Kuwee 1 - Bibeli do fee

Kuwee ŋa iyi à ya maa ce waati kãma fei Kuwee iyi à ya jo si ina fei sãa sãa

¹ Aɔ̃ Lafɛ̃ɛ í kpe Moizi wa hai ile bi kukou nɔ í sɔ̃ɔ í ni,

² sɔ̃ inɛi Izirɛli ŋau i ni, bii inɛ gɔ nŋɛ gɔ í naa ku ceem amu Aɔ̃ Lafɛ̃ɛ kuwee do mɛɛmu gɔ, lafɛ̃ɛ ku cica si kɛtɛ gaaɛ, walakɔ si angudã do iwoɛ ŋa.

³ Bii lafɛ̃ɛ wa ce kuwee iyi à ya jo si ina fei sãa sãa, nɔ hai si inɔi mɛɛmu gaa ŋa iyi à laui wa bi ku mu, lafɛ̃ɛu ku mu kɛtɛ kombo iyi kù nɛ leebu kãma nɔ ku gbã ku bɔòɛ anui ile bi kukou nɔ ku ceò kuweeu ku ba ku dɔ̃a amu Aɔ̃ Lafɛ̃ɛ si.

⁴ Si anyiɛ, nɔ ku lesi awɔɛ si irii mɛɛmu iyi wa ceem do kuwee iyi á dɔ̃ɔm si ku kpaò idei dulum dɛɛ.

⁵ Nɔ ku saka kɛtɛu si wajum, nɔ woo wee ŋa, amai Arɔ̃ɔ ŋau a kooò njɛu bi tom, si anyiɛ nɔ a fãsi icui bi kuwee iyi í wa tengii anui ile bi kukou a kaakoɛò.

⁶ Lafɛ̃ɛ á pũ kɛtɛui nɔ ku bububuɛ.

⁷ Si anyiɛ amai Arɔ̃ɔ woo wee ŋaui aa dasi bi kuweeu ina nɔ a dasi jĩi,

⁸ a bɛi a so iŋau do iriɛ do ikpo ŋau a lesi antaii jĩi ŋa iyi à konko si antaii bi kuwee a dasi inau.

⁹ Si anyiɛ á wiɛ mii ndii inɔ ŋaui do kɔbisi ŋau, nɔ woo weeu ku jo fei ndɛɛ si antaii bi kuweeu. Nŋu bɛi í jɛ kuwee iyi à ya jo si ina fei sãa sãa iyi inunuɛ í ya dɔ̃ɔm si.

¹⁰ Bii í nɔ í jɛ inɛ gɔ wa ceem kuwee iyi à ya jo si ina fei sãa sãa, nɔ hai si inɔi mɛɛmu gaa ŋa iyi à kereui wa bi ku mu, lafɛ̃ɛ ku mu angudã kombo walakɔ iwo kombo iyi kù nɛ leebu kãma,

¹¹ nɔ koo sakaɛ si wajum do ikpa awɔ njɛi kpãai inunui bi kuweeu. Nɔ woo wee ŋau a fãsi njɛu si bi kuweeu a kaakoɛò.

¹² Lafɛ̃ɛ á bububuui, nɔ ku nya iriu do ikpo ŋau woo weeu ku bɛi ku lesi antaii jĩi ŋa iyi à konko si antaii bi kuwee iyi à dasi inau.

¹³ Mii ndii inɔ ŋau do kɔbisi ŋau fei á wiɛi, nɔ woo weeu ku naaò wa bi tom ku jo fei ndɛɛ si antaii bi kuweeu. Nŋu bɛi í jɛ kuwee iyi à ya jo si ina fei sãa sãa iyi inunuɛ í ya dɔ̃ɔm si.

¹⁴ Bii inɛ gɔ wa ceem kuwee iyi à ya jo si ina fei sãa sãa do yɛi, lafɛ̃ɛ ku dɛ kufe walakɔ ankasiidi.

¹⁵ Woo weeu á kooò yɛiui tengi bii à ya ce kuweeu nɔ ku nya iriɛ ku dasi inai bi kuweeu, nɔ ku fãsi njɛu si cingaa akãi bi kuweeu.

¹⁶ Nɔ ku nya kpokpou do mii ndii inɔɛ ŋa ku nyɔɔ kɔkɔi bi kuweeu do ikpa nunui daakɔ do ikpa bii à ya jilɛ ilúlu ŋau.

¹⁷ Si anyiɛ nɔ ku lawɛ ikpai yɛiu tengi bii wa gũsi araɛu cingaa minji fei, nɔ ku maà nyaa hai si arau, nɔ woo weeu ku lesi yɛiu si antaii jĩi ndii kuwee iyi à dasi inau ku joo. Nŋu bɛi í jɛ kuwee iyi à ya jo si ina fei sãa sãa iyi inunuɛ í ya dɔ̃a amu Aɔ̃ Lafɛ̃ɛ si.