Kuka 23 - Bibeli do fee

¹ Ŋɔi Balamu í sɔ̃ Balaki í ni ku maa nŋu bi kuwee ikɔ mɛɛje tengi bɛ, nɔ ku dɛa nŋu kɛtɛ kombo mɛɛje do angudã kombo mɛɛje wa.

² Ŋɔi Balaki í ce bɛi Balamu í sɔ̃ɔu, nɔ aŋaò fei à ce kuwee do kɛtɛ kombo ŋau do angudã kombo ŋau akã akã si bi kuwee ŋau fei.

³ Nɔ Balamu í sɔ̃ Balaki í ni, leekĩ kɔkɔi bi kuweeɛ ŋau, amu an tɛkɛɛ keeke, á yɔkɔ ku jɛ Aɔ̃ Lafɛ̃ɛ á naa sim, nɔ n na n sɔ̃ɛ bɛi í sɔ̃m. Ŋɔi í koo í gũ geete hai nɛ fɔfɔ gɔ.

⁴ Ŋɔi Aɔ̃ Lafɛ̃ɛ í naa si Balamu, nɔ Balamu í sɔ̃ɔ í ni, ǹ jɔ̀ à ma bi kuwee mɛɛje nɔ ǹ kpa si kɛtɛ kombo do angudã kombo si fei ndɛɛ akã akã, ǹ jo ŋa si ina fei sãa sãa.

⁵ Ŋɔi Aɔ̃ Lafɛ̃ɛ í sɔ̃ Balamu ide iyi á koo fɔ, nɔ í ni ku sinda ku nyi bi Balaki koo fɔ bɛɛbɛ.

⁶ Ŋɔi Balamu í sinda í nyi bii Balaki wa leekĩ kɔkɔi bi kuweeɛ ŋau nŋu do amanlui inɛi Moabu ŋau fei.

⁷ Ŋɔi Balamu í wasi ideɛ ŋa ku fɔ wa ni, Balaki í jɔ̀ ǹ naa hai Aramu. Ilaalui Moabu í jɔ̀ ǹ kita wa hai iri kutai nunui daakɔ ŋau, í ni n naa n ceekpe tɔkui Zakɔbu ŋa, í ni n jɔ̀ idɔm ku kɔ̃ si inɛi Izirɛli ŋa.

⁸ Amma bɛirei an ce n ceekpe inɛ ŋa iyi Ilaaɔ̃ kù ceekpe, nɔ bɛirei an ce n jɔ̀ idɔm ku kɔ̃ bii idɔi Aɔ̃ Lafɛ̃ɛ kù kɔ̃ si ŋa.

⁹ Ǹ wa n cɔ inɛ ŋau hai iri kutau ihɛ̃, ǹ wa n yɛ inɛ ŋau hai geeteu ihɛ̃, inɛ ŋau à nɛ bi kuwa nŋai ikã nɔ a kù jɛ akã do inɛi ilɛi ihɛ̃ ŋa.

¹⁰ Yooi á yɔkɔ ku ka akpɔi inɛi Zakɔbu ŋau ihɛ̃, yooi á yɔkɔ ku mà jiai inɛi Izirɛli ŋau ihɛ̃. Amu mɔ ǹ wa n tɔɔ n ba n ku mɔm nii bɛi inɛ dee dee ŋau bɛ, nɔ n nɛ baam si mii iyi á ba ŋa fei.

¹¹ Ŋɔi Balaki í bee Balamu í ni, ee, bɛirei ì waa ceem bɛ ya. Ǹ koo ǹ gbãɛ wa ihɛ̃i i naa i ceekpeem mbɛɛm ŋa, nɔ wee ì wasi ku wee nŋai.

¹² Amma Balamu í jɛaa í ni, kù jɛ ide ŋa iyi Aɔ̃ Lafɛ̃ɛ í daam si gɛlɛi ǹ nɛ ku fɔ?

Balamu í weea inɛi Izirɛli ŋa isɛ gbeejisia

¹³ Ŋɔi Balaki í nyi í ni má, toom wa ka bɔ inya mmu, hai bii aa yɛ inɛi Izirɛli ŋau ku ce ncɛɛ. Fiti bubu nŋa dei aa ba i yɛ, domi i kaa ba i yɛ aŋa fei mam mam. Hai bɛ nɔ i ceekpeem inɛ ŋau.

¹⁴ Ŋɔi í gbãa í bɔòɛ ikoi Sofimu hee si antaii iri kutai Pisigaau, nɔ í ma bi kuwee tengi bɛ má ikɔ mɛɛje, nɔ si bi kuwee ŋau fei í kpa si fei ndɛɛ kɛtɛ kombo akã akã do angudã kombo akã akã, í jo ŋa si ina fei sãa sãa.

¹⁵ Si anyiɛ nɔ Balamu í nyi í sɔ̃ Balaki má í ni, leekĩ ihɛ̃ kɔkɔi bi kuweeɛ ŋau, an bɔ ihɔ̃ n koo n gbɔ bɛi Aɔ̃ Lafɛ̃ɛ á sɔ̃m wa.

¹⁶ Ŋɔi Aɔ̃ Lafɛ̃ɛ í naa si Balamu, nɔ í sɔ̃ɔ ide iyi á koo fɔ, si anyiɛ nɔ í ni ku sinda ku nyi bi Balaki.

¹⁷ Nɔ Balamu í sinda í nyi í koo í ba Balaki wa leekĩ kɔkɔi bi kuweeɛ ŋau nŋu do amanlui Moabu ŋau. Ŋɔi Balaki í beeɛ í ni, bɛirei Aɔ̃ Lafɛ̃ɛ í sɔ̃ɛ wa.

¹⁸ Nɔ í jɛa í ni, dede i gbɔ Balaki, sotĩ i gbɔ idem amai Sipɔɔ.

¹⁹ Ilaaɔ̃ kù jɛ amanɛ hee ku sɔ ibo, nɔ kù jɛ amanɛ hee ku kpaasi lasabuɛ. Ide iyi í fɔ, ci ya cooi? Kuwã iyi í ce, ci ya kɔ̃ɔi?

²⁰ Amu ǹ wa n weea inɛ ŋaui si na iyi í jɔ̀ bɛɛbɛi Aɔ̃ Lafɛ̃ɛ í ni n ce. Aɔ̃ Lafɛ̃ɛ takaɛ í wee nŋa tã, debɛi n kù nɛ n kpaasiɛ má pai.

²¹ Aɔ̃ Lafɛ̃ɛ kù yɛ si inɛi Izirɛli ŋau laalɔ gɔ, nɔ kù yɛ si ŋa dee dee hai jɛ gɔ. Aɔ̃ Lafɛ̃ɛ nŋa í wɛɛ do aŋa, nŋui í jɛ ilaalu nŋa, nɔ à ya maa dakpɛi do inɔ didɔ̃i na iriɛ.

²² Nŋui í nya ŋa wa hai ilɛi Ezibiti do gbugbã nlaɛ iyi kaa tale bɛi gbugbãi ifã.

²³ Dobu dobu do alisi ŋa ku ce kù wɛɛ bi inɛi Izirɛli ŋa. Ilaaɔ̃ í ya jɔ̀ inɛi Izirɛli ŋa a mà mii iyi nŋu á cei si waati iyi í bi.

²⁴ Inɛ ŋau à ya dedei bɛi muusu nla abo, nɔ à ya dede a leekĩi bɛi muusu nla akɔ iyi ci ya sũ í gbe bii í ba sɔndaɛ í kpa nɔ í mɔmɔɔ njɛɛu.

²⁵ Ŋɔi Balaki í sɔ̃ Balamu í ni, to. Baa bii í jɛ i kù bi ku ceekpe ŋa, maà ti i maa wee nŋa má.

²⁶ Nɔ nŋu mɔ í jɛa Balaki í ni, i jɔ̀ ǹ nɔ ǹ sɔ̃ɛ tã ǹ ni bɛi Aɔ̃ Lafɛ̃ɛ í sɔ̃m fei bɛɛbɛi an fɔ mɛɛ.

Balamu í weea inɛi Izirɛli ŋa isɛ gbɛɛtasia

²⁷ Ŋɔi Balaki í nyi í sɔ̃ɔ má í ni, naa wa ka koo n koo n nyisiɛ inya mmu má, á yɔkɔ ku jɛ hai bɛ bɛi Ilaaɔ̃ á yɔɔ iyi á sĩa i ceekpeem inɛ ŋau.

²⁸ Ŋɔi í gbã Balamu í bɔòɛ si iri kutai Peɔɔ hai bii inɛ á ba ku maa yɛ gbaau dee dee.

²⁹ Nɔ Balamu í sɔ̃ɔ í ni, maam bi kuwee ikɔ mɛɛje tengi ihɛ̃, nɔ i dɛɛm kɛtɛ kombo mɛɛje wa do angudã kombo mɛɛje.

³⁰ Balaki í ce bɛi í sɔ̃ɔu, nɔ í ce kuwee do kɛtɛ kombo ŋau do angudã kombo ŋau si bi kuwee ŋau fei akã akã.