Kuka 29 - Bibeli do fee

Iyi í jɛ ti ajɔi kudakpɛ

¹ Ajɔ sintei cukpa mɛɛjesiau aa tɔtɔɔ njɛ i tɔɔ amu Aɔ̃ Lafɛ̃ɛ ŋai. Ajɔ nŋu bɛ i maà ce icɛ kãma ŋa, domi ajɔi kudakpɛ do inɔ didɔ̃i.

² Nɔ i cea amu Aɔ̃ Lafɛ̃ɛ kuwee iyi à ya jo si ina fei sãa sãa iyi inunuɛ á dɔ̃ɔm si do kɛtɛ kombo akã do angudã kombo akã do ama angudãi adɔ̃ akã ara mɛɛje, nɔ kãma nŋa ku maà nɛ leebu gɔ.

³ Aa ce kuweei mɛɛmu akã feii do kuweei iyafũ iyi à taki do ikpo. Ti kɛtɛ kombou iyafũ kiloo mɛɛsãi, ti angudã kombou mɔ kiloo mɛɛfa,

⁴ ti ama angudã ŋau mɔ, akã fei kiloo mɛɛta.

⁵ Si anyiɛ nɔ i ce kuwee iyi á kpa idei dulum do iwo kombo akã ku ba amu Aɔ̃ Lafɛ̃ɛ n ce nŋɛ suurui dulum du ŋɛ.

⁶ Aa ce kuwee ŋau bɛ ŋai baai kuwee iyi à ya jo si ina fei sãa sãa waati kãma fei do ti ajɔ sintei cukpau do kuweei iyafũ ŋa do amuai vɛ̃ɛ ŋau baasi. Nɔ inunui kuwee ŋa iyi à ya jo si ina á dɔ̃ɔm si.

Iyi í jɛ ti ajɔ nlai suurui dulum ŋau

⁷ Si ajɔ mɛɛwai cukpa mɛɛjesiau aa tɔtɔɔ njɛ i tɔɔ amu Aɔ̃ Lafɛ̃ɛ ŋai. Aa dĩ anu ŋai, nɔ i maà ce icɛ kãma ajɔ nŋu bɛ ŋa.

⁸ I cea amu Aɔ̃ Lafɛ̃ɛ kuwee iyi à ya jo si ina fei sãa sãa iyi inunuɛ á dɔ̃ɔm si do kɛtɛ kombo akã, do angudã kombo akã, do ama angudãi adɔ̃ akã ara mɛɛje, nɔ kãma nŋa ku maà nɛ leebu gɔ.

⁹ Aa ce kuweei mɛɛmu akã feii do kuweei iyafũ iyi à taki do ikpo. Ti kɛtɛ kombou iyafũ kiloo mɛɛsãi, ti angudã kombou mɔ kiloo mɛɛfa,

¹⁰ ti ama angudã ŋau mɔ, akã fei kiloo mɛɛta.

¹¹ Si anyiɛ nɔ i ce kuwee iyi á kpa idei dulum do iwo kombo akã ku ba amu Aɔ̃ Lafɛ̃ɛ n ce nŋɛ suurui dulum du ŋɛ. Aa ce kuwee ŋau bɛ ŋai baai kuwee iyi á kpa idei dulum do kuwee iyi à ya jo si ina fei sãa sãa waati kãma fei do kuweei iyafũ ŋa do amuai vɛ̃ɛ ŋau baasi.

Iyi í jɛ ti jingaui Kusu ŋa

¹² Si ajɔ maatũsiai cukpa mɛɛjesiau, aa tɔtɔɔ i tɔɔ amu Aɔ̃ Lafɛ̃ɛ ŋai nɔ i maà ce icɛ kãma ajɔ nŋu bɛ ŋa. Aa ce jingaui na bɛɛrɛi amu Aɔ̃ Lafɛ̃ɛ ajɔ mɛɛje.

¹³ Ajɔ sinteu aa ceem kuwee iyi à ya jo si ina fei sãa sãa ŋai iyi inunuɛ á dɔ̃ɔm si do kɛtɛ kombo maatɛta, do angudã kombo minji do ama angudãi adɔ̃ akã ara maatɛ̃ɛ, nɔ kãma nŋa ku maà nɛ leebu gɔ.

¹⁴ Aa ce kuweei mɛɛmu akã feii do kuweei iyafũ iyi à taki do ikpo. Ti kɛtɛ maatɛta ŋau, akã fei kiloo mɛɛsãi, angudã kombo minji ŋau mɔ, akã fei kiloo mɛɛfa,

¹⁵ ama angudã maatɛ̃ɛ ŋau mɔ, akã fei kiloo mɛɛta.

¹⁶ Si anyiɛ nɔ i ce kuwee iyi á kpa idei dulum do iwo kombo akã ku ba amu Aɔ̃ Lafɛ̃ɛ n ce nŋɛ suurui dulum du ŋɛ. Aa ce kuwee ŋau bɛ ŋai baai kuwee iyi à ya jo si ina fei sãa sãa waati kãma fei do kuweei iyafũ ŋa do amuai vɛ̃ɛ ŋau baasi.

^17-34 Hai ajɔ minjisiau ku bɔ ajɔ mɛɛjesiau, baai kuwee iyi à ya jo si ina fei sãa sãa ajɔ fei baasi, aa ce kuwee má ŋai do mɛɛmu ŋa iyi a kù nɛ leebu gɔ, do kuweei iyafũ ŋau do amuai vɛ̃ɛ ŋau bɛi ì nɛ dɔ̃ɔnɛi ku ce ŋau. Yaaseɛ si tuubaɛ wee. Si ajɔ minjisiau, kɛtɛ kombo maateejii, do angudã kombo minji, do ama angudãi adɔ̃ akã ara maatɛ̃ɛ, do iwo kombo akã. Si ajɔ mɛɛtasiau mɔ, kɛtɛ kombo maatakã, do angudã kombo minji, do ama angudãi adɔ̃ akã ara maatɛ̃ɛ, do iwo kombo akã má. Si ajɔ mɛɛsiau mɔ, kɛtɛ kombo mɛɛwa, do angudã kombo minji, do ama angudãi adɔ̃ akã ara maatɛ̃ɛ, do iwo kombo akã. Si ajɔ miiusiau mɔ kɛtɛ kombo mɛɛsã, do angudã kombo minji, do ama angudãi adɔ̃ akã ara maatɛ̃ɛ, do iwo kombo akã. Si ajɔ mɛɛfasiau mɔ, kɛtɛ kombo mɛɛjɔ, do angudã kombo minji, do ama angudãi adɔ̃ akã ara maatɛ̃ɛ, do iwo kombo akã. Si ajɔ mɛɛjesiau mɔ, kɛtɛ kombo mɛɛje, do angudã kombo minji, do ama angudãi adɔ̃ akã ara maatɛ̃ɛ, do iwo kombo akã.

³⁵ Si ajɔ mɛɛjɔsiai jingauu, ajɔi kutɔtɔɔi ankãanyiu, i kaa ce icɛ kãma ajɔ nŋu bɛ ŋa.

³⁶ Aa ceem kuwee iyi à ya jo si ina fei sãa sãa ŋai iyi inunuɛ á dɔ̃ɔm si do kɛtɛ kombo akã, do angudã kombo akã, do ama angudãi adɔ̃ akã ara meeje, nɔ kãma nŋa ku maà nɛ leebu gɔ.

³⁷ Aa ce kuweei mɛɛmu akã feii do kuweei iyafũ iyi à taki do ikpo do amuai vɛ̃ɛ si bɛi à nɛ dɔ̃ɔnɛi ku ceɛu.

³⁸ Bɛɛbɛ mɔi aa ce kuwee iyi á kpa idei dulum do iwo kombo akã ku ba amu Aɔ̃ Lafɛ̃ɛ n ce nŋɛ suurui dulum du ŋɛ. Aa ce kuwee ŋau bɛ ŋai baai kuwee iyi à ya jo si ina fei sãa sãa waati kãma fei do kuweei iyafũ ŋa do amuai vɛ̃ɛ ŋau baasi.

³⁹ Kuwee ŋa iyi ì nɛ ku cea amu Aɔ̃ Lafɛ̃ɛ mbɛ si ajɔi jingau nŋɛ ŋa. Aa ce kuwee ŋau bɛ ŋai baai kuwee iyi à ya jo si ina fei sãa sãa waati kãma fei do kuweei iyafũ ŋa do amuai vɛ̃ɛ ŋau do kuweei anu akã iyi aa yɔkɔ i kooa do idɔɔbi nŋɛ walakɔ na i kɔ̃ kuwã gɔ iyi ì ce ŋa baasi.