Kuka 34 - Bibeli do fee

Kɔɔ ŋa iyi í jɛ kɔɔi Kanaã

¹ Ŋɔi Aɔ̃ Lafɛ̃ɛ í sɔ̃ Moizi í ni,

² sɔ̃ inɛi Izirɛli ŋau woodau ihɛ̃ i ni, waati iyi aa na i lɔ si ilɛi Kanaãu ŋa, ilɛu á baa ku jɛ tubu nŋɛi. Ilɛi Kanaãu, kɔɔɛ ŋa wee.

³ Do ikpa awɔ cangai kpãai inunu, ilɛu á sintii hai gbaai Siniu kɔkɔi ilɛi Edɔmu, nɔ kɔɔi ilɛu á sinti má hai bi Tenku ku da Imu hee ku bɔ ikpa nunui daakɔ,

⁴ nɔ ku sinda má ku nɛ ikpa geetei Akarabimu, nɔ ku bɔ ikpa Sini, nɔ ku na isɛ ku bɔ hee Kadɛsi-Baanea, nɔ ku mɔsi ku bɔ Hatisaa-Adaa, nɔ ku lɔ do ikpa Asimoni,

⁵ hai Asimoni nɔ ku sinda ku nɛ ikpa Ezibiti koo dasi Tenku Nlau.

⁶ Do ikpa nunui alɛ, Tenku Nlaui á jɛ kɔɔ nŋɛ.

⁷ Do ikpa awɔ njɛi kpãai inunu aa jɔ̀ kɔɔu ku lɔi si afei tenkuu do si afei iri kutai Ɔɔu.

⁸ Hai iri kutai Ɔɔu, aa jɔ̀ ku lɔ ŋai do ikpa Lebo-Amati nɔ ku bɔ hee Sedadi,

⁹ hai bɛ á mɔsii do ikpa Zifurɔ̃ɔ nɔ koo faata Atisaa-Ena. Tengi bɛi á jɛ kɔɔ nŋɛ do ikpa awɔ njɛi kpãai inunuu.

¹⁰ Do ikpa nunui daakɔ mɔ kɔɔu á sintii hai Atisaa-Enai hee ku bɔ Sefamu.

¹¹ Hai Sefamu bɛ, Ribulai á bɔ do ikpa nunui daakɔi Aini, nɔ ku too itĩi tenkui Kinerɛti wa do ikpa nunui daakɔ.

¹² Si anyiɛ nɔ ku nyi wa ikpa idoi Zuudɛ̃ɛ má, ku bɛi koo kã si Tenku ku da Imuu má. Tengi bii á jɛ ilɛ nŋɛ mbɛ do kɔɔɛ ŋa.

¹³ Moizi í sɔ̃ inɛi Izirɛli ŋau í ni, ilɛ iyi Aɔ̃ Lafɛ̃ɛ í jilɔɔ si nŋu ku mu nŋɛu mbɛ. Aa kpɔ̃ɔ ŋai si dimi mɛɛsã ŋau do dimi fiti bubuu. Kpasai aa ta si ŋa inɛ fei ku bɛi ku baò titɛɛ.

¹⁴ Ntɔi, dimii Rubɛ̃ɛ do ti Gadi ŋau do fiti bubui dimii Manasee ŋau à ba ikpɛ̃ iyi í jɛ tu ŋa tã.

¹⁵ Ikpɛ̃ iyi í jɛ ti dimi minji do dimi fiti bubuu do wajui Zerikoi í wa si itĩi idoi Zuudɛ̃ɛu do ikpa nunui daakɔ.

Irii inɛ ŋa iyi à jɛ inɛ ngboi ikpɛ̃u ku ce

¹⁶ Aɔ̃ Lafɛ̃ɛ í sɔ̃ Moizi í ni,

¹⁷ irii inɛ ŋa iyi aa ce ikpɛ̃i ilɛu si inɔ nŋɛ wee. Eleazaa woo weeu do Zozue amai Nunu.

¹⁸ Si anyiɛ si dimi fei, aa nya inɛ ngbo akãi iyi aŋaò ŋa aa ce ikpɛ̃i ilɛu.

¹⁹ Irii inɛ ŋau wee. Si dimii Zudaa, Kalɛbu amai Yɛfunei aa nya.

²⁰ Si dimii Simeɔ̃ mɔ, Samuɛli amai Amihudui aa nya.

²¹ Si dimii Bɛnzamɛɛ, Elidadi amai Kisilonii aa nya.

²² Si dimii Dãa mɔ, Buki amai Yogilii aa nya.

²³ Si dimii Manasee amai Zozɛfu mɔ, Haniɛli amai Efodii aa nya.

²⁴ Si dimii Efaraimu, Kemuɛli amai Sifutanii aa nya.

²⁵ Si dimii Zabulɔ̃ɔ mɔ, Elisafãa amai Paanakii aa nya.

²⁶ Si dimii Isakaa mɔ, Palitiɛli amai Azanii aa nya.

²⁷ Si dimii Azɛɛ mɔ, Ahihudu amai Selomii aa nya.

²⁸ Si dimii Nɛfitali mɔ, Pedahɛli amai Amihudui aa nya.

²⁹ Inɛ ŋa iyi Aɔ̃ Lafɛ̃ɛ í cica a ce ikpɛ̃i ilɛi Kanaãu si inɔi inɛi Izirɛli ŋau mbɛ.