Kukpata 2 - Bibeli do fee

Aɔ̃ Lafɛ̃ɛ í ce Zeruzalɛmu mbɛɛ

¹ Aɔ̃ Lafɛ̃ɛ, si idɔɔkɔ̃ɛ í bii ilui Siɔ̃ɔ do kudũi ijĩ. Hai lelei Aɔ̃i í kɛkɛ mii iyi wa jɛ bɛɛrɛi Izirɛliu hee ilɛ. Si waati iyi idɔɔkɔ̃ɛ í dedeu, kù ye gigi iyi Siɔ̃ɔi í jɛ bi ku lesi isɛɛ.

² Aɔ̃ Lafɛ̃ɛ í ce nfei bi kuwai inɛi Zakɔbu ŋa. Si idɔɔkɔ̃ɛ, í lɛgɛ inya ku nɛ gbugbãi inɛi Zudaa ŋa. Í kɛkɛ ŋai hee ilɛ. Í dasi bommau do ilaaluɛ ŋa anyɔ.

³ Si idɔɔkɔ̃ nlaɛ, í kɛkɛ mii iyi í jɛ gbugbãi Izirɛli fei. Í fa awɔ gbugbãɛi, waati iyi mbɛɛ í to wa. Í dasi bi kuwai inɛ ŋau ina, nɔ inau í jo í kaakoɛ fei mam mam.

⁴ Í katee si ŋa biooɛ bɛi mbɛɛ. Í tã sɔɔlu tã ku ta ŋa do awɔ njɛɛ. Í ce nfei mii ŋa iyi iju nwa í ya maa bi ku yɛ fei. Í jɔ̀ idɔɔkɔ̃ɛ í naa si kpasɛ̃ɛ iyi í wa Siɔ̃ɔu bɛi ina.

⁵ Aɔ̃ Lafɛ̃ɛ í cei bɛi mbɛɛ. Í ce nfei inɛi Izirɛli ŋa, í lɛgɛ kpasɛ̃ jiida nŋa, í kɛkɛ ile ku nɛ gbugbã nŋa, í kɔ̃ɔsi weeweai inɛi Zudaa ŋa do kukakaa nŋa.

⁶ Í lɔ si bindiɛu do gbugbã bɛi bindii lambo. Í kɛkɛ inya bi kukou. Aɔ̃ Lafɛ̃ɛ í jɔ̀ inɛ ŋa à gbɛjɛ ajɔi jingau nla ŋa do ajɔi kusĩmi ŋa si ilui Siɔ̃ɔu. Idɔɛ í kɔ̃ ntɔ ntɔ, nɔ í jɔ̀ bɛɛrɛi ilaaluu do ti woo wee ŋau fei í tã.

⁷ Aɔ̃ Lafɛ̃ɛ í cé bii à ya ce kuweeu, nɔ í fũsi ile kumáɛu awɔ. Í so kpasɛ̃ jiidai Siɔ̃ɔ ŋa í daa mbɛɛ si awɔ. Si inɔ kpasɛ̃i Aɔ̃ Lafɛ̃ɛu, à gbɔ anu ku dɔ̃ ŋa nla nla bɛi ti ajɔi jingau nlau.

⁸ Aɔ̃ Lafɛ̃ɛ í dasi idɔ nŋu ku lɛgɛ bindii ilui Siɔ̃ɔ mam mam. I tɛsi inyau ikũ, nɔ nkãma kù gɛɛ hee í lɛgɛ bindi minji ŋau fei mam mam. Inɔ kufɔ nla nlai, domi bindi minji ŋau fei à lɛgɛi.

⁹ Gamboɛ ŋau à nya à cuku. Í lɛgɛ sɔkɔɛ ŋau. À mu ilaaluɛ do inɛ ngboɛ ŋa à nɛò ŋa ilɛ mmu. Wooda kù wɛɛ má, nɔ waliiɛ ŋa a kù waa ce kuyɛ kãma má iyi wa naa hai bi Aɔ̃ Lafɛ̃ɛ.

¹⁰ Inɛ ngboi ilui Siɔ̃ɔ ŋa à waa buba ilɛ à waa coko. À kosi iri nŋa sãa nɔ à dasi jĩnɛi saaki na inɔ kufɔ. Mudɛ̃ɛi Zeruzalɛmu ŋau à kɔmba iri ilɛ.

¹¹ Ǹ kpata hee ǹ gbɛɛji na wahalau, nɔ lasabum fei í fɔtɔtɔ. Í yɛ bɛi alolom í da wa cuku ilɛ, na bitandi iyi í ba inɛm ŋa. Ama kpɔtɔɔ ŋa do ama keeke ŋa à waa ku si bantumai iluu.

¹² Amu ŋa à ya bee iye nŋa ŋai a maa ni, iwoi aa ka ba sɔnda do inyi ku mɔ. À ya cukui bɛi inɛ ŋa iyi à ba kumɛɛ si bantumai iluu, nɔ a ku si ikpai iye nŋa ŋa.

¹³ Ide yoomai an sɔ̃ɛ má. Yooi an wãɛ do, Zeruzalɛmu. Yooi an ni í jɛ saaɛ. Nɔ ide yoomai an sɔ̃ɛ Siɔ̃ɔ n tũò idɔɛ. Wahalaɛu í lai bɛi kulai tenku. Yooi á yɔkɔ ku jɔ̀ i ba iri.

¹⁴ Kuyɛ ngbɛ do iboi waliiɛ ŋa à ce na iriɛ. A kù fitaò kuraraɛ gbugbãa iyi á jɔ̀ kuwɛɛu ku kpaasi. Kuyɛ ŋa iyi à ce na iriɛ, kuyɛ iboi do idei inɛ ku lɛlɛ.

¹⁵ Inɛ ŋa iyi à waa too do bɛ fei à ya dakpaɛi a maa nyaanyi na iriɛ. À ya fã fooi, nɔ a gbugbã iri a yaakoɛ a maa ni, Zeruzalɛmu ilu iyi à ya kpe kusĩau mbɛ? Na iriɛi inɛi ilɛ ŋa fei à ya maa wɛɛò inɔ didɔ̃u bɛ?

¹⁶ Mbɛɛɛ ŋa fei laalɔɛi à ya maa fɔ. À ya fã fooi nɔ à sa siɛ inyí do kugaabu à ni, à too awɔ à muu mbɛ. Ntɔ ntɔ, si ajɔ iyi à waa cɔ kpãaɛui à wa si, nɔ à yɔɔ.

¹⁷ Aɔ̃ Lafɛ̃ɛ í ce mii iyi í dasi idɔ ku ceu, í jɔ̀ ide iyi í fɔ hai ku kpɛu í kɔ̃. Í lɛgɛ Zeruzalɛmui mam mam kù ce araareɛ, í jɔ̀ í jɛ dɔ̃anyi bi mbɛɛ ŋa, nɔ í kɔ̃ɔsi gbugbãi faaui mbɛɛɛ ŋau.

¹⁸ Inɛi Zeruzalɛmu ŋa à dɔ̃ anu si Aɔ̃ Lafɛ̃ɛ. Bindii Siɔ̃ɔ ilu kusĩau, jɔ̀ cikãajuɛ ku maa cã bɛi acãi inyi dasã do idũ. Maà muaa araɛ kusĩmi kãma, nɔ i maà leekĩ kukpataɛ.

¹⁹ Dede i maa dɔ̃ anu idũ waati do waati fei. Fɔ mii iyi í waɛ si idɔ fei mam mam si wajui Aɔ̃ Lafɛ̃ɛ. Wu awɔɛ ŋa lele ikpa bi titɛɛ i tɔɔɛ suuru na kuwɛɛi amaɛ ŋa iyi à waa ku do ari, si kpãa koko ŋa fei.

²⁰ Aɔ̃ Lafɛ̃ɛ, cɔ nɔ i yɛ inɛ iyi ì waa cea dimi bɛɛbɛ. Aa jɔ̀ ku to hee inaabo ŋa a maa ŋɔ ama nŋa ŋa iyi à bí? Inaabo ŋau à nɛ kubii ama nŋa ŋa iyi à bí ŋau jiida jiida. Aa kpa woo wee ŋa do walii ŋau fei si inɔ kpasɛ̃ɛi?

²¹ Awaasũ ŋa do mɔkɔ ngbo ŋa à waa sũi ilɛ si kpãa ŋa bii fei. Mudɛ̃ɛm ŋa do awaasũm ŋa, à kpa ŋai do taakuba. Si ajɔi idɔɔkɔ̃ɛu, ì jɔ̀ à kpa ŋa, nɔ ì jɔ̀ à saka ŋa baa araare kù wa si.

²² Inɛ ŋa iyi à jɔ̀ njo wa mum ŋau, ì kpe ŋa wai hai bii fei bɛi si ajɔi jingau nla gɔ. Aɔ̃ Lafɛ̃ɛ, si ajɔi idɔɔkɔ̃ɛu inɛ kãma kù fita si, inɛ gɔ kù gbe si hunde. Amu ŋa iyi ǹ bi jiida jiida, nɔ ǹ bíi ŋau, mbɛɛm nɔu í ce nfe nŋai mam mam.