Kuka 4 - Bibeli do fee

Icɛi nyaanzei Levii ŋa Tɔkui Kehati ŋa

¹ Aɔ̃ Lafɛ̃ɛ í sɔ̃ Moizi do Arɔ̃ɔ í ni,

² i ka tɔkui Kehati ŋa hai si inɔi inɛi Levii ŋau si nyaanze nŋa ŋa do si kpasɛ̃i baa nŋa ŋa,

³ hai adɔ̃ kuntaa do ku lesi hee ku bɔ adɔ̃ ciitaa, inɛ nŋu ŋau bɛi aa ce icɛ si ile bi kukou.

⁴ Iyi í jɛ icɛi amai Kehati ŋau si ile bi kukou wee. Aŋai aa jɛ inɛ ngboi mii ŋa iyi à nya ikã ŋau fei.

⁵ Waati iyi inɛi Izirɛli ŋau à waa bi a dasi kpãa fei, Arɔ̃ɔ do amaɛ ŋai aa ya naa a gbangaa acɔ iyi í fɛɛfɛ ile kumáu do ile iyi í re do kumáu a biiò kpakoi akabuuu.

⁶ Nɔ bata ku nɛ gbugbã gɔi aa bii si antaiɛ, si anyiɛ nɔ a biiɛ má fei sãa sãa do acɔ boogu gɔ a bɛi a naaò jĩi ŋa iyi aa soò kpakoi akabuuu a dasi.

⁷ Si anyiɛ aa tɛsi acɔ boogu mmuɛ si antaii taabu bi ku lesi pɛ̃ɛ iyi à nya ikã ŋaui nɔ a lesi jɛɛ ŋa bɛ, do kɔɔfu ŋa, do kpaaba ŋa do jɛɛ fata ŋa si bii aa ya cea Aɔ̃ Lafɛ̃ɛ kuwee do vɛ̃ɛu. Pɛ̃ɛ á ya maa wa bɛi waati kãma fei.

⁸ Si anyiɛ má aa tɛsi mii ŋau acɔ nkpa ku yɔgɛɛò boogu gɔi, nɔ aa bii nŋu mɔ mái do bata ku nɛ gbugbã ŋau, nɔ a dasi jĩi ŋa iyi aa soò taabuu mɔ.

⁹ Aa so acɔ boogui nɔ a biiò bi ku lesi fitila ŋau, do fitila ŋau taka nŋa, do mii ku teese fitila ŋau do bi ku busi ina nyɛnyɛ ŋa, do tuui ikpo ŋau, hee ku koo si mii iyi í jɛ jĩnɛi fitilau fei de.

¹⁰ Aa so fei ndɛɛi a dasi bɔgɔ bata nla ku nɛ gbugbã gɔ a bɛi a so a lesi antaii gbaakete.

¹¹ Aa dɛdɛ acɔ boogui a tɛsi bi kuwee iyi à ce do wurau, nɔ aa bii nŋu mɔi do bata ku nɛ gbugbã, si anyiɛ nɔ a dasi jĩi ŋa iyi aa soò bi kuweeu mɔ.

¹² Aa so jĩnɛ ŋa iyi à waa ceò icɛ si ile kumáu do ile iyi í re do kumáu feii a woo do acɔ boogu nɔ a biiɛ do bata ku nɛ gbugbã, a bɛi a so a lesi antaii gbaakete.

¹³ Aa wa ilúlui bi kuweeui nɔ a tɛsi acɔ nkpa gɔ si antaiɛ.

¹⁴ Andi mii iyi à ya ceò icɛi kuweeu fei si acɔu bɛi aa dasi, hai bi ku busi ina nyɛnyɛ ŋau do kaato cate cate ŋau do mii ku ko ilúlu ŋau do jɛɛ nantaa ŋau hee ku koo si mii iyi í jɛ jĩnɛi bi kuweeu fei de. Si anyiɛ nɔ a tɛsi bata ku nɛ gbugbã má a bɛi a dasi jĩi ŋa iyi aa soò bi kuweeu.

¹⁵ Waati iyi Arɔ̃ɔ do amaɛ ŋau à bii ile bi kukou do jĩnɛ ŋa iyi à wa inɔɛ ŋau à tã, amai Kehati ŋai aa naa a soo bii à waa nɛ hai bii à ce asɔu, amma a kaa lu mii iyi à nya ikã ŋau kãma do awɔ, ku ba a maà na a ku. Aso ku sou bɛi í jɛ icɛi amai Kehati ŋau si ile bi kukou.

¹⁶ Eleazaa amai Arɔ̃ɔ woo weeu mɔi á jɛ woo ce wũai ikpoi fitila ŋau, do tuae ku dɔ̃ inunuu, do kuweei iyafũ ŋa iyi à ya maa naaò wa waati kãma feiu, do ikpo kumá iyi à nya ikãu mɔ má, do ile bi kukou do mii iyi í wa inɔɛ fei.

¹⁷ Nɔ Aɔ̃ Lafɛ̃ɛ í sɔ̃ Moizi do Arɔ̃ɔ má í ni,

¹⁸ i ya maa ce laakai ŋa ku ba dimii nyaanzei Kehati ŋau a maà ku si inɔi dimii Levii ŋau.

¹⁹ Bɛi ì nɛ ku ce ŋa wee. Arɔ̃ɔ do amaɛ ŋa aa naa a jilɛ ŋai akã akã si icɛ nŋa ŋa, nɔ inɛ fei ku nɛ asoɛ. Do yaase bɛɛbɛ aa maa wɛɛi a kaa ku waati iyi aa naa a maai si mii iyi à nya ikã ŋau.

²⁰ Aŋa de a kaa lɔ a koo a yɛ mii kumá ŋau ku ba a maà na a ku.

Tɔkui Gɛɛsɔ̃ɔ ŋa

²¹ Aɔ̃ Lafɛ̃ɛ í nyi í sɔ̃ Moizi má í ni,

²² ce doai tɔkui Gɛɛsɔ̃ɔ ŋau mɔ si kpasɛ̃i baa nŋa ŋa do si nyaanze nŋa ŋa.

²³ Aa ce kukaui hai bi inɛ ŋa iyi à nɛ adɔ̃ kuntaa hee ku bɔ adɔ̃ ciitaa. Inɛ nŋu ŋau bɛi aa jɛ woo ce icɛ si ile bi kukou.

²⁴ Iyi í jɛ icɛ nŋa si ile bi kukou do mii iyi aa ya so wee.

²⁵ Aŋai aa ya maa so ilei acɔu, do acɔ ŋa iyi à biiò antaiɛu, do acɔ iyi í wa anu bi ku lɔi ile bi kukou,

²⁶ do acɔi dangai bantumai ile bi kukou, do acɔ iyi í wa anu bi ku lɔi bantuma iyi í kaako ileu do bi kuweeu, do ikũɛ ŋa do jĩnɛɛ ŋau fei. Aŋai aa ce icɛ ŋau bɛ fei.

²⁷ Arɔ̃ɔ do amaɛ ŋai aa maa cɔ bɛi tɔkui Gɛɛsɔ̃ɔ ŋau à waa ce, hai aso ŋau ku so hee do icɛ ŋa iyi à waa ce fei. Aŋai aa ya sɔ̃ ŋa mii iyi aa ya ce, do mii iyi aa ya so.

²⁸ Icɛ ŋa iyi à dasi tɔkui Gɛɛsɔ̃ɔ ŋau mbɛ si ile bi kukou. Itamaa amai Arɔ̃ɔ woo weeui á ya maa cɔ icɛ nŋa.

Tɔkui Merari ŋa

²⁹ Aa ce doai tɔkui Merari ŋau mɔi si nyaanze nŋa ŋa do si kpasɛ̃i baa nŋa ŋa.

³⁰ Aa ce kukaui hai bi inɛ ŋa iyi à nɛ adɔ̃ kuntaa hee ku bɔ adɔ̃ ciitaa. Inɛ nŋu ŋau bɛi aa jɛ woo ce icɛ si ile bi kukou.

³¹ Iyi í jɛ icɛ nŋa si ile bi kukou do mii iyi aa ya so wee. Aŋai aa ya maa so kpataku ŋa iyi à ya ceò ile bi kukou, do gadagaauɛ ŋa, do sɔbeɛ ŋa, do bi ku lesi sɔbeɛ ŋa,

³² do sɔbei bantumai ileu do bi ku lesi sɔbeɛ ŋa, do kɛkɛɛ ŋa do ikũɛ ŋa do jĩnɛ ŋa iyi à ya ceò icɛ ŋau fei. Aa sɔ̃ inɛ fei iyi á ya soi.

³³ Iyi í jɛ icɛi tɔkui Merari ŋau mbɛ si ile bi kukou, nɔ Itamaa amai Arɔ̃ɔ woo weeui á ya maa cɔ icɛ nŋa.

Kukai inɛi Levii ŋa iyi à wa si icɛ

³⁴ Moizi do Arɔ̃ɔ do inɛ ngboi inɛi Izirɛli ŋau à ka inɛi Kehati ŋaui si nyaanze nŋa ŋa do si kpasɛ̃i baa nŋa ŋa,

³⁵ hai bi inɛ ŋa iyi à nɛ adɔ̃ kuntaa hee ku bɔ adɔ̃ ciitaau, inɛ nŋu ŋau à to a ce icɛ si ile bi kukou.

³⁶ Inɛ ŋa iyi à ka si nyaanze nŋa ŋau à wɛɛi aŋa dubu minji do cĩɔ mɛɛje do ciitaa (2.750).

³⁷ Jiai nyaanzei tɔkui Kehati ŋa iyi à kau mbɛ, inɛ ŋa iyi à jɛ woo ce icɛ si ile bi kukou fei. Moizi do Arɔ̃ɔ à ka ŋa si bɛi Aɔ̃ Lafɛ̃ɛ í sɔ̃ Moiziu.

³⁸ Tɔkui Gɛɛsɔ̃ɔ ŋau mɔ iyi à ka si nyaanze nŋa ŋa do si kpasɛ̃i baa nŋa ŋa,

³⁹ hai bi inɛ ŋa iyi à nɛ adɔ̃ kuntaa hee ku bɔ adɔ̃ ciitaa, inɛ nŋu ŋau à to a ce icɛ si ile bi kukou.

⁴⁰ Inɛ ŋa iyi à ka si nyaanze nŋa ŋa do si kpasɛ̃i baa nŋa ŋau à wɛɛi aŋa dubu minji do cĩɔ mɛɛfa do kuntaa (2.630).

⁴¹ Jiai nyaanzei tɔkui Gɛɛsɔ̃ɔ ŋa iyi à kau mbɛ, inɛ ŋa iyi à jɛ woo ce icɛ si ile bi kukou. Moizi do Arɔ̃ɔ, aŋai à ka ŋa si bɛi Aɔ̃ Lafɛ̃ɛ í na ŋa woodaɛ.

⁴² Tɔkui nyaanzei Merari ŋau iyi à ka si nyaanze nŋa ŋa do si kpasɛ̃i baa nŋa ŋa,

⁴³ hai bi inɛ ŋa iyi à nɛ adɔ̃ kuntaa hee ku bɔ adɔ̃ ciitaa, inɛ nŋu ŋau à to a ce icɛ si ile bi kukou.

⁴⁴ Inɛ ŋa iyi à ka si nyaanze nŋa ŋau à wɛɛi aŋa dubu mɛɛta do cĩɔ minji (3.200).

⁴⁵ Jiai nyaanzei tɔkui Merari ŋau iyi à ka mbɛ. Moizi do Arɔ̃ɔ, aŋai à ka ŋa si bɛi Aɔ̃ Lafɛ̃ɛ í sɔ̃ Moiziu.

⁴⁶ Andi inɛi dimii Levii ŋa iyi Moizi do Arɔ̃ɔ do inɛ ngboi Izirɛli ŋau à ka si nyaanze nŋa ŋa do si kpasɛ̃i baa nŋa ŋa,

⁴⁷ hai inɛ ŋa iyi à nɛ adɔ̃ kuntaa hee ku bɔ adɔ̃ ciitaa, andi inɛ ŋa iyi à to icɛ ku ce do aso ŋa ku so si icɛi ile bi kukou fei,

⁴⁸ iyi à ka ŋa, à wɛɛi aŋa dubu mɛɛjɔ do cĩɔ miiu do cinɛ (8.580).

⁴⁹ À ce kukaui si bɛi Aɔ̃ Lafɛ̃ɛ í na Moizi woodau, nɔ à sɔ̃ inɛ fei icɛ iyi í nɛ ku ce do aso iyi á so. À ce kukaui dee dee si bɛi Aɔ̃ Lafɛ̃ɛ í sɔ̃ Moiziu.