Kuka 35 - Bibeli do fee

Ilu nlai inɛi Levii ŋa

¹ Waati iyi Moizi í wa si lɔɔmai Moabu ŋau kɔkɔi idoi Zuudɛ̃ɛ do wajui Zerikou, Aɔ̃ Lafɛ̃ɛ í sɔ̃ɔ í ni,

² sɔ̃ inɛi Izirɛli ŋa a mua inɛi Levii ŋau ilu gɔ ŋa si ilɛ nŋa ku ba aŋa mɔ a ba bii aa wa. Nɔ i mu nŋa bi ku jɛi mɛɛmu nŋa ŋa kɔkɔi ilu ŋau bɛ.

³ Aa mu nŋa ilu ŋaui ku ba a ba bi kuwa. Bantuma ku mungau ŋau mɔi aa jɛ bi ku jɛi mɛɛmu gaa nŋa ŋa do mɛɛmu ŋa iyi à nɛ fei.

^4-5 Bi ku jɛi mɛɛmu ŋau, kucĩɛ agbãawɔ dubui á jɛ do alalai bindii iluu do ikpa nunui daakɔ, do ikpa awɔ cangai inunu, do ikpa nunui alɛ, hee do ikpa awɔ njɛi kpãai inunu. Do yaase bɛɛbɛi aa nyaa inɛ ŋau kɔɔi inyau, nɔ kusɔɛ do kucĩɛ fei a maa mungai. Hai aninii iluu agbãawɔ dubu minjii á jɛ cingaa do cingaa fei.

⁶ Si inɔi ilu ŋa iyi aa na inɛi Levii ŋau, ilu mɛɛfa ilu bi ku manjii á jɛ, tengi bii inɛ iyi í kpa amanɛ iyi kù jɛ do idɔɔbiɛ á yɔkɔ ku sa koo manji, do ilu ciiji do minji mmuɛ má.

⁷ Jiai ilu iyi aa mua inɛi Levii ŋau fei sãa sãa í wɛɛi ilu ciiji do mɛɛjɔ do bi ku jɛi mɛɛmu nŋa ŋa.

⁸ Dimi fei á mu nŋa ilu ŋai zaka bɛi kulai ilɛɛ í to. Dimi ŋa iyi ilɛ nŋa í la, inɛ nŋu ŋaui aa na ilu ku kpɔ, dimi ŋa mɔ iyi tu ŋa í kere, aŋa mɔ aa na ku mungaui.

Ilu bi ku manji ŋau

⁹ Ŋɔi Aɔ̃ Lafɛ̃ɛ í sɔ̃ Moizi í ni,

¹⁰ sɔ̃ inɛi Izirɛli ŋau i ni, waati iyi ì na ì kua idoi Zuudɛ̃ɛu ŋa, nɔ ì lɔ si ilɛi Kanaãu ŋa,

¹¹ aa cica ilu gɔ ŋai a jɛ ilu bi ku manji ŋa. Tengi bɛi inɛ iyi í kpa amanɛ iyi kù jɛ do idɔɔbiɛ á yɔkɔ ku sa koo manji.

¹² Do yaase bɛɛbɛi inɛ iyi í kpa inɛ á ba ku gbãò hai si awɔi inɛ iyi í nɛ ku jaa ikuu, nɔ a kaa kpaa má bii kù jɛ inɛi igbɛ ŋau a kiitiaa si wajui zamaa a yɛ taaleɛ.

¹³ Si ilu ŋa iyi aa na ŋa ŋau, ilu mɛɛfai á jɛ ilu bi ku manji nŋɛ.

¹⁴ Aa na ilu mɛɛta ŋai do ikpa icei idoi Zuudɛ̃ɛu, si ilɛi Kanaã mɔ ilu mɛɛta. Tengi bii á jɛ ilu bi ku manji ŋau mbɛ.

¹⁵ Ilu mɛɛfa ŋau bɛi aa jɛ bi ku manjii inɛi Izirɛli ŋa, do bi ku manjii inɛ njoo ŋa, do inɛ iyi í wa inɔ nŋɛ fei. Tengi bɛi inɛ iyi í kpa amanɛ iyi kù jɛ do idɔɔbiɛ fei á yɔkɔ ku sa koo manji.

¹⁶ Bii inɛ gɔ í cã inɛ gɔ do mii iyi à ce do isɔ, si anyiɛ bii inɛɛu í na í ku, inɛ iyi í cãau woo kpa inɛi, nɔ aa kpa nŋu mɔi.

¹⁷ Bii í nɔ í jɛ í cãai do kuta gɔ iyi wa mu si awɔ, bii inɛɛu í na í ku, inɛ iyi í kpaau í baa í jɛ woo kpa inɛi, nɔ aa kpa nŋu mɔi.

¹⁸ Bii í nɔ í jɛ í cãai do jĩi gɔ iyi wa mu, bii inɛɛu í na í ku, inɛ iyi í kpaau, woo kpa inɛi, nɔ aa kpa nŋu mɔi.

¹⁹ Inɛ iyi í nɛ ku jaa inɛ iyi í kuui á kpa woo kpa inɛu bii í baa gbakã.

²⁰ Bii inɛ gɔ í tale inɛ gɔ si na iyi í jɔ̀ í cóo, walakɔ bii í kã í ce í jɔ̀ mii gɔ í bataɛ, bii inɛɛu í ku,

²¹ walakɔ bii í nɔ í jɛ do awɔ mɔi í cãa si na iyi í jɔ̀ í cóo, si anyiɛ bii inɛɛu í ku, inɛ iyi í cã í kpaau, inɛ iyi í nɛ ku jaa inɛ iyi í kuu á kpa nŋu mɔi bii í baa, domi í jɛ woo kpa inɛi.

²² Amma bii inɛ í tale inɛ anu akã, nɔ kù jɛ si na iyi í jɔ̀ í cóo, walakɔ bii í jɔ̀ ngɔgɔ í bataɛ nɔ kù jɛ do idɔɔbiɛ,

²³ walakɔ bii í tale kuta gɔ wa í na í bata inɛ gɔ si na iyi í jɔ̀ kù waa yɔɔ, nɔ si anyiɛ inɛɛu í na í ku, nɔ kù jɛ si na iyi í jɔ̀ í cóoi í kpaa walakɔ wa dɛ ku ceaa laalɔ,

²⁴ wooda ŋa iyi zamaau á too si ku kiitiaò inɛ iyi í kpa inɛ do inɛ iyi í nɛ ku jaa inɛ iyi à kpau mbɛ.

²⁵ Zamaau á jɔ̀ a gba inɛ iyi í ce daaui hai si awɔi inɛ iyi wa jaa ikuu, nɔ á jɔ̀ ku nyi ilu bii í tako í sa í koo í manjiui. Á maa wa bɛi hee woo wee nla iyi à fãsi ikpo kumáu ku ku.

²⁶ Amma bii inɛ iyi í kpa inɛɛu í fita hai ilu bi ku manjiu,

²⁷ bii woo jaa inɛ iyi í kuu í kòo nɔ í kpaa, njɛ kù nɛ taale kãma má,

²⁸ domi inɛ iyi í kpa inɛ gɔ bɛɛbɛ, í nɛ ku maa wa ilu bii í koo í manjiui hee woo wee nlau ku ku. Si anyii ikui woo wee nlaui á yɔkɔ ku nyi ilɛɛ.

²⁹ Yaase bɛɛbɛi aa maa ce ŋa waati kãma fei iŋɛ do tɔku nŋɛ ŋa tengi bii ì wa ŋa fei.

³⁰ Si mii iyi í jɛ idei inɛ ku kpa fei, a kaa yɛ taalei inɛ a kpaa, bii kù jɛ do kumàsii woo jɛ sɛɛda nkpɔ nkpɔi ideu. Sɛɛda ku jɛi amanɛ akã kù to.

³¹ Bii inɛ gɔ í kpa inɛ, bii í jɛ í nɛ ti a kpa nŋu mɔi, i maà gba siɛ fia nɔ i jɔ̀ɔ si hunde ŋa, aa kpa nŋu mɔi.

³² Nɔ i maà gbasi inɛ kãma fia ku ba i jɔ̀ ku sa koo manji si akãi ilu bi ku manji ŋau, ku bɛi ku na ku sinda ku baa si ilɛɛu má, waati iyi woo wee nlau í na í ku.

³³ I maà ti i riisi ilɛ bii ì wau ŋa, domi inɛ ku kpa í ya riisi ilɛi, nɔ bii à kpa amanɛ, ilɛu kaa yɔkɔ ku maaju, bii kù jɛ a kpa inɛ iyi í kpa inɛɛu.

³⁴ Debɛi i ce laakai ŋa i maà na i riisi ilɛ bii aa koo i wa ŋau, tengi bii amu mɔ an wau, domi amui ǹ jɛ Aɔ̃ Lafɛ̃ɛ nɔ ǹ wa anini nŋɛ.