Kuka 28 - Bibeli do fee

Iyi í jɛ woodai kuwee ŋa Iyi í jɛ ti ajɔ akã fei

¹ Aɔ̃ Lafɛ̃ɛ í sɔ̃ Moizi í ni,

² sɔ̃ inɛi Izirɛli ŋau i ni, amu Aɔ̃ Lafɛ̃ɛ ǹ ni, bii waatiu í to i nam amua ŋau, i ceem kuweei sɔnda ŋa iyi à ya jo si ina iyi inunu nŋa á dɔ̃ɔm siu.

³ Ajɔ akã fei aa ya naa amu Aɔ̃ Lafɛ̃ɛ ama angudãi adɔ̃ akã wai ara minji iyi a kù nɛ leebu gɔ nɔ a jo ŋa fei sãa sãa.

⁴ Ama angudã akãi aa ceò kuwee daakɔ, minjisiau mɔ alɛ.

⁵ Ti daakɔu do ti alɛu fei aa ya cooi do iyafũ kiloo mɛɛta iyi à taki do ikpoi olivi liiti akã do bubu.

⁶ Kuwee iyi à ya jo si ina fei sãa sãa ajɔ feiu bɛ, dimi akãi á jɛ do iyi à cea amu Aɔ̃ Lafɛ̃ɛ si iri kutai Sinaiu. Kuwee iyi aa jo si ina iyi inunuɛ á dɔ̃ɔm sii.

⁷ Angudãi daakɔ iyi aa ceò kuweeu, aa naaò wai do vɛ̃ɛ liiti akã do bubu. Si inɔ ile kumáui aa dikã vɛ̃ɛu.

⁸ Angudã minjisiau alɛi aa ceem do kuwee, aa cooi dee dee bɛi ti daakɔu, do iyafũ do vɛ̃ɛ. Kuwee iyi aa jo si ina iyi inunuɛ á dɔ̃ɔm sii.

Iyi í jɛ ti ajɔi kusĩmi

⁹ Ajɔi kusĩmiu ama angudã minji iyi a kù nɛ leebu iyi à nɛ adɔ̃ akã akãi aa ceaò amu Aɔ̃ Lafɛ̃ɛ kuwee do iyafũ kiloo mɛɛfa ajɔ iyi à taki do ikpo, do amuai vɛ̃ɛ.

¹⁰ Kuwee iyi à ya jo si ina fei sãa sãau ti ajɔi kusĩmi feii, baai kuwee iyi í wɛɛ do ajɔ feiu iyi à ya ce do vɛ̃ɛ ajɔu baasi.

Iyi í jɛ ti ajɔ sintei cukpau

¹¹ Ajɔ sintei cukpa titɔ̃ fei i ya cea amu Aɔ̃ Lafɛ̃ɛ kuwee iyi à ya jo si ina fei sãa sãa do kɛtɛ kombo minji, do angudã kombo akã do ama angudã ŋa iyi à nɛ adɔ̃ akã akã ara mɛɛje iyi kãma nŋa kù nɛ leebu.

¹² Aa ce kuweei mɛɛmu akã feii do kuweei iyafũ iyi à taki do ikpo. Kɛtɛ kombo akã fei iyafũ kiloo mɛɛsãi, angudã kombou mɔ kiloo mɛɛfa,

¹³ ama angudã ŋau mɔ akã fei kiloo mɛɛta. Inunui kuwee ŋau bɛ iyi aa jou á dɔ̃a amu Aɔ̃ Lafɛ̃ɛ sii.

¹⁴ Amuai vɛ̃ɛ iyi aa naò mɔ, kɛtɛ kombo akã fei liiti mɛɛtai, angudã kombo akã mɔ fei liiti minjii, ama angudã ŋau mɔ liiti akã do bubu. Iyi bɛi í jɛ kuwee iyi aa ya ce si ajɔ sintei cukpa titɔ̃ fei si adɔ̃.

¹⁵ Nɔ aa cea amu Aɔ̃ Lafɛ̃ɛ kuwee iyi á kpa idei dulum do iwo kombo akã, baai kuwee iyi à ya jo si ina fei sãa sãa waati kãma feiu do amuai vɛ̃ɛu baasi.

Iyi í jɛ ti jingaui Iku ku kua

¹⁶ Si ajɔ maatɛ̃ɛsiai cukpa sintei adɔ̃, i jɛ jingaui Iku ku kua i naò amu Aɔ̃ Lafɛ̃ɛ bɛɛrɛ ŋa.

¹⁷ Si ajɔ maatũsiai cukpa akãu má, jingaui aa jɛ. Nɔ aa jɛ pɛ̃ɛ hai nɛ levɛ̃ɛi azuma akã.

¹⁸ Ajɔ sintei jingauu aa tɔtɔɔ njɛ i tɔɔ amu Aɔ̃ Lafɛ̃ɛ ŋai, nɔ i maà ce icɛ kãma ajɔ nŋu ŋa.

¹⁹ Nɔ i ceem kuwee iyi à ya jo si ina fei sãa sãa do kɛtɛ kombo minji, do angudã kombo akã do ama angudãi adɔ̃ akã ŋa ara mɛɛje. Mɛɛmu ŋa iyi aa naaò wa fei, mɛɛmu ŋa iyi a kù nɛ leebui aa jɛ.

²⁰ Kuweei mɛɛmu akã fei aa cooi do kuweei iyafũ iyi à taki do ikpo. Kɛtɛ kombo akã fei do iyafũ kiloo mɛɛsãi, ti angudã kombou mɔ kiloo mɛɛfa,

²¹ ti ama angudã mɛɛje ŋau mɔ akã fei kiloo mɛɛta.

²² Nɔ i ce kuwee iyi á kpa idei dulum do iwo kombo akã má ŋa ku ba amu Aɔ̃ Lafɛ̃ɛ n ce nŋɛ suurui dulum du ŋɛ.

²³ Kuwee ŋau bɛ fei, si kuwee iyi à ya jo si ina fei sãa sãa daakɔ feiui aa kɔ̃ɔsi.

²⁴ Aa ya ce kuwee ŋaui daakɔ fei hee ku bɔ ajɔ mɛɛje bɛi sɔnda iyi à jo si ina iyi inunuɛ á dɔ̃a amu Aɔ̃ Lafɛ̃ɛ si, baai kuwee iyi à ya jo si ina fei sãa sãa waati kãma fei do amuai vɛ̃ɛu baasi.

²⁵ Si ajɔ mɛɛjesiau aa nyi i tɔtɔɔ njɛ má ŋai i tɔɔ amu Aɔ̃ Lafɛ̃ɛ ŋa nɔ i maà ce icɛ kãma ajɔ nŋu bɛ ŋa.

Iyi í jɛ ti jingaui Amaajɛ sinte ŋa

²⁶ Ajɔi jingaui Amaajɛ sinte ŋa, waati iyi ì naa amu Aɔ̃ Lafɛ̃ɛ amuai amaajɛ sinte nŋɛ ŋau wa, aa tɔtɔɔ ŋai i tɔɔm ŋa nɔ i maà ce icɛ kãma ajɔ nŋu bɛ ŋa.

²⁷ Nɔ i cea amu Aɔ̃ Lafɛ̃ɛ kuwee iyi à ya jo si ina fei sãa sãa iyi inunuɛ á dɔ̃ɔm siu ŋa do kɛtɛ kombo minji, do angudã kombo akã, do ama angudãi adɔ̃ akã ara mɛɛje.

²⁸ Aa ce kuweei mɛɛmu akã feii do kuweei iyafũ iyi à taki do ikpo. Kɛtɛ kombo akã fei iyafũ kiloo mɛɛsãi, ti angudã kombou mɔ kiloo mɛɛfa,

²⁹ ti ama angudã ŋau mɔ akã fei kiloo mɛɛta.

³⁰ Si anyiɛ nɔ i ce kuwee iyi á kpa idei dulum do iwo kombo akã má ŋa ku ba amu Aɔ̃ Lafɛ̃ɛ n ce nŋɛ suurui dulum du ŋɛ.

³¹ Aa ce kuwee ŋau bɛ ŋai baai kuwee iyi à ya jo si ina fei sãa sãa waati kãma feiu do ti iyafũu baasi. Mɛɛmu ŋa iyi aa ceò kuwee ŋa fei, mɛɛmu ŋa iyi a kù nɛ leebu ŋai aa jɛ, nɔ aa cooi do amuai vɛ̃ɛu.