Kuka 36 - Bibeli do fee

Wooda iyi í jɛ ti inaabo ŋa iyi à nɛ a ba tubu

¹ Inɛ ŋa iyi à jɛ tɔkui Manasee amai Zozɛfu ŋa, iyi à jɛ inɛ ngboi kpasɛ̃i Galaadi amai Makii, à naa à ba Moizi do inɛ ngboi dimii inɛi Izirɛli ŋau ide ku fɔ,

² à ni, lafɛ̃ɛ nwa Moizi, Aɔ̃ Lafɛ̃ɛ í naɛ wooda i kpɛ̃a dimii inɛi Izirɛli ŋa ilɛu si kpasa iyi aa tau, nɔ í ni ikpɛ̃ iyi á jɛ ti Selofadi inɛ nwau i na ama inaaboɛ ŋau.

³ Bii í jɛ nsɛi à na à so mɔkɔ ŋa si dimi mmui inɛi Izirɛli ŋau, aa gba ikpɛ̃ nŋai hai si dimi nwa nɔ a kɔ̃ɔsi ilɛi dimi titɔ̃ iyi à lɔsiu. Si bɛɛbɛ ikpɛ̃ iyi awa à ba si kpasau á kayei,

⁴ nɔ si adɔ̃i ara ku nɛu, ikpɛ̃ nŋa ku nyi si dimi titɔ̃ iyi à lɔsiu mam mam.

⁵ Ŋɔi Moizi í sɔ̃ inɛi Izirɛli ŋau wooda ŋa iyi Aɔ̃ Lafɛ̃ɛ í jilɛ í ni, tɔkui Zozɛfu ŋau à nɛ ntɔ.

⁶ Wooda iyi Aɔ̃ Lafɛ̃ɛ í jilɛa ama inaaboi Selofadi ŋau wee. Aa so mɔkɔ nŋa ŋai tengi bii à bi, amma de ku jɛ si nyaanzei dimii baa nŋa ŋa.

⁷ Si bɛɛbɛ ilɛi Izirɛli ŋau a kaa kua si dimi iyi ihɛ̃ a bɔ si dimi iyi ihɔ̃, amma inɛ fei á leekĩi dim dim si tubu iyi í jɛ ti dimii baaɛ.

⁸ Bii í jɛ si akãi dimi ŋau, inaabo gɔ í ba ilɛ ŋa iyi í jɛ tubuɛ, inɛi dimiɛ gɔi í nɛ ku so si tuubai nyaanze, ku ba dimii Izirɛli fei ku maa mu ilɛ iyi í ba hai bi balaɛ ŋa.

⁹ Do yaase bɛɛbɛi ilɛ ŋau a kaa kua hai si dimi iyi ihɛ̃ a bɔ si dimi iyi ihɔ̃, dimii Izirɛli fei á leekĩi dim dim si ilɛɛ.

¹⁰ Ŋɔi ama inaaboi Selofadi ŋau à jirima ide iyi Aɔ̃ Lafɛ̃ɛ í sɔ̃ Moiziu.

¹¹ Mala do Tirisa do Hogula do Milika do Noa aŋa fei ama inɛmɔkɔ ŋa iyi igbã walakɔ ifɔi baa nŋa ŋa à bí ŋaui à so,

¹² waatɔ si nyaanzei tɔkui Manasee amai Zozɛfu ŋau, nɔ tubu nŋa í gbe si dimii nyaanzei baa nŋa.

¹³ Wooda ŋa do asaiya ŋa iyi Aɔ̃ Lafɛ̃ɛ í ni Moizi ku sɔ̃ inɛi Izirɛli ŋau mbɛ si lɔɔmai Moabu ŋau, itĩi idoi Zuudɛ̃ɛu do wajui Zeriko.