Kuka 25 - Bibeli do fee

Inɛi Izirɛli ŋau à lɔsi iwɛ̃ ku tɔɔ

¹ Inɛi Izirɛli ŋau à wa Sitimu bɛ, nɔ à na à lɔsi sɛ̃ɛ ku tɔtɔɔ do inaaboi Moabu ŋau.

² Inaabo ŋaui à ya kpe inɛi Izirɛli ŋa tengi bii à waa cea iwɛ̃ nŋa ŋau kuwee ŋa, ŋɔi aŋa mɔ à ya koo, nɔ à ya jɛ ijɛi kuwee ŋau nɔ à gulɛa iwɛ̃ ŋau.

³ Inɛi Izirɛli ŋau à so ara nŋa à daa Baali-Peɔɔ si awɔ, ŋɔi idɔɔkɔ̃i Aɔ̃ Lafɛ̃ɛ í dede si ŋa.

⁴ Ŋɔi Aɔ̃ Lafɛ̃ɛ í sɔ̃ Moizi í ni, mu inɛ ŋa iyi à ya gbã inɛi Izirɛli ŋa a maa bɔò ŋa si iwɛ̃ ŋa ku tɔɔu fei, i jɔ̀ a kpa ŋa, si wajum do ijui inunu, ku ba idɔɔkɔ̃m nɔu ku kita hai si inɛi Izirɛli ŋa.

⁵ Ŋɔi Moizi í sɔ̃ inɛ ngboi Izirɛli ŋau í ni, inɛ fei ku kpa inɛi nyaanzeɛ ŋa iyi à lɔsi Baali-Peɔɔ ku tɔɔu.

⁶ Wee waati bɛɛbɛ inɛi Izirɛli gɔ í to wa bɛ gbakã do inaaboi Madiãa gɔ ku nyisi inɛɛ ŋa. Si bɛi Moizi do inɛi Izirɛli ŋa iyi à gbe ŋau fei à tɔtɔɔ anui ile bi kukou à waa kpata, ŋɔi à yɔɔ.

⁷ Si bɛi à yɔɔ, ŋɔi Fineɛzi woo weeu, amai Eleazaa, nŋu iyi wa jɛ tɔkui Arɔ̃ɔ woo weeu í dede hai tengi bii à tɔtɔɔu, nɔ í so kaka.

⁸ Ŋɔi í too inɛi Izirɛliu hee inɔ ilei acɔɛu, nɔ í kpa aŋa minji fei, inɛmɔkɔi Izirɛli do inaabou. Í gũ ŋai si inɔ. Ŋɔi ijuukpã iyi í naa si inɛi Izirɛli ŋau í bɛi í leekĩ.

⁹ Amanɛ dubu kɔnfia do mɛɛi (24.000) í ku si ijuukpãu waati bɛɛbɛ.

¹⁰ Aɔ̃ Lafɛ̃ɛ í sɔ̃ Moizi í ni,

¹¹ Fineɛzi woo weeu, amai Eleazaa, tɔkui Arɔ̃ɔ woo weeu, í sinda idɔɔkɔ̃m hai si inɛi Izirɛli ŋau domi mii iyi ǹ nɛ n ce nŋa wo í coo si agbɛm. Ŋɔi í jɔ̀ si idɔɔkɔ̃m nɔu n kù kpa inɛi Izirɛli ŋau fei má.

¹² Na nŋu, sɔ̃ɔ i ni awaò ŋa aa ka dĩ akabuui laakai ku sũi.

¹³ Akabuuu á maa wɛɛi na irii nŋu do tɔkuɛ ŋa, nɔ nŋui á ce ŋa woo wee ŋa hee do ajɔ fei, si na iyi í jɔ̀ í dasi himma na amu Ilaaɔ̃ Lafɛ̃ɛɛ, ŋɔi í jɔ̀ ǹ cea inɛi Izirɛli ŋau suuru.

¹⁴ Inɛi Izirɛli iyi à kpa do inaaboi Madiãa ajɔu, Zimirii à ya kpoo, amai Salui, inɛ akãi inɛ ngboi dimii Simeɔ̃ ŋai wa jɛ.

¹⁵ Inaaboi Madiãa iyi à kpau mɔi à ya kpe Kɔzubi. Baaɛ mɔi à ya kpe Suu iyi í tako í jɛ inɛ ngboi nyaanzei inɛi Madiãa ŋa.

¹⁶ Ŋɔi Aɔ̃ Lafɛ̃ɛ í sɔ̃ Moizi í ni,

¹⁷ i ce inɛi Madiãa ŋau mbɛɛ nŋɛ ŋa nɔ i kpa ŋa ŋa,

^18-19 domi à nyisi iyi aŋa à jɛ mbɛɛ nŋɛ ŋa do yaase bɛi à zamba ŋɛ do bisi nŋa si idei Peɔɔ do si idei Kɔzubi ama inaaboi inɛ akãi inɛ ngboi inɛi Madiãa ŋa iyi à kpa si ajɔi ijuukpãi Peɔɔu.