jɛ ilu riisi hee alɛ koo lɛò.

²⁶ Andi mɛɛmu iyi kù nɛ kɔwe ku nɛ afã ŋa, nɔ ci ya kpɔ mii iyi í jɛ ku sisi ku ŋɔɔ má, inɛ iyi í luu fei í baa í jɛ ilu riisii.

²⁷ Andi mɛɛmu ŋa iyi à nɛ kutɛ mɛɛ nɔ a kù nɛ kɔwe fei, i jilɛ ŋa si mɛɛmu ŋa iyi à jɛ iwɔ̀ ŋa, nɔ inɛ iyi í lu iku nŋa fei í baa í jɛ ilu riisi hee alɛ koo lɛò,

²⁸ nɔ inɛ iyi í so iku nŋa fei á fɔ ibɔɛ ŋai nɔ lafɛ̃ɛ í baa í jɛ ilu riisi hee alɛ koo lɛò. Aa maa cɔ ŋai bɛi ilu riisi ŋa.

²⁹ Si inɔi mɛɛmu wɛwɛɛ ku nɛ ilɛ ŋa mɔ, iyi ì nɛ i jilɛ si mɛɛmu ŋa iyi à jɛ iwɔ̀ ŋa wee. Kute buɛɛ, do kute, do wãayĩ do mɛɛmu ŋa iyi à yɛ bɛi wãayĩ fei,

³⁰ do katakatawou, do kpɔlɔ, do baaɔ̃, do godom, do kpangu.

³¹ Mɛɛmu ŋau bɛ fei i ya maa cɔ ŋa bɛi mɛɛmu ŋa iyi à jɛ iwɔ̀ ŋa si inɔi mɛɛmu keeke ku nɛ ilɛ ŋa fei. Inɛ iyi í lu iku nŋa á jɛ ilu riisii hee alɛ koo lɛò.

³² Bii iku nŋau í cuku si mii gɔ, mii nɔu á baa ku jɛ riisii, hai jĩnɛ ŋa iyi à ce do jĩi, do ibɔ ŋa, do bata, do saaki. Andi jĩnɛ iyi à waa ceò icɛ fei, bii iku nŋa í cuku si fei, aa dasi inyii a wiɛɛ nɔ ku wɛɛò riisi hee alɛ koo lɛò, si anyiɛ ku bɛi ku maaju.

³³ Mii iyi í wa inɔ cakai amà fei, bii gɔgɔɛ gɔ í dasi, mii nɔu á riisii, nɔ aa lɛgɛ cakau ŋai.

³⁴ Inyi iyi à fɔò jĩnɛ iyi í ba riisiu, bii í nikã si sɔnda á riisii, nɔ inyi iyi à waa ceò saalu fei, baa bii bɛirei caka bii í wa siu í yɛ, nŋu mɔ á baa ku riisii.

³⁵ Mii iyi ikui mɛɛmu ŋau bɛ í cuku si fei á riisii. Bi ku sɔ̃ pɛ̃ɛ do icu alulu iyi gɔgɔɛ gɔ í cuku si fei aa lɛgɛɛi, domi aŋa mɔ aa riisii. Nɔ i jilɛ ŋa si mii riisi ŋa.

³⁶ Amma baa bii ikui gɔgɔɛ gɔ í cuku si inyii isɔ̃ walakɔ si inyii lɔgɔ gɔ, inɛ nŋu kù jɛ riisi, amma inɛ iyi í lu iku nŋau wa fei á baa ku jɛ ilu riisii.

³⁷ Nɔ baa bii ikui gɔgɔ í cuku si dimi ku gbɛ̃, inɛ nŋu mɔ kù jɛ riisi.

³⁸ Amma bii inɛ í dasi inyi si dimi ku gbɛ̃, bii ikui gɔgɔ í dasi bɛ inɛ nŋu á riisii.

³⁹ Bii mɛɛmu iyi ì ya ŋɔ ŋa í ku, inɛ iyi í lu ikuɛu á jɛ ilu riisii hee alɛ koo lɛò.

⁴⁰ Inɛ iyi í ŋɔ iŋa dimi bɛɛbɛ á fɔ ibɔɛ ŋai, amma do nŋu fei á jɛ ilu riisi hee alɛ koo lɛò. Nɔ bɛɛbɛ mɔi inɛ iyi í so ikui mɛɛmuu, nŋu mɔ á fɔ ibɔɛ ŋai nɔ ku jɛ ilu riisi hee alɛ koo lɛò.

⁴¹ I ya mu ara nŋɛ si mɛɛmu wɛwɛɛ ku nɛ ilɛ ŋau fei do ku cã ilɛ ŋau ŋa. I maà ya ŋɔ kãma nŋa.

⁴² I maà ya ŋɔ iyi à ya maa cã ilɛ ŋa hee má jɛ iyi à ya maa nɛ si kutɛ mɛɛ nŋa ŋa walakɔ kutɛ nkpɔ nkpɔ.

⁴³ I maà ya jɔ̀ mɛɛmu ku cã ilɛ ŋau bɛ a dasi ŋɛ riisi, domi aa dasi ŋɛ riisii bii ì waa lu ŋa ŋa.

⁴⁴ Amui ǹ jɛ Aɔ̃ Lafɛ̃ɛ nŋɛ. Na nŋu, i jɔ̀ i má ŋa bɛi amu mɔ ǹ má, nɔ i maà jɔ̀ mɛɛmu ku cã ilɛ ŋau ihɛ̃ a dasi ŋɛ riisi.

⁴⁵ Ntɔ ntɔ, amui ǹ jɛ Aɔ̃ Lafɛ̃ɛ iyi í nya ŋɛ wa hai ilɛi Ezibiti ku ba n jɛ Ilaaɔ̃ Lafɛ̃ɛ nŋɛ nɔ iŋɛ mɔ i má bɛi amu mɔ ǹ máu.

⁴⁶ Iyi í jɛ woodai mɛɛmu ŋa do yɛi ŋa do mɛɛmu ŋa iyi à wa inɔ inyi fei hee do mɛɛmu ku nɛ ilɛ ŋau feii mbɛ.

⁴⁷ Woodaui á jɔ̀ i wũa iyi í jɛ iwɔ̀ do iyi kù jɛ iwɔ̀ ŋa, nɔ i mà iyi à ya ŋɔ do iyi a ci ya ŋɔ ŋa.