Kuwee 10 - Bibeli do fee

Dulum iyi Nadabu do Abihu à ce

¹ Nadabu do Abihu amai Arɔ̃ɔ ŋa, aŋa fei à so mii ku bu ina akã akã à dasi ina mmu gɔ nɔ à dasi tuae si antaiɛ, à bɛi à waa kooò si wajui Aɔ̃ Lafɛ̃ɛ. Wee wooda kù wɛɛ a ce bɛɛbɛ.

² Ŋɔi ina í dede anu akã hai si wajui Aɔ̃ Lafɛ̃ɛ nɔ í jo ŋa bɛ í kpa ŋa gbakã.

³ Ŋɔi Moizi í sɔ̃ Arɔ̃ɔ í ni, bɛɛbɛi Aɔ̃ Lafɛ̃ɛ í fɔ si waati iyi í ni, ǹ bi inɛ ŋa iyi à waa sɛkɛɛ sim wa ku ba a ceem kuwee a mà iyi amu inɛ kumái, nɔ a ya naa do jirima, nɔ a ya jɔ̀ zamaau fei ku mà bɛɛrɛm. Ŋɔi Arɔ̃ɔ wa coko.

⁴ Ŋɔi Moizi í kpe Misaɛli do Elisafãa amai Uziɛli ifɔi baai Arɔ̃ɔ, nɔ í sɔ̃ ŋa í ni, i sɛkɛɛ wa i naa i so kpaasi nŋɛ ŋau ihɛ̃ hai si ile kumáu i nɛò ŋa angule ŋa.

⁵ Ŋɔi à naa à so ŋa do ibɔ nŋa ŋa iyi à waa dasiu à nɛò ŋa bɛi Moizi í fɔu.

⁶ Si anyiɛ nɔ Moizi í sɔ̃ Arɔ̃ɔ do ama inɛmɔkɔ minjiɛ ŋa iyi à ya kpe Eleazaa do Itamaa í ni, i maà wa iri nŋɛ ŋa, nɔ i maà ga ibɔ nŋɛ ŋa ku ba iŋɛ mɔ i maà na i ku ŋa, nɔ idɔɔkɔ̃i Aɔ̃ Lafɛ̃ɛ ku maà na ku dede si zamaau fei. I jɔ̀ inɛi Izirɛli kpaasi nŋɛ ŋau a kpata na ina iyi Aɔ̃ Lafɛ̃ɛ í jɔ̀ í dede í kpa ŋau bɛ.

⁷ Iŋɛ taka nŋɛ mɔ i maà tɛkɛɛ hai anui ile bi kukou, ku ba i maà na i ku ŋa, domi à tontoo ikpo si iri nŋɛ à nya ŋɛò ikã na icɛi Aɔ̃ Lafɛ̃ɛ. Ŋɔi à ce bɛi Moizi í fɔu.

Woodai atɛ̃ ku nɛ gbugbã iyi í kã woo wee ŋa

⁸ Aɔ̃ Lafɛ̃ɛ í sɔ̃ Arɔ̃ɔ í ni,

⁹ maà mɔ atɛ̃ vɛ̃ɛ, walakɔ mii gɔ iyi aa mɔ ku kpaɛ, awɔ do amaɛ ŋa fei waati iyi ì waa bi i lɔ ile bi kukou ŋa, ku ba i maà ti i na i ku ŋa. Nŋu bɛi í baa í jɛ wooda iyi tɔku nŋɛ ŋa aa na a maa too si hee do ajɔ fei.

¹⁰ I maà ya mɔ atɛ̃ ŋa ku ba i ya yɔkɔ i mà mii ŋa iyi à nya ikã à jɛ ti Ilaaɔ̃ do mii ŋa iyi a kù nya ŋa ikã ŋau, nɔ i ya mà mii ŋa iyi à riisi do mii ŋa iyi à maaju ŋau,

¹¹ nɔ i sɔ̃ inɛi Izirɛli ŋa wooda ŋa iyi amu Aɔ̃ Lafɛ̃ɛ ǹ ni Moizi ku na ŋau fei.

Woodai iŋai kuwee ŋa

¹² Nɔ Moizi í sɔ̃ Arɔ̃ɔ do ama inɛmɔkɔ minjiɛ ŋa iyi à gbe ŋau, Eleazaa do Itamaa, í ni, i so kuweei iyafũ iyi í gbe si iyi à jo si ina si wajui Aɔ̃ Lafɛ̃ɛ feiu, nɔ i jɔ́ɔ hai nɛ levɛ̃ɛ kɔkɔi bi kuweeu ŋa, domi mii gɔi iyi í má jiida jiida.

¹³ Aa jɔ́ɔ ŋai si inya gɔ iyi à nya ikã. Ì nɛ kpãai i jɛ mbɔi kuwee iyi à ya jo si ina si wajui Aɔ̃ Lafɛ̃ɛ feiu nɔ amaɛ ŋa mɔ à nɛ kpãaɛ, domi bɛɛbɛi Aɔ̃ Lafɛ̃ɛ í sɔ̃m.

¹⁴ Nɔ gɛndɛi mɛɛmu ŋa iyi inɛi Izirɛli ŋau à ceò kuweeu do itã njɛ nŋa ŋa iyi à gbugbã gbugbãu aa ŋɔ nŋu mɔ ŋai si inya gɔ iyi à nya ikã. Aa ŋɔɔi awɔ do ama inɛmɔkɔɛ ŋa do ama inaaboɛ ŋa, domi nŋu mɔ aa naɛi ku jɛ ikpɛ̃ nŋɛ, awɔ do amaɛ ŋa, bɛi ti kuweei anu akãi inɛi Izirɛli ŋau.

¹⁵ Aa naaò ikpoi iŋa iyi aa ceò kuweeu wai, do itãɛ, do gɛndɛ iyi à ya gbugbã gbugbã si wajui Aɔ̃ Lafɛ̃ɛu. Nɔ aa gbugbã gbugbã fei ndɛɛi si wajui Aɔ̃ Lafɛ̃ɛ. Nŋu bɛi á baa ku jɛ ikpɛ̃i awɔ do amaɛ ŋa, nɔ ku jɛ wooda iyi aa maa too si ŋa hee do ajɔ fei.

¹⁶ Ŋɔi Moizi wa dɛdɛ iwo kombo iyi inɛi Izirɛli ŋa à ceò kuwee iyi á kpa idei dulum du ŋau, nɔ wee à joo tã. Ŋɔi idɔɛ í kɔ̃ si Eleazaa do Itamaa ama minjii Arɔ̃ɔ ŋa iyi à gbeu nɔ í ni,

¹⁷ bɛirei í ce i kù ŋɔ inɛ nŋu si inya iyi à nya ikãu si bantumai ile bi kukou ŋa. Mii gɔi iyi í má jiida jiida, nɔ Aɔ̃ Lafɛ̃ɛ í na ŋɛi ku ba i ceò kuweeu i kpaò idei dulum dii inɛi Izirɛli ŋau ŋa.

¹⁸ Wee i kù kooò njɛi mɛɛmuu si ile bi kukou ŋa. Ì nɛ i ŋɔ iŋau ŋai wo si inya iyi à nya ikãu si bɛi ǹ tako ǹ sɔ̃ ŋɛu.

¹⁹ Ŋɔi Arɔ̃ɔ í jɛa Moizi í ni, ajɔ iyi inɛi Izirɛli ŋau à naaò kuwee iyi á kpa idei dulum du ŋa do iyi à ya jo si ina fei sãa sãa wau, awɔ takaɛ ì mà mii iyi í bam. Ajɔ nŋu bɛ an yɔkɔ n ŋɔ iŋai kuwee iyi á kpa idei dulum? Bɛɛbɛ á dɔ̃a Aɔ̃ Lafɛ̃ɛ si?

²⁰ Ŋɔi ideu í ye Moizi.