Kukpata 1 - Bibeli do fee

Zeruzalɛmu í yɛ bɛi abo jaaɔ̃

¹ Zeruzalɛmu iyi í ya nɛ zamaa wo wee nsɛi í baa í gbe nŋu akã. Nŋu iyi í nya iri si dimi ŋa wo, wee nsɛi í baa í wɛɛ bɛi jaaɔ̃. Nŋu iyi í jɛ ilaalu wo si ilɛ nla ŋa, wee í baa í dasi icɛi aru ku ce.

² Í ya maa kpatai idũ fei, cikãajui í ya maa cã wa si kɛkɛlɛɛ. Si inɛ ŋa iyi à buu, inɛ gɔ kù wɛɛ iyi í lɛlɛɛ í mua gbugbã. Kpaasiɛ ŋa fei à zambaɛi, à baa à jɛ mbɛɛɛ ŋa.

³ À mu inɛi Zudaa ŋa à nɛò ŋa ilɛ mmu. Bɛi à koo à waa ta nŋa gbugbã, à jɔ̀ à waa ce icɛi aru. À koo à wai si inɔi dimi mmu ŋa, nɔ a ci ya nɛ kusĩmi. Mbɛɛ nŋa ŋa iyi à lele ŋau, à na à ba ŋai si inɔ kufɔ.

⁴ Kpãa ŋa iyi à waa bɔ Siɔ̃ɔ, à nɛ inɔ kufɔi iku. Inɛ ŋa à ci ya too ŋa a bɔ jingau má. Bantumaɛ ŋa fei à gbe ngbɛ. Woo weeɛ ŋa à waa kakaa, ama mudɛ̃ɛɛ ŋa à nɛ inɔ kufɔ, nɔ nŋu takaɛ í wa si ara kuro.

⁵ Mbɛɛɛ ŋa à kãmiaɛ, inɛ ŋa iyi à cóo ŋau à wɛɛò laakai ku sũ, domi Aɔ̃ Lafɛ̃ɛi í dasiɛ inɔ kufɔu na kurara nkpɔ nkpɔɛ ŋa. Mbɛɛɛ ŋau à mu amaɛ ŋa a nɛò ŋa.

⁶ Ilui Siɔ̃ɔu í kua mii iyi í jɛ bɛɛrɛɛ fei. Inɛ ngboi ilu ŋau à baa à yɛi bɛi kulu ŋa iyi a kù ba fɔfɔ a kù waa jɛ. Nɔ à waa sa hai nɛ gbugbã si wajui tobi.

⁷ Si waatii wahalau, Zeruzalɛmu kù mà bii á bɔ. Ŋɔi í ye gigii mii jiida ŋa iyi í tako í nɛ fei wo. Waati iyi inɛɛ ŋa à dasi awɔi mbɛɛ ŋa, inɛ gɔ kù naa ku sobi ŋa. Mbɛɛ nŋa ŋau à yɛ ŋa, nɔ à waa nyaanyi ŋa na nfe ku ce iyi à waa bɔ.

⁸ Zeruzalɛmu í ce dulum í caa, na ŋɔi í jɔ̀ í baa í jɛ mii riisi. Inɛ ŋa iyi à mà bɛɛrɛɛ wo, à waa yaakoɛ si na iyi í jɔ̀ à yɛ basĩɛ, í nyi do anyi nɔ wa kakaa.

⁹ Riisiɛu í wa si ibɔɛ. Kù lasabu si mii iyi á na ku naa. Kucukuɛu í jɛa zamba, nɔ inɛ gɔ kù lɛlɛɛ. Ŋɔi í ni, Aɔ̃ Lafɛ̃ɛ, cɔ wahalam. Cɔ bɛi mbɛɛ wa jɛ igũ.

¹⁰ Mbɛɛ í ko mii jiida ŋa iyi Zeruzalɛmu í nɛu fei. Zeruzalɛmu í yɛ soogei dimi mmu ŋa à lɔ si ile kumáɛ, aŋa iyi ì ganji a lɔ si bii zamaaɛ ŋa à tɔtɔɔu.

¹¹ Inɛi Zeruzalɛmu ŋau fei à waa kakaa nɔ à wɛɛò inɔ kufɔ. À waa dɛdɛ sɔnda iyi aa jɛ. À na mii jiida nŋa ŋa iyi à nɛ fei na a ba sɔnda iyi aa jɛ a maa wɛɛò nɔ a ba gbugbã má. Zeruzalɛmu í ni, Aɔ̃ Lafɛ̃ɛ, cɔ bɛi ǹ jɛ dɔ̃anyi í to.

¹² Iŋɛ iyi ì ya maa too do ihɛ̃, laalɔu ihɛ̃ kù ba ŋɛ. I cɔ, nɔ aa yɔɔ ŋa iyi wahala gɔ kù wɛɛ iyi í yɛ bɛi dimi iyi í bam nɔu ihɛ̃. Aɔ̃ Lafɛ̃ɛ í jɔ̀ wahala í bam nii, si ajɔ iyi idɔɔkɔ̃ nla nlaɛu í dede.

¹³ Hai lelei Aɔ̃ Lafɛ̃ɛ í jɔ̀ ina gɔ í naa si aram nɔ í lɔ si kũkũm ŋa. Í leem taa, í jɔ̀ ǹ cuku kaiya. Í jɔ̀ ǹ koo ǹ wɛɛ amu akã, nɔ ǹ wa si wahala hai nɛ kɔɔ.

¹⁴ Aɔ̃ Lafɛ̃ɛ wa yɛ kuraram ŋa. Í tɔtɔɔ kuraram ŋaui í dĩ ŋa inya akã wa muu si awɔɛ, nɔ kugbokaɛ í naa hee si kɔ̃ɔm. Aɔ̃ Lafɛ̃ɛ í jɔ̀ ǹ kua gbugbã. Í som í daa mbɛɛ ŋa si awɔ, nɔ n kaa n yɔkɔ n kɔ̀ò aram si gãmɛ nŋa.

¹⁵ Aɔ̃ Lafɛ̃ɛ í kɛkɛ woo ja igũ ilu wɔɔkɔ ŋa iyi ǹ nɛ fei. Í tɔtɔɔ woo ja igũ mmuɛ gɔ ŋa wa sim, ku ba a ce nfei awaasũm ŋa. Aɔ̃ Lafɛ̃ɛ í tɛɛsɛ amu Zeruzalɛmu ilui Zudaaui bɛi à ya tɛɛsɛ rezɛ̃ɛ a fɔ̃ inyiɛ.

¹⁶ Na ŋɔi í jɔ̀ ǹ wa n kpata. Cikãajum ŋa a kù waa leekĩ. Inɛ iyi á lɛlɛm ku muum gbugbã n baò kuwɛɛ, í jĩim. Amam ŋa à mɔngɔ, domi mbɛɛ í nɛ gbugbã í re ŋa.

¹⁷ Nɔ waliiu í ni, Siɔ̃ɔ í to awɔ í tɔɔ sobi, amma inɛ kãma kù sobiɛ. Aɔ̃ Lafɛ̃ɛ í jɔ̀ inɛ ŋa iyi à wa kɔkɔi tɔkui Zakɔbu ŋa, à baa à jɛ mbɛɛ nŋa ŋa. Si anini nŋa, Zeruzalɛmui í baa í jɛ mii riisi.

¹⁸ Ŋɔi Zeruzalɛmu í ni, Aɔ̃ Lafɛ̃ɛ í nɛ ntɔ ku ce bɛɛbɛ, domi amu Zeruzalɛmu ǹ kɔ̀ ku ceò woodaɛ ŋa icɛi. Iŋɛ fei, ǹ wa n tɔɔ ŋɛi, i soti i gbɔ ŋa, nɔ i yɛ wahalam ŋa. Ama mudɛ̃ɛm ŋa do ama awaasũm ŋa, à nɛò ŋa ilɛ mmu à waa jɛ aru.

¹⁹ Ǹ tɔɔ inɛ ŋa iyi à bim ŋa sobi, amma à fɔ́ inɔm nii. Woo weem ŋa do inɛ ngbom ŋa, à kui si inɔ iluu, waati iyi à waa dɛdɛ sɔnda, iyi aa jɛ a maa wɛɛò.

²⁰ Aɔ̃ Lafɛ̃ɛ, cɔ wahalam. Aram wa yaya nɔ ǹ nɛ inɔ kufɔ ntɔ ntɔ, domi ǹ kɔ̀ ku gbɔ ideɛ. Waduude, igũ í kpa amam ŋa. Inɔ kpasɛ̃, ikui wa ce.

²¹ Inɛ ŋa à gbɔ iyi ǹ wa n kakaa, amma inɛ gɔ kù na kù sobim. Mbɛɛm ŋa fei à gbɔ baaui wahalam, nɔ inɔ nŋa í dɔ̃i si na iyi í jɔ̀ awɔi ì coo. Awɔi ì fɔ idei ajɔu, nɔ ì jɔ̀ í naa. Jɔ̀ a baa a yɛ bɛi amu.

²² Cɔ laalɔ ku ce nŋau fei ku ce ncɛɛ, nɔ i kpã ŋa iju, bɛi ì kpãm iju, na kurara nkpɔ nkpɔm ŋa feiu. Ntɔ ntɔ kukakaam nɔu í caa, nɔ ǹ wa n wahala jiida jiida.