Kukpata 4 - Bibeli do fee

Inɔ kufɔ iyi í ba Zeruzalɛmu

¹ Ee, bɛirei í ce wurai kpasɛ̃i Aɔ̃ Lafɛ̃ɛ iyi wa daanau, kù waa daana má, wura alalau í bɛjɛ. Kuta ŋa iyi à maò kpasɛ̃i Aɔ̃ Lafɛ̃ɛu à fangaa bii fei.

² Inɛi Siɔ̃ɔ ŋa à jɛ ilu bɛɛrɛ ŋa, aŋa iyi à waa wã bɛɛrɛ nŋa bɛi ti wura alala. Bɛirei í ce nsɛi, à waa doo ŋa bɛi cakai amà iyi woo ce caka í ce.

³ Baa ajaako ŋa á ya na ama nŋa ŋa amɔ. Amma inɛm ŋau, à baa à jɛ iye laalɔi bɛi taataa iyi í ya wa si gbaa.

⁴ Agbɛ í jɔ̀ amɛi ama kpɔtɔɔ ŋa í masi gbangɔlɔ nŋa, ama keeke ŋa à wasi sɔnda ku bee, amma inɛ kãma kù waa kpa ŋa kili.

⁵ Inɛ ŋa iyi à ya ba sɔnda jiida ŋa a maa jɛ wo, à waa ku si kpãa ŋa. Inɛ ŋa iyi à dede si ididɔ̃ wo, à na à waa wusɛ iri ankitã ŋa do awɔ nŋa ŋa.

⁶ Kurarai inɛm ŋau í la í re baa dulum dii inɛi ilui Sodomu ŋa iyi Aɔ̃ Lafɛ̃ɛ í jɔ̀ í ce nfe si iju kãmɛɛ akã, awɔi inɛ gɔ kù wa siu.

⁷ Inɛ ŋa iyi à nya ara nŋa ikã à ce kuwã ku ba a cea Aɔ̃ Lafɛ̃ɛ icɛu à maaju à re baa mii iyi í fũuta bɛi iwu. À fũuta à re baa amɔ, nɔ ara nŋa í ya maa daanai bɛi kutai inɔ inyi. Kpãai njɛ ŋa iyi à wa si ara nŋau à boogui bɛi kuta jiida iyi à ya kpe safira.

⁸ Amma nsɛi, waju nŋa í baa í dũi í re baa kanjũa. Si kpãa ŋa, a ci ya mà ŋa má. À wũ hee batai ara nŋa í mási kũkũi ara nŋa ŋa, nɔ ara nŋa ŋa à gbɛi bɛi jĩi ngbɛ.

⁹ Inɛ ŋa iyi à ku si igũ, à nɛ daama à re inɛ ŋa iyi à ku do ari. Inɛ ŋau à kua gbugbãi na sɔnda hai wɛɛ.

¹⁰ Si waati iyi wahala í naa si inɛm ŋau, iyei amu ŋa, baa do iyi à nɛ kubii ama nŋa ŋau jiida jiida fei, à kɛkɛɛ ama nŋa ŋaui à ceò sɔnda.

¹¹ Aɔ̃ Lafɛ̃ɛ í nyisi idɔɔkɔ̃ɛi hee kɔɔ, nɔ si idɔɔkɔ̃ɛu, í dasi ilui Siɔ̃ɔ ina. Inau í jo hee do icui ileɛ ŋa fei.

¹² Ilaalui ilɛ ŋa, walakɔ inɛ gɔ si andunya, a kaa dasi naanɛ wo iyi mbɛɛ á yɔkɔ ku lɔ hai do andɛ koofai ilui Zeruzalɛmu ŋau.

¹³ Wahalau í naai na dulum dii walii ŋau do kurarai woo wee ŋau, domi aŋai à kpa inɛ dee dee ŋa si inɔ iluu.

¹⁴ À waa dabii si kpãa ŋa bɛi fɛɛju ŋa, nɔ à riisi do njɛ hee í to bii inɛ kaa yɔkɔ ku lu baa jĩnɛ nŋa.

¹⁵ Bii à waa bɔ kɔkɔi inɛ ŋa, inɛ ŋa à ya dɔ̃ si ŋa anui à maa ni, i sɛkɛɛ hai ihɛ̃ ŋa, iŋɛ ilu riisi ŋa. I maà maai kɔkɔ nwa i lu wa ŋa. Ŋɔi à ya nɛ nɔ a ci ya mà bii à waa bɔ. Bii à to bi dimi mmu ŋa, aŋa mɔ à ya nii, i kaa kpɛ bi tu wa ihɛ̃ ŋa.

¹⁶ Aɔ̃ Lafɛ̃ɛ takaɛi í fangaa ŋa, kù bi ku yɛ ŋa má. A ci ya jirima woo wee ŋau, nɔ a kù mà baa bɛɛrɛi mɔkɔ ngbo ŋa.

¹⁷ À cɔ kpãa hee à gbɛɛji, sobi kãma kù naa. À waa cɔ kpãai inɛi ilɛ mmu gɔ ŋa a naa a faaba wa, amma a kù naa.

¹⁸ Mbɛɛ nwa ŋa à waa cɔ isɛɛnɛ nwa, nɔ à ganji wa ka bɔ si bantuma nwa ŋau. Iku nwa í maai wa, ajɔ nwa í kɔ̃, à tosi iri ku kpai kuwɛɛ nwa mbɛ.

¹⁹ Inɛ ŋa iyi à waa lele wa ŋau, à gbãa à re baa kungbã iyi wa fo lele. À lele wai hee si iri kuta ŋa. À koo à waa manji nwai si gbaa.

²⁰ Inɛ iyi í jɔ̀ à wɛɛ, ilaalu iyi Aɔ̃ Lafɛ̃ɛ í cicau, í dasi isa nŋau. Nŋui à waa ni wo, do saabuɛi aa ka ba ka maa wɛɛ si aninii inɛi ilɛ mmu ŋa.

²¹ Iŋɛ inɛi Edɔmu ŋa iyi ì wa ilɛi Usu ŋa, aa yɔkɔ i wɛɛò inɔ didɔ̃, i maa nyaanyi ŋa. Amma iŋɛ mɔ, kɔɔfui idɔɔkɔ̃i Ilaaɔ̃u á to wa si ŋɛ, nɔ aa mɔɔ ŋai, hee ku kpa ŋɛ i fita basĩ ŋa.

²² Iŋɛ inɛi Siɔ̃ɔ ŋa, ijuukpã nŋɛu í to kɔɔ mbɛ a kaa nɛò ŋɛ ilɛ mmu bii kãma má. Amma iŋɛ inɛi Edɔmu ŋa, Aɔ̃ Lafɛ̃ɛ á kpã ŋɛ ijui, nɔ á fitaò dulum du ŋɛ ŋa wa gbugbãai.