Kuka 9 - Bibeli do fee

Waatii jingaui Iku ku kua ku jɛ

¹ Aɔ̃ Lafɛ̃ɛ í ba Moizi ide ku fɔ si gbaai Sinaiu si cukpa sintei adɔ̃ minjisiau si anyii kufita nŋa hai ilɛi Ezibiti í ni,

² inɛi Izirɛli ŋau aa ce jingaui Iku ku kuai si waati iyi ǹ da nŋau.

³ Alɛi aa coo ŋa si ajɔ maatɛ̃ɛsiai cukpau ihɛ̃. Aa coo ŋai si bɛi ǹ na ŋɛ ideɛ ŋau do woodaɛ ŋau dee dee.

⁴ Ŋɔi Moizi í sɔ̃ inɛi Izirɛli ŋau í ni a ce jingaui Iku ku kuau.

⁵ Nɔ à ce jingaui Iku ku kuau alɛ, si ajɔ maatɛ̃ɛsiai cukpa sinteu si gbaai Sinaiu. Inɛi Izirɛli ŋau à ce bɛi Aɔ̃ Lafɛ̃ɛ í sɔ̃ Moiziu fei.

⁶ Ajɔ nŋu bɛ inɛ gɔ ŋa a kù maaju si na iyi í jɔ̀ à lu iku gɔ, í jɔ̀ a kaa yɔkɔ a ce jingaui Iku ku kuau si ajɔ nŋu bɛ. Ajɔ nŋu bɛ mɔi à koo si wajui Moizi do Arɔ̃ɔ,

⁷ nɔ inɛ ŋau à sɔ̃ Moizi à ni, awa a kù maaju na saabui iku gɔ. Iyi bɛ á ganji wa ka naaò amua nwa ŋa wa bi Aɔ̃ Lafɛ̃ɛ bɛi inɛi Izirɛli inɛ nwa ŋa? Wee í nɛ waati iyi à jilɛ si ku ceɛui.

⁸ Ŋɔi Moizi í jɛ nŋa í ni, i degbe hee n bee Aɔ̃ Lafɛ̃ɛ wa n gbɔ bɛi í fɔ na iri nŋɛ.

⁹ Ŋɔi Aɔ̃ Lafɛ̃ɛ í sɔ̃ Moizi í ni,

¹⁰ ide iyi aa sɔ̃ inɛi Izirɛli ŋau wee. Bii í jɛ nnyi walakɔ si waatii tɔku nŋɛ ŋa, inɛi Izirɛli gɔ ŋa a kù na a kù maaju si na iyi í jɔ̀ à lu iku gɔ, walakɔ bii à bɔ ilu jĩijĩ gɔ si waatii jingaui Iku ku kuau, do nŋu fei aŋa mɔ aa ce jingauui,

¹¹ amma aa cooi alɛ, si ajɔ maatɛ̃ɛsiai cukpa minjisiau. Aa jɔ́ɔ ŋai do iŋai angudãu do pɛ̃ɛ hai nɛ levɛ̃ɛ do wua kuro ŋa.

¹² A kaa jɔ̀ kãmaɛ ku gbe hee iju ku má, nɔ a kaa lɛgɛ kũkũi iŋau. Aa too si bɛi à ya ce jingaui Iku ku kuaui dee dee.

¹³ Amma bii inɛ gɔ í ce atafii nɔ kù ce jingauu si waati iyi ǹ dau dee dee, nɔ lafɛ̃ɛ kù nɛ riisi gɔ, nɔ kù bɔ ilu, aa nyaa hai si inɔi inɛi Izirɛli ŋaui, si na iyi í jɔ̀ kù naam amuaɛ wa si waati iyi ǹ dau, nɔ í so taale mbɛ.

¹⁴ Si anyiɛ bii inɛ njoo ŋa iyi à wa bi tu ŋɛ ŋau aŋa mɔ à waa bi a ce jingauu, a too si woodai jingauu dee dee, nɔ a coo bɛi ì nɛ dɔ̃ɔnɛi ku ceɛ ŋa. Woodau, dimi akãi á jɛ bi inɛ fei, hai inɛi Izirɛli ŋa, hee do inɛ njoo ŋa fei.

Kudũi ijĩ í bii ile bi kukou

¹⁵ Ajɔ iyi à gũ ile bi kukou bii kpakoi akabuu í wau, kudũi ijĩ í naa í biiɛi piu. Bii alɛ í lɛ, kudũi ijĩu í ya baa ku ce inya kumái hee iju koo máò.

¹⁶ Hai waati bɛɛbɛ, bɛɛbɛi í ya maa ce waati kãma fei. Kudũi ijĩ í ya bii ileui, bii idũ í dũ nɔ ku kpaasi ku ce inya kumá.

¹⁷ Waati iyi kudũi ijĩu í dede si antaii ileu fei, inɛi Izirɛli ŋau à ya dede hai asɔ bɛi à koo à buba tengi bii kudũi ijĩu í koo í leekĩ.

¹⁸ Do yaase bɛɛbɛ, woodai Aɔ̃ Lafɛ̃ɛi inɛi Izirɛli ŋau à ya dedeò hai tengi bii à ce asɔu, nɔ à ya nyi à koo à ce asɔ mái do woodai Aɔ̃ Lafɛ̃ɛ. A ci ya tekĩò asɔu bii kudũi ijĩu í wa si ileu.

¹⁹ Bii í jɛ kudũi ijĩu wa kpɛ si ile bi kukou, inɛi Izirɛli ŋau à ya jirima Aɔ̃ Lafɛ̃ɛi, a ci ya nɛ.

²⁰ Bii í nɔ í jɛ kù kpɛ bɛ mɔi, asɔ ku ce nŋa do ku dede nŋa fei, woodai Aɔ̃ Lafɛ̃ɛi à ya maa too si.

²¹ Bii gɔ ŋa kudũi ijĩu í ya wa bɛi hai alɛ hee iju koo máò, walakɔ mɔm dasã akã do idũ akã. Hai í na í dede í fita gbakã, inɛi Izirɛli ŋau à ya dede hai bɛi.

²² Bii í ce ajɔ minji si ile bi kukou, walakɔ cukpa akã, walakɔ bii í nɔ í kpɛ í re bɛɛbɛ mɔi, inɛ ŋau a ci ya dede hai asɔ nŋau bii kudũi ijĩu kù dede. Amma bii í dede à ya nɛi.

²³ Inɛi Izirɛli ŋau a ci ya buba a ci ya nɔ a dede bii kù jɛ Aɔ̃ Lafɛ̃ɛi í na ŋa wooda. À ya ce icɛ nŋai dee dee si bɛi Aɔ̃ Lafɛ̃ɛ í ni Moizi ku sɔ̃ ŋau.