Kuka 26 - Bibeli do fee

Kuka minjisiai dimii inɛi Izirɛli ŋau

¹ Si anyii ijuukpãu, Aɔ̃ Lafɛ̃ɛ í sɔ̃ Moizi do Eleazaa woo wee amai Arɔ̃ɔu í ni,

² i ka inɛi Izirɛli ŋau fei ŋa si kpasɛ̃ do kpasɛ̃ hai inɛmɔkɔ ŋa iyi à nɛ adɔ̃ kɔnfia hee ku bɔ adɔ̃ kɔnfia do ku lesi fei, inɛ ŋa iyi à to jĩnɛi igũ ŋa ku kɔtɔ fei.

³ Ŋɔi Moizi do Eleazaa woo weeu à ba ŋa ide ku fɔ si lɔɔmai Moabu ŋau kɔkɔi idoi Zuudɛ̃ɛu do wajui Zerikou à ni,

⁴ Aɔ̃ Lafɛ̃ɛ í na wooda í ni a ka inɛmɔkɔi Izirɛli ŋa iyi à nɛ adɔ̃ kɔnfia hee ku bɔ adɔ̃ kɔnfia do ku lesiu fei bɛi í tako í sɔ̃ Moizi wo nŋu do inɛi Izirɛli ŋa iyi à fita wa hai ilɛi Ezibitiu.

⁵ Sinte titã à ka inɛmɔkɔ si dimii Rubɛ̃ɛ, ama yemmai Zakɔbu nŋu iyi à ya kpe Izirɛli. Dimiɛui í nɛ nyaanze ikã ikã iyi í fita hai si amaɛ ŋa. Hai bi Enɔku, hai bɛi nyaanzei Enɔku í fita, hai bi Palu, hai bɛi nyaanzei Palu í fita,

⁶ hai bi Esirɔ̃ɔ, hai bɛi nyaanzei Esirɔ̃ɔ mɔ í fita, hai bi Kaami, hai bɛi nyaanzei Kaami mɔ í fita.

⁷ Nyaanzei inɛi Rubɛ̃ɛ ŋau mbɛ. Jiai inɛ ŋa iyi à ka, í dedei inɛmɔkɔ dubu ciiji do mɛɛta do cĩɔ mɛɛje do kuntaa (43.730).

⁸ Paluu í nɛ ama gɔ iyi à ya kpe Eliabu.

⁹ Irii amai Eliabu ŋau mɔ wee. Nemuɛli, Datãa do Abiramu. Datãau do Abiramui à kpe si kutɔtɔɔu, nɔ aŋai à dedeò ide ku kɔ̀ si wajui Moizi do Arɔ̃ɔ, aŋai à jɛ inɛi anyii Kore ŋa si waati iyi à waa kɔ̀ ide si wajui Aɔ̃ Lafɛ̃ɛu.

¹⁰ Aŋai ilɛ í la í mi do Kore ajɔu. Ajɔ nŋu bɛi inɛ ŋa iyi à jɛ inɛi anyiɛ ŋau fei à kuu, nɔ ajɔ nŋu bɛ mɔi ina í jo amanɛ cĩɔ minji do ciitaa iyi ihɔ̃ ŋau. Inɛ nŋu bɛi á maa ye inɛ ŋa iyi à gbe ŋau mɔ gigi.

¹¹ Amma amai Kore ŋa a kù ku si waati nŋu.

¹² Nyaanzei dimii Simeɔ̃ ŋa mɔ wee. Hai bi Nemuɛli, hai bɛi nyaanzei Nemuɛli í fita, hai bi Yamɛɛ, hai bɛi nyaanzei Yamɛɛ mɔ í fita, hai bi Yakɛ̃ɛ mɔi nyaanzei Yakɛ̃ɛ í fita,

¹³ hai bi Zera mɔi nyaanzei Zera mɔ í fita, hai bi Saulu hai bɛi nyaanzei Saulu mɔ í fita.

¹⁴ Nyaanzei amai Simeɔ̃ ŋau mbɛ. Jiai inɛ ŋa iyi à ka, í dedei inɛmɔkɔ dubu kɔnfia do minji do cĩɔ minji (22.200).

¹⁵ Nyaanzei dimii Gadi ŋa mɔ wee. Hai bi Sefɔ̃ɔ, hai bɛi nyaanzei Sefɔ̃ɔ í fita, hai bi Hagi, hai bɛi nyaanzei Hagi í fita, hai bi Suni mɔ, hai bɛi nyaanzei Suni í fita,

¹⁶ hai bi Ozuni mɔ, hai bɛi nyaanzei Ozuni í fita, hai bi Eri, hai bɛi nyaanzei Eri mɔ í fita,

¹⁷ hai bi Arodi, hai bɛi nyaanzei Arodi mɔ í fita, hai bi Arelii nyaanzei Areli mɔ í fita.

¹⁸ Nyaanzei amai Gadi ŋau mbɛ. Jiai inɛ ŋa iyi à ka, í dedei inɛmɔkɔ dubu ciiji do cĩɔ miiu (40.500).

^19-21 Nyaanzei dimii Zudaa ŋa mɔ wee. Hai bi Selai nyaanzei Sela í fita, hai bi Perɛsii nyaanzei Perɛsi mɔ í fita, hai bi Zera mɔi nyaanzei Zera í fita. Si nyaanzei Perɛsii inɛi Hɛsirɔ̃ɔ ŋa iyi à jɛ tɔkui Hɛsirɔ̃ɔ ŋau à wa, do inɛi Hamulu ŋa iyi à jɛ tɔkui Hamulu ŋa. Zudaa í nɛ ama minji gɔ ŋa iyi à ya kpe Ɛɛ do Onaa, inɛ nŋu ŋau à ku ilɛi Kanaã.

²² Nyaanzei amai Zudaa ŋau mbɛ. Jiai inɛ ŋa iyi à ka, í dedei inɛmɔkɔ dubu kitaò fɛɛwa do mɛɛfa do cĩɔ miiu (76.500).

²³ Nyaanzei dimii Isakaa ŋa mɔ wee. Hai bi Tolai nyaanzei Tola í fita, hai bi Puva mɔi nyaanzei Puva mɔ í fita,

²⁴ hai bi Yasubu mɔi nyaanzei Yasubu í fita, hai bi Simirɔ̃ɔ mɔi nyaanzei Simirɔ̃ɔ í fita.

²⁵ Nyaanzei amai Isakaa ŋau mbɛ. Jiai inɛ ŋa iyi à ka, í dedei inɛmɔkɔ dubu kita do mɛɛ do cĩɔ mɛɛta (64.300).

²⁶ Nyaanzei dimii Zabulɔ̃ɔ ŋa mɔ wee. Hai bi Serɛdii nyaanzei Serɛdi í fita, hai bi Elɔ̃ɔ mɔi nyaanzei Elɔ̃ɔ mɔ í fita, hai bi Yaleɛli mɔi nyaanzei Yaleɛli mɔ í fita.

²⁷ Nyaanzei amai Zabulɔ̃ɔ ŋau mbɛ. Jiai inɛ ŋa iyi à ka, í dedei inɛmɔkɔ dubu kita do cĩɔ miiu (60.500).

²⁸ Si dimii Manasee do ti Efaraimui tɔkui Zozɛfu ŋa à wa.

²⁹ Nyaanzei dimii Manasee ŋa wee. Hai bi Makiii nyaanzei Makii í fita, hai bi Galaadi amai Makii mɔ nyaanzei Galaadi í fita.

³⁰ Nyaanzei Galaadi ŋa mɔ wee. Hai bi Yezɛɛi nyaanzei Yezɛɛ í fita, hai bi Elɛki mɔi nyaanzei Elɛki í fita,

³¹ hai bi Asiriɛlii nyaanzei Asiriɛli mɔ í fita, hai bi Sikɛmu mɔi nyaanzei Sikɛmu í fita,

³² hai bi Semida mɔi nyaanzei Semida í fita, hai bi Efɛɛ mɔi nyaanzei Efɛɛ í fita.

³³ Selofadi amai Efɛɛ kù nɛ ama inɛmɔkɔ ŋa, amma í nɛ ama inaabo ŋa. Iri nŋa wee. Mala do Noa do Hogula do Milika do Tirisa.

³⁴ Nyaanzei amai Manasee ŋau mbɛ. Jiai inɛ ŋa iyi à ka, í dedei inɛmɔkɔ dubu ciitaa do minji do cĩɔ mɛɛje (52.700).

³⁵ Nyaanzei dimii Efaraimu ŋa mɔ wee. Hai bi Sutelai nyaanzei Sutela í fita, hai bi Bekɛɛ mɔi nyaanzei Bekɛɛ í fita, hai bi Tahani mɔi nyaanzei Tahani í fita.

³⁶ Amai Sutela ŋau wee. Hai bi Eranii nyaanzei Erani í fita.

³⁷ Nyaanzei amai Efaraimu ŋau mbɛ. Jiai inɛ ŋa iyi à ka, í dedei inɛmɔkɔ dubu kuntaa do minji do cĩɔ miiu (32.500). Dimi minji ŋau ihɛ̃, tɔkui Zozɛfu ŋai.

³⁸ Nyaanzei dimii Bɛnzamɛɛ ŋa mɔ wee. Hai bi Belai nyaanzei Bela í fita, hai bi Asibɛli mɔi nyaanzei Asibɛli í fita, hai bi Asiramu mɔi nyaanzei Asiramu í fita,

³⁹ hai bi Sufamu hai bɛi nyaanzei Sufamu ŋau í fita. Nyaanzei Hufamu ŋa mɔ, hai bi Hufamui à fita wa.

⁴⁰ Amai Bela ŋau wee. Aadu do Naamaa. Hai bi Aadui nyaanzei Aadu í fita, hai bi Naamaa mɔi nyaanzei Naamaa í fita.

⁴¹ Nyaanzei amai Bɛnzamɛɛ ŋau mbɛ. Jiai inɛ ŋa iyi à ka, í dedei inɛmɔkɔ dubu ciiji do miiu do cĩɔ mɛɛfa (45.600).

⁴² Nyaanzei dimii Dãa ŋa mɔ wee. Hai bi Susamui nyaanzei Susamu í fita. Nyaanze ŋa iyi à jɛ ti Dãa mbɛ.

⁴³ Jiai aŋa mɔ í dedei dubu kita do mɛɛ do cĩɔ mɛɛ (64.400).

⁴⁴ Nyaanzei dimii Azɛɛ ŋa mɔ wee. Hai bi Yimai nyaanzei Yima í fita, nyaanzei Yisevi mɔ, hai bi Yisevii í fita, hai bi Beriai nyaanzei Beria mɔ í fita.

⁴⁵ Nyaanzei Beriai í tɔtɔɔ inɛ ŋa iyi à fita hai si nyaanzei Ebɛɛ do inɛ ŋa iyi à fita wa hai si nyaanzei Malikiɛli.

⁴⁶ Azɛɛ í nɛ ama inaabo gɔ bɛ iyi à ya kpe Sera.

⁴⁷ Nyaanzei amai Azɛɛ ŋau mɔ mbɛ. Jiai inɛ ŋa iyi à ka, í dedei inɛmɔkɔ dubu ciitaa do mɛɛta do cĩɔ mɛɛ (53.400).

⁴⁸ Nyaanzei dimii Nɛfitali ŋau mɔ wee. Hai bi Yaseɛlii nyaanzei Yaseɛli í fita, hai bi Guni mɔi nyaanzei Guni í fita,

⁴⁹ hai bi Yesɛɛ mɔi nyaanzei Yesɛɛ í fita, hai bi Silɛmu mɔi nyaanzei Silɛmu í fita.

⁵⁰ Iyi í jɛ nyaanzei amai Nɛfitali ŋau mɔ mbɛ. Jiai inɛ ŋa iyi à ka, í dedei inɛmɔkɔ dubu ciiji do miiu do cĩɔ mɛɛ (45.400).

⁵¹ Kukpɔi inɛi Izirɛli ŋau í koo í dedei fei sãa sãa inɛmɔkɔ dubu cĩɔ mɛɛfa do akã do cĩɔ mɛɛje do kuntaa (601.730).

Yaasei ilɛu ku kpɛ̃

⁵² Aɔ̃ Lafɛ̃ɛ í sɔ̃ Moizi í ni,

⁵³ aa kpɛ̃ ilɛui ku jɛ tubu nŋa si zaka bɛi kukpɔ nŋa ŋa í mungau.

⁵⁴ Inɛ ŋa iyi à kpɔ, aa na ŋa ilɛu ku lai, inɛ ŋa iyi a kù kpɔ mɔ, nɔ i na ŋa keeke. Aa na inɛ fei titɛɛi si yaase bɛi à ce kukau.

⁵⁵ Amma do nŋu fei si ikpɛ̃i ilɛu ku ce, kpasai aa ta. Aa ba ilɛu ku jɛ tu ŋai si bɛi kukpɔi inɛi dimii baa nŋa ŋau í to.

⁵⁶ Kpasai aa ta a kpɛ̃ò ilɛu, nɔ inɛ ŋa iyi à kpɔ a ba zaka bɛi akpɔ nŋa í to, inɛ ŋa mɔ iyi a kù kpɔ a ba keeke.

Kuka minjisiai dimii Levii ŋa

⁵⁷ Inɛi Levii ŋa iyi à ka do nyaanzei nŋa ŋau wee. Nyaanzei Gɛɛsɔ̃ɔ ŋa iyi à waa jɛ tɔkui Gɛɛsɔ̃ɔ ŋau, do nyaanzei Kehati ŋa iyi à waa jɛ tɔkui Kehati ŋau, do nyaanzei Merari ŋa iyi à waa jɛ tɔkui Merari ŋau.

⁵⁸ Nyaanzei Levii ŋa wee. Nyaanzei Libuni do nyaanzei Eborɔ̃ɔ do nyaanzei Masili do nyaanzei Musi do nyaanzei Kore. Kehatii í bí Amuramu.

⁵⁹ Irii aboi Amuramui í jɛ Yokebɛdi, ama inaaboi Leviii iyi à bíaa ilɛi Ezibiti. Ama mɛɛtai abou í bía Amuramu. Irii amu ŋau wee. Arɔ̃ɔ do Moizi do Mariama wecĩ nŋa.

⁶⁰ Arɔ̃ɔ mɔ takaɛ ama inɛmɔkɔ mɛɛi í bí, iri nŋa wee. Nadabu do Abihu do Eleazaa do Itamaa.

⁶¹ Amma Nadabu do Abihu à ku waati iyi à so ina mmuɛ gɔ à kooò si wajui Aɔ̃ Lafɛ̃ɛ.

⁶² Jiai inɛ ngbo ŋa do ama inɛmɔkɔ ŋa iyi à to cukpa akã hee do ku lesi fei, í dedei dubu kɔnfia do mɛɛta (23.000). A kù ka ŋa si inɔi inɛi Izirɛli iyi ihɔ̃ ŋau si na iyi í jɔ̀ a kù nɛ baa nŋa si ilɛu ku kpɛ̃ɛ.

Iri ku kpai kukau

⁶³ Inɛ ŋa iyi Moizi do Eleazaa woo weeu à ka ŋau mbɛ si lɔɔmai Moabu kɔkɔi idoi Zuudɛ̃ɛ do wajui ilui Zerikou.

⁶⁴ Si inɔi inɛi Izirɛli ŋau, inɛ ŋa iyi Moizi do Arɔ̃ɔ woo weeu à ka si gbaai Sinaiu baa akã nŋa kù wa bɛ má,

⁶⁵ domi Aɔ̃ Lafɛ̃ɛ í ni aŋa fei aa kui si gbaau, í gbe Kalɛbu amai Yɛfune do Zozue amai Nunu.