Kuka 30 - Bibeli do fee

¹ Nɔ Moizi í sisia inɛi Izirɛli ŋau wooda ŋa iyi Aɔ̃ Lafɛ̃ɛ í naau fei.

Woodai kuwã ŋa

² Si anyiɛ nɔ Moizi í sisia inɛ ngboi dimii Izirɛli ŋau wooda mmuɛ ŋa iyi Aɔ̃ Lafɛ̃ɛ í naa má.

³ Bii inɛ gɔ í cea Aɔ̃ Lafɛ̃ɛ kuwã, walakɔ bii í fɔ ide gɔ do kugbasi, kù sĩa ku jɔ̀ ideu ku haata, amma í nɛ ku jɔ̀ ideu ku kɔ̃i dee dee si bɛi nŋu takaɛ í ce kuwãu.

⁴ Bii í jɛ ama mudɛ̃ɛ gɔ iyi í wa idei baaɛ, í cea Aɔ̃ Lafɛ̃ɛ kuwã, walakɔ bii í fɔ ide gɔ do kugbasi,

⁵ bii baaɛu í na í gbɔ nɔ kù dɔ̃a ide kãma, í nɛ ku teese ku mu kuwã iyi í ceui.

⁶ Bii í nɔ í jɛ ajɔ iyi baaɛu í gbɔ ideu gbakã kù jɛsii, kù nɛ ku teese ku mu kuwãɛu má. Nɔ Aɔ̃ Lafɛ̃ɛ á ceaa suuru, domi baaɛi í ganjiɛ ku kɔ̃ kuwãɛu.

⁷ Bii í nɔ í jɛ mudɛ̃ɛ gɔ í cea Aɔ̃ Lafɛ̃ɛ kuwã walakɔ kugbasi nɔ kù ce si lasabu jiida, si anyiɛ bii à gbaa abɔdɔ̃,

⁸ bii mɔkɔɛu kù niaa ide gɔ ajɔ iyi í gbɔ ideu, í nɛ ku teese ku mu kuwã iyi í ceui.

⁹ Bii í nɔ í jɛ ajɔ iyi mɔkɔɛu í gbɔ ideu gbakã kù jɛsii, kù nɛ ku teese ku mu kuwã iyi í ceu má. Nɔ Aɔ̃ Lafɛ̃ɛ á ceaa suuru.

¹⁰ Bii í jɛ inaabo jaaɔ̃ gɔ walakɔ inaabo gɔ iyi aŋaò mɔkɔɛ a kù waa njɛ má í ce kuwã, walakɔ bii í fɔ ide gɔ do kugbasi, í nɛ ku mu kuwã iyi í ceui.

¹¹ Bii í jɛ inaabo à so mɔkɔ gɔ í ce kuwã, walakɔ í fɔ ide gɔ do kugbasi,

¹² bii mɔkɔɛ í gbɔ nɔ kù niaa ide kãma, í nɛ ku teese ku mu kuwãɛ iyi í ceui.

¹³ Bii í nɔ í jɛ ajɔ iyi mɔkɔɛu í gbɔ ideu gbakã kù jɛsii, kù nɛ ku teese ku mu kuwãɛ ŋau má, Aɔ̃ Lafɛ̃ɛ á nɔ ku ceaa suuru, domi mɔkɔɛi kù jɛaa si kuwãɛ ŋa iyi í ceu.

¹⁴ Na nŋu, bii inaabo gɔ í ce kuwã walakɔ bii í fɔ do kugbasi nŋu ku mu arai nŋu si ngɔgɔ ku ce, mɔkɔɛ á yɔkɔ ku jɛsi walakɔ mɔ ku ganji kuwãu.

¹⁵ Bii í nɔ í jɛ mɔkɔu í na í gbɔ ideu nɔ kù nia abou ide kãma, hee iju í koo í má, í yɛ bɛi í jɛsi kuwã iyi abou í ce mbɛ si kucokoɛu bɛ.

¹⁶ Amma do ankãanyi bii í na í jilɔɔ si nŋu ku ganjiɛ, nŋu takaɛi á baa ku jɛ ilu taale si kuwã iyi aboɛu í fũsi awɔu.

¹⁷ Wooda ŋa iyi Aɔ̃ Lafɛ̃ɛ í na Moizi mbɛ si idei kuwã ŋa iyi inaabo à so mɔkɔ, walakɔ mudɛ̃ɛ gɔ iyi í wa idei baaɛ í ce.