Kuka 8 - Bibeli do fee

Ku jilɛi fitila ŋau

¹ Aɔ̃ Lafɛ̃ɛ í sɔ̃ Moizi í ni,

² sɔ̃ Arɔ̃ɔ i ni, bii ì waa jilɛ fitila ŋau si bi ku lesi nŋa, fitila mɛɛje ŋau fei, aa jɔ̀ a maa joi do waju ihɛ̃ wa.

³ Bɛɛbɛ mɔi Arɔ̃ɔ í nɔ í ce, í lesi fitila ŋaui do wajui bii à ya lesi ŋau bɛi Aɔ̃ Lafɛ̃ɛ í sɔ̃ Moizi.

⁴ Bi ku lesi fitilau do wurai à coo, hee ku koo si kutɛɛu do kokoi jĩi ŋa iyi à dasiu fei. Moizi í ce bi ku lesi fitilau si yaase bɛi Aɔ̃ Lafɛ̃ɛ í nyisiɛu.

Inɛi Levii ŋa ku nya ikã

⁵ Aɔ̃ Lafɛ̃ɛ í nyi í sɔ̃ Moizi má í ni,

⁶ nya inɛi Levii ŋau ikã hai si inɔi inɛi Izirɛli ŋau, nɔ í ce nŋa bɛi aa ce a maaju.

⁷ Yaase bɛi aa ce bukii iyi á jɔ̀ a maajuu wee. Fãsi ŋa inyi iyi á jɔ̀ a maaju, nɔ i jɔ̀ a wa nto ŋa iyi à wa si ara nŋa ŋa fei, nɔ a fɔ jĩnɛ nŋa ŋa fei. Si anyii nŋu bɛ, aa maaju.

⁸ Nɔ a dɛ kɛtɛ kombo, do kuweei iyafũ iyi à taki do ikpo, si anyiɛ nɔ awɔ takaɛ i dɛ kɛtɛ kombo mmuɛ i ceò kuwee iyi á kpa idei dulum nɔu.

^9-10 Aa tɔtɔɔ inɛi Izirɛli ŋau feii, nɔ i jɔ̀ inɛi Levii ŋau a naa si wajum si wajui ile bi kukou, nɔ inɛi Izirɛli ŋau a lesi ŋa awɔ.

¹¹ Arɔ̃ɔ á ce bukii ku nyaò inɛi Levii ŋau ikã si wajum a jɛ amua iyi inɛi Izirɛli ŋa à ceem, nɔ aa jilɛ ŋai si icɛm.

¹² Inɛi Levii ŋau aa lesi awɔ nŋai si irii kɛtɛ kombo ŋau nɔ kɛtɛ ŋau akã i ceò kuwee iyi á kpa idei dulum, akã mɔ i ceò kuwee iyi à ya jo si ina fei sãa sãau ku ba ku kpa dulum dii inɛi Levii ŋau.

¹³ Jɔ̀ inɛi Levii ŋau a leekĩ si wajui Arɔ̃ɔ do amaɛ ŋa, nɔ i ce buki i nya ŋaò ikã a jɛ amua iyi à cea amu Aɔ̃ Lafɛ̃ɛ.

¹⁴ Do yaase bɛɛbɛi aa nya inɛi Levii ŋau ikã hai si inɔi inɛi Izirɛli ŋau, nɔ inɛi Levii ŋau tom nii aa jɛ.

¹⁵ Si anyii nŋu ŋau bɛ, inɛi Levii ŋaui aa ya naa a maa ce icɛ si ile bi kukou. Do yaase bɛi aa ce buki i jɔ̀ inɛi Levii ŋau a maaju, nɔ a nya ikã si ile bi kukou a jɛ amua iyi à kooa amu Aɔ̃ Lafɛ̃ɛ mbɛ,

¹⁶ domi à ceem amua nŋai hai si aninii inɛi Izirɛli ŋa, ǹ gba ŋai a jɛ nsũi ama yemmai inɛi Izirɛli ŋau.

¹⁷ Ama yemmai inɛi Izirɛli ŋau fei, amui ǹ nɛ ŋa, hai ti amanɛ ŋa, hee ku koo si mɛɛmu ŋa iyi à bí sinte fei. Ajɔ iyi ǹ kpa ama yemmai inɛi Ezibiti ŋa do mɛɛmu ŋa iyi à bí sinte ŋau fei, ǹ jɔ̀ inɛ nŋu ŋau a jɛ tom.

¹⁸ Na ŋɔi í jɔ̀ ǹ so inɛi Levii ŋau ku ba a jɛ nsũi ama yemmai inɛi Izirɛli ŋa iyi ǹ nɛ ku gba feiu.

¹⁹ Ǹ nya inɛi Levii ŋai hai si inɔi inɛi Izirɛli ŋa, nɔ ǹ so ŋa n mua Arɔ̃ɔ do amaɛ ŋa mam mam ku ba a cea inɛi Izirɛli ŋau icɛ si ile bi kukou. Aŋai aa ya maa ce kuwee ŋa ku ba n cea inɛi Izirɛli ŋa suurui dulum du ŋa, nɔ wahala gɔ ku maà ba ŋa waati iyi aa naa a maai si ile kumáu.

²⁰ Moizi do Arɔ̃ɔ do inɛi Izirɛli iyi à gbe ŋau fei à cea inɛi Levii ŋau bɛi Aɔ̃ Lafɛ̃ɛ í sɔ̃ Moiziu fei.

²¹ Inɛi Levii ŋau à ce buki iyi á jɔ̀ a maaju, à fɔ jĩnɛ nŋa ŋa, nɔ Arɔ̃ɔ í ce buki í nya ŋaò ikã a jɛ amua iyi à kooò si wajui Aɔ̃ Lafɛ̃ɛ, nɔ í ce nŋa bɛi à nɛ dɔ̃ɔnɛi ku ce a kpaò dulum du ŋa ku ba a maaju.

²² Si anyiɛ inɛi Levii ŋau à sinti icɛ ku ce si ile bi kukou si wajui Arɔ̃ɔ do amaɛ ŋa si bɛi Aɔ̃ Lafɛ̃ɛ í tako í sɔ̃ Moiziu.

²³ Aɔ̃ Lafɛ̃ɛ í nyi í sɔ̃ Moizi má í ni,

²⁴ mii iyi í jɛ ti inɛi Levii ŋau wee. Hai zakai adɔ̃ kaafɛtũ hee ku koo kaafɛtũ do ku lesi, inɛi Levii fei á lɔsi icɛ ku ce si ile bi kukoui.

²⁵ Nɔ hai adɔ̃ ciitaa á fitai, kaa ce icɛ má.

²⁶ Á ya maa sobi kpaasiɛ ŋai si icɛi ile bi kukou, amma kaa ya nɛ icɛ gɔ iyi á jɛ ti nŋu takaɛ má. Bɛɛbɛi aa cea inɛi Levii ŋa na icɛ iyi à dasi ŋau.