Kuka 33 - Bibeli do fee

Ikɔ̃ ikɔ̃i isɛɛnɛ iyi inɛi Izirɛli ŋau à ce

¹ Ikɔ̃ ikɔ̃i isɛɛnɛ iyi inɛi Izirɛli ŋau à ce waati iyi à fita wa hai ilɛi Ezibiti dimiò dimi, Moizi do Arɔ̃ɔi à waa gbã ŋa wa.

² Ŋɔi Moizi í kɔ yaasei isɛɛnɛ nŋau do tengi bii à leekĩ leekĩ fei si bɛi Aɔ̃ Lafɛ̃ɛ í naa woodaɛu. Tengi bii à leekĩ leekĩ si isɛɛnɛ nŋau wee.

³ À nɛi hai ilui Ramusɛsi si ajɔ maatũsiai cukpa sintei adɔ̃u. Iju kumái jingaui Iku ku kuai inɛi Izirɛli ŋau à fita hai Ezibiti do wɔɔkɔ.

⁴ Ŋɔi inɛi Ezibiti ŋau à waa si ama yemma nŋa ŋa iyi Aɔ̃ Lafɛ̃ɛ í kpa feiu, nɔ bɛɛbɛi í nyisiu iyi iwɛ̃ nŋa ŋau a kù nɛ gbugbã.

⁵ Inɛi Izirɛli ŋau à nɛ hai ilui Ramusɛsi nɔ à koo à sɔ ilui Sukɔtu.

⁶ Hai ilui Sukɔtu nɔ à bɔ ilui Etamu kɔkɔi gbaau.

⁷ Hai ilui Etamu nɔ à sinda à nɛ ikpa ilui Pihahirɔti tengii Baali-Sefɔ̃ɔ suusuu, nɔ à ce asɔ nŋa tengii ilui Migidɔli suusuu.

⁸ Iyi à dede hai ilui Pihahirɔti nɔ à too aninii tenkuu à waa nɛ ikpa gbaau, nɔ à ce isɛɛnɛ ajɔ mɛɛta si gbaai Etamuu, nɔ à koo à ce asɔ ilui Mara.

⁹ Hai ilui Mara nɔ à bɔ Elimu bii isɔ̃ maateeji gɔ ŋa à wa do jĩi ndii kpakpa kitaò fɛɛwa, nɔ à ce asɔ tengi bɛ.

¹⁰ Iyi à nɛ hai Elimu nɔ à koo à ce asɔ kɔkɔi Tenkui Njee.

¹¹ Iyi à nɛ hai Tenkui Njee nɔ à koo à ce asɔ si gbaai Sini.

¹² Iyi à nɛ hai gbaai Siniu nɔ à koo à ce asɔ Dɔfuka.

¹³ Hai Dɔfuka nɔ à nɛ Alusi.

¹⁴ Iyi à nɛ hai Alusi nɔ à koo à ce asɔ Refidimu tengi bii zamaau kù ba inyi ku mɔ.

¹⁵ Iyi à nɛ hai Refidimu nɔ à koo à ce asɔ nŋa si gbaai Sinai.

¹⁶ Iyi à nɛ hai gbaai Sinaiu nɔ à koo à ce asɔ Kiboroti-Taava.

¹⁷ Iyi à nɛ hai Kiboroti-Taava nɔ à koo à sɔ Asiterɔti.

¹⁸ Iyi à nɛ hai Asiterɔti nɔ à koo à ce asɔ Ritima.

¹⁹ Iyi à nɛ hai Ritima nɔ à koo à ce asɔ Rimɔɔ-Perɛsi.

²⁰ Iyi à nɛ hai Rimɔɔ-Perɛsi nɔ à koo à ce asɔ Libuna.

²¹ Iyi à nɛ hai Libuna nɔ à koo à ce asɔ Risa.

²² Iyi à nɛ hai Risa nɔ à koo à ce asɔ Kehelata.

²³ Iyi à nɛ hai Kehelata nɔ à koo à ce asɔ si iri kutai Sefɛɛ.

²⁴ Iyi à nɛ hai bi iri kutai Sefɛɛu nɔ à koo à ce asɔ Harada.

²⁵ Iyi à nɛ hai Harada nɔ à koo à ce asɔ Makelɔtu.

²⁶ Iyi à nɛ hai Makelɔtu nɔ à koo à ce asɔ Tahatu.

²⁷ Iyi à nɛ hai Tahatu nɔ à koo à ce asɔ Taraa.

²⁸ Iyi à nɛ hai Taraa nɔ à koo à ce asɔ Mitika.

²⁹ Iyi à nɛ hai Mitika nɔ à koo à ce asɔ Hasimona.

³⁰ Iyi à nɛ hai Hasimona nɔ à koo à ce asɔ Mozerɔtu.

³¹ Iyi à nɛ hai Mozerɔtu nɔ à koo à ce asɔ Beni-Yaakãa.

³² Iyi à nɛ hai Beni-Yaakãa, nɔ à koo à ce asɔ Ɔɔ-Gidigadi.

³³ Hai Ɔɔ-Gidigadi nɔ à koo à ce asɔ Yotibata.

³⁴ Iyi à nɛ hai Yotibata nɔ à koo à ce asɔ Aborona.

³⁵ Iyi à nɛ hai Aborona nɔ à koo à ce asɔ Ɛsiyɔni-Gebɛɛ.

³⁶ Iyi à nɛ hai Ɛsiyɔni-Gebɛɛ, nɔ à koo à ce asɔ Kadɛsi si gbaai Sini.

³⁷ Iyi à nɛ hai Kadɛsi nɔ à koo à ce asɔ iri kutai Ɔɔ kɔkɔi ilɛi Edɔmu.

³⁸ Ŋɔi Arɔ̃ɔ woo weeu í gũ iri kutau si bɛi Aɔ̃ Lafɛ̃ɛ í sɔ̃ɔu, nɔ í ku bɛ si adɔ̃ ciijisiai kufitai inɛi Izirɛli ŋau wa hai ilɛi Ezibiti si cukpa miiusiai adɔ̃u si ajɔ sintei cukpau.

³⁹ Adɔ̃ cifa do mɛɛtai (123) Arɔ̃ɔ í nɛ waati iyi í ku si antaii iri kutai Ɔɔu.

⁴⁰ Ŋɔi ilaalui Aradi inɛi Kanaã iyi í wa do ikpa awɔ cangai kpãai inunuu, í gbɔ kutoi inɛi Izirɛli ŋau wa.

⁴¹ Inɛi Izirɛli ŋau à nɛ hai bi iri kutai Ɔɔu, nɔ à koo à ce asɔ Salumɔna.

⁴² Iyi à nɛ hai bɛ má nɔ à koo à ce asɔ Punɔni.

⁴³ Iyi à nɛ hai Punɔni nɔ à koo à ce asɔ Obɔtu.

⁴⁴ Iyi à nɛ hai Obɔtu nɔ à koo à ce asɔ Ye-Abarimu tengi bii kɔɔi Moabu í wau.

⁴⁵ Iyi à nɛ hai bɛ nɔ à koo à ce asɔ Dibɔ̃ɔ-Gadi.

⁴⁶ Iyi à nɛ hai Dibɔ̃ɔ-Gadi nɔ à koo à ce asɔ Alimoni-Dibulataimu.

⁴⁷ Iyi à nɛ hai bɛ má nɔ à koo à ce asɔ si iri kutai Abarimu ŋa do wajui iri kutai Nebo.

⁴⁸ Iyi à nɛ hai iri kutai Abarimu ŋau nɔ à koo à ce asɔ si lɔɔmai Moabu ŋau kɔkɔi idoi Zuudɛ̃ɛ, do wajui Zeriko.

⁴⁹ À ce asɔi kɔkɔi idoi Zuudɛ̃ɛu, hai Bɛti-Yesimɔti hee ku bɔ Abɛli-Sitimu si lɔɔmai Moabu ŋau.

Wooda iyi Aɔ̃ Lafɛ̃ɛ í jilɛ si idei ilɛu ku kpɛ̃

⁵⁰ Ŋɔi Aɔ̃ Lafɛ̃ɛ í ba Moizi ide ku fɔ si lɔɔmai Moabu ŋau kɔkɔi idoi Zuudɛ̃ɛ do wajui Zerikou í ni,

⁵¹ sɔ̃ inɛi Izirɛli ŋau i ni, bii ì na ì kua idoi Zuudɛ̃ɛu ŋa, nɔ ì lɔ si ilɛi Kanaãu ŋa,

⁵² aa lele inɛi ilɛ ŋau fei ŋai. Aa lɛgɛ iwɛ̃ nŋa ŋa iyi à ce do kuta ku nɛ booda ŋau fei ŋai. Isɔ ŋa iyi à yɔ à ceò mii ŋa iyi à jɔ ŋa ŋau fei aa kɛkɛɛ ŋai, nɔ geete bii à ya cea iwɛ̃ nŋa ŋau kuwee fei, aa lɛgɛɛ ŋai.

⁵³ Aa gba ilɛu ŋai nɔ i buba si ndu ŋɛ, domi ǹ mu nŋɛ ilɛui ku jɛ tu ŋɛ.

⁵⁴ Aa ta kpasai i kpɛ̃ò ilɛu ŋa si bɛi nyaanze nŋɛ ŋau à to. Inɛ ŋa iyi à kpɔ, i na ŋa ku la ŋa, inɛ ŋa mɔ iyi a kù kpɔ, i na ŋa keeke ŋa. Inɛ fei á ba titɛɛi si kpasa iyi aa tau. Aa baa ŋai ku jɛ tu ŋɛ si bɛi dimii baa nŋɛ ŋau í to.

⁵⁵ Amma bii i kù lele inɛi ilɛ ŋau bɛ hai si waju nŋɛ, inɛ ŋa iyi i jɔ̀ ŋa, aŋai aa na a yɛ bɛi agũ ŋa si iju nŋɛ, do bɛi abɛɛ ŋa iyi aa maa gũ ŋɛ si cingaa nŋɛ ŋa, aŋai aa jɛ mbɛɛ nŋɛ ŋa si ilɛ bii aa na i buba ŋau.

⁵⁶ Nɔ bii i kù laakai ŋa an na n ce nŋɛ bɛi ǹ lasabu n ce nŋau.