Kuka 27 - Bibeli do fee

Tubui inaabo ŋa

¹ Mala do Noa do Hogula do Milika do Tirisa, aŋai à jɛ ama inaaboi Selofadi ŋa, nɔ à jɛ inɛi dimii Manasee. Selofadi baa nŋai í jɛ tɔkui Zozɛfu, domi Zozɛfui í jɛ baai Manasee. Manasee mɔi í jɛ baai Makii, Makii mɔi í jɛ baai Galaadi, Galaadi mɔi í jɛ baai Efɛɛ, Efɛɛ mɔi í jɛ baai Selofadi. Inaabo miiu ŋau bɛi à naa

² à leekĩ si wajui Moizi do Eleazaa woo weeu do si wajui inɛ ngboi inɛi Izirɛli ŋa do si wajui zamaa fei tengii anui ile bi kukou, nɔ à ni,

³ baa nwa í ku si gbaau, kù nɔ kù wa si inɔi inɛi anyii Kore ŋa iyi à waa kɔ̀ ide si wajui Aɔ̃ Lafɛ̃ɛ, amma í kui na kurarai nŋu takaɛ, nɔ wee kù nɛ ama inɛmɔkɔ kãma.

⁴ De aa nya irii baai awa si tuubai nyaanzeɛi si na iyi í jɔ̀ kù nɛ ama inɛmɔkɔ baa akã? I na wa ikpɛ̃ iyi á jɛ tu wa bɛi à waa na ifɔi baa nwa ŋa do igbãɛ ŋa.

⁵ Ŋɔi Moizi í kooò ideu bi Aɔ̃ Lafɛ̃ɛ.

⁶ Ŋɔi Aɔ̃ Lafɛ̃ɛ í sɔ̃ Moizi í ni,

⁷ ama inaaboi Selofadi ŋau à nɛ ntɔ. Na nŋu, na ŋa ikpɛ̃ iyi á jɛ ti baa nŋau, ku jɛ tu ŋa.

⁸ Si anyiɛ ide iyi aa sɔ̃ inɛi Izirɛli ŋau wee. Bii inɛ í ku nɔ kù nɛ ama inɛmɔkɔ, amani ŋa iyi í nɛu, i na ama inaaboɛ ŋa.

⁹ Bii í nɔ í jɛ kù nɛ baa ama inaabo mɔi i na ifɔɛ walakɔ igbãɛ ŋa amaniɛ ŋau.

¹⁰ Bii í nɔ í jɛ kù nɛ igbã do ifɔ ŋa mɔi, i na igbãi baaɛ walakɔ ifɔi baaɛ ŋa.

¹¹ Bii í nɔ í jɛ baaɛ kù nɛ ifɔ do igbã ŋa mɔi i na inɛ gɔ iyi nyaanze ku jɛi aŋaò í ce amɛɛ í re ku jɛ tubuɛ ŋa. Inɛi Izirɛli ŋau aa jirima woodau ihɛ̃i dee dee si bɛi amu Aɔ̃ Lafɛ̃ɛ ǹ sɔ̃ Moizi.

Ilaaɔ̃ í cica Zozue ku jɛ nsũi Moizi

¹² Aɔ̃ Lafɛ̃ɛ í sɔ̃ Moizi í ni, gũ antaii iri kutai Abarimu ihɛ̃ i cɔ ilɛ iyi an mua inɛi Izirɛli ŋau.

¹³ Hai ihɛ̃i aa cɔɔ, nɔ awɔ mɔ aa kui bɛi Arɔ̃ɔ igbãɛu,

¹⁴ si na iyi í jɔ̀ i kù jirima woodam ŋa si gbaai Siniu waati iyi zamaau wa kɔ̀ ide. I kù jɔ̀ inɛ ŋa a mà bɛɛrɛm ŋa si gãmɛi inyii Meriba si waati iyi ì wa Kadɛsi ŋa si gbaai Sini.

¹⁵ Ŋɔi Moizi í sɔ̃ Aɔ̃ Lafɛ̃ɛ í ni,

¹⁶ Aɔ̃ Lafɛ̃ɛ, awɔ iyi ì jɔ̀ ilu hunde fei í wɛɛ, jilɛa zamaau inɛ gɔ

¹⁷ iyi á yɔkɔ ku maa gbã ŋa waati kãma fei, ku ba zamaaɛ ku maà ti kù wɛɛ bɛi mɛɛmu gaa iyi kù nɛ woo degbe.

¹⁸ Ŋɔi Aɔ̃ Lafɛ̃ɛ í jɛa Moizi í ni, Zozue amai Nunu í jɛ inɛ gɔ iyi hundem í wa siɛ. Kpoo bi tɛɛ nɔ i lea awɔ si iri.

¹⁹ Gbã i bɔòɛ si wajui Eleazaa woo weeu tengi bii zamaau fei í wa, nɔ i naa wooda ŋa si wajui aŋa fei.

²⁰ Aa naa yiikoɛi ku ba inɛi Izirɛli ŋau a jirimaɛ.

²¹ Nŋu takaɛ á ya bɔ bi Eleazaa woo weeu, nŋui á ya beea ide do urimuu bi tom. Nɔ Zozue do inɛi Izirɛli ŋau fei aa ya jirima ideɛ ŋaui.

²² Ŋɔi Moizi í ce bɛi Aɔ̃ Lafɛ̃ɛ í sɔ̃ɔu. Í gbã Zozue í koo í leekĩɛ bi Eleazaa woo weeu si wajui zamaau fei,

²³ ŋɔi í lea awɔ si iri nɔ í naa wooda ŋa bɛi Aɔ̃ Lafɛ̃ɛ í tako í sɔ̃ɔu.