Kuka 5 - Bibeli do fee

Kufitai inɛ ŋa iyi à riisi

¹ Aɔ̃ Lafɛ̃ɛ í sɔ̃ Moizi í ni,

² sɔ̃ inɛi Izirɛli ŋau a jɔ̀ ilu bɔ̃ɔi batai ara ŋa iyi à wa inɔ nŋa ŋau fei a fita, do inɛ ŋa iyi à waa ce bɔ̃ɔi kentu, walakɔ inɛ ŋa iyi à lu iku gɔ.

³ Bii inɛmɔkɔ ŋai walakɔ bii inaabo ŋai aa fitai ku ba a maà riisi asɔ nŋɛ bii ǹ wau.

⁴ Ŋɔi inɛi Izirɛli ŋau à jirima wooda iyi Aɔ̃ Lafɛ̃ɛ í na Moiziu. À jɔ̀ inɛ ŋa iyi à nɛ riisi ŋau à fita hai inɔ nŋa.

Mii iyi í bɛjɛ ku teese

⁵ Aɔ̃ Lafɛ̃ɛ í sɔ̃ Moizi í ni,

⁶ sɔ̃ inɛi Izirɛli ŋa ide ŋau ihɛ̃. Bii inɛmɔkɔ walakɔ inaabo í cea inɛ mmu gɔ taale na mii ndɛɛ gɔ iyi í so, í ce dulum nii bi Aɔ̃ Lafɛ̃ɛ.

⁷ Á ce tuubai dulum iyi í cei, nɔ koo sindo mii iyi í sou bi inɛ iyi í nɔɔu. Nɔ zaka bɛi ilu mii nɔu í ra mii ndɛɛ á kpɔ̃ɔi ikɔ miiu, nɔ ku lea si ikɔ akã.

⁸ Bii í jɛ ilu mii nɔu kù wɛɛ, nɔ kù nɛ nyaanze gɔ iyi aa sindoa, mii nɔu ti Aɔ̃ Lafɛ̃ɛi á baa ku jɛ waatɔ aa na woo weeui. Si anyiɛ inɛ iyi í ce kurarau, á na angudã kombo akãi iyi aa ceò bukii kuwee iyi á kpaò idei dulum dɛɛu.

⁹ Mii iyi inɛi Izirɛli ŋa à nya ikã a ceaò Aɔ̃ Lafɛ̃ɛ kuwee fei, ti woo wee iyi í ce kuweeui á jɛ.

¹⁰ Mii iyi à nya ikã ku jɛ ti Aɔ̃ Lafɛ̃ɛ fei, woo wee iyi í ce kuweeui á nɔɔ, mii iyi à koo a naa fei titɛɛi á jɛ.

Wooda iyi à jilɛ na inaabo iyi mɔkɔɛ wa sikaɛ do sakara

¹¹ Aɔ̃ Lafɛ̃ɛ í sɔ̃ Moizi í ni

¹² ku sɔ̃ inɛi Izirɛli ŋau ku ni, bii aboi inɛ gɔ í na í sinda í ce mii iyi kù jɛ dee dee,

¹³ bii inɛmɔkɔ mmu gɔ í sũòɛ, nɔ mɔkɔɛ kù mà, nɔ í riisi araɛ si asii, bii inɛ kãma kù yɔɔ hee ku jɛ sɛɛda, nɔ inɛ kãma kù ba ŋa tengi bii à waa coou,

¹⁴ bii lasabu gɔ í naa í tale si mɔkɔɛu igu ku ja nɔ do ntɔ aboɛ í dasi araɛ riisi, walakɔ bii lasabu gɔ í nɔ í naa siɛ í jɔ̀ wa ce igu baa bii aboɛu kù dasi araɛ riisi,

¹⁵ mɔkɔu á gbã aboɛu ku bɔò bi woo weeui. Bii wa koo, á so iyafũ kiloo mɛɛta koo ceò kuwee. Kaa fãsi ikpo, kaa nɔ ku dasi tuae ku dɔ̃ inunuu, domi kuweei igu ku jai, kuweei gigi ku yei, nŋui á ye inɛ gigii laalɔ iyi í ce.

¹⁶ Woo weeu á gbã aboui koo leekĩɛ si wajui Aɔ̃ Lafɛ̃ɛ.

¹⁷ Woo weeu á bu inyi iyi à nya ikã gɔi si cakai amà, nɔ ku bu sãai inɔi ile bi kukou ku dasi inyiu.

¹⁸ Woo weeu á jɔ̀ abou ku leekĩi si wajui Aɔ̃ Lafɛ̃ɛ, nɔ ku jɔ̀ ku nya mangoɛ, nɔ ku so kuweei gigi ku yeu ku daa si awɔ, iyi í jɛ kuweei iguu. Woo weeu á maa mu inyi kuro si awɔɛi iyi à ya ceekpeò.

¹⁹ Woo weeu á jɔ̀ abou ku gbasii nɔ ku sɔ̃ɔ ku ni, bii inɛmɔkɔ kãma kù sũòɛ, nɔ si bɛi ì wa si awɔ gbugbãi mɔkɔɛ, bii i kù dasi araɛ riisi, inyi kuro iyi à ya ceekpeò ihɛ̃ kaa ceɛ nkãma.

²⁰ Amma bii í jɛ do iyi ì wa si awɔ gbugbãi mɔkɔɛ fei ì sinda ì dasi araɛ riisi, ì jɔ̀ inɛmɔkɔ mmu gɔ í sũòɛ...,

²¹ nɔ woo weeu í jɔ̀ ì gbasi do kuwãi ikpe, nɔ í ni, Aɔ̃ Lafɛ̃ɛ ku ceekpeɛ nɔ ku jɔ̀ i baa i jɛ ilu ikpe si aninii inɛɛ ŋa, nɔ ku jɔ̀ i baa i jɛ gbɛnda nɔ inɔɛ ku kɔ̃,

²² nɔ inyii ikpeu ku lɔ inɔɛ, nɔ ku jɔ̀ inɔɛ ku kɔ̃, nɔ ku jɔ̀ i baa i jɛ gbɛnda. Nɔ abou ku ni, ami. Ku ce bɛɛbɛ.

²³ Woo weeu á kɔ idei ikpe ŋaui si tia gɔ, nɔ ku wiɛ do inyi kuro,

²⁴ nɔ ku na abou ku mɔ, nɔ inyii ikpeu ku lɔ inɔɛ ku bía wahala.

²⁵ Woo weeu á gba kuweei iguui hai si awɔi abou, nɔ ku gbugbã gbugbãɛ cingaa do cingaa fei si wajui Aɔ̃ Lafɛ̃ɛ ku bɛi ku ceò kuwee si tengi bii à ya ce kuweeu.

²⁶ Woo weeu á bu mii iyi à ceò kuweeui awɔ kutu akã ku jɛ ti gigi ku ye, nɔ ku joo si bi kuweeu. Si anyii nŋu bɛi á bɛi ku jɔ̀ abou ku mɔ inyi kurou.

²⁷ Waati iyi í mɔ inyiu í tã, bii í jɛ í dasi araɛ riisi, nɔ kù jɛ dee dee bi mɔkɔɛ, inyii ikpeu á lɔ inɔɛi nɔ ku bía wahala. Inɔɛ á fufui, nɔ ku baa ku gbe gbɛnda, nɔ ku baa ku jɛ inɛ iyi à ceekpe si inɔi inɛɛ ŋa.

²⁸ Amma bii abou njɛ kù nɛ taale gɔ, nɔ í maaju si ideu, á jɛ hai nɛ taale gɔi nɔ ku maa bí amaɛ ŋa.

²⁹ Iyi í jɛ woodai igu mbɛ ti inaabo iyi í wa si awɔ gbugbãi mɔkɔɛ nɔ í so riisi,

³⁰ do ti inɛmɔkɔ iyi lasabu gɔ í tale siɛ wa ce igu na aboɛ si ide dimi bɛɛbɛ. Inɛɛu á jɔ̀ abou ku leekĩi si wajui Aɔ̃ Lafɛ̃ɛ nɔ woo weeu ku cea bɛi woodau ihɛ̃ í fɔ fei.

³¹ Mɔkɔu njɛ kù nɛ taale kãma iyi aa yɛ siɛ, amma abou bii í jɛ í ce daaui, á yɛ ijuukpãi ndɛɛ.