Kukpata 3 - Bibeli do fee

Si wahalai kpãa ku cɔ í wa

¹ Amui ǹ jɛ inɛ iyi í mà wahala iyi wa naa hai si idɔɔkɔ̃i Aɔ̃ Lafɛ̃ɛ.

² Í gbãm í bɔɔm si ilu kuku tengi bii inya kumá kù wa.

³ Si amu akãi awɔɛ í ya maa wa ajɔ fei.

⁴ Í jɔ̀ ǹ gbɛ hai irim hee ku bɔ isɛm, nɔ í lɛgɛ kũkũi aram ŋa.

⁵ Í jɔ̀ ara kuro do wahala í kaakom bɛi bindi iyi à ma.

⁶ Í jɔ̀ ǹ wa si ilu kuku bɛi inɛi tako ŋa iyi à ku.

⁷ Aɔ̃ Lafɛ̃ɛ í ma bindi í kaakom nii ku ba n maà n fita, nɔ í kãam sesee kuwo gɔ ŋa.

⁸ Waati iyi ǹ dɔ̃ siɛ anu ǹ tɔɔɛ sobi, kù de sim itĩ hee ku gbɔ kutɔɔm.

⁹ Í kpaam kpãa do kuta nla nla, nɔ í jɔ̀ ǹ yaa si kpãa mmu.

¹⁰ Í koo í manji wa degbem nii bɛi gbeegbekũ, do bɛi muusu nla iyi í wa bi kuwaɛ.

¹¹ Í jɔ̀ ǹ yaa hai si kpãa, í gagagam nɔ í ce nfem.

¹² Í katee biooɛ nɔ í wãm bɛi mɛɛmu iyi wa bi ku ta do afaɛu.

¹³ Ŋɔi í gũ bũum do afaɛ ŋau fei.

¹⁴ Ǹ baa ǹ jɛ dɔ̃anyii inɛm ŋa fei. Ajɔ fei, irim nii í baa í jɛ mii ku kɔ̃ò iri nŋa.

¹⁵ Í jɔ̀ ǹ mɔ mii iyi í ro hee ǹ yo. Í jɔ̀ ǹ mɔ iwɔ gɔ iyi í nɛ acĩ ku kpa inɛ.

¹⁶ Í jɔ̀ kuta cɔ̀cɔ́ ŋa à cɛ inyím, nɔ í tɛɛsɛm si ilúlu.

¹⁷ Ì jɔ̀ n kù nɛ laakai ku sũ, nɔ ǹ gbɛjɛ mii iyi í jɛ ididɔ̃.

¹⁸ Nɔ ǹ ni, n kù nɛ kpãa ku cɔ má, n kù wa n cɔ kpãai nkãma si Aɔ̃ Lafɛ̃ɛ má.

¹⁹ Ye gigii wahalam do bɛi ǹ dabii si kuwɛɛm. Í yɛi bɛi iwɔ kuro gɔ iyi í nɛ acĩ ku kpa inɛ.

²⁰ Ǹ ya n maa n ce si lasabui ajɔ fei, nɔ í jɔ̀ ǹ kua gbugbã ntɔ ntɔ.

²¹ Amma iyi ǹ wa n lasabu si wee, iyi í jɔ̀ ǹ nɛ kpãa ku cɔ,

²² nŋui í jɛ iyi jiida ku jɛi Aɔ̃ Lafɛ̃ɛ kù tã, nɔ araareɛ mɔ ci ya nɛ kɔɔ.

²³ Daakɔ fei Aɔ̃ Lafɛ̃ɛ í ya maa nyisi jiida ku jɛɛi, nɔ kubiɛ í la ntɔ ntɔ.

²⁴ Ǹ ni, Aɔ̃ Lafɛ̃ɛi í jɛ ikpɛ̃m na ŋɔi í jɔ̀ ǹ nɛ kpãa ku cɔ siɛ.

²⁵ Aɔ̃ Lafɛ̃ɛ í jɛ jiida bi inɛ iyi í nɛ kpãa ku cɔ siɛ nɔ wa dɛdɛɛ.

²⁶ Í sĩa amanɛ ku cokoi ku maa degbeò faabai Aɔ̃ Lafɛ̃ɛ.

²⁷ Í sĩa amanɛ ku jɛsi nŋu ku jɛ arui Aɔ̃ Lafɛ̃ɛi hai waatii awaasũɛ.

²⁸ Waati iyi laakai ku cɔ gɔ í naa siɛ, í sĩa ku cokoi nɔ ku fa araɛ ikã koo buba.

²⁹ Í sĩa ku kaye araɛi, nɔ ku jɔ̀ wajuɛ ku bɔ hee ilɛ ku maa cɔò kpãai faabai Aɔ̃ Lafɛ̃ɛ.

³⁰ Ku tooa inɛ iyi wa sambalaɛ kɛkɛlɛɛ, nɔ ku jɛsi arabu iyi à waa buu fei,

³¹ domi Aɔ̃ Lafɛ̃ɛ ci ya kɔ̀si inɛ hee do ajɔ fei.

³² Baa bii wa kpã inɛ iju, í ya ce araareɛ mái, domi jiida ku jɛɛ í la ntɔ ntɔ.

³³ Í ya kaye amanɛ ŋa nɔ ku dasi ŋa wahala, amma kù jɛ bɛɛbɛi í bi.

³⁴ Waati iyi à waa tɛɛsɛ inɛi piisɔ̃ɔ ŋa si ilɛ gɔ fei,

³⁵ waati iyi à waa tɛɛsɛ asaiyai inɛ gɔ si wajui Ilaaɔ̃ nŋu iyi í wa leleu,

³⁶ waati iyi à cea inɛ gɔ kiiti hai jɛ dee dee, Aɔ̃ Lafɛ̃ɛ kù waa yɔɔi?

³⁷ Yooi á fɔ ide nɔ ngɔgɔ ku ce. Kù jɛ Aɔ̃ Lafɛ̃ɛi í ya na wooda ngɔgɔ ku bɛi ku ce?

³⁸ Kù jɛ hai si gɛlɛi nŋu Ilaaɔ̃ iyi í wa hee lelei, jiida do laalɔ í ya naa?

³⁹ Na mii í jɔ̀ inɛ iyi í wɛɛ si hunde wa weewea. Inɛ fei ku weewea na dulum dɛɛ ŋa.

⁴⁰ Ka cɔ isɛɛnɛ nwa, ka wusɛ ara nwa ku ce ncɛɛ nɔ ka nyi bi Aɔ̃ Lafɛ̃ɛ.

⁴¹ Aɔ̃ Lafɛ̃ɛ í wa lele. Ka wu awɔ nwa ŋa lele nɔ ka tɔɔɛ do idɔ nwa fei.

⁴² Ka ni, Aɔ̃ Lafɛ̃ɛ, awai à ce dulum, à ce ide ku kɔ̀ siɛ, iyi bɛi í jɔ̀ i kù ce nwa suuru.

⁴³ Ì bii araɛ do idɔɔkɔ̃, nɔ ì lele wa, ì kpa wa, i kù ce araare nwa.

⁴⁴ Ì bii araɛ do kudũi ijĩ, ku ba kutɔɔ nwa ŋa a maà to wa bi titɛɛ.

⁴⁵ Si aninii dimi mmu ŋa, ì ce nwai bɛi mii iyi à kpã do bɛi mii riisi iyi à waa bɔ ku nyɔ.

⁴⁶ Mbɛɛ nwa ŋa fei à ya maa fɔ si wa idei à maa dɛdɛ anu nwa.

⁴⁷ Nɔ mii iyi í gbe nwai í jɛ, zigiida do njo nla nla do wahala do nfe ku ce.

⁴⁸ Ŋɔi ǹ kpata ntɔ ntɔ, na wahalai inɛm ŋau.

⁴⁹ Cikãajum ŋau kù waa leekĩ, nɔ kusĩmi kù wa si

⁵⁰ hee koo to Aɔ̃ Lafɛ̃ɛ ku ce laakai nɔ ku cɔ wa hai lelei Aɔ̃ ku ba ku yɛ

⁵¹ iyi ǹ wɛɛò ara kuro ntɔ ntɔ na mii iyi ǹ yɛ wa ba inɛi ilum ŋau.

⁵² Mbɛɛm ŋa iyi à waa dɛdɛm ngbɛ ngbɛu, à waa lelem nii bɛi yɛi.

⁵³ À koo à tale sim si isa gɔ nɔ à dĩ andɛu do kuta à biim.

⁵⁴ Inyi í biim hee do irim fei, nɔ ǹ wa n ni, ǹ ce nfe mbɛ.

⁵⁵ Ŋɔi ǹ ce kutɔɔ hai lɛlɛi isau ǹ kpe awɔ Aɔ̃ Lafɛ̃ɛ,

⁵⁶ nɔ ì gbɔ imum wa. Maà dĩ itĩɛ si waati iyi ǹ wa si wahala nɔ ǹ wa n tɔɔɛ sobi.

⁵⁷ Ajɔ iyi ǹ kpeɛu, ì tɛkɛɛ sim wa, nɔ ì sɔ̃m ì ni n maà jɔ̀ zigim ku da.

⁵⁸ Aɔ̃ Lafɛ̃ɛ, si kiitiu, ì kɔ̀ɔm nɔ ì ya kuwɛɛm.

⁵⁹ Aɔ̃ Lafɛ̃ɛ, ì yɛ bɛi à tɛɛsɛm, kiitim nɔ i jɔ̀ n ba ntɔ.

⁶⁰ Ì yɛ do yaase bɛi à waa dɛ a sã sim gbese, ì yɛ sɔɔlui laalɔ nŋa iyi à ce na irim fei.

⁶¹ Aɔ̃ Lafɛ̃ɛ, ì gbɔ arabu ŋau, do laalɔ ŋa iyi à ce sɔɔluɛ na irim fei.

⁶² Ide ku fɔi inɛ ŋa iyi à waa dɛdɛm ŋau do lasabu nŋa, sim nii í ya wa ajɔ fei.

⁶³ Cɔ, à waa bubai, walakɔ à waa leekĩi, irim nii í baa í jɛ mii ku kɔ̃ò iri nŋa.

⁶⁴ Aɔ̃ Lafɛ̃ɛ, sã nŋa iyi à nɛ a ba, si yaase bɛi à ceem nɔu.

⁶⁵ Lele idɔ nŋa, nɔ i jɔ̀ ikpeɛ ku cuku si iri nŋa wa.

⁶⁶ Hai lelei Aɔ̃ wa, lele ŋa si idɔɔkɔ̃ɛ, nɔ i kpa iri nŋa mam mam.