Kuka 31 - Bibeli do fee

Igũi inɛi Izirɛli ŋa do inɛi Madiãa ŋa

¹ Aɔ̃ Lafɛ̃ɛ í sɔ̃ Moizi í ni,

² koo kpã inɛi Madiãa ŋau iju na laalɔ iyi à cea inɛi Izirɛli ŋau, si anyiɛ aa jɔ̀ andunyai.

³ Ŋɔi Moizi í sɔ̃ inɛ ŋau í ni, hai si inɔ nŋɛ, i jɔ̀ inɛ gɔ ŋa a kɔtɔ jĩnɛi igũ nŋa ŋa nɔ a koo si inɛi Madiãa ŋau a kpã ŋa iju bɛi Aɔ̃ Lafɛ̃ɛ í fɔu.

⁴ Si igũu, dimi Izirɛli fei amanɛ dubui á na.

⁵ Nɔ si zamaa nla nlai Izirɛliu, si dimi fei à nya amanɛ dubu, ŋɔi í koo í dede amanɛ dubu maateeji, aŋa fei do jĩnɛi igũ nŋa ŋa.

⁶ Nɔ Moizi í jɔ̀ aŋa fei à bɔ igũu do Fineɛzi woo wee amai Eleazaau. Nŋui wa so jĩnɛi ile kumá ŋau, do kãakãakĩ iyi aa ya fã si igũu.

⁷ Ŋɔi à waa koo si inɛi Madiãa ŋau si bɛi Aɔ̃ Lafɛ̃ɛ í tako í sɔ̃ Moiziu, nɔ à kpa inɛmɔkɔ ŋau fei.

⁸ À kpa ilaalu miiui Madiãa ŋau, iri nŋa wee. Evi do Rekɛmu do Suu do Huu do Reba. À kpa Balamu amai Beɔɔ mɔ, do inɛ ŋa iyi à gbe ŋau fei.

⁹ Ŋɔi inɛi Izirɛli ŋau à mu inaaboi Madiãa ŋau aru do ama nŋa ŋa, nɔ à gba mɛɛmu gaa nŋa ŋa do amani nŋa ŋa fei.

¹⁰ Ŋɔi à jo ilui inɛ ŋau hee do asɔ nŋa ŋau fei,

¹¹ nɔ à nɛò mii ŋa iyi à gbau fei, hee do amanɛ ŋau hee do mɛɛmu ŋa iyi à gbau fei.

¹² Ŋɔi à baaò fei ndɛɛ wa bi asɔ nŋa iyi í wa si lɔɔmai Moabu, kɔkɔi idoi Zuudɛ̃ɛ do wajui Zerikou suusuu, ku ba a koo a nyisi Moizi do Eleazaa woo weeu do zamaai Izirɛliu fei.

¹³ Ŋɔi Moizi do Eleazaa do inɛ ŋa iyi à jɛ inɛ ngbo ŋa si zamaau fei à fita hai asɔu à bɔ ku ko nŋa.

¹⁴ Ŋɔi idɔi Moizi í kɔ̃ si inɛ ŋa iyi à jɛ inɛ ngboi igũu, inɛ ŋa iyi à jɛ inɛ ngbo si amanɛ dubu, do inɛ ŋa iyi à jɛ inɛ ngbo si amanɛ cĩɔ iyi à waa baa hai igũu.

¹⁵ Nɔ í bee ŋa í ni, ì jɔ̀ inaabo ŋau i kù kpa ŋa ŋai?

¹⁶ Ì nɔ ì mà sãa sãa ŋa iyi inaaboi Madiãa ŋau, aŋai à too si idei Balamuu, nɔ à fa inɛi Izirɛli ŋau si laalɔ ku ce bi Aɔ̃ Lafɛ̃ɛ si waatii idei Peɔɔu, nɔ si anyiɛ ijuukpã í naa si inɛi Aɔ̃ Lafɛ̃ɛ ŋau.

¹⁷ Na nŋu, nsɛi i kpa ama inɛmɔkɔ ŋau fei, do inaabo ŋa iyi à mà mɔkɔ ŋau.

¹⁸ Amma inaabo ŋa iyi a kù mà mɔkɔ ŋau fei aa yɔkɔ i jɔ̀ ndu ŋɛ ŋa.

¹⁹ Iŋɛ fei aa gbe ŋai do anyii asɔu ajɔ mɛɛje. Si inɔ nŋɛ inɛ iyi í kpa inɛ gɔ fei, walakɔ inɛ iyi í lu ikui inɛ gɔ fei, si ajɔ mɛɛtasia do si ajɔ mɛɛjesia í nɛ ku ce bukii ara kumaajui. Woodau bɛ hee do ti aru ŋa iyi ì mu wa ŋaui.

²⁰ Hai jĩnɛ nŋɛ ŋa hee do jĩnɛi bata ŋa iyi ì nɛ ŋa fei, do jĩnɛ ŋa iyi à ce do ntoi iwo ŋa do iyi à ce do jĩi ŋa fei, aa jɔ̀ a maaju ŋai.

²¹ Ŋɔi Eleazaa woo weeu í sɔ̃ inɛ ŋa iyi à bɔ igũu í ni, wooda iyi Aɔ̃ Lafɛ̃ɛ í na Moiziu wee.

²² Mii ŋa iyi à ce do wura do isɔ fũfũ do isɔ nkpa do isɔ fũfũ ku rɔ gɔ do lolo,

²³ jĩnɛ ŋa iyi a kaa jo aa dasi ŋa inai, si anyiɛ nɔ i nya ŋa i dasi ŋa si inyi ku ba a maaju. Jĩnɛ iyi à jo, i sɔsi inɛ nŋu ŋa si inyi iyi à nya ikã ku ba a maaju.

²⁴ Bii ì fɔ ibɔ nŋɛ ŋa si ajɔ mɛɛjesiau, aa maaju ŋa, nɔ aa yɔkɔ i nyi wa asɔu ŋa.

Ikpɛ̃i mii ŋa iyi à ba wa hai si igũu

²⁵ Aɔ̃ Lafɛ̃ɛ í sɔ̃ Moizi í ni,

²⁶ awɔ do Eleazaa woo weeu do sobii inɛ ŋa iyi à jɛ inɛ ngboi zamaau, i ce doai mii ŋa iyi à gba wa ŋau fei, hai amanɛ hee do mɛɛmu ŋa fei.

²⁷ Si anyiɛ nɔ i ce ikpɛ̃u ikɔ minji, fei ndɛɛ ku maa munga. Ikɔ akã ti inɛ ŋa iyi à bɔ igũui á jɛ, ikɔ akã mɔ ti zamaa iyi í gbeu.

²⁸ Si ikpɛ̃ iyi í jɛ ti inɛ ŋa iyi à bɔ igũu bɛ, si bɛi aa nya iyi á jɛ ti amu Aɔ̃ Lafɛ̃ɛ. Si cĩɔ miiu fei akãi aa nya hai si amanɛ ŋa iyi à mu wau, do kɛtɛ ŋa hee do gbankɛlɛ ŋa do angudã ŋa do iwo ŋa fei.

²⁹ Nɔ iyi ì nyau, Eleazaa woo weeui aa na ku ba ku jɛ titom.

³⁰ Nɔ si fiti bubu iyi í jɛ ti inɛi Izirɛli ŋau, si ciitaa fei aa nya akãi hai si amanɛ ŋa iyi à mu wau, do si kɛtɛ ŋa do gbankɛlɛ ŋa do angudã ŋa do iwo ŋa si mɛɛmu ŋau fei, nɔ i na inɛi Levii ŋa iyi à waa ce icɛ ile bi kukou.

³¹ Ŋɔi Moizi do Eleazaa woo weeu à ce bɛi Aɔ̃ Lafɛ̃ɛ í tako í sɔ̃ Moizi takaɛu.

³² Mii ŋa iyi woo ce igũ ŋau à gba wa, iyi í gbe í wɛɛi dubu cĩɔ mɛɛfa do kitaò fɛɛwa do miiu (675.000) si angudã ŋa do iwo ŋa.

³³ Kɛtɛ dubu kitaò fɛɛwa do minjii (72.000),

³⁴ gbankɛlɛ dubu kita do akã (61.000),

³⁵ do inaabo dubu kuntaa do minji (32.000) iyi kù mà mɔkɔ.

³⁶ Ikpɛ̃ iyi í jɛ ti inɛ ŋa iyi à bɔ igũu, angudã ŋa do iwo ŋa iyi à bau í wɛɛi dubu cĩɔ mɛɛta do kuntaa do mɛɛje do cĩɔ miiu (337.500).

³⁷ Si inɔɛ bɛi à nya cĩɔ mɛɛfa do kitaò fɛɛwa do miiu (675) iyi í jɛ ti Aɔ̃ Lafɛ̃ɛ.

³⁸ Si kɛtɛ dubu kuntaa do mɛɛfa (36.000), bɛi à nya kitaò fɛɛwa do minji (72) iyi í jɛ ti Aɔ̃ Lafɛ̃ɛ,

³⁹ si gbankɛlɛ dubu kuntaa do cĩɔ miiu (30.500), bɛi à nya kita do akã (61) iyi í jɛ ti Aɔ̃ Lafɛ̃ɛ,

⁴⁰ si amanɛ dubu maatũ do akã (16.000), bɛi à nya amanɛ kuntaa do minji (32) iyi í jɛ ti Aɔ̃ Lafɛ̃ɛ.

⁴¹ Moizi í nya amua ŋa iyi à jɛ ti Aɔ̃ Lafɛ̃ɛu í na Eleazaa woo weeu bɛi Aɔ̃ Lafɛ̃ɛ takaɛ í tako í sɔ̃ɔu.

⁴² Ikpɛ̃ iyi í jɛ ti inɛi Izirɛli ŋa iyi Moizi í nya ikã do ti inɛ ŋa iyi à bɔ igũu,

⁴³ iyi í jɛ ti inɛi Izirɛli ŋa iyi à gbeu, angudã ŋa do iwo ŋau à wɛɛi dubu cĩɔ mɛɛta do kuntaa do mɛɛje do cĩɔ miiu (337.500).

⁴⁴ Si ikpɛ̃u bɛ kɛtɛ dubu kuntaa do mɛɛfai (36.000) í wa si,

⁴⁵ gbankɛlɛ dubu kuntaa do cĩɔ miiu (30.500),

⁴⁶ do amanɛ dubu maatũ do akã (16.000).

⁴⁷ Si fiti bubu iyi í jɛ ti inɛi Izirɛli ŋa iyi à gbe ŋau, si amanɛ ŋau do mɛɛmu ŋau fei, si ciitaa fei Moizi í ya nya akãi ku na inɛi Levii ŋa iyi à waa ce icɛ ile bi kukou, si bɛi Aɔ̃ Lafɛ̃ɛ í tako í sɔ̃ɔu.

Amuai idɔɔbi iyi à cea Aɔ̃ Lafɛ̃ɛ

⁴⁸ Inɛ ŋa iyi à jɛ inɛ ngboi sooge dubu ŋau do inɛ ngboi sooge cĩɔ ŋau à naa bi Moizi,

⁴⁹ nɔ à sɔ̃ɔ à ni, awa woo ce icɛɛ ŋau à ce doai sooge ŋa iyi à jilɛ nwa ka jɛ inɛ ngbo nŋa ŋau, nɔ baa inɛ akã kù gaizia.

⁵⁰ Na ŋɔi í jɔ̀ à waa naa Aɔ̃ Lafɛ̃ɛ amua ŋa wa. Awa fei à waa naaò amuai wura ŋa iyi à ba wau. Hai saba do lɛlɛawɔ do isɔi awɔ ŋa do hanlaga ŋa ku ba do yaase bɛɛbɛ Aɔ̃ Lafɛ̃ɛ ku ce nwa suurui dulum du wa ŋa.

⁵¹ Moizi do Eleazaa woo weeu à gba mii ŋa iyi à ce do wura ŋa iyi inɛ ŋau à naaò wa fei.

⁵² Mii ŋa iyi inɛ ngboi sooge ŋau à naa Aɔ̃ Lafɛ̃ɛ wau fei sãa sãa, kuwoɛ í to kiloo cijɔò fɛɛwa (170).

⁵³ Sooge wɛwɛɛ iyi à gbe ŋau, inɛ fei í mu mii iyi í ba wai.

⁵⁴ Moizi do Eleazaa woo weeu à kooò amuai wura ŋa iyi inɛ ngboi sooge ŋau à naaò wau à koo à jilɔɔ inɔi ile bi kukou ku ba Aɔ̃ Lafɛ̃ɛ ku maà gbɛjɛ inɛi Izirɛli ŋau.