Kuka 6 - Bibeli do fee

Woodai inɛ iyi í ce kuwãi ara ku nya ikã na Aɔ̃ Lafɛ̃ɛ

¹ Aɔ̃ Lafɛ̃ɛ í sɔ̃ Moizi í ni,

² sɔ̃ inɛi Izirɛli ŋau i ni, waati iyi inɛmɔkɔ gɔ walakɔ inaabo gɔ í ce kuwã í nya araɛ ikã hai si inɔi kpaasi ŋa, na amu Aɔ̃ Lafɛ̃ɛ,

³ á mu araɛi, kaa ya mɔ vɛ̃ɛ, nɔ kaa mɔ atɛ̃ ku kpa inɛ. Kaa mɔ atɛ̃ ku kã iyi à ce do vɛ̃ɛ hee má jɛ atɛ̃ ku kã iyi í ya kpa inɛ. Kaa mɔ atɛ̃ kãma iyi à ce do isoi rezɛ̃ɛ ŋa, kaa nɔ ku jɛ isoi rezɛ̃ɛ tũtũ ŋa hee má jɛ ngbɛɛ ŋa.

⁴ Si waati iyi í jilɛ si nŋu ku nya arai nŋu ikã na amu Aɔ̃ Lafɛ̃ɛ fei, kaa jɛ nkãma iyi à ceò isoi rezɛ̃ɛ, baa ngboɛ ŋau hee ku koo si kpakai isoɛ fei.

⁵ Si waati iyi í nya araɛ ikã fei, a kaa waa iri má hee koo toò kɔɔi waati iyi nŋu takaɛ í jilɔɔ si nŋu ku nya arai nŋu ikã na amu Aɔ̃ Lafɛ̃ɛ, titom nii á jɛ, nɔ ku jɔ̀ ntoi iriɛu ku la ku maa koo.

⁶ Nɔ bɛɛbɛ mɔi si waati iyi í nya araɛ ikã na amu Aɔ̃ Lafɛ̃ɛu bɛ, kaa bɔ kɔkɔi inɛ gɔ iyi í ku.

⁷ Kù nɛ kpãa mɔm ku bɔ bi ikui baaɛ hee ku dasi araɛ riisi bii í jɛ baaɛu í ku si waati nŋu bɛi, nɔ kù nɛ ku dasi araɛ riisi na ikui iyeɛ, walakɔ na ikui ifɔɛ walakɔ igbãɛ, walakɔ na ikui wecĩɛ, domi í nya araɛ ikãi na amu Ilaaɔ̃ Lafɛ̃ɛɛ si bɛi à waa yɔɔ si ntoi iriɛ iyi ci ya jau.

⁸ Si waati iyi í ce kuwãu bɛ fei, á wɛɛ ikãi na amu Aɔ̃ Lafɛ̃ɛu.

⁹ Bii inɛ gɔ í ku kɔkɔɛ anu akã, nɔ iriɛ iyi í wɛɛ ikã na amu Aɔ̃ Lafɛ̃ɛu í so riisi, á wa iriɛui si ajɔi buki iyi á jɔ̀ nŋu takaɛ ku maajuu. Á waai si ajɔ mɛɛjesiau.

¹⁰ Si ajɔ mɛɛjɔsiau, kufe minjii á naaò wa bi woo weeu tengii anui ile bi kukou, walakɔ ankasiidi minji.

¹¹ Woo weeu á ce kuweei dulum ku kpai do akãi yɛi ŋau, akã mɔ ku ceò kuwee iyi à ya jo si ina fei sãa sãau, nɔ ku cea bɛi à ya cea inɛ iyi í ba riisi hai si ikui inɛ gɔu ku bɛi ku maaju. Do yaase bɛɛbɛi inɛ iyi í nya araɛ ikã na amu Aɔ̃ Lafɛ̃ɛu á teese ku nya araɛ ikã má ajɔ nŋu bɛ.

¹² Hai bɛ inɛɛu á nyi ku ce kuwã mmuɛ mái, nɔ ku na ama angudãi adɔ̃ akã iyi á ceò kuweei ku teese. A kaa ka ajɔi tako ŋau má, domi inɛ nŋu ŋau à na à so riisi.

¹³ Iyi í jɛ woodai inɛ iyi í nya araɛ ikã na amu Aɔ̃ Lafɛ̃ɛ bɛɛbɛ wee. Ajɔ iyi í kpa irii waati iyi í dau, aa gbãa a naaɛ wa anui ile bi kukoui,

¹⁴ nɔ ku kooa amu Aɔ̃ Lafɛ̃ɛ ama angudãi adɔ̃ akã iyi kù nɛ leebu gɔ ku ceò kuwee iyi à ya jo si ina fei sãa sãau, do ama angudã zãui adɔ̃ akã iyi kù nɛ leebu gɔ iyi á ceò kuwee iyi á kpa idei dulum nɔu, do angudã kombo iyi kù nɛ leebu gɔ iyi á ceò kuweei anu akã.

¹⁵ Nɔ á kooò pɛ̃ɛ hai nɛ levɛ̃ɛ ŋa iyi à fɔ do ikpoi, do kaa hai nɛ levɛ̃ɛ ŋa iyi à fãsi ikpo, do kaai iyafũ ŋa iyi à fɔ do ikpo, fei ndɛɛ si inɔ kɔlɔ gɔi á wa. Nɔ ku kooò kuweei iyafũ do ti vɛ̃ɛ má bɛi à nɛ dɔ̃ɔnɛi ku ceɛu.

¹⁶ Woo weeu á kooò mii ŋau feii si wajum, nɔ ku ce kuwee iyi í ya kpa dulum nɔu do iyi à ya jo si ina fei sãa sãau.

¹⁷ Angudã komboui á ceò kuweei anu akã, baai kɔlɔ si bii mii hai nɛ levɛ̃ɛ ŋau à wa, do kuweei iyafũ do ti vɛ̃ɛu baasi.

¹⁸ Inɛ iyi í cea amu Aɔ̃ Lafɛ̃ɛ kuwãu, á wa iriɛui anui ile bi kukou. Á so ntoi iriɛ ŋaui koo dasi bi inai kuweei anu akãu.

¹⁹ Woo weeu á so ikpai angudã kombou iyi í se í jĩaui, do kaa iyi kù nɛ levɛ̃ɛ minji, ku so ku daa inɛ iyi í ce kuwãu awɔ, waati iyi í wa iriɛu í tã.

²⁰ Si anyiɛ woo weeu takaɛ á so mii ŋaui koo gbugbã gbugbãɛ si wajum, domi mii iyi à nya ikãi, nɔ ti woo weeui á jɛ hee do gɛndɛu do ikpau iyi í jɛ ti amu Aɔ̃ Lafɛ̃ɛu. Bii waati iyi bɛ í lɔ, inɛ iyi í ce kuwãu á yɔkɔ ku mɔ vɛ̃ɛ bɛbɛi.

²¹ Yaase bɛi aa ya cea inɛ iyi í jilɔɔ si nŋu ku nya arai nŋu ikã na amu Aɔ̃ Lafɛ̃ɛ do kuwã mbɛ. Nɔ do yaase bɛi á ya ceaò amu Aɔ̃ Lafɛ̃ɛ kuwee ŋau mbɛ. Bii í nɔ í nɛ kpãa iyi á yɔkɔ ku kɔ̃ɔsiò amua gɔ ŋa mɔ má í sĩa. Amma mii iyi í wã si idɔɛi á na dee dee si bɛi à nɛ dɔ̃ɔnɛi ku ce bii inɛ gɔ í jilɔɔ si nŋu ku nya arai nŋu ikã na amu Aɔ̃ Lafɛ̃ɛ.

Yaase bɛi aa ya weea inɛi Izirɛli ŋa

²² Aɔ̃ Lafɛ̃ɛ í sɔ̃ Moizi í ni,

²³ sɔ̃ Arɔ̃ɔ do amaɛ ŋau i ni, ide ŋa iyi aa ya fɔ i weeaò inɛi Izirɛli ŋau wee. I ya ni ŋa,

²⁴ Aɔ̃ Lafɛ̃ɛ ku wee nŋɛ nɔ ku ya maa degbe ŋɛ.

²⁵ Aɔ̃ Lafɛ̃ɛ ku cɔ ŋɛ do jiida ku jɛ, nɔ ku ce nŋɛ didɔ̃.

²⁶ Aɔ̃ Lafɛ̃ɛ ku ce nŋɛ jiida nɔ ku mu nŋɛ laakai ku sũ.

²⁷ Bii woo wee ŋau à fɔ bɛɛbɛ do irim ku ba a weea inɛi Izirɛli ŋa, amui an gba kuweeu.