Kuka 32 - Bibeli do fee

Dimi mɛɛtai í buba do ikpa nunui daakɔi idoi Zuudɛ̃ɛu

¹ Tɔkui Rubɛ̃ɛ ŋau do tɔkui Gadi ŋau à nɛ mɛɛmu gaa ŋai nkpɔ nkpɔ. Ŋɔi à yɔɔ iyi ilɛi Yazɛɛ do ilɛi Galaadi à sĩaò mɛɛmu ŋa ku sɛ̃.

² Nɔ à dede à koo à ba Moizi do Eleazaa woo weeu do inɛ ŋa iyi à jɛ inɛ ngboi zamaau à sɔ̃ ŋa à ni,

³ ilui Atarɔti do Dibɔ̃ɔ do Yazɛɛ do Nimura do Hɛsebɔ̃ɔ do Eleale do Sebamu do Nebo do Beɔ̃ɔ, à wai si

⁴ ilɛ iyi inɛi Izirɛli ŋau à ba do gbugbãi Aɔ̃ Lafɛ̃ɛu. Ilɛu í jɛ inya gɔ iyi á sĩaò mɛɛmu ŋa ku sɛ̃, nɔ wee awa woo ce icɛɛ ŋau à nɛ mɛɛmu gaa ŋa nkpɔ nkpɔ.

⁵ Si anyiɛ nɔ à ni má, bii ì jɛsi ide nwa Moizi, bii ì waa ce ikpɛ̃i ilɛu, na wa ikpa bɛ, maà bɔò wa do ikpa icei idoi Zuudɛ̃ɛu.

⁶ Ŋɔi Moizi í jɛ nŋa í ni, bɛirei. Kpaasi nŋɛ ŋa aa bɔ igũ nɔ iŋɛ i gbe nŋɛ ihɛ̃ sɛ̃ɛ?

⁷ Bɛirei í ce ì waa bi i fɔ inɔi inɛi Izirɛli ŋau si ilɛ iyi Aɔ̃ Lafɛ̃ɛ í mu nŋau ku lɔ ŋa.

⁸ Kurara bɛɛbɛi baa nŋɛ ŋau mɔ à tako à ce má wo waati iyi ǹ bɛ ŋa hai Kadɛsi-Baanea ku ba a koo a cɔ yaasei ilɛi Kanaãu wa.

⁹ À lɔ à bɔ hee lɔɔmai Ɛsekɔlu, nɔ waati iyi à koo à cɔ yaasei ilɛu à tã, iyi à baa à fɔ inɔi inɛi Izirɛli kpaasi nŋa ŋau à jɔ̀ à kɔ̀ ku koo si ilɛ iyi Aɔ̃ Lafɛ̃ɛ í mu nŋau.

¹⁰ Ajɔ nŋu bɛ, idɔɔkɔ̃i Aɔ̃ Lafɛ̃ɛ í dede nɔ í fɔ do kugbasi í ni,

¹¹ baa inɛ akãi inɛ ŋa iyi à fita wa hai ilɛi Ezibiti iyi à nɛ adɔ̃ kɔnfia hee do kɔnfia do ku lesiu fei a kaa yɛ ilɛ iyi ǹ wãò Aburahamu do Izaaki do Zakɔbuu má, domi a kù jirimam dee dee.

¹² Kalɛbu amai Yɛfune iyi í wa si nyaanzei Kenaziu do Zozue amai Nunu, aŋa akãi aa lɔ si ilɛu, domi aŋai à jirima idei Aɔ̃ Lafɛ̃ɛu dee dee.

¹³ Idɔɔkɔ̃i Aɔ̃ Lafɛ̃ɛ í dede si inɛi Izirɛli ŋau nɔ í jɔ̀ à dabii si gbaau adɔ̃ ciiji hee inɛ ŋa iyi à ce laalɔ ŋau fei à kpa iri bɛ.

¹⁴ Wee nsɛi iŋɛ ilu dulum ŋau ì waa bi i too tuubai baa nŋɛ ŋau nɔ i dede idɔɔkɔ̃i Aɔ̃ Lafɛ̃ɛ si inɛi Izirɛli ŋau i kɔ̃ɔsi má ŋa.

¹⁵ Iŋɛ inɛi Rubɛ̃ɛ ŋa do inɛi Gadi ŋa bii ì sinda i tooa Aɔ̃ Lafɛ̃ɛ anyi ŋa, á nyi ku kɔ̃ɔsi kukpɔi ajɔi inɛi Izirɛli ŋau si gbaau má, nɔ iŋɛi aa naa inɛi Izirɛli ŋau nfe ku ce wa.

¹⁶ Ŋɔi inɛ ŋau à nyi wa bi Moizi má, nɔ à sɔ̃ɔ à ni, aawo. Aa ka ma aroi mɛɛmu nwa ŋa ihɛ̃, nɔ ka maa tɔku nwa ŋa ilu ŋa.

¹⁷ Si anyiɛ nɔ ka ce sɔɔlu gbãa gbãa do jĩnɛi igũ ŋa, nɔ ka lɔ wajui inɛi Izirɛli kpaasi nwa ŋau ka bɔò ŋa si ilɛ iyi à na ŋa si ikpɛ̃u, nɔ tɔku nwa ŋau aa maa wa si ilu ku nɛ bindi ku nɛ gbugbã ŋau ku ba a wɛɛò laakai ku sũ na inɛi ilɛ ŋau.

¹⁸ A kaa ka sinda ka nyi wa ide nwa ŋa má, í gbe bii inɛi Izirɛli fei í buba si ilɛɛ iyi í ba si ikpɛ̃u,

¹⁹ nɔ a kù waa lasabu ka nɛ ikpɛ̃ si nkãma do aŋa do ikpa icei idoi Zuudɛ̃ɛu má hee má jɛ do wajuɛ, domi aa ka ba ikpɛ̃ nwa ihɛ̃ do ikpa nunui daakɔi idoi Zuudɛ̃ɛu.

²⁰ Ŋɔi Moizi í sɔ̃ ŋa í ni, bii ì ce bɛɛbɛ ŋa, bii ì ce sɔɔlu ì koo ì ce igũ bɛi Aɔ̃ Lafɛ̃ɛ í sɔ̃ ŋɛ,

²¹ bii iŋɛ iyi ì ce sɔɔlui igũu fei ì kua idoi Zuudɛ̃ɛu si wajui Aɔ̃ Lafɛ̃ɛ, hee koo leleò mbɛɛɛ ŋa fei,

²² bii ì sinda ì baa nŋɛ wa waati iyi inɛi ilɛ ŋau a sũa Aɔ̃ Lafɛ̃ɛ iri ilɛ, waati bɛɛbɛ aa jɛ inɛ ŋa iyi a kù nɛ taale kãma bi Aɔ̃ Lafɛ̃ɛ do bi inɛi Izirɛli ŋa nɔ Aɔ̃ Lafɛ̃ɛ á mu nŋɛ ilɛu ihɛ̃.

²³ Amma bii i kù ce bɛɛbɛ ŋa ì ce dulum ŋai bi Aɔ̃ Lafɛ̃ɛ, nɔ i mà ŋa iyi aa yɛ ijuukpãi dulum du ŋɛ.

²⁴ I maa tɔku nŋɛ ŋau ilu ŋa do aroi mɛɛmu nŋɛ ŋau nɔ i ce bɛi gɛlɛ nŋɛ í fɔ.

²⁵ Ŋɔi inɛi Rubɛ̃ɛ do inɛi Gadi ŋau à jɛa Moizi à ni, aa ka ce bɛi ì sɔ̃ wau fei lafɛ̃ɛ nwa.

²⁶ Aa ka jɔ̀ tɔku nwa ŋai do abo nwa ŋa do mɛɛmu nwa ŋa fei si ilui Galaadi ŋa ihɛ̃,

²⁷ nɔ ka kɔtɔ jĩnɛi igũ ŋa ka bɔ igũu ku ce si woodai Aɔ̃ Lafɛ̃ɛ bɛi ì sɔ̃ wau.

²⁸ Ŋɔi Moizi í na Eleazaa woo weeu wooda ŋa na iri nŋa do Zozue amai Nunu, nɔ í na inɛ ngboi kpasɛ̃ ŋau mɔ si dimi ikã ikãi inɛi Izirɛli ŋau fei.

²⁹ Ide iyi í sɔ̃ ŋa wee. Bii inɛi Gadi ŋau do inɛi Rubɛ̃ɛ ŋau à kua idoi Zuudɛ̃ɛu iŋɛò ŋa ajɔ, bii aŋa fei à wɛɛò sɔɔlui igũ bɛi Aɔ̃ Lafɛ̃ɛ í fɔu, bii ì jɛ inɛi ilɛ ŋau igũ ŋa, i mu nŋa ilɛi Galaadiu ku jɛ tu ŋa.

³⁰ Amma bii a kù bɔ ku ba ŋɛ igũu ku ce, iŋɛò ŋa fei ilɛi Kanaã bɛi aa wa ŋa.

³¹ Inɛi Gadi do inɛi Rubɛ̃ɛ ŋau à jɛa Moizi à ni, awa woo ce icɛɛ ŋa, aa ka ce bɛi Aɔ̃ Lafɛ̃ɛ í fɔ fei.

³² Aa ka kɔtɔ jĩnɛi igũ nwa ŋa nɔ ka lɔ si ilɛi Kanaãu si bɛi Aɔ̃ Lafɛ̃ɛ í fɔ ku ba awa mɔ ka ba ikpɛ̃ nwa do icei idoi Zuudɛ̃ɛu ihɛ̃.

³³ Moizi í na dimii Gadi do dimii Rubɛ̃ɛ, do dimii Manasee iyi í jɛ bubui dimii Zozɛfuu bommai Sioni ilaalui inɛi Amɔre ŋau do bommai Ɔgu ilaalui Basãa do ilu nŋa ŋa do ilɛ ŋa iyi à wa amɛɛ bɛ fei.

³⁴ Inɛi Gadi ŋau à teese à ma ilui Dibɔ̃ɔ do Atarɔti do Aroɛɛ

³⁵ do Atorɔtu-Sofã do Yazɛɛ do Yogboha

³⁶ do Bɛti-Nimura do Bɛti-Harãa ilu ku nɛ bindi ku nɛ gbugbã ŋau. Bɛi à ma aroi mɛɛmu nŋa ŋau.

³⁷ Inɛi Rubɛ̃ɛ ŋau mɔ à teese à ma ilui Hɛsebɔ̃ɔ do Eleale do Kiriataimu,

³⁸ do Nebo do Baali-Meɔ̃ɔ iyi à kpaasi iri nŋa ŋau, do Sibuma, nɔ à sɔ ilu gɔ ŋa iyi à teese à ma ŋau iri.

³⁹ Makii amai Manaseeu, tɔkuɛ ŋai à koo si inɛi ilɛi Galaadi ŋa, nɔ à jɛ ŋa igũ, nɔ à lele inɛi Amɔre ŋa iyi à wa bɛu.

⁴⁰ Ŋɔi Moizi í na ŋa ilɛu à buba si.

⁴¹ Yaii tɔkui Manasee gɔ, í koo í gba ilɛɛkoi Amɔre ŋa nɔ í sɔ ilɛɛko ŋau Yaii.

⁴² Noba mɔ í koo í gba Kenati do ilu ŋa iyi à wa amɛɛ bɛ fei nɔ í sɔ ŋa Noba bɛi à ya kpe nŋu takaɛ.