Kuka 3 - Bibeli do fee

Icɛi dimii Levii ŋa

¹ Inɛ ŋa iyi à jɛ nyaanzei Moizi do Arɔ̃ɔ wee si waati iyi Aɔ̃ Lafɛ̃ɛ í ba Moizi ide ku fɔ si antaii iri kutai Sinaiu.

² Irii amai Arɔ̃ɔ ŋa wee. Yemmaui à ya kpe Nadabu, inɛ ŋa iyi à gbe ŋau mɔ, Abihu, Eleazaa do Itamaa.

³ Inɛ mɛɛ ŋau bɛ fei, à tontoo nŋa ikpo si iri nŋa ŋai a jɛ woo wee ŋa, nɔ à lɔsi icɛu ku ce.

⁴ Amma Nadabu do Abihu à ku si wajui Aɔ̃ Lafɛ̃ɛ waati iyi à so ina mmuɛ gɔ à kooò ile bi kukou si wajui Aɔ̃ Lafɛ̃ɛ si gbaai Sinaiu. Inɛ nŋu ŋau a kù nɛ ama inɛmɔkɔ kãma. Eleazaa do Itamaai à ya maa ce icɛi kuweeu bɛbɛi nɔ Arɔ̃ɔ baa nŋaui í jɛ inɛ ngbo nŋa.

⁵ Aɔ̃ Lafɛ̃ɛ í sɔ̃ Moizi í ni,

⁶ jɔ̀ inɛi dimii Levii ŋa a tɛkɛɛ wa, nɔ i so ŋa i daa Arɔ̃ɔ woo weeu si awɔ ku ba a sobiɛ si icɛɛ.

⁷ Aŋai aa ya maa sobi Arɔ̃ɔ si icɛu, nɔ aŋai aa ya maa cea inɛi Izirɛli ŋau fei icɛ si wajui ile bi kukou, nɔ aŋai aa ya ce icɛ si inɔi ile bi kukou má.

⁸ Aŋai aa ya maa ce wũai jĩnɛi ile bi kukou fei. Aŋai aa ya maa ce icɛi ile bi kukou na irii inɛi Izirɛli ŋa.

⁹ Do yaase bɛɛbɛi aa so inɛi Levii ŋau i daa Arɔ̃ɔ do amaɛ ŋa si awɔ. Aa so ŋai hai si inɔi inɛi Izirɛli ŋau i daa Arɔ̃ɔ si awɔ.

¹⁰ Aa jilɛ Arɔ̃ɔ do amaɛ ŋai a maa ce icɛi kuwee ŋau. Inɛ iyi kù jɛ woo wee, bii í koo bɛ aa kpaai.

¹¹ Si anyiɛ Aɔ̃ Lafɛ̃ɛ í sɔ̃ Moizi má í ni,

¹² wee hai si inɔi inɛi Izirɛli ŋau ǹ cica inɛi Levii ŋa a jɛ nsũi ama yemma ŋau fei, nɔ inɛi Levii ŋau à baa à jɛ titom,

¹³ domi ama yemmai inɛi Izirɛli ŋa fei titom ŋai. Ajɔ iyi ǹ kpa ama yemmai inɛi Ezibiti ŋau fei, ǹ jɔ̀a aram ama yemmai Izirɛli ŋau fei, hai amai amanɛ ŋa hee ku koo do ti mɛɛmu ŋa fei, aŋa fei titom ŋai à jɛ. Amui ǹ jɛ Aɔ̃ Lafɛ̃ɛ.

Kuka sintei dimii Levii ŋa

¹⁴ Aɔ̃ Lafɛ̃ɛ í sɔ̃ Moizi si gbaai Sinaiu í ni,

¹⁵ ce kukai amai Levii ŋau si nyaanze do nyaanze ikã ikã, do si kpasɛ̃i baa nŋa ŋa ikã ikã. Aa ka inɛmɔkɔ ŋaui akã akã inɛ fei do iriɛ, hai inɛ ŋa iyi à nɛ cukpa akã hee ku koo bɛbɛi.

¹⁶ Nɔ Moizi í ce kukau si bɛi Aɔ̃ Lafɛ̃ɛ í sɔ̃ɔu dee dee.

¹⁷ Amai Levii ŋa wee do iri nŋa ŋa. Gɛɛsɔ̃ɔ, Kehati do Merari.

¹⁸ Irii amai Gɛɛsɔ̃ɔ ŋa mɔ wee si nyaanze nŋa. Libuni do Simei.

¹⁹ Irii amai Kehati ŋa mɔ wee si nyaanze nŋa ŋa. Amuramu, Yisehaa, Eborɔ̃ɔ do Uziɛli.

²⁰ Irii amai Merari ŋa mɔ wee si nyaanze nŋa ŋa. Mali do Musi. Nyaanzei Levii ŋa mbɛ aŋa fei do kpasɛ̃i baa nŋa ŋa.

²¹ Hai bi Gɛɛsɔ̃ɔi nyaanzei Libuni í fita do nyaanzei Simei, aŋai à tɔtɔɔ à jɛ nyaanzei Gɛɛsɔ̃ɔ ŋa.

²² Si kukau, inɛ ŋa iyi à ka hai cukpa akã hee ku mɔsi ku koo, à wɛɛi aŋa dubu mɛɛje do cĩɔ miiu (7.500).

²³ Nyaanzei inɛi Gɛɛsɔ̃ɔ ŋa à ya ce asɔ nŋai do anyii ile bi kukou do ikpa nunui alɛ.

²⁴ Inɛ ngboi nyaanzei inɛi Gɛɛsɔ̃ɔ ŋai í jɛ Eliasafu amai Laɛli.

²⁵ Iyi í jɛ ti ile bi kukou nyaanzei Gɛɛsɔ̃ɔ ŋai à daa si awɔ. Ilei acɔu, do acɔ ŋa iyi à biiò antaiɛu, do acɔ iyi í wa anu bi ku lɔi ile bi kukou,

²⁶ do acɔi dangai bantumai ile bi kukou, do acɔ iyi í wa anu bi ku lɔi bantuma iyi í kaako ileu do bi kuweeu, do ikũɛ ŋa do jĩnɛɛ ŋau fei.

²⁷ Hai bi Kehatii nyaanzei Amuramu ŋa í fita, do nyaanzei Yisehaa, do nyaanzei Eborɔ̃ɔ ŋa, do nyaanzei Uziɛli ŋa. Aŋai à tɔtɔɔ à jɛ nyaanzei inɛi Kehati ŋau.

²⁸ Si kukau, inɛmɔkɔ ŋa iyi à ka hai cukpa akã hee ku mɔsi ku koo, à wɛɛi aŋa dubu mɛɛjɔ do cĩɔ mɛɛfa (8.600), aŋa iyi à jɛ woo ce icɛi ile bi kukou.

²⁹ Inɛi nyaanzei Kehati ŋau à ya ce asɔ nŋai do ikpa awɔ cangai kpãai inunu si tengi bii ile bi kukou í wa.

³⁰ Elisafãa amai Uziɛlii í jɛ inɛ ngboi nyaanzei Kehati ŋa.

³¹ Aŋa mɔi à daa kpakoi akabuu si awɔ, do taabuu, do bi ku lesi fitilau, do bi kuwee ŋau do jĩnɛ ŋa iyi à jɛ ti ile bi kukou, iyi à ya ceò icɛ ŋau do acɔ iyi í ya fɛɛfɛ ile iyi í re do kumáu do ile kumáu do mii iyi í wa bɛ fei.

³² Eleazaa amai Arɔ̃ɔ woo weeui í jɛ inɛ ngbo iyi í wa antaii inɛ ŋa iyi à jɛ inɛ ngboi inɛi Levii ŋau fei. Nŋui í ya maa cɔ inɛ ŋa iyi à da nŋa icɛi ile bi kukou si awɔ.

³³ Hai bi Merarii nyaanzei Mali í fita do nyaanzei Musi, aŋa mɔi à tɔtɔɔ à jɛ nyaanzei Merari ŋa.

³⁴ Si kukau, inɛmɔkɔ ŋa iyi à ka hai cukpa akã hee ku mɔsi ku koo, à wɛɛi aŋa dubu mɛɛfa do cĩɔ minji (6.200).

³⁵ Suriɛli amai Abihaili í jɛ inɛ ngboi nyaanzei Merari ŋa. Aŋa mɔ à bubai do ikpa awɔ njɛi kpãai inunu tengi bii ile bi kukou í wa.

³⁶ Icɛ iyi à dasi dimii Merari ŋau mɔi í jɛ a maa ce wũai kpatakui ile bi kukou, do gadagaauɛ ŋa, do sɔbeɛ ŋa, do bi ku lesi sɔbeɛ ŋa, do jĩnɛɛ ŋa, hee do iyi í gbe fei.

³⁷ Aŋai à nyi à nɛ a maa ce wũai icɛi sɔbei dangai bantumau má, do bi ku lesi sɔbeɛ ŋa, do kɛkɛɛ ŋau do ikũ nŋa ŋa.

³⁸ Moizi do Arɔ̃ɔ do amaɛ ŋa à ya ce asɔ nŋai do wajui ileu do ikpa nunui daakɔ, do wajui ile bi kukou, hai do bi kulai inunu wa. Aŋai à nɛ a maa ce wũai ile bi kukou na irii inɛi Izirɛli ŋau. Bii inɛ mmu gɔ iyi kù jɛ woo wee í maai wa bi ile bi kukou, aa kpa lafɛ̃ɛi.

³⁹ Jiai inɛmɔkɔi Levii ŋau fei sãa sãa hai inɛ ŋa iyi à nɛ cukpa akã hee ku mɔsi ku koo, í wɛɛi amanɛ dubu kɔnfia do minji (22.000). Kukau Moizi do Arɔ̃ɔi à coo si bɛi Aɔ̃ Lafɛ̃ɛ í na ŋa woodau. À cooi si nyaanze do nyaanze ikã ikã.

Ama yemma ŋa ku ya

⁴⁰ Aɔ̃ Lafɛ̃ɛ í sɔ̃ Moizi í ni, ka ama yemma inɛmɔkɔi inɛi Izirɛli ŋau fei. Aa ka ŋai hai cukpa akã hee ku mɔsi ku koo bɛ. Aa ka ŋai inɛ fei do iriɛ.

⁴¹ Soom inɛi Levii ŋau a jɛ nsũi ama yemmai inɛi Izirɛli ŋau fei, nɔ mɛɛmui inɛi Levii ŋau fei a jɛ nsũi mɛɛmu sintei inɛi Izirɛli ŋau.

⁴² Ŋɔi Moizi í ka ama yemma inɛmɔkɔi inɛi Izirɛli ŋau fei si bɛi Aɔ̃ Lafɛ̃ɛ í sɔ̃ɔu.

⁴³ Ama yemma inɛmɔkɔ ŋa iyi à ka do iri nŋa ŋa iyi à nɛ hai cukpa akã hee do ku lesiu à wɛɛi aŋa dubu kɔnfia do minji do cĩɔ minji do kitaò fɛɛwa do mɛɛta (22.273).

⁴⁴ Aɔ̃ Lafɛ̃ɛ í sɔ̃ Moizi má í ni,

⁴⁵ nya inɛi Levii ŋau ikã a jɛ titom. Aŋai aa jɛ nsũi ama yemmai inɛi Izirɛli ŋau fei, nɔ mɛɛmu nŋa ŋa mɔi aa jɛ nsũi mɛɛmu sintei inɛi Izirɛli ŋau. Amui ǹ jɛ Aɔ̃ Lafɛ̃ɛ.

⁴⁶ Do nŋu fei ama yemmai inɛi Izirɛli ŋa iyi à gbe à wɛɛi aŋa cĩɔ minji do kitaò fɛɛwa do mɛɛta (273), domi à kpɔ à re inɛi Levii ŋaui.

⁴⁷ Inɛ akã nŋa fei í nɛ jiai fia iyi aa daai. Inɛ akã fei fia iyi à ya kpe sikilii miiui aa daa, si bɛi à ya wã fiai ile kumáu. Sikiliiu, fia iyi à ya kpe gɛra ara kɔnfiai.

⁴⁸ Fia nŋu bɛi aa na Arɔ̃ɔ do amaɛ ŋa. Do yaase bɛɛbɛi aa yaò ama yemmai inɛi Izirɛli ŋa iyi à kpɔ à reu.

⁴⁹ Ŋɔi Moizi í gba fia iyi aa yaò inɛ ŋa iyi a kù ba inɛi Levii ŋa iyi aa sãsi agbɛ nŋau.

⁵⁰ Fia iyi í gba hai bi ama yemmai inɛi Izirɛli ŋau í koo í dedei sikilii dubu do cĩɔ mɛɛta do kita do miiu (1.365), si bɛi à ya wã fiai ile kumáu,

⁵¹ nɔ í so í na Arɔ̃ɔ do amaɛ ŋa dee dee si bɛi Aɔ̃ Lafɛ̃ɛ í sɔ̃ɔu.